Z wudaća: srjeda, 20 junija 2018

Etatowa klawsura knježerstwa

Kamjenica. Sakske knježerstwo CDU a SPD wuradźuje w kónčnej klawsurje wo dwójnym etaće 2019/2020 dźensa a jutře w Kamjenicy. Wuchadźejo z dobreje dawkoweje prognozy wobkedźbowarjo trochuja, zo móhł dwójny etat prě­ni­ raz sumu 40 miliardow eurow docpěć, tón za lěće 2017/2018 wučinješe 37,5 miliar­dow. Docpěte wuslědki chcedźa pjatk předstajić.

Alojsowy běh wotprajeny

Budyšin/Radwor. Za 23. junij planowany 1. běh wo pokal zbóžneho Alojsa Andrickeho so njewotměje. Wo tym je wčera předsyda Towarstwa Cyrila a Metoda Jurij Špitank medije informował. Za přičinu podawa přemało přizjewjenjow. Wurisanje běchu składnostnje lětušich 75. posmjertnych narodnin zbóžnoprajeneho kapłana Alojsa Andrickeho na Radworskej nawsy planowali.

Dalše projekty planowane

Na honach wokoło Njechornja započachu tele dny ječmjeń žnjeć. Daniel Wujatz je tam­ ze swojej syčomłóćawu jako požčeny dźěłaćer zasadźeny. Dołho trajaceje suchoty­ dla liča ratarjo lětsa ze snadnymi wunoškami. Tež kwalita zorna je lětsa wjele hu­bjeńša. Foto: SN/Maćij Bulank

Ludowa banka swoju bilancu wozjewiła

Budyšin (SN/BŠe). Lěto 2017 bě za Lu­dowu banku Drježdźany-Budyšin přewšo wuspěšne. To wuchadźa z bilancy, kotruž je pjenježny institut nětko předpołožił. „Zo móžemy z wulkej zahoritosću na wob­chodniske lěto zhladować, je přede­wšěm přičina poradźeneje fuzije Drjež­dźanskeje wotnožki z Budyskej“, zdźěli nawoda předsydstwa Ludoweje banki Drježdźany-Budyšin Thomas Müller. Doskónčnje zjednoćiłoj stej so wotnožce 4. awgusta 2017, čehoždla bě lěto jara na­pja­te. Zastupjerjo wobeju domow běchu fuziji tehdy bjez spřećiwjenja přihłosowali. „Začuwamy to jako dowěru do našeho noweho strategiskeho wu­směrje­nja. Zaměr dźě je, bankowe wobchodnistwo za naš region do přichoda zawěsćić“, nawoda předsydstwa rozłoži.

Budyšin (CK/SN). Město Budyšin by Serbski sejm akceptowało, rjekny wyši měšćanosta Alexander Ahrens (SPD) tydźe­nja w serbskim dźěłowym kruhu měšćanskeho parlamenta. Tajka jednora wotmołwa pak njedosaha.

Runje tak je Ahrens hižo na poslednim posedźenju měšćanskeje rady argumentował. W tamnišej hodźinje za wobydlerske naprašowanja rysowaše Měrćin Krawc z iniciatiwy Serbski sejm ­pró­cowanja wo swójske ludowe zastupnistwo. Wón chcyše wědźeć, kak steji město­ Budyšin k prawu Serbow na samopostajowanje a hač směł so Serbski sejm podpěry města napřećo Zwjazkej, krajej a wokrjesej nadźijeć.

Wojerecy (SN/JaW). Prezidij Zwjazko­we­ho předsydstwa Domowiny je wčera we Wojerecach njedawne słyšenje k serbskim naležnosćam w Drježdźanskim krajnym sejmje wuhódnoćił.

Kaž předsyda Do­mowiny Dawid Statnik zdźěli, je słyšenje zmóžniło, wo po­łoženju Serbow zjawnje rozprawjeć. „Naprašowanja pokazachu, zo je połoženje serbskeho ludu aktualna tema we wšěch frakcijach krajneho sejma­“, Statnik pisa. Dalše zarjadowanja by sej Domowina wuraznje přała. „Wšako je to nowa forma transparentneje demokratije.“ Čło­nojo prezidija witaja toho­runja rozsud, při krajnym sejmje serbski napis připrawić. Wočakuja pak, zo budźe napis po wulkosći a pismje runja němskemu.

Kórki a len słušeja k najznaćišim wudźěł­­kam w Błótach. Zašły tydźeń su zamołwići kołowokoło Błótowskeho towarstwa žně kórkow oficialnje za­hajili­. Len pak hišće chwilku trjeba. Tuchwilu rostlina kćěje a kuzła cunju­ lila barbu na zahonach.

Błóta (SN/BŠe). Na něhdźe 50 hektarach plahuje biozawod Frehn w błótowskim Schöneiche kórki. W aprylu běchu tam symjo wusyli, nětko su woblubowanu zeleninu hižo žnjeć započeli. Wuskut­ko­wała je zažne žně změna wjedra kónc apryla, hdźež dóńdźe ke konstantnje ćopłym temperaturam wodnjo a w nocy. Lětuši měsac meja słuša k najćoplišim wot časa­ zapisowanjow wjedra. Sylne zliwki a krupy su na někotrych polach k tomu wjedli, zo su so rostliny pomałšo wu­wili, štož pak bě jenož krótkodobny zjaw. Přiwšěm kórki w Błótach hižo wot kónca meje domchowaja.

Wojerecy (AK/SN). Po třoch lětach při­hota su we Wojerowskim měšćanskim muzeju njedźelu dalši dźěl moderneje, znowa zarjadowaneje trajneje wustajeńcy wotewrěli. Wobłuk „powučenjahódny“ (LehrReich) je do šěsć wobłukow rozrja­dowany. Nowy slěduje na hižo wote­wrjeny wobłuk „dožiwjenjahódny“ (ErlebnisReich). „Smy tójšto stawiznow do małych rumnosćow hroda zaměst­ni­li“, wuzběhny nawodnica muzeja Kerstin Noack.

Washington (dpa/SN). W senaće USA wutworja so poněčim wjetšina za nowy zakoń, kotryž ma ilegalnje zapućowanym žonam zmóžnić zhromadny přebytk ze swojimi dźěćimi w jastwje. To je nawoda republikanskeje wjetšiny Mitch McConnell připowědźił, złožujo so na připrajenja tamnych republikanskich ­senatorow. Dźělenje maćerjow a dźěći w lěhwach podłu mexiskeje mjezy je mjezynarodny protest zbudźiło. Tež ­w USA su ludźo šokowani a bjezradni.

Söder: Zhromadne nastajenje

Linz (dpa/SN). Bayerski ministerski prezident Markus Söder (CSU) zepěra so w europskej zwadźe wo noworjadowanje azyloweje politiki na plany Awstriskeje. „Bayerska a Awstriska matej zhromadne přeswědčenje a nastajenje“, rjekny Söder dźensa do zetkanja z awstriskim ministerskim prezidentom Sebastianom Kurzom w Linzu. Europa je drje swětej wotewrjeny kontinent, trjeba pak lěpši škit swojich wonkownych mjezow, a migra­ciju měli wobmjezować, Söder doda.

Tusk za lěhwa zwonka EU

Trenar němskeje koparskeje wubranki Joachim Löw je so dźensa rano po mórskej promenadźe w ruskim Sočiju wuchodźował a so mjez druhim ze žurnalistom rozmołwjał. Löw swojich chowancow tuchwilu na přichodnu hru swětowych mišterstwow ­přihotuje. Woni nastupja sobotu wječor přećiwo Šwedskej. Hladajo na poražku přećiwo Mexiku w prěnim duelu minjenu ­njedźelu je partija němskeho narodneho mustwa přećiwo Šwedam hižo nětko „kónčna hra“. Foto: dpa/Christian Charisius

Hasu chorhojow je Achim Klimmeck, 62lětny twarc róštow a zahority přiwisnik kopańcy, w Essenje zarjadował. Dróha, na kotrejž bydli, je wupyšena ze stami chorhojow na woclowych powjazach. Widźeć su chorhoje wšitkich wobdźělnikow tuchwilnych swětowych mišterstwow. Lěta 2006 bě koparski fan prěni króć chorhoje wupowěsnył a ma jich mjeztym wjace hač 300. Na turněr wudawa wón něhdźe tysac eurow za chorhoje.

Dobry pomjatk dopokazał je policist w Mnichowje, jako spózna zhubjeneho psyčka. Toho měješe muž při sebi, kotrehož zastojnicy na policajskej straži Mnichowskeho hłowneho dwórnišća kontrolowachu. Připadnje přitomnemu polici­stej bě mały chihuahua někak znaty.­ ­Hakle dźeń do toho bě žona foto psyčka, za kotrymž pytaše, na stražu přinjesła. Muž twjerdźi, zo bě psa připadnje našoł.