Z wudaća: wutora, 12 junija 2018

Ze swojej „čumpatej kačku“ a w do­mjacych črijach běše dwulětny pachoł w bayerskim Marktoberdorfje na zwjazkowej dróze po puću. Pozdźišo so wustaji, zo je wón wowce twochnył a so bjez cila na puć nastajił. Kaž rěčnica policije pozdźišo měnješe, drje chcyše sej hólčk jenož raz wulećeć. Napadnył bě wón busowemu šoferej, kiž jeho na to na poli­ciju dowjeze.

Dwě tiće ze 36 000 eurami namakachu w spowědnym stole cyrkwje w Romje blisko Vatikana, jako ju rjedźachu. Farar Giovanni Martire Savina, kiž tiće wočini, bě wustróžany a so boješe, zo je w nimaj snano rozbuchlina. Njeje hišće jasne, hač jedna so wo anonymny dar abo wo skutk hrěšnika z hubjenym swědomjom. Po słowach duchowneho su drje hižo časćišo pjenjezy namakali, ale hišće ženje tajke wulke mnóstwo.

Wusud wot lěta 1990 knježaceje SPD njeje braniborskemu premierej Dietmarej Woidce lěto do wólbow krajneho sejma wšojedne. Tuž je wón přichod Łužicy z trěbnym strukturnym wuwićom za šefowu naležnosć wozjewił. Wšako je tež jeho strona při lońšich wólbach zwjazkoweho sejma w Delnjej Łužicy mnohe hłosy na AfD zhubiła. Ze społnomócnjenym za Łužicu změja w Delnjej Łužicy posrědko­warja, kiž prócowanja najwšelakorišich zajimowych skupin zwjedźe a spyta, zanjechanu dowěru ludnosće knježerstwu napřećo wróćo zdobyć. Wězo budźe to wulke wužadanje, wšako je braniborska SPD předołho hłownje zajimy brunicy zakitowała. Sydło noweho społnomócnjeneho je w Choćebuzu, štož je prawe znamjo. Wón znaje ze swojeho prjedawšeho skutkowanja jako prezident tamnišeho wyšeho hórniskeho zarjada tež mnohich akterow. Tež to móže lěpšina być w prócowanju wo dalši dialog. Axel Arlt

Budyšin (CS/SN). Regionalne hospodarstwo cyle blisko dožiwić móžachu Budyšenjo na nowym zarjadowanju z mjenom „pózdnja změna“. Tak je minjeny pjatk zajimcam na pózdnim popołdnju 24 ­předewzaćow swoje wrota wotewrěło. Cyłkownje tři móžachu sej wobdźělnicy na jednej turje wobhladać.

Zarjadowanje, organizowane wot Budyskeho měšćanskeho zarjadnistwa, žněješe jara wulki wothłós. Kaž jednaćelka Budyskeho wokrjesneho rjemjeslnistwa Sabine Gotscha-Schock zdźěli, bě so za turu k Budyskemu stejnišću Bombardier, k předewzaću za transportnu a składowansku techniku AFT a k pišćeletwarcej Eule samo 100 ludźi přizjewiło, tak zo zarjadowachu tam skónčnje dwě turje.

Rom (dpa/SN). Wuchowanska łódź „Aquarius“ hotuje so na wjace dnjow trajacu jězbu z přiwzatymi migrantami do Španiskeje. Po planach zamołwitych matej dwě italskej łódźi ćěkancow přewzać a zhromadnje z wuchowanskej łódźu do Valencije jěć, zdźěla pomocna organiza­cija Lěkarjo bjez mjezow. „Aquarius“ je prawidłownje w južnym Srjedźnym morju po puću, zo by ćěkancow z njekmanych čołmow wuchowała a do italskich přistawow dowjezła. Nowe italske knježerstwo pak je to zakazało. Organizacija kritizuje, zo dyrbja wučerpani ćěkancy nětko dalše štyri dny na morju wutrać. Ze 629 wuchowanymi ludźimi je „Aquarius“ přećežena. Nimo toho so wjedro pohubjeńša.

Wobkedźbowarjo maja zadźerženje italskeho knježerstwa a předewšěm noweho, přećiwo wukrajnikam nastajeneho, nutřkowneho ministra Matteja Salvinija za demonstraciju mocy. Italska čuje so hižo dlěje wot swojich europskich partnerow při zmištrowanju krizy ćěkancow dla wopušćena. Salvini pisaše tuž na Twitteru: „Italska so hižo dlěje njepodwola. Nětko je tu něchtó, kiž ně praji.“

Na trochu hinaše wašnje je sej horstka zajimcow minjenu sobotu na dźeń wotewrjenych duri w Domje Měrćina Nowaka w Njechornju dóšła. Na přeprošenje Budyskeje župy nóžkowachu woni wot rowa Njechorńskeho tule w Hrodźišću hač do Njechornja, hdźež po tym tež dalšich zajimcow witachu. Foto: SN/Maćij Bulank

W Njezdašecach w Hodźijskej gmejnje je plahowarka pstruhow nimale swój dospołny wobstatk rybow zhubiła. Přičina je nje­znata maćizna, kotraž bě so tam do wody dóstała.

Njezdašecy (SN/MWj). Štož dyrbješe wobsedźerka plahowanskeje připrawy za pstruhi w Njezdašecach minjeny pjatk wječor wuhladać, je jej najskerje dych wotrazyło. W bazenkach při Čornicy, w kotrychž ryby hewak wjesele zaskakuja, płuwachu wone mortwe na powjerchu wody. Přičina pak njeběchu lětnje temperatury. Po wšěm zdaću bě něchtó dale horjeka nje­znatu maćiznu do rěčki sypnył abo kidnył, kotraž dósta so pozdźišo do plahowanskich bazenkow, w kotrychž wobstatk rybow nimale dospołnje zniči.

Štyri dróhotwarske projekty chce gmejna Hamor lětsa zwoprawdźić

Hamor (AK/SN). Ze štyrjomi naprawami da Hamorska gmejna lětsa dróhi a kolesowanske šćežki ponowić. Tele projekty rozłoži nawodnica twarskeho wotrjada gmejny Cortina Kokles na wčerawšim posedźenju gmejnskeje rady.

Dohromady chcedźa 350 000 eurow za dróhotwar nałožić. Wutwarić maja so wjesna dróha w Radšowku (Klein Radisch), wotrězk Sprjewineho kolesowanskeho puća při wotbóčce Bjerwałdskeho jězora, dalši wotrězk samsneho kolesowanskeho puća při zwjazkowej dróze B 156 kaž tež dróha z Manjowa do Delnjeho Wujězda. „Wona je wjeski zwjazowacy puć a runočasnje dźěl Sprjewineho kolesowanskeho puća“, Cortina Kokles wuswětli. Radźićeljo jednohłósnje wobzamknychu wšitke štyri naprawy zwoprawdźić. Tohorunja jednohłósnje woni wobzamknychu, wjesny puć w Dyrbachu wutwarić. Nadawk we wobjimje 430 000 eurow přepodachu twarskemu zawodej z Krušwicy. 30 procentow cyłkowneje sumy dyrbi gmejna Hamor ze swójskeje kasy zapłaćić, 70 procentow dóstanje jako spěchowanje za komunalny dróhotwar Swobodneho stata Sakskeje.

Z dwudnjowskim swjedźenjom swjećachu minjeny kónc tydźenja 675. róčnicu prěnjeho pisomneho naspomnjenja Wulkeje Dubrawy a 20lětne wobstaće partnerstwa z pólskej gmejnu Nowogrodziec. Mjeztym zo steješe sobota cyle w znamjenju sportowych wubědźowanjow, bě wjeršk njedźele swjedźenski ćah. W 32 wobrazach předstajichu stawizny wsy, při čimž drje běchu stare traktory sobu najzajimawše. ­Na serbske stawizny Wulkeje Dubrawy pak běchu dospołnje zabyli. Foto: Heinz Noack

Pančicy-Kukow. Při ponowjenju třěchi Šule Ćišinskeho w Pančicach su tež nowu sirenu připrawili. Dyrbja ju lědma hladać, a wona funguje tež bjez miliny, informowaše wjesnjanosta Markus Kreuz (CDU) na zašłym posedźenju gmejnskeje rady. Nimo toho je nowa sirena wótřiša hač dotalna. Gmejna dyrbješe za nju 2 500 eurow připłaćić. Samsny model chcedźa nětko tež w Kukowje a we Wotrowje instalować.

Pućuja po bahnje

Dubrjenk. Na přirodowědnu ekskursiju po Dubrjenskim bahnje podać móža so zajimcy njedźelu, 17. junija, w 10 hodź. Bodo Plesky z Kamjenskeho Muzeja zapadneje Łužicy powjedźe wobdźělnikow po jónkrótnej krajinje, kotraž je najwjetši hišće zdźeržany bahnowy kompleks Hornjeje Łužicy. Wobdźělenje płaći na wosobu pjeć eurow, potuńšene tři eura. Zajimcy njech přizjewja so pod telefonowym čisłom 03578/ 78 830. Při tym jim zdźěla, hdźe so pućowanje započnje. Je radźomne sej dalokowid sobu wzać.

Lětadło nuzowje přizemić dyrbjało

Sulšecy. Jako lećeše ultralochke lětadło minjenu sobotu připołdnju z Kamjenca do Rózborka, jeho motor nadobo wupadny. 62lětny pilot zahaji tuž nuzowe přizemjenje a sadźi mašinu pola Sulšec do žitnišća. Při tym přeprěči wón pólny puć, na čož so kolesa lětadła wotłamachu a pilot so zrani. Wuchowanske jězdźidło dowjeze jeho do chorownje. Skóncowane lětadło su najprjedy raz za dalše přepytowanja sćazali. Kelko škody je při njewšědnej akciji nastało, njeje hišće znate.