Drježdźany (dpa/SN). Sakska chce wučerjow nastupajo wobchadźenje z hidu na wukrajnikow na šulach kubłać. Za to chcedźa modelowy projekt „Sylni wučerjo – sylni šulerjo“ rozšěrić, kaž kultusowy minister Christian Piwarz (CDU) wčera w Drježdźanach připowědźi. Koordinatoraj mataj so wo zwoprawdźenje projekta starać. Planowane su nimo toho dalekubłanja wučerjow, zwučowanja a natwar syće z eksternymi podpěraćelemi. Za to přizjewichu za přichodnej lěće 400 000 eurow w dwójnym etaće, kotryž chce Sakski krajny sejm kónc lěta wobzamknyć, Piwarz zdźěli.
Nazymu 1918 bližeše so kónc Prěnjeje swětoweje wójny. Kejžorska Němska bě w tym lěće něhdźe 700 000 wojakow zhubiła. Mjez padnjenymi běchu tež Serbja. Armeje zwjazkarstwa Entente mějachu 210 diwizijow, Němska chětro wosłabjene a materielnje špatnje wuhotowane 207 diwizijow. 8. awgusta 1918 zahajichu armeje Ententy sto dnjow trajacu wulkoofensiwu na zapadźe, z kotrejž stejnišća němskeho wójska přewinychu. Hižo prěni dźeń nadběha Jendźelčanow na sewjerofrancoski Amiens přełamachu dźesatki jich tankow němsku frontu, na kotruž njepřećeljo ze stami kanonow třělachu, po tym z lětadłow bomby mjetachu. 20 000 němskich wojakow tón dźeń padny. Ofensiwa wojakow Ententy zaměrnje postupowaše, jich tanki zadobywachu so dale a hłubšo do němskich stejnišćow. Wojacy kejžorskim generalam přiwołachu, zo chcedźa měr a zo jich zabija, zetkaja-li jich sami.
Praha (ČŽ/K/SN). Swětowy ekonomiski forum (WEF) je konkurencykmanosć 140 krajow zwěsćował. W jeho studiji steji Čěska na 29. městnje, z čimž je so wo dwě polěpšiła. Z něhdyšich socialistiskich krajow je wona zdobom najlěpje placěrowana. Čěska docpě 71,1 dypk ze sto móžnych. Najwyše hódnoćenje maja USA z 85,6 dypkami, sćěhujetej Singapur z 83,5 a Němska z 82,8 dypkami. Přepytowanje konkurencykmanosće wotmě so tónkróć po nowej metodźe, reflektowacej bóle digitalnu transformaciju ekonomije. Studija WEF wujewja, zo zawostawa Čěska na polu optiskeho kontaktowanja z internetom, štož je technologija přichoda. Zakład přirunanja tworješe dwanaće faktorow, wopřijace mjez druhim infrastrukturu, kubłanje, strowotnistwo, efektiwnosć dźěłowych wikow, inowaciju, wulkosć wikow, transparentnosć a wukonliwosć knježerstwa.
Tabulka konkurencykmanosće ma po USA, Singapurje a Němskej slědowacy rjad: 4. Šwicarska, 5. Japanska, 6. Nižozemska, 7. Hongkong, 8. Wulka Britaniska, 9. Šwedska, 10. Danska, 29. Čěska, 37. Pólska, 41. Słowakska, 48. Madźarska.
Radwor (SN/MkWj). Najwjetši infrastrukturny projekt Budyskeho wokrjesa a po wšej Němskej dotal jónkrótne předewzaće su wčera w Radworju zahajili, byrnjež hišće nic oficialnje: wutwar spěšneho interneta. Wobydlerjo běchu na žurlu hosćenca „Meja“ prošeni, zo bychu wo nadrobnosćach předewzaća zhonili. Minjene tydźenje měješe kóždy wobsedźer domu składnosć, za přizamknjenje ze škleńčnonićowym kablom so přizjewić. Zatwar kabla hač do domu njeje za wobydlerjow ze žanymi kóštami zwjazany, su-li so přizjewili. Zwjazk a Sakska wšitko zapłaćitej. Kóšty projekta wučinjeja wjace hač sto milionow eurow.
Wobydlerjo zhonichu wčera tohorunja wo hoberskich dimensijach předewzaća. Tak dyrbja twarske firmy na wjace hač 1 700 kilometrach nowy kabl kłasć, štož wotpowěduje wšej nadróžnej syći wokrjesa. Přizamknyć chcedźa 25 000 domjacnosćow. Do plana přiwzali su tež 117 šulow. Kónc lěta 2020 změja wšitcy wukonity spěšny internetowy přizamk.
Baćoń (CK/SN). Njech sej čłonojo dobrowólneje wohnjoweje wobory mjez sobu pomhaja a so z kóždeho zasadźenja strowi domoj nawróća. Tele přeće hraješe na Božej mši w Baćonju njedźelu wosebitu rólu. Zo w prěnjej ławce ludźo w módrej uniformje wobornikow sedźachu, njebě runjewon wšědne. Třo kameradojo stejachu z chorhoju Hodźijskeje gmejnskeje wobory při dupje. Před 20 lětami běchu chorhoj w Hodźijskej ewangelskej cyrkwi poswjećili, a to na samsnym městnje před dźesać lětami wobnowili. Na wurazne přeće młodych wobornikow wospjetowachu žohnowanje nětko w Baćońskej katolskej cyrkwi.