Wojerecy (AK/SN). Město Wojerecy chce přichodnje kóžde lěto 10,5 milionow eurow za hladanje dźěći wudać. Tole je z wotstawkom najwjetša suma w hospodarskim planje, podšmórny měšćanosta za socialne a šule Thomas Delling (SPD) na wčerawšim posedźenju měšćanskeje rady. Jeje čłonojo wobzamknychu koncept za dalše wuwiće pěstowarnjow. Zakład bě analyza, kotruž bě město 2016 a loni zhotowić dała. Z njeje wuchadźa, zo maja 200 pěstowarskich městnow přewjele. Tuchwilu wudźeržuje město 21 zarjadnišćow pola jědnaće nošerjow.
W pěstowarni AWO „Při Halštrowskim kolenu“ chcedźa za 320 000 eurow elektrisku připrawu saněrować. W Čornym Chołmcu ma za 1,1 milion eurow nowa pěstowarnja nastać. Dale wudadźa nimale 190 000 eurow za energetiske saněrowanje fasady a třěchi pěstowarnje „Lěsny jězor“, kotrejež nošer je Křesćansko-socialny kubłanski skutk.
Budyšin (SN). Wid čłonow serbskich towarstwow a zwjazkow pod třěchu třěšneho zwjazka a zwonka njeho na swójske skutkowanje chce Domowina z naprašowanja zhonić, kotrež tuchwilu přewjedźe. Nimo ćišćaneho naprašnika a tajkeho jako PDF-dataja, kotraž steji na internetnej stronje Domowiny www.domowina.de za indiwiduelne wućišćenje k dispoziciji, prócuje so zamołwity wuběrk za zjawnostne a lobbyjowe dźěło Domowiny tež wo online-naprašnik. Tutón projekt přewodźaca agentura z Lipska programěruje. Někotrych wudospołnjenjow dla njeje online-naprašnik w interneće hišće přistupny.
Třeći raz změja šulerki a šulerjo nazymu składnosć, so pod fachowym nawodom z rjemjeslniskimi a wobsahowymi aspektami medijoweho dźěła zaběrać.
Budyšin (SN/bn). Tež lětsa poskićitej Serbski rozhłós a Sakski wukubłanski a wupruwowanski kanal (SAEK) dorostej přiležnosć, so zadarmo na „šulerskej akademiji medije“ wobdźělić. Mjeztym hižo třeći raz změja šulerki a šulerjo 5. lětnika składnosć, w běhu tydźenja pod profesionelnym nawodom zeznajomić so ze zakładami žurnalistiskeho kaž tež techniskeho medijoweho dźěła. Wopytowarjam lońšeho kursa resp. na wšelakich polach hižo nazhonitym oferujetej zarjadowarjej we wobłuku natwarnych seminarow dale so wukmanić.
Budyšin (SN/at). Hnydom dwaj lawreataj lětušeho Myta Domowiny resp. Myta Domowiny za dorost je Budyska župa „Jan Arnošt Smoler“ namjetowała. Wjelelětnu předsydku Domowinskeje skupiny Baćoń/Haslow Hilžu Mehrowu počesća z najwyšim wuznamjenjenjom třěšneho zwjazka runje tak kaž Bjarnata Rjentša z Choćebuza a rejwansku pedagogowku Alenu Kubankovu z Budyšina.
Nad Mytom Domowiny za dorost smětej so wjeselić skupinje Berlinska dróha, namjet Budyskeje župy, a Deyzidox, wot Kamjenskeje župy podaty.
Čestne znamješko Domowiny 2018 spožča Resi Lotrinje z Hochoze, Sybili Bertramowej z Kózleho, Doris Heincowej ze Žylowa, Danielej Wjenkej ze Smjerdźaceje, Pětrej Korjeńkej z Pančic-Kukowa, Milanej Hrabalej z Warnoćic, Cyrilej Pjechej z Berlina, Lucianej Kaulfürstej z Budyšina, Janej Wawrikej z Chrósćic a Lukašej Novosadej z Prahi.
Mjena počesćenych je mytowanski wuběrk Domowiny dźensa wozjewił. Wuznamjenjenske zarjadowanje budźe pjatk, dnja 5. oktobra, w Budyskim Serbskim domje.
Berlin (dpa/SN). Po nowowólbach šefa frakcije unije, hdźež je wčera Ralph Brinkhaus (CDU) překwapjacy wjetšinu hłosow dóstał, je wiceprezident CDU Armin Laschet wumjetowanja strony FDP wotpokazał, kotřiž sej žadachu zwjazkowej kanclerce Angeli Merkel (CDU) prašenje dowěry stajić. Ralph Brinkhaus je připowědźił kanclerku podpěrać. Hladajo na zastojnstwo šefa frakcije je jenož kandidował, dokelž chce so wo čerstwy stil a nowe ideje postarać.
Wobzamknjenja njedosahace
Berlin (dpa/SN). Zwjazkowy sejm je dźensa bilancu bydlenskeho wjerška diskutował, hdźež su minjeny tydźeń naprawy přećiwo přemało bydlenjam a přećiwo zwyšenju podruže wobzamknyli. Koalicija unije a SPD je wo aktualnu hodźinu w sejmje prosyła. Dokelž njesahaja SPD wobzamknjenja daloko dosć, chce hišće wjace naprawow přesadźić. Na přikład njeměła so podruž pjeć lět dołho zwyšić.
Trump posedźenje nawjeduje
Berlin/Zhorjelc (SN/BŠe). Planowany wottwar dźěłowych městnow pola koncerna Siemens njebudźe tajki kaž poprawom wočakowany. Na stejnišću w Berlinje chcychu 870 dźěłowych městnow šmórnyć. W přichodnymaj lětomaj pak budu tomu 700, předewzaće zawčerawšim zdźěli. Po cyłej Němskej chcedźa 2 900 dźěłowych městnow wottwarić, štož je 500 mjenje hač předwidźane. To je wuslědk jednanjow mjez dźěłodawarjom a zastupjerjemi dźěłopřijimarjow. Dojednane wuslědki su minjenu póndźelu podpisali.
Kaž dźěłarnistwo IG metal wujasni, je Siemens swoje plany chětro změnił, při čimž su zawodni radźićeljo stejnišćow a dźěłarnistwo proces aktiwnje přewodźeli. Předewšěm na wuchodźe Sakskeje docpěchu wulki wuspěch, wšako budźe Zhorjelski zawod z tuchwilu něhdźe 960 dźěłowymi městnami zdźeržany. Poprawom bě planowane jón zawrěć, štož je wulke protesty wuwabiło. Hižo w meji bě zawrjenje stejnišća z blida.
Swojeho psyka njepušćił a z nim po nahłej skłoninje při bayerskim jězorje Königssee 40 metrow dele padnył je 46lětny muž z Berlina. 37lětna přewodnica chcyše mužej pomhać, so tohorunja suny a wosta tčacy. Hórska straža dyrbješe znjezboženeju wuchować a kaž wčera zdźěli, njejstej so žona a psyk zraniłoj. Muž pak dyrbješe do chorownje.
W hódnoće něhdźe jedyn milion eurow ma so 3. oktobra bleša whiskyja přesadźować, zdźěli předwčerawšim znaty awkciski dom Bonham. Cyłkownje dwanaće blešow 60 lět zrawjeneho whiskyja palernje Marcellan na sewjeru Šotiskeje scyła eksistuje. Etiket je italski wuměłc Valerio Adami naćisnył. Jedna bleša whiskyja bu lětsa hižo w Hongkongu za něhdźe 910 000 eurow přesadźena. Kelko z dwanaće blešow scyła hišće eksistuje, je njejasne.
Drježdźany/Choćebuz (dpa/SN). Technika so njesměrnje spěšnje dale wuwiwa. Před dwěmaj lětomaj diskutowachu fachowcy na konferencach hišće teoretisce wo nowej mobilnostandartnej technologiji z mjenom 5G. Na wčerawšim zarjadowanju 5G Summit w Drježdźanach móžachu nětko hižo prěnje prototypy přitomnym prezentować. Něhdźe 500 wědomostnikow a zastupjerjow industrije je so w stolicy Sakskeje mjeztym hižo třeći raz schadźowało.