Z wudaća: srjeda, 05 decembera 2018

Běła Woda (AK/SN). Na swojim zašłym posedźenju zaběrachu so čłonojo Běłowodźanskeje měšćanskeje rady mjez druhim z prašenjom, hač měł so parlament wot 22 na 18 radźićelow pomjeńšić a hač njemóhli tak zaměrnišo dźěłać. „Naše město dale wobydlerjow zhubja. Kónc lěta 2017 mějachmy jich hišće 16 348. Na to měli reagować“, podšmórny radźićel Andreas Friebel z frakcije Klartext w swojim namjeće. Hižo nětko su posedźenja radźićelow lědma raz połnoličbne, dokelž někotři pobrachuja. Andreas­ Friebel tuž měni, zo měli móžnosće, kotrež sakski gmejnski porjad skići,­ nałožować. Wón namjetuje, měšćansku radu na 18 čłonow pomjeńšić. To by, tak Friebel dale argumentowaše, tohorunja „přinošk ke konsolidaciji měšćanskich financow było. Mnohostronskosć měnjenjow by tež w pomjeńšenej měšćanskej radźe zaručena była.“

Nowoslicy. Přichodne posedźenje gmejnskeje rady Ralbicy-Róžant wotměje so jutře, štwórtk, we 18 hodź. w Nowosličanskim kulturnym domje. Na dnjowym porjedźe steja mjez druhim wustawki za Łazkowski puć w Ralbicach. Nimo toho chcedźa lěto 2018 wuhódnoćić.

Pančicy-Kukow. Samsny dźeń w 19 hodź. započnje so posedźenje gmejnskeje rady Pančicy-Kukow. Mjez druhim zaběraja so radźićeljo z nadawkami za ponowjenje postawy swj. Bosćana w Swinjarni a z namjetom za regulowane wjelče pasmo.

Bjez dowolnosće z awtom po puću

Budyšin. Dokelž při wotbočenju z Wo­jerowskeje na Schliebenowu swoje jěz­dźi­dło wokomik w horšći njeměješe, je 20lětny wodźer BMWja póndźelu w Budyšinje policiji napadnył. Jako zastojnikaj za nim jědźeštaj, stupi młody muž na płun a spyta do směra na Židow a Ćemjercy ćeknyć. Na Ćemjerčanskim puću jeho skónčnje zadźeržeštaj. Tam so wukopa, zo 20lětny scyła žanu jězbnu dowolnosć njeměješe. Nimo toho namakachu w jeho awće titku z běłej maćiznu. Dro­gowy test pola njeho pak bě negatiwny.

Před 100 lětami skónči so Prěnja swětowa wójna – z wjace hač 15 milionami mortwych dotal najkrawniša w stawi­znach čłowjestwa. W němskich wójskach – předewšěm w sakskim a pruskim – wojowachu tež tysacy Serbow na bitwišćach na zapadźe a wuchodźe Europy. Jeničce katolski serbski kraj zhubi w surowym boju wulkomocow wjacore sta swojich synow. Hižo krótko po wójnje rozsudźi so tuž tež we Łužicy wjele gmejnow a wosadow, stajić swojim padnjenym pomniki, zo njebychu na jich mjena zabyli. Jedyn z prěnich w serbsko-katolskich gmejnach bě – mjeztym wotstronjeny – Radworski pomnik w meji 1919; bórze slědowachu Miłoćicy a Wotrow (1920), Jawora, Wudwor­ a Njebjelčicy (1921) kaž tež Jaseńca­ a Worklecy (1922). Tež Swi­njarnja, Kukow a Šunow stajichu swojim­ padłym swójske pomniki.

Jónkrótne wuwzaće

Viktoria 1889 Berlin

– Budissa Budyšin 1:0 (1:0)

Zestawa hosći: Schulz – Bär, Patka (55. Mack), Weiß, Kral, Krawčik (70. Treu), Schlicht, Ciapa (82. Wockatz), Merkel, Schmidt, Bönisch

W prěnjej połseriji doma je Budissa Budyšin přećiwo Viktoriji Berlin 2:0 dobyła. We wróćohrě w stadionje Lichter­felde pak bě nadawk za Budyšanow wo wjele ćeši. Tu bě sylna Viktoria mjenujcy jasny faworit, štož wona přez cyłu hru pokaza.

VfL Osnabrück

– FC Energija Choćebuz 3:1 (1:0)

Zestawa hosći: Spahić – Starcew (46. Rangelow), Matuwila, Schneider (46. Scheidhauer), Stein, Weidlich, Gehrmann, Viteritti, Holthaus (78. Beyazit), Schlüter, Mamba

„W prěnim połčasu njejsmy dosć aktiwni byli. Njejsmy sej dypk tuž zasłužili“, rjekny přesłapjeny trenar koparjow FC Energije Choćebuz Claus-Dieter Wollitz po poražce na městnje, na kotrymž je Wollitz něhdy raz dźěłał. A woprawdźe, hosćo z Łužicy su načolnikej 3. ligi prěni połčas přewostajili, tak zo běchu ze zastatkom 0:1 hišće dosć derje posłuženi.

Hakle po přestawce so Energija do hry namaka. Chcyjo wurunanje docpěć pak měješe w škiće wjetše dźěry. Jednu tajku hosćićel wuži a zwyši na 2:0 (82.). To běchu njetrjebawše wrota, dokelž poradźi so Fabijej Viterittijej z přichodnej akciju 2:1 (87.) Znowa chcyše FCE remis, ale wospjet bě přewjele jeho hrajerjow prědku, tuž třěli domjacy cyłk dalše wrota (88.). Tak sydaše njetrjebawša sedma poražka sezony. Georg Zielonkowski