Z wudaća: srjeda, 17 oktobera 2018

srjeda, 17 oktobera 2018 14:00

Krótkopowěsće (17.10.18)

Tež Žitawa so předstajiła

Berlin. Kotre město budźe 2025 europska kulturna stolica? Wčera su wurisanje po cyłym Zwjazku wo požadany titl z informaciskim dnjom w Berlinje startowali. Tam su so hižo wosmjo kandidaća předstajili: Kamjenica, Drježdźany a Žitawa ze Sakskeje kaž tež Gera, Hannover, Hildesheim, Magdeburg a Nürnberg. Hač do 30. septembra 2019 móža so zajimowane komuny požadać.

Hotuja so na róčnicu wosady

Radwor. 750. róčnicu swojeho wob­sta­ća chce katolska wosada w Radworju w lěće 2020 woswjećić. Tole je wjesnja­nosta Wincenc Baberška (CDU) na wčera­wšim posedźenju tamnišeje gmejnskeje rady připowědźił. Wšitke towarstwa su přeprošene, so na přihotach wobdźělić, zo móhli zamołwići planować započeć. Přichodny čas su prěnje zetkanja planowane, zo bychu sej ćežišća róčnicy dorěčeli.

Wo přichodźe rewěra rěčeć

wozjewjene w: Krótkopowěsće
srjeda, 17 oktobera 2018 14:00

Zajim na poskitku wospjet wulki

Serbski rozhłós a SAEK spěchujetej dorost

Budyšin (SN/bn). Sakski wukubłanski a wupruwowanski kanal (SAEK) a Serbski rozhłós wuhotujetej tuchwilu „III. šu­lersku akademiju medije“. Dohromady dwanaće šulerjow 5. do 10. lětnika je so přizjewiło. W dwěmaj po starobje roz­rjadowanymaj skupinomaj zaběraja so woni w Budyskim studiju předewzaća MeKoSax – Medijowa kompetenca za Saksku z me­dijowym dźěłom.

wozjewjene w: Medije
srjeda, 17 oktobera 2018 14:00

Z Rusami wo kooperaciji rěčeć

Čorna Pumpa (SN/at). Ruski wopyt přijmje jutře, štwórtk, hospodarska spěchowanska towaršnosć ASG Grodk w Čornej Pumpje. W oblasće Kursk skutkowace předewzaće UltraMol 000 je nowu technologiju za recycling starych wobručow wuwiło a pyta nětko za móžnosćemi, ju na němskich wikach nałožować. Zastupjerjo ruskeje firmy chcedźa łužiskim zajim­cam technologiju zbližić.

Wuslědk recyclinga je jara drobny gumi­jowy granulat najwšelakorišeje zor­nito­sće, a tón hodźi so na přikład w zhotowjenju wobručow dale předźěłać. Pola ASG Grodk hižo wědźa, zo zepěra so mlěće­ granulata na termiske procesy. To je­ nowe porno dotal znatej kryogenej technologiji a ma lěpšinu, zo nastawacy gumijowy granulat swoje prěnjotne kajkosće kaž elastiskosć wobchowa.

wozjewjene w: Hospodarstwo
srjeda, 17 oktobera 2018 14:00

Ze zajimawej kubłanskej temu

Budyšin/Choćebuz (SN/at). Naležnosće Delnjeje Łužicy steja sobu w srjedźišću přichodneho posedźenja Zwjazkoweho předsydstwa Domowiny pjatk w Choćebuzu. Tak ma gremij zastupjerja zjednoćenstwow Serbow do Rozhłosoweje rady Rozhłosa Berlin-Braniborska delegować, štož je po paragrafje 4a braniborskeho Serbskeho zakonja postajene. Župa Delnja Łužica je Marcusa Końcarja namjetowała. Zastupowacy jednaćel Domowiny měł zastojnstwo we wólbnej periodźe 2019–2023 wukonjeć a by načolnicu Dešnjanskeho domizniskeho muzeja Babetu Zenkerowu naslědował.

K dotalnej dźěławosći Rady za naležnosće Serbow Braniborskeje w nachilacej so wólbnej periodźe porěči jeje předsyda Torsten Mak. Wot njeho wočakuja zdobom wuhlad na předstejace nowowólby rady za dobu 2019–2024. Nawoda delnjoserbskeje wotnožki Rěčneho centruma WITAJ dr. Viktor Zakar informuje wo aktualnych kubłansko-politiskich prašenjach w Braniborskej.

wozjewjene w: Towarstwa
srjeda, 17 oktobera 2018 14:00

Spěwa a dźěła na dobro Serbow

Wot lěta 2016 je wón předsyda Domowinskeje skupiny Pančicy-Kukow, do toho skutkowaše hižo pjeć lět w předsyd­stwje skupiny. Rěč je wo wučerju na wuměnku Pětrje Korjeńku z Pančic-Kukowa. Za jeho čestnohamtski angažement spožči jemu třěšny zwjazk lětsa Čestne znamješko Domowiny.

wozjewjene w: Towarstwa
srjeda, 17 oktobera 2018 14:00

Hladanski dialog nastork był

Budyski wokrjes bě minjenu póndźelu druha stacija tak mjenowaneho hladanskeho dialoga Sakskeje. Zarjadowanje přewjeduje ministerstwo we wšěch 13 wokrjesach w Sakskej. Na městnje pyta přisłušne ministerstwo za socialne a škit přetrjebarjow rozmołwu z ludźi­mi. Na zarjadowanju w Smochćicach je so statna sekretarka za strowotnistwo Regina Kraushaar wobdźěliła.

Budyšin/Smochćicy (SN/at). Wjesnjanosća, w hladanju dźěłacy, komunalni politikarjo a dalši potrjecheni, jich je něhdźe połsta wosobow, běchu póndźelu do Smochćic přijěli. Jich wid na tule wažnu towaršnostnu temu zastupjerjow ministerstwa wosebje zajimowaše. „Chcemy předewšěm připosłuchać, wšako móžemy jeno zhromadnje wujasnić, što a štó je za dobre hladanje trjeba“, rjekny statna sekretarka Regina Kraushaar. Zwěsćić chcychu, hdźe klaca, a zhonić, kotre dobre ideje su wobdźěleni w regionje nastupajo hladanje hižo wuwili.

wozjewjene w: Socialne
srjeda, 17 oktobera 2018 14:00

Skala a Pólska

Opole (SN/bn). Towarstwo za koopera­ciju mjez Pólskej a wuchodom, zarjad Opolskeho wojewódstwa a regionalna zjawna biblioteka Emanuela Smołki wuho­tuja wot dźensnišeho mjezyna­rodny literarny forum „W kole kultury“ a „XXIX. zetkanje poetow“. Z wosebitym programowym dypkom wěnuja so lětsa Janej Skali. Jutře chcedźa wotpołožejo kwěćele při rowje Skale w Dziedzicach a při pomniku za njeho w Namysłowje serbskeho basnika a narodneho prócowarja počesćić. Wjacori literaća čitaja jeho­ twórby. Wažne bě hłownemu organizatorej Januszej Ireneuszej Wójcikej, zo zaklinča „jeho hrónčka tež w maćeršćinje Jana Skale“. Serbow zastupuje Tomasz Nawka z Budyšina. Nawječor slě­duje w bibliotece Stanisława Wasylewskeho spominanje na Skalu kaž tež na stawiznarja prof. Leszeka Kuberskeho a knihowni mjeno spožčaceho literarneho kritikarja a tołmačerja.

wozjewjene w: Z Łužicy
srjeda, 17 oktobera 2018 14:00

Prěnje rozmołwy wo koaliciji

Mnichow (dpa/SN). Jenož tři dny po wólbach bayerskeho krajneho sejma su tam dźensa prěnje sonděrowanske rozmołwy zahajili. Dopołdnja zetkaštaj so ministerski prezident Markus Söder (CSU) a předsyda CSU Horst Seehofer ze zastupni­kami Swobodnych wolerjow. Popołdnju běchu rozmołwy ze Zelenymi planowane. Bjezposrědnje po tym chcyštaj wo­zjewić, z kajkej stronu chcyła CSU konkretne koaliciske jednanja zahajić.

Brüssel poskića kompromis

Brüssel/London (dpa/SN). W ćahańcy wo rjadowany wustup Wulkeje Britaniskeje z Europskeje unije su w Brüsselu po informacijach medijow ke kompromisam zwólniwi. Posrědkowar EU Michel Barnier chcył přechodny čas, w kotrymž so tež po wustupje za wobydlerjow a předewzaća ničo njezměni, wo lěto podlěšić. Za to pak dyrbjała premierministerka Theresa May kompromisam w zwadźe wo mjezu k Irskej přizwolić. Statni a knježerstwowi nawodźa čłonskich krajow EU chcychu dźensa w Brüsselu wo tym wuradźować.

Trump hrozy Łaćonskej Americe

wozjewjene w: Kraj a swět
srjeda, 17 oktobera 2018 14:00

Nowe stołpy podłu mjezy

Betonowe elementy z časa NDR při saksko-pólskej hranicy so pominu

Žitawa (UM/SN). Betonowy stołp a jón wobdawaca škitna plasta stej hižo lěpše časy dožiwiłoj. Wjedro, ale tež čłowjeska namóc su čorno-čerwjeno-žołtym stołpam při nasypje bjezposrědnje nad Nysu lětdźesatki škodźałoj. Nětko je načasu, zo dyrbja swoje městno wopušćić, wšako „naslědnicy“ hižo čakaja.

wozjewjene w: Łužica
srjeda, 17 oktobera 2018 14:00

To a tamne (17.10.18)

Kamel při zwjazkowej dróze w Čornym lěsu je mnohich šoferow znjeměrnił. Zwěrjo steješe na parkowanišću bjezpo- srědnje při dróze w Freiburgu. „Wobsteješe strach, zo kamel na dróhu poběži“, policija zdźěli. Zwěrjo słušeše do pućowaceho cirkusa, kotryž bě w bliskosći swój stan natwarił. Wobsedźer bě zwěrjo na parkowanišću wotstajił, bjez toho zo by je přiwjazał. Wón bě sej wěsty, zo kamel na dróhu njepoběhnje. Policija jemu přikaza, zwěrjo na druhe městno dowjezć.

Z kolesom z Alaski do Južneje Ameriki dojěł je awstriski ekstremny sportowc Michael Strasser. Při tym je po swójskich informacijach nowy swětowy rekord na­stajił­. Wón trjebaše za 22 642 kilometrow dołhu čaru 84 dnjow, 11 hodźin a 50 mjeńšin, 15 dnjow mjenje hač při dotalnym rekordźe. Strasser bě minjene lěta hižo podobne wužadanja zmištrował.

wozjewjene w: To a tamne

Serbska debata

nowostki LND