Z wudaća: štwórtk, 14 junija 2018

Ryby tema w krajnym sejmje

Drježdźany. Pad wo zahinjenych pstruhach 8. junija w Njezdašecach stanje so nětko z temu w Sakskim krajnym sejmje. Zapósłanča Franziska Schubert (Zwjazk 90/Zeleni) je naprašowanje krajnemu knje­žerstwu zapodała. W prěnim rjedźe dźe jej wo to rozjasnić, kak je k tomu dóšło­. Wotmołwy sakskeho knježerstwa wočakuje wona najpozdźišo 11. julija.

Žně kórkow w Błótach zahajene

Steinreich. Žně zawarjenskich kórkow su dźensa w Błótach oficialnje zahajili, zdźěla Błótowske towarstwo. Wysoke temperatury su dobry róst woblubo­waneje zeleniny přisporjeli, informuje agrarne drustwo Delnje Błóta we wo­krjesu Dubja-Błóta. Tak bu zapozdźeny start sadźenja rostlin niskich tempera­turow w předměsacach dla nachwatany. Domchowane kórki předźěłuja hłownje w městnych konserwowarnjach.

Łódźny wobchad zakazany

Dźensa zahaja so koparske swětowe mišterstwa w Ruskej

Budyšin (SN/at). Přiwisnicy kopańcy su so skónčnje dočakali. Dźensa popoł­dnju zahaja so w Moskwje swětowe mišterstwa 2018. W sławnym stadionje Lužniki wotewrjetaj prezident FIFA Gianni Infantino a ruski prezident Wladimir Putin wulki sportowy podawk.

Do koparskich mišterstwow bě wo­se­bje z Němskeje sylna kritika nastupajo dodźerženje čłowjeskich prawow „w Ruskej Putina“ słyšeć. FDP a Zeleni su na­­ležnosć dźensa tež w parlamenće te­ma­tizo­wali. Politiske podawki kaž wójna na wu­chodnej Ukrainje a wobsadźenje kupy Krim so na sportowy wjeršk wotbłyšćuja. Tohodla běchu Rebecca Harms z frakcije Zelenych/EFA a 60 dalšich zapósłancow Europskeho parlamenta po­litikarjow kontinenta w zjawnym lisće namołwili, swětowe mišterstwa w Ruskej boj­ko­tować. Europski zapósłanc a prezident Sakskeho koparskeho zwjazka Hermann Winkler (CDU) je přećiwo tajkemu po­stu­powanju. „Sport njeje lěk za misnjenu wonkownu politiku“, wón rjekny.

Dźensa zahaja so w Moskwje lětuše kopar­ske swětowe mišterstwa (WM). Euforija w Ruskej je wulka. Tež w Hornjej Łužicy napjatosć přiběra. Smy so tuž mjez Serbami naprašowali, kak napje­ći su a hač chcedźa sej hry zhromadnje jako tak mjenowany public-viewing wobhladać abo skerje sami doma w kruhu swójbnych.

Luiza Winarjec z Radworja: Hry Němskeje a wulkich faworitow sej na kóždy pad wobhladam, ale doma zhromadnje ze swójbnymi abo z přećelemi. Sama žanoho faworita nimam. Popřała bych wězo Němskej, zo titul zakituje, ale sprawnje prajene sej to poprawom njemyslu.

Ławrjenc Bobka z Miłoćic: Dokelž so na polu kopańcy derje wuznawam, so jara­ na swětowe mišterstwa wjeselu. Wobhladam sej hry Němskeje a finalne partije na zjawnej sćěnowinje z wjes­njanami. Moje najlubše mustwo je lětsa Senegal, tež hdyž přewulke šansy na titul nima. Te ma skerje Brazilska, wšako stej nadběh a škit jara derje wobsadźenej. Ale tež Španičanam dobyće přicpěwam.

Budyšin (SN). Za čitarjow wot 14 lět je w Ludowym nakładnistwje Domowina fantastiska kniha „Łójerjo sonow“ Jěwy-Marje Čornakec wušła. W srjedźišću jeje nowotwórby steja sony a žedźby, wočakowanja na přichod a prašenja za zašłosću – temy, kotrež drje dorostowacych ­čitarjow wosebje jimaja. W srjedźišću stejitaj Janik Šajatowić a Nina, wobdźělnikaj seminara, na kotrymž sony wułožuja. Tam pak pytnjetaj, zo ma Master mjenowacy so nawoda wostrózbnjace wotpohlady. Na mjezy mjez žiwjenjom a smjerću, mjez sonom a realitu pytataj wonaj za wotmołwami na swoje prašenja.

Na 8. mjezynarodny festiwal dudakow kónc tydźenja w Slepom su derje přihoto­wani. Tež hudźbnicy a mali rejwarjo tamnišeho Serbskeho folklorneho ansam­bla su minjene dny hišće poslednje přihoty do wulkeho swjatka přewjedli. Wolfgang Kotisek (naprawo) ma dorost ansambla derje na festiwal přihotowany. Za Idu a Gretu­ (wotlěwa) budźe to prěni wulki wustup. Tróšku rozpjeršenej myslitej wonej hižo na wokomik, hdyž budźetej na jewišću stać a před stami přihladowarjow na swo­jich dudach hudźić. Foto: Joachim Rjela

Zo by serbskosć w Budyšinje zjawnje prezentna była, mamy hišće wjele činić, zwěsći wčera wospjet dźěłowy kruh za serb­ske naležnosće měšćanskeje rady­. Ale tež škrička nadźije je mjeztym widźeć.

Budyšin (CK/SN). Wot Budyskeho nalěća ma sprjewine město Naměsto partnerskich městow. W přitomnosći zastupjerjow Wormsa, Heidelberga, pólskeje Je­lenje­je Góry, čěskeho Jabloneca nad Nisou a francoskeho Dreuxa běchu městno pod Starej wodarnju swjatočnje pomjenowali. Při muri su tafle z informacijemi a wobrazami jednotliwych partnerskich městow připrawjene. Za serbskim přełožkom tam podarmo pytaš.

Wiesbaden (dpa/SN). W boju přećiwo hidypołnym komentaram w interneće je policija dźensa w dźesać zwjazkowych krajach, tež w Sakskej, bydlenja přepytała a mjez druhim kompjutery sćazała. ­Akciju koordinował je Zwjazkowy kriminalny zarjad. Cyłkownje 29 wobskorženym wumjetuja, zo su w interneće chło­stajomne komentary rozšěrjeli, mjez druhim z antisemitiskimi hanjenjemi abo našćuwajo ludźi přećiwo w Němskej bydlacym wukrajnikam.

Wotpokazuja kompromis

Skopje (dpa/SN). Tysacy ludźi su wčera w makedonskej stolicy Skopju přećiwo kompromisej z Athenom pomjenowanja swojeho stata dla demonstrowali. Před parlamentom zhromadźeni ludźo wumjetowachu knježerstwu přeradu, kaž medije rozprawjeja. „Mamy jenož jedne mjeno: Makedonsku“, rěkaše jedna z parolow. Tež w druhich kónčinach kraja su protestowali. Ministerski prezident Zoran Zajew a jeho grjekski kolega Alexis Tsipras běštaj so na mjeno „Sewjerna Makedonska“ dojednałoj.

Dalša łódź z ćěkancami čaka

Wjace hač 300 ludźi wobdźěli so wčera w Choćebuzu na sportowym swjedźenju ­seniorow, kotryž je měšćanska seniorska přirada zhromadnje ze sportowym ­zwjazkom wuhotowała. Na trawniku sportoweho centruma běchu organizatorojo 22 stacijow přihotowali, mjez druhim kolesowe ergometry. Foto: Michael Helbig

Berlin (dpa/SN). Wonkowny minister Heiko Maas (SPD) žada sej hladajo na mjezynarodne swojowólnosće prezidenta USA Donalda Trumpa sebjewědomišu wonkownu politiku Europy. „Pod pre­zidentom Trumpom je so Atlantik šěrši stał“, rjekny Maas na zarjadowanju k europskej politice. Lětdźesatki trajace zwjazkarstwa Trump „w takće Twittera“ do prašenja staja. Maas wupraja so tohodla za „nowe wubalansowane partnerstwo“ z USA. „Hdźež so naš partner wróćo sćehnje, dyrbimy swoju wahu zasadźić. Hdźež knježerstwo USA naše hódnoty a zajimy ofensiwnje do prašenja staja, dyrbimy robustnje wustupować“, minister namołwja.

Kuriozna pana z mjerzacym wuskutkom: Dokelž je IHK klawsurne dźěła zhubiła, dyrbi 18 přichodnych běrowowych překupcow w Dortmundźe kónčne pruwowanje wospjetować. Zamołwići nje­móža sej wujasnić, kak bě so to stać móhło. Misnjenje so wukopa, jako wuslědki 2 500 pruwowanjow online wozjewichu, při čimž je 18 pobrachowało.