Z wudaća: wutora, 10 julija 2018

London (dpa/SN). Britiska premierministerka Theresa May je zastojnstwo wonkowneho ministra znowa wobsadźiła, po tym zo bě dotalny načolny diplomat kraja Boris Johnson wčera w zwadźe wo wustup kraja z EU wotstupił. Nowy wonkowny minister budźe dotalny minister za strowotnistwo Jeremy Hunt. Toho zastojnstwo přewozmje Matt Jancock, dotal minister za kulturu a medije.

May, kotraž chcyła Wulku Britanisku tež po brexiće wusko na Europsku uniju wjazać, wojuje wo swoje politiske přežiwjenje. Wobkedźbowarjo w Londonje wočakuja zběžk zasakłych přećiwnikow EU w jeje konserwatiwnej stronje. Tež nowowólby hižo njewuzamkuja.

Boris Johnson, jedyn z najwažnišich přiwisnikow brexita, bě wčera popołdnju wotstupił, jenož hodźiny po wotstupje ministra za brexit Davida Davisa. Johnson twjerdźi, zo stanje so Wulka Britaniska z „koloniju EU“, dyrbjała-li May swoje plany zwoprawdźić. Ta bě hakle minjeny pjatk ministrow na swój kurs přinjesła. Dojednanja pak dołho njedźeržachu.

Konferenca wo strukturnej změnje po brunicy a wo konsekwencach

Berlin (SN/MkWj). W zwjazkowej stolicy Berlinje wotmě so minjeny pjatk konferenca „Z rewěrow – za rewěry“, kotraž zaběraše so z kóncom wudobywanja brunicy. A tam dźěše tež wo sćěwki w potrjechenych kónčinach.

Zo maja w Rakecach wot dźensnišeho nowu wulku kupnicu, je za wobydlerjow wsy a wokoliny bjezdwěla zwjeselace. Zo dyrbješe tohodla žona we wysokej starobje swoje bydlenje wopušćić, pak spožča naležnosći jěry přisłód. Ja mam hišće dalši tajki na jazyku, myslu-li na to, zo maja nětko we wsy prózdnu kupnicu wjace, mjenujcy tu, w kotrejž bě Netto dotal zaměstnjeny. Po wšěm zdaću so nichtó za tym njepraša, što so z tymle twarom při zwjazkowej dróze B 96 stanje. Po mojim měnjenju by rozmyslowanje wo nim dyrbjało wobstatk wšitkich jednanjow a dowolnosćow za nowotwar być. Hakle hdyž je jasne, kak dotalnu kupnicu dale wužiwać, směli nowu dowolić. Ale to sej najskerje wot wulkeho koncerna nichtó žadać njezwaži. Přewulki je strach, zo móhł so Netto snano cyle z Rakec rozžohnować. „Dobry“ to přikład za to, kak wulka je móc hospodarstwa a kak wobmjezowana je ta politiki. Marian Wjeńka

Mae Sai (dpa/SN). W prózdnjeńcowej dramje w Thailandskej započachu dźensa rano poslednich štyrjoch hólcow a trenarja wuchować. Hłowny zaměr bě hišće dźensa wšitkich w prózdnjeńcy čakacych wuswobodźić, dokelž hroža z monsunowymi zliwkami nowe strachi. Młodostni su mjeztym 17 dnjow w prózdnjeńcy. Kaž zamołwići zdźěleja, su wšitcy wuchowani w poměrnje dobrym strowot­niskim stawje. Přiwšěm dyrbja hišće w chorowni wostać.

Němskaj koparskaj sudnikaj Felix Zwayer a Bastian Dankert mataj na finalu swětowych koparskich mišterstwow hišće składnosć, być zasadźenaj jako šefwidejoasistentaj. Dwójka Němskeho koparskeho zwjazka je skok na lisćinu dźesać móžnych sudnikow za widejoteamy we wobłuku zbywacych štyrjoch hrow docpěła. Tež Markus Borsch, asistent němskeho sudnika dr. Felixa Brycha, wostanje w turněrje. W polu hłownych zamołwitych, kotřiž dwuboje na trawniku sudźa, je hišće dwanaće refereejow, kotřiž móhli finale nawjedować. Najwjetše šansy mataj Nižozemjan Björn Kuipers a Argentinjan Néstor Pitana. ­Jasne a rozsudźene pak hižo je, zo budźe finale za telewiziju ZDF Béla Réthy komentować. To zdźěli wčera sportowy šef ZDF Thomas Fuhrmann.

NAJZBOŽOWNIŠI su Češa wot lěta 1991 w samej přitomnosći. To wuchadźa z wobšěrneho přepytowanja wědomostnikow fakulty socialnych wědomosćow Brnjanskeje Masarykoweje uniwersity. Ličba ludźi, kotřiž wo sebi praja, zo su ­„jara zbožowni“, spochi přiběra, kaž sociologojo nazhonjeja. Wot lěta 1991 do 2017 je so wona wjace hač podwojiła – ze sydom procentow postupi na 18 proc.

Wědomostnicy su tež zwěsćowali, kajke su nastupajo zbožownosć rozdźěle mjez regionami a starobnymi skupinami. Młoda generacija je najzbožowniša na Morawje. Mjeztym zo so z njeje w Praze jeničce 14 procentow „jara zbožowna“ čuje, je jich na Morawje dwójce telko. Tam su tež seniorojo trochu zbožowniši hač w stolicy.

Rozestajenja wo předawanišću přiwšěm hišće njedorozrisane

Rakecy (UM/SN). Nowonatwarjenu Rakečansku kupnicu Netto su dźensa rano swojemu zaměrej přepodali. Tajke něšto so nimale wšědnje něhdźe stawa a njeje poprawom ničo wosebiteho. W tym padźe pak je połoženje cyle hinaše, přetož lědma hdy wuwiwa so twar kupnicy na komunalny politikum.

W oktobru 2013 bě Rakečanska gmejnska rada zasadnje rozsudźiła, zo smědźa we wsy nowu kupnicu twarić. „Z twarom předawanišća so wulki wobłuk srjedźišća Rakec, hdźež su tuchwilu zwjetša dodźeržane twarjenja a skóncowane puće, zaso zmysłapołnje wužiwa“, argumentowaše tehdyši wjesnjanosta Jurij Paška (CDU). Zdobom wón warnowaše: Gmejnska rada njech njeriskěruje, zo so samsne stanje kaž w padźe Lidla, mjenujcy zo so discounter dospołnje z Rakec zminje.

Dale a wjac ludźi z busom jězdźiło

W druhej połojcy 19. lětstotka za čas industrializacije twarjachu tež w Hornjej Łužicy železniske čary. Runočasnje nastachu dwórnišća, stražniske chěžki a wuhibkarnje. W lětnjej seriji so ­rozhladujemy, kak trěbne wone něhdy běchu a što je so z nimi stało. (5)

Kulow (AK/SN). Twar chódnika, ponowjenje kapałki a nowotwar mosta w tak mjenowanym zelenym lěsu běchu w delnich Sulšecach wažne naprawy minjeneho ­časa. To podšmórny w swojej rozprawje na zašłym posedźenju Kulowskeje měšćanskeje rady Jurij Brösan, kiž je dlěje hač 20 lět Sulšečanski wjesny předstejićer. „Z nowym chódnikom wěstota we wsy přiběra. Za šulerjow je wón runje tak wažny kaž za tych, kotřiž chcedźa do pěstowarnje“, praji wjesny předstejićer. Nowy móst bě nuznje trěbny. Stary bě wulka woda wobškodźiła. Swobodny stat Sakska je projekt stoprocentnje spěchował.

Čisle a antena fuk

Salow. Diskoteka kuntworow minjeny kónc tydźenja w Salowje njeje jenož mnohich wopytowarjow přiwabiła, ale samo paduchow. Mjeztym zo je so tam 23lětny z přećelemi zabawjał, so druzy z jeho Seatom zaběrachu. Wot­šrubowa­chu wobě značce jězdźidła a pokradnychu třěšnu antenu. Nimo toho awto młodeho muža rozdrapachu. Dohromady načinichu wjace hač tysac eurow škody, kaž policija rozprawja.