Z wudaća: póndźela, 05 nowembera 2018

Dobra nalada w rjemjeslnistwje Budyskeho a Zhorjelskeho wokrjesa

Budyšin/Zhorjelc (SN/BŠe). Rjemjeslniske zawody Budyskeho a Zhorjelskeho wokrjesa wuprudźeja dobru naladu. Wšako wujewja nazymska konjunkturna analyza z aktualnymi ličbami naprašowanja Drježdźanskeje rjemjeslniskeje komory přewšo spokojace prognozy. Cyłkownje 72 procentow předewzaćow ma swoje wobchadne połoženja za dobre. A sydom z dźesać firmow Drježdźanskeho komorneho wokrjesa wočakuje, zo tomu dale tak wostanje.

Nětko wón tu je, prěni Serbski sejm. 24 čłonow jemu přisłuša, a za dwaj tydźenjej zhonimy, štó twori jeho předsydstwo, takrjec prěnje „serbske knježerstwo“. Najebać wulke wotpokazanje dyrbju přiznać, zo běchu wólby a wuličenje hłosow jara dokładne. Připóznaće wuprajam iniciatiwnikam za wutrajnosć, zo su nimo wšěch ćežow­ při wěcy wostali a swoju ideju zwoprawdźili,­ znajmjeńša dźělnje. Nětko mamy wočaknyć, kak komunalna a nadregionalna politika na wuzwolenje prěnjeho serbskeho parlamenta reaguje. Hinak hač iniciatiwnicy sej mjenujcy myslu, zo njebudu němscy politikarjo hnydom za čłonami sejma běhać a jich na čerwjenym přestrjencu witać, ale budu ze swo­jimi wupruwowanymi partnerami dale­ dźěłać. Hdyž iniciatiwnicy tu runje telko mocy nałoža, kaž su Serbow na wsy wo swojej ideji informowali, potom wostanje Serbski sejm zawěsće wjele citowany tiger bjez zubow. Janek Wowčer

Městopřesyda Domowiny a župan župy Delnja Łužica Wylem Janhoefer reaguje na Zapósłane Měrka Šołty z Budyšina, wozjewjene w SN z 19. oktobra. Dokelž njemóže někotre podsuwanja bjez komentara jako tajke w zjawnosći stejo wostajić, wón pisa:

Dźiwam so, zo dyrbju w Serbskich Nowinach w Zapósłanym wěsteho knjeza Měrka Šołty čitać, zo wjetšina čłonow Zwjazkoweho předsydstwa Domowiny ze srjedźneje a Delnjeje Łužicy po wšěm zdaću ničo njerozumi, hdyž so w gremiju w hornjoserbskej rěči rozmołwjeja. Zo njeje twjerdźenje awtora wěrne, potwjerdźa hižo fakt, zo móžach jeho dopis w SN čitać a sym jón tež zrozumił, byrnjež ani Hornjoserb ani maćernorěčny Delnjoserb njebył.

Mam zaćišć, zo awtor scyła njewě, kotre wosoby wón posudźuje. Su to mjez druhim bywšej studentce sorabistiki a maćernorěčni Delnjoserbja. My to wšitko rozumimy a Hornim Serbam tež rady rozłožimy, što „groniś“ woznamjenja.

Zo pak knjez Šołta tule wěrnosć nje­znaje, mje njezadźiwa. Wšako njejsym jeho hišće ženje na našich zjawnych po­sedźenjach, kotrež wšak wón w Zapósłanym kritizuje, widźał.

Přewšo derje wopytany bě sobotu popołdnju nazymski koncert chóra Budyšin w Budyskim Serbskim domje. 60 přihotowanym městnam dyrbjachu dalše stólcy přistajić. Zwjetša staršemu publikumej předstajichu chórisća pod nawodom Michała Jancy pisany­ wěnc serbskich a słowjanskich ludowych kaž tež wuměłskich spěwow. Foto: SN/Maćij Bulank

Budyšin (SN/MWj). Wulke syły ludźi tłóčachu so zawčerawšim po Budyskich hasach. Za lětuši nakupowanski a dožiwjenski wječor Romantika běchu wonkowne wuměnjenja ze suchim a přijomnym wjedrom přewšo dobre. Wšo druhe bě Budyske nutřkoměšćanske towarstwo ze swojimi njeličomnymi partnerami wuběrnje spřihotowało: wobswětlene fasady, swěćace so hwězdy w štomach, widejowe animacije na wjacorych wěžach, młode holcy w frinkolacych kostimach, live-hudźba na hasach a w někotrych wobchodach, swěčki, smólnicy a lěhwowe wohenje atd.

Jedne ze srjedźišćow bě Póstowe naměsto před Serbskim domom. Tu mě­ješe Radijo Satkula jewišćo natwarjene a poskićeše přihladowarjam młodu hudźbu. Tak wustupi z telewizijneho wusyłanja „The Voice kids“ znaty Gabriel Mommer. Wón njespěwaše jenož němsce a jendźelsce, ale tež jako premjeru swój serbski spěw, wšako ma z wowku Majku Kowarjec serbske korjenje. Dale připowědźi moderatorka Katka Pöpelec spěwarja Christopha Cyža. Nimo toho dožiwi serbski a němski publikum modowu přehladku tobołow z módroćišćom a Mühlmannec rejwansku šulu.

Gmejna wuda wjele pjenjez za planowanu nowu zakładnu šulu

Hodźij (CK/SN). Za hłubokotwarske dźěła planuje gmejna Hodźij klětu 947 000 eurow. Twarić chcedźa wjesny wopłóčkowy kanal w Debiškowje (Döbschke). Tež w Njezdašecach (Nedaschütz) stej nowy wopłóčkowy kanal a dróhotwarski projekt předwidźanej. To wuchadźa z naćiska hospodarskeho plana za 2019, z kotrymž je so gmejnska rada na swojim zašłym posedźenju zaběrała. W nim zapřijatych je 259 000 eurow, kotrež chcedźa takrjec přihotowane měć, móža-li ležownosć za nowo­twar zakładneje šule kupić. Jako dochody planuja poł miliona eurow spěchowanskich srědkow, klučowe připokazanki Swo­bodneho stata Sakskeje a dróhotwarske přinoški wobydlerjow. Kaž wjesnjanosta Gerald­ Meyer (njestronjan) rozłoži, so sadźby za ležownostny a přemysłowy dawk klětu njezwyša. Dohromady steji pod smužku deficit 238 000 eurow. Při­wšěm płaći plan jako wurunany, dokelž jedna so při minusu wo wotpisanja za stare zamóženstwo.

Ćežke wobchadne njezbožo sta so wčera popołdnju při Porchowskej wotbóčce awtodróhi A 4. Po wšěm zdaću njekedźbliwosće dla stej tam VW a Audi do so zrazyłoj. Jedne z jězdźidłow wosta hakle na polu stejo. Móžno, zo běchu dołhe rynki čakacych awtow­ do směra na Drježdźany sobu wina, přetož tohodla knježeše při wotbóčce wjace wobchada hač hewak. Foto: Christian Essler

Wudwor (AK/SN). W planowanej nowej bydlenskej štwórći při tankowni w Pan­čicach-Kukowje chce zaměrowy zwjazk za wopłóčki Při Klóšterskej wodźe (AZV) klětu a 2020 wopłóčkowe kanale kłasć. Tale inwesticija je zapisana do hospodarskeho plana za přichodne lěto, kotryž je hišće hač do 8. nowembra zjawnje wu­połoženy.

Zaměrowy zwjazk liči klětu z dochodami 1,671 milionow a z wudawkami 1,663 milionow eurow. Přinošk zwjazkej přisłušacych gmejnow wostanje z dohromady 25 000 eurami konstantny. Z nim financuja te wudawki, kotrež njehodźa so na domjacnosće přepołožić. Po tuchwilnych předstawach ma klětu 8 510 eurow dobytka nastać. Jón chcedźa swojim rezerwam přirjadować.

Zo móhli wobstejace wodočisćernje optimalnišo hladać a trěbne reparatury spěšnišo přewjesć, chcedźa pjateho hladarja techniskich připrawow přistajić. Tak změje zaměrowy zwjazk za wopłóčki potom dźewjeć krutych přistajenych, z nich štyrjoch w zarjadnistwje. Personalne kóšty inkluziwnje socialne wotedawki maja klětu 540 000 eurow wučinjeć.

Stróža. Stawizny Stróže a Lemišowa steja w srjedźišću čitanskeho wječora srjedu, 7. nowembra, w 19 hodź. w Stróžanskim Domje tysac hatow. Tam čita publicist a awtor Sieghard Kozel ze swojeje němskorěčneje knihi, kotraž zaběra so z časom wot prěnjeho wobsydlenja a prě­njeho pisomneho naspomnjenja wobeju wsow hač k přitomnosći. Čitanje zwjaza Sieghard Kozel ze swójskimi dopomnjenkami na wjesne žiwjenje w zašłych sydom lětdźesatkach a kak je so serbska rěčna substanca w tym času změniła. Zastup­ płaći dwaj euraj, potuńšene euro. Zajimcy su wutrobnje přeprošeni.

Wuzwola noweho princa

Njebjelčicy. Serbskopazličanske karnewalowe towarstwo hotuje so na swoju 49. sezonu. Prěni wjeršk budźe 17. nowembra w 19.30 hodź, hdyž w Njebjelčanskej „Bjesadźe“ noweho princa wu­zwola. Zastupne lisćiki za to móža sej zajimcy pola Hübenthalec pod telefonowym čisłom 03578/ 303 505 (wot 17 hodź.) w Serbskich Pazlicach skazać. Zbywace zastupne lisćiki předawaja při wječornej kasy.

Na třěchu wobchoda zalězli

Budyšin. Kedźbnosć mnohich ludźi zdoby sej skupina muži, kotraž je sobotu wječor po wohnjowobornym rěblu na třěchu sportoweho wobchoda na Wonkownej Lawskej zalězła. Tam rozpřestrěchu woni něhdźe 40 metrow dołhi plakat z napisom „UN-Migrationspakt stoppen“. Zo by wón derje widźeć był, zapalichu tak mjenowane bengalo-wohenje. Policija zakroči, zwěsći wot wosom muži w starobje 16 do 31 lět personalije a plakat sćaza.