Z wudaća: septembera 2018

Moskwa (dpa/SN). Ruski wonkowny minister Sergej Lawrow widźi najebać rozdźělne měnjenja dobre šansy dorozumjenja z Němskej. „Njebych poćahi mjez našimaj krajomaj napjate mjenował“, rjekny wón w rozmołwje z powěsćernju dpa do swojeho wopyta w Berlinje. „Haj, je rozdźělnych pozicijow, kotrež něštožkuli w našich bilateralnych poćahach skomplikuja.“ Wuske splećenje hospodarstwa, kultury a stawiznow pak pohnuwa, zhromadnje za „dobry a wěšćomny přichod“ dźěłać. Lawrow chce so jutře w Berlinje z wonkownym ministrom Heikom Maasom (SPD) zetkać.

Lawrow zakitowaše w rozmołwje swój nahlad, zo njeje Ruska na tuchwilnej zwadźe ze zapadom wina. „Ruska njeje do­wěru raniła. Zapadne kraje su minjene štwórć lětstotka liniju sćěhowali, Rusku zamjezować.“ Wón zapad namołwješe antiruske sankcije skónčić, kotrež USA wukazuja. „Dźiwamy so, kak spěšnje so EU ze stratami wjacorych miliardow eurow wotnamaka. USA porno tomu žane straty nimaja.“ Tuta politika měła so skónčić.

Razne a naležne rozestajenje w zwjazkowym sejmje wo połoženju kraja

Berlin (dpa/SN). W zwjazkowym sejmje je wčera k dotal njesłyšanemu raznemu rozestajenju mjez bywšim předsydu SPD Martinom Schulzom a frakciskim šefom AfD Alexanderom Gaulandom dóšło. Schulz Gaulandej wumjetowaše, zo w swojich narěčach starodawne „srědki fašizma“ wužiwa. Gauland bě w generalnej rozrěči wo kanclerskim etaće chłostajomne njeskutki požadarjow azyla naličił a zwjazkowej kanclerce Angeli Merkel (CDU) wu­mjetował, zo je wona ze swojej politiku ćěkancam napřećo za polarizaciju w kraju zamołwita.

Po Gaulandźe rěčeše kanclerski kandidat lěta 2017. Redukcija na jeničku temu je znaty stilistiski srědk: „Migranća su na wšěm wina. Podobne postupowanje smy w tutym domje hižo raz dožiwili“, rjekny Martin Schulz hladajo na čas nacionalsocializma. „Je načasu, zo so demokraća kraja tajkej formje retoriskeho brónjenja spřećiwjeja. Wone zawinuje na kóncu znjehaćenja, kotrychž wuslědk je namóc na dróhach.

Je to něšto tajke kaž jěd, kotryž cyle pomału skutkuje: Měnju wone złahodnjenje, kotrež pola AfD dožiwjamy. Je da woprawdźe tak zlě, hdyž něchtó hitlerski postrow pokazuje abo „Sieg Heil“ woła? To su tola jenož jednotliwi hłupacy! A čas nacionalsocializma z wjace hač 50 milionami woporow njebě wjace hač „ptače hownješko“ w dołhich němskich stawiznach, kaž to předsyda AfD Alexander Gauland formulowaše. Hłowny strach widźu w tym, zo so jěd poněčim we hłowach ludźi zakorjeni a zo prjedy abo pozdźišo tež naše myslenje postaja. Předewšěm młodu generaciju, kotraž wójnu jenož hišće z filmow znaje, dokelž swědcy woteměraja, mjenowany jěd wohroža. Sym wćipny, kak sudnistwa na wospjetowace so nacistiske wupěranja w Kamjenicy reaguja. Prěni z tych, kotřiž su hitlerski postrow pokazali, steja mjeztym hižo před sudnistwom. Budźe to wažny signal, zo njeby jěd mjez ludźimi dale skutkował. Marko Wjeńka

Nimale 40 lět je Ludwig Kola, žurnalist a wjelelětny nawoda serbskeje redakcije, stawizny Serbskeho rozhłosa sobu pisał. W nocy na 6. september 2018 so jeho žiwjenje po dołhej chorosći dokónči.

Kolebka Ludwiga Kole steješe w Ra­dworju, hdźež bě so 20. oktobra 1931 narodźił. Po gymnaziju w Čěskej a w Bu­dyšinje studowaše w Lipsku. Jako wukubłany diplomowy žurnalist dźěłaše najprjedy w redakciji dźěćaceho časopisa Płomjo. Jeho rozhłosowy čas zahaji so w tehdyšim Zhorjelskim serbskim studiju. Lěta 1957 bě Serbski rozhłós do Choćebuza přećahnył. Tam je młody rozhłosownik zamołwity nadawk za sebje namakał a pozdźišo zhromadnje ze swójbu druhu domiznu.

Wotrowčenjo hotuja so na wulki wjesny swjedźeń, kotryž tam wot jutřišeho hač do njedźele na sportnišću přewjedu. Mjeztym zo běchu hižo wutoru wjacore stany stajili, mějachu wčera dalše dźěła wobstarać. Jedyn z wjerškow předewšěm za młódšich wopytowarjow budźe sobotu wječor party z mjenom summer-ending-openair. Foto: SN/Maćij Bulank

Budyšin (CK/SN). Za 2,75 milionow ­eurow da město Budyšin w přichodnych pjeć lětach šule, sportowe hale a sportnišća rjedźić. Nadawki za 18 objektow w nošerstwje města su měšćanscy radźićeljo na swojim zašłym posedźenju ­jednohłósnje přepodali. Nutřkowne rjedźenje přewozmje wot 8. oktobra ­předewzaće Götz Gebäudemanagement Ost. Firma skutkuje na 90 městnach w šěsć krajach a ma tež w Budyšinje wotnožku. Rjedźenje woknow změje tohorunja wot oktobra 2018 hač do julija 2023 w sprjewinym měsće zasydlena firma RmTV Dienstleistungen na starosći.

Rozdźělene běchu jednotliwe nadawki we woběmaj wobłukomaj stajnje do šěsć losow, rozłoži wotrjadnik měšćanskeho zarjadnistwa za kubłanje a socialne naležnosće Thomas Groß. Při tym zapřijachu zarjadnišća w susodstwje do jednoho losa, zo móhli kóšty lutować. Kaž Groß dale ­rjekny, bě so za kóždy los dźewjeć do dwanaće zajimowanych poskićerjow přizjewiło.

Podłu wokrjesneje dróhi z Chwaćic do Wulkeje Dubrawy twari hłubokotwarska firma Schulz w nadawku Budyskeho krajnoradneho zarjada kolesowansku šćežku. Wona wjedźe na zapadnym boku dróhi hač k Měrkowskemu pućej we Wulkej Dubrawje. Předewšěm šulerjam budźe to wulke wolóženje, přetož na dosć wuskej wokrjesnej dróze jich wšědny puć do šule tuchwilu runjewon njestrašny njeje. W prě­nim tydźenju ­decembra ma kolesowanska šćežka hotowa być. Foto: Heinz Noack

Sakski ministerski prezident přijědźe do Slepjanskeje wosady

Trjebin (AK/SN). Planowanje za přesy­dlensku městnosć Miłoraza w sewjernym dźělu Slepoho je zaběžało. Wo tym informowaše Trjebinski wjesnjanosta Waldemar Locke (CDU) na wčerawšim posedźenju gmejnskeje rady. „Do koła planowarjow słušeja z Miłoraskeje wjesneje rady Andreas Schneidewind a z kruha wobydlerjow Miłoražan Detlef Rölke“, Trjebinski wjesnjanosta rozłoži.

19. julija, 13. awgusta a 7. septembra je so koło planowarjow zetkało. Přichodne wuradźowanje budźe 10. oktobra. Gremij nawjeduje Zhorjelski planowanski běrow Kaup. 25. oktobra přewjedu w Miłorazu wobydlerski dialog ze zastupjerjemi energijoweho koncerna LEAG a z planowarjemi jako zjawne zarjadowanje. Na wjacorych stejnišćach chcedźa tam wobydlerjow informować. Mjez druhim předstaji Slepjanska gmejna planowanu nowotwarsku štwórć. Dale pokazaja koncept wotwodźowanja wopłóčkow, a LEAG rozłoži swój nowy rewěrowy koncept, kotryž je loni kónc měrca wozjewiła.

Delegacija gmejny Chrósćicy pod nawodom wjesnjanosty Marka Klimana (CDU) poda so minjeny kónc tydźenja na wuprawu do partnerskeje pólskeje gmejny Leśnica njedaloko Opola. Chróšćenjo wopytachu „Dożynki“, kaž tam swoju domchowanku mjenuja.

Kóžde druhe lěto zarjaduje Leśnica domchowanku w jednym ze swojich wjesnych dźělow. Lětsa zahaji so swjedźeń z wulkim swjedźenskim ćahom sobotu popołdnju we wsy Raszowa. Nimo mnohich pyšenych wozow pokazachu w swjedźenskim ćahu jědnaće krasnych žnjenskich krónow. Kóždy wjesny dźěl gmejny bě jednu nawił. Najrjeńše króny su mytowali. W stanje su z pisanym programom pokročowali. Tež někotryžkuli němskorěčny programowy dypk při tym zapřijachu, wšako přisłušeja wjacori wobydlerjo Leśničanskeje gmejny němskej mjeńšinje w Pólskej. Dalša wosebitostka domchowanki bě, zo přepoda kóždy wjesny dźěl wjesnjanosće „žnjenski chlěb“. Tež Chróšćenjo běchu sej tajki chlěb wot pjekarja napjec dali a jón hosćićelam darichu.

Do latarnje a do murje zjěł

Radwor. Chětro natutkany bě wodźer transportera, kiž je zawčerawšim popołdnju w Radworju do latarnje a na to do murje zrazył. Při wobdźěłanju njezboža napadny policistam jeho chorhojčka. Pola 31lětneho zwěsćichu 2,14 promilow alkohola w kreji.