Z wudaća: štwórtk, 10 januara 2019

štwórtk, 10 januara 2019 13:00

Krótkopowěsće (10.01.19)

Flashmob w interneće přistupny

Budyšin. Serbski flashmob w Budyskim Centeru na Žitnych wikach móža sej zajimcy nětko pod www.youtube.com/watch?v=h8z0QIFn3Ak wobhladać. Widejo natočił je Sakski wukubłanski a wupruwowanski kanal. Dotal je sej tam filmčk nimale 2 200 ludźi wobhladało. Wutoru bě ně­hdźe 30 Serbow mjenje abo bóle spon­tanje serbski postrow na njewšědne wašnje do noweho lěto słało.

Za wjac fachowcow we wokrjesu

Zhorjelc. Regionalna fachowa alianca Zhorjelskeho wokrjesa namołwja zajimcow tež lětsa projekty za zdobyće a zawěsćenje fachowcow zapodać. Tak móhli komuny abo dalši nošerjo, kaž na přikład zhromadźenstwa, swoje naprawy pomjenować, kotrež chcyli lětsa we wo­krjesu zwoprawdźić. Srědki pak maja hač do 31. decembra za projekty wužiwać.

Spěchuja přetwar kapałki

wozjewjene w: Krótkopowěsće
štwórtk, 10 januara 2019 13:00

„Skutkowanje jara spomóžne“

Generalna konsulka Čěskeje republiki dr. Meissnerová Łužicu wopytała

Chrósćicy (SN/MiR). Generalna konsulka Čěskeje republiki w Sakskej dr. Markéta Meissnerová wopyta wčera dopołdnja dźěćace dnjowe přebywanišćo „Chróšćan kołć“ kaž tež Serbsku zakładnu šulu „Jurij­ Chěžka“ w Chrósćicach. Konsulka, kotraž bě na přeprošenje Ludmile Buda­rjoweje, předsydki Serbskeho šulskeho towarstwa – wone je nošer dnjoweho přebywanišća – do Łužicy přijěła, zwura­zni: „Štož dźěći w swojich prěnich lětach nazhonjeja, čas žiwjenja w sebi chowaja. Tuž je skutkowanje kubłanišćow na dobro serbskeje rěče a kultury jara spomóžne.“ Pěsto­warske dźěći přednjesechu jej a dalšim hosćom po witanju tři serbske spěwy a zestupachu so k zhromadnemu wobrazej, kotryž chcedźa do rozprawy na internetnej stronje konsulata zapřijeć.

wozjewjene w: Kubłanje
štwórtk, 10 januara 2019 13:00

Rjemjesło a dwě stronce medalje

Kaž kóžde lěto bě tež Zwjazk serbskich rjemjeslnikow a předewzaćelow (ZSRP) loni jara aktiwny. Bianka Šeferowa je so po­la předsydki Moniki Cyžoweje wobhoniła, što ZSRP tuchwilu zaběra. A kaž so wujewi, ma rjemjesło kaž wšo druhe dwě stronce medalje.

Kak posudźujeće połoženje serbskich rjemjeslnikow a předewzaćelow? Hdźe maće ćeže?

M. Cyžowa: Tuchwilu maja wšitcy dosć a nadosć nadawkow. Maja derje pjelnjene knihi a nimaja přičinu skoržić. Přiwšěm je jim ćežko kwalifikowanych fachowcow a docyła wučomnikow nańć. Naše lońše prócowanja njeběchu dotal bohužel wuspěšne.

Zwjazk je w zašłosći zaměrnje na šulach za powołanje w rjemjesle wabił.

M. Cyžowa: Loni so nam to bohužel poradźiło njeje. Planowanu ekskursiju ze šulerjemi Radworskeje wyšeje šule njemóžachmy organizatoriskich přičin ze stron kubłanišća dla přewjesć. Tež zwólniwosć rjemjeslnikow, do šulow hić a wabić, woteběra. Wšako wopruja cyły dźěłowy dźeń. Wulke płody dźě z toho dotal žnjeli njejsu.

Sće loni nowych čłonow w serbskim zhromadźenstwje witać móhli?

wozjewjene w: Rozmołwa
štwórtk, 10 januara 2019 13:00

Namjetuje cyłoserbsku instituciju

Předsyda župy „Handrij Zejler“ Woje­recy­ Marcel Brauman je po wuzwolenju do zastojnstwa wjacekróć připowědźił, zo chce so za to zasadźić serbsku instituciju w srjedźnej Łužicy zaměstnić. Nětko je zamołwitym w załožbowej radźe­ a Domowinje prěni naćisk namje­ta předstajił.

wozjewjene w: Towarstwa
štwórtk, 10 januara 2019 13:00

Europska medalja Budyšanej

Prezident Sakskeho sportoweho zwjazka a zapósłanc Europskeho parlamenta Hermann­ Winkler (2. wotprawa) je dźensa dopołdnja Hanspetera Benada (nalěwo) z Europskej medalju wuznamjenił. Budy­šan skutkowaše wjele lět jako kopar a sudnik. Najebać parkinsonske schorjenje so wón dale čestnohamtsce w kopańcy angažu­je. Znaty je předewšěm za wudawanje nowiny „Einblicke & Ausblicke“, w kotrejž je dotal něhdźe 500 interviewow ze sportowcami ze wšeho swěta wozjewił. Tak přinošuje Benad k mjezynarodnemu zro­zumjenju a připóznaću sprjewineho města, rěka we wopodstatnjenju. Tež za SN je njeličomne sportowe artikle a roz­mołwy spisał. Gratulowali su Benadej toho­runja zapósłanc Marko Šiman (CDU, napra­wo) kaž tež jednaćel a prezident Zapadołužiskeho koparskeho zwjazka Gojko Sinde a Axel Görner (2. a 3. wotlěwa). Foto: SN/Hanka Šěnec

wozjewjene w: Sport
štwórtk, 10 januara 2019 13:00

Hłownu a wólbnu dopřihotowali

Budyšin (kl/SN). Předsydstwo župy „Jan Ar­nošt Smoler“ Budyšin hotuje so na hłownu zhromadźiznu 19. januara w Budyskim Serbskim domje. Na wčerawšim wuradźowanju su čłonojo tuž swoju „hłownu“ dopřihotowali. Na zhromadźiznje, kotraž je zdobom wólbna, maja delegaća župje přisłušnych Domowinskich skupin, towarstwow a dalšich cyłkow zdobom nowe předsydstwo a župana abo županku wuzwolić. Dojednali su so čłonojo předsydstwa na časowy plan a dnjowy porjad zhromadźi­zny. Disku­towali su tohoru­nja wo roz­prawje skutkowanja předsydstwa, kotruž ma tuchwilna županka Jana Pětrowa přednjesć. Zdobom namołwjeja čłonojo předsydstwa angažowanych młodych ludźi, kotřiž su zwólniwi na dobro serbskeje rěče­ zamołwitosć přewzać, so gratu přimać a w župje sobu skutkować. Rozjimali su wčera tež dźěłowy plan, wobsahowacy předewzaća za přichodnej dwě lěće. Jón na hłownej zhromadźiznje předstaja. Mjez druhim chcedźa nalěto znowa dźeń wotewrjenych duri w Njechorńskim Domje Měrćina Nowaka přewjesć a dotalne šulerske projekty dale wjesć.

wozjewjene w: Towarstwa
štwórtk, 10 januara 2019 13:00

May pod časowym ćišćom

London (dpa/SN). Něšto dnjow do wažneho wothłosowanja wo zrěčenju mjez Wulkej Britaniskej a Brüsselom wo wustupje kraja z EU je premierministerka Theresa May poražku poćerpjeła. Na zahajenju pjeć dnjow trajaceje debaty su zapósłancy z wjetšinu rozsudźili, zo ma wona w běhu třoch dnjow alternatiwny plan předpołožić, dyrbjało-li zrěčenje w parlamenće zwrěšćić. Tak steji May pod časowym ćišćom. Wothłosowanje je za přichodnu wutoru předwidźane.

Tsipras chwali sej Merkel

Athen (dpa/SM). Krótko do wopyta zwjazkoweje kanclerki Angele Merkel (CDU) w Athenje je grjekski ministerski prezident Alexis Tsipras zhromadne dźěło z kanclerku pozitiwnje wuzběhnył. „Štož smój rjekłoj, smój tež tak měniłoj. Njemějachmoj nihdy wotpohlad, so mjez sobu zjebać“, rjekny Tsipras grjekskemu telewizijnemu sćelakej OPEN. Merkel wočakowachu dźensa w běhu dnja na dwu­dnjowski oficialny wopyt w Athenje, prěni­ raz po lěće 2014, jako bě Grjekska tak derje kaž bankrotna.

Seehofer před wuběrk dyrbjał

wozjewjene w: Kraj a swět
Thomas Müller (naprawo) wot zwjazkoweho ligista FC Bayern Mnichow je so dźensa do zahajenja poslednjeho treninga w katarskej stolicy Doha z fanami fotografować dał. W běhu dnja chcychu so koparjo zaso do Mnichowa nawróćić. W Kataru je wopyt rekordneho němskeho koparskeho mištra wulku kedźbnosć zbudźił, w Němskej skerje kritiku. Foto: dpa/Peter Kneffel

wozjewjene w: Kraj a swět
štwórtk, 10 januara 2019 13:00

To a tamne (10.01.19)

Runje 50 lět po legendarnym festiwalu Woodstock, na kotrymž běchu hudźbne hwězdy kaž Jimi Hendrix a Janis Joplin wustupili, planuje jedyn z tehdyšich organizatorow, zarjadowanje lětsa wožiwić. Festiwal ma so wot 16. do 18. awgusta we Watkins Glen na sewjeru zwjazkoweho stata USA New York wotměć, 200 kilometrow wot originalneje městnosće Bethela. Na festiwalu w awgusće 1969 wobdźěli so 400 000 ludźi.

Pedal płuna a borzdźidła zaměnił bě 19lětny w sewjerorynsko-westfalskim Kerpenje a je ze swojim 272 PS sylnym awtom do bydlenskeho domu zrazył. Tam přełama murju a wosta na chódbje stejo. Dom, w kotrymž bydli 72lětny, je na zbožo dale wužiwajomny. Młody šofer njeměješe jězbnu dowolnosć ani hišće lěto. Policija trochuje cyłkownu škodu na něhdźe 60 000 eurow.

wozjewjene w: To a tamne
štwórtk, 10 januara 2019 13:00

Sćěhi zymy tež w Sakskej

Kamjenica (dpa/SN). Dale trajace sněhowanje je minjenu nóc tež na sakskich dróhach haćenja a zasadźenja policije zawinowało­. Na awtodróze A 72 stejachu wjacore nakładne awta prěki a podłu. Wobchad haćeše so po dźesać kilometrach, rěčnica policija zdźěli. Po wupra­jenjach sobudźěłaćerja krizoweho centruma su wokrjesy Rudne horiny, Bohotska (Vogtland) a Sakska Šwica wosebje po­trjechene. Na zwjazkowej dróze B 174 mjez Kamjenicu a Marienbergom steješe wjace hač 166 Lkw-jow na jězdni, dokelž hižo dale njemóžachu, policija infor­muje. Podobna bě situacija w Kamjenicy a na zwjazkowej dróze B 95. Hač do połnocy dyrbješe policija tam sta wobchadnych njezbožow z cyłkownje 22 zranjenymi registrować. Wjacore dróhi dyrbjachu powróćenych štomow dla zawrěć. Zdźěla bě tež zymska słužba bjezmócna. W Oberwiesenthalu su namjezny přechod do Čěskeje zawrěć dyrbjeli.

wozjewjene w: Kraj a swět

Serbska debata

nowostki LND