Z wudaća: štwórtk, 10 januara 2019
štwórtk, 10 januara 2019 13:00

Europska medalja Budyšanej

Prezident Sakskeho sportoweho zwjazka a zapósłanc Europskeho parlamenta Hermann­ Winkler (2. wotprawa) je dźensa dopołdnja Hanspetera Benada (nalěwo) z Europskej medalju wuznamjenił. Budy­šan skutkowaše wjele lět jako kopar a sudnik. Najebać parkinsonske schorjenje so wón dale čestnohamtsce w kopańcy angažu­je. Znaty je předewšěm za wudawanje nowiny „Einblicke & Ausblicke“, w kotrejž je dotal něhdźe 500 interviewow ze sportowcami ze wšeho swěta wozjewił. Tak přinošuje Benad k mjezynarodnemu zro­zumjenju a připóznaću sprjewineho města, rěka we wopodstatnjenju. Tež za SN je njeličomne sportowe artikle a roz­mołwy spisał. Gratulowali su Benadej toho­runja zapósłanc Marko Šiman (CDU, napra­wo) kaž tež jednaćel a prezident Zapadołužiskeho koparskeho zwjazka Gojko Sinde a Axel Görner (2. a 3. wotlěwa). Foto: SN/Hanka Šěnec

wozjewjene w: Sport
štwórtk, 10 januara 2019 13:00

Kulowminatije pjaty raz dobyli

Wuhotowar, zarjadowar a organizator šeste­ho haloweho koparskeho turněra Kulow-cup w zymje bě znowa mustwo Kulowminatijow. Wšako bě wone turněr loni dobyło. A zakitowar steješe tónraz zaso na prěnim městnje, po załoženju w lěće 2014 nětko hižo pjaty raz. Dokelž běchu Kulowminatije loni tež lěćnu ediciju dobyli, dyrbja woni lětsa a klětu spočatk lěta wobaj turněraj přewjesć.

W Kulowskej wjacezaměrowej hali hra­­ješe 5. januara wosom cyłkow na 6. zymskim Kulow-cupje w dwěmaj skupinomaj w předkole. Prěnje połfinale mjez Zelenej gardu a WD-40 skónči so 1:2, druhe mjez Dołhej gardu a Kulow­mina­ti­jemi 3:4.

W finalu běchu potom Kulowminatije přećiwo WD-40 z 5:0 wuspěšni.

Kónčny staw 6. Kulow-cupa w zymje:

1. Kulowminatije, 2. WD-40, 3. Dołha garda, 4. Zelena garda, 5. Gut Kickerz, 6. Söffnerojo, 7. Company of Kulow, 8. Wjesni hłupacy Werner Müller

wozjewjene w: Sport
štwórtk, 10 januara 2019 13:00

Nowe trikoty wolejbulistam

Krótko do hód namakachu Pančičanscy wolejbulisća w swojich halowych črijach wosebitu překwapjenku: nowe trikoty. To bě tež trjeba, wšako maja dosć nowačkow, kotřiž dyrbjachu dotal w požčenych abo staršich dresach hrać. Nowe shirty maja toho­runja na rukawje serbske lipowe łopješko. Wosebity dźak słuša předewzaćelej Měrćinej Kralej (nalěwo) z Pančic-Kukowa. Jeho firma GartenArt je hrajerjam jako nowy sponsor tutón hodowny dar zmóžniła. Foto: Metod Šołta

wozjewjene w: Sport
štwórtk, 10 januara 2019 13:00

30 km/h při šuli wotpokazali

Staršiska přirada zakładneje Šule Ćišinskeho w Pančicach-Kukowje wojuje wot lěta 2017 wo to, zo měła so spěšnosć wobchada na statnej Dróze Ćišinskeho blisko kubłanišća na 30 km/h wobmjezować. Wčera připołdnju bu to wotpokazane.

wozjewjene w: Lokalka
štwórtk, 10 januara 2019 13:00

Šulu nutřka dale wutwarjeja

Slepo (AK/SN). Hižo druhi dźeń noweho lěta su někotre rjemjeslniske předewzaća na twarnišću noweho němsko-serbskeho šulskeho kompleksa w Slepom po kónclětnej přestawce ze swojim dźěłom pokročowali. Nětko měrja so tam na nutřkowny wutwar kubłanišća, rozłoži na­woda twarskeho wotrjada Slepjanskeho zarjadniskeho zjednoćenstwa ­Steffen Seidlich na wutornym posedźenju Slepjanskeje gmejnskeje rady. „Nutřkowny wutwar wusměrja so na tepjenje, přewětrjenje, sanitarne připrawy a na cyłu elektriku. Bórze budu samo prěnje špundowanja kładźene“, Seidlich rjekny. Srjedź januara su potom dalše dźěła na wonkownych připrawach předwidźane.

Za sydom losow chcedźa přichodne dny dalše twarske nadawki rozdawać. Tak maja so w sportowej hali wěstotna sćěna, špundowanje, tribuna, zawěški za dźělenje­ hale a zaćěmnjenje zatwarić. W decembru chcedźa šulski centrum potom­ přepodać.

wozjewjene w: Lokalka
štwórtk, 10 januara 2019 13:00

Dosć dźěła za zymsku słužbu

Tež mokry sněh so wotsamo njerumuje. Po tym zo bě zymska słužba wčera rano najprjedy na hłownych dróhach po puću, zo njeby wobchad přejara haćeny był, běchu pozdźišo tež pódlanske puće a kolesowanske šćežki, kaž tule ze Smječkec do směra na Worklecy, na rjedźe. Erik Preißler z Kamjenskeje nadróžneje mištrownje je tam ze swojim Multicarom připołdnju sněh storkał a pućik hnydom ze selu posy­pał. Zawěsće njebě to posledni raz, zo je na tymle městnje tele dźěło wukonjał, bě sej Preißler wčera wěsty. Foto: Feliks Haza

wozjewjene w: Lokalka
štwórtk, 10 januara 2019 13:00

Lisćiki za Krabat budu na předań

Čorny Chołmc (SN/MWj). Štóž chce sej lětuše Krabatowe swjedźenske hry w Čornym Chołmcu wobhladać, trjeba přichodnu póndźelu wjele wutrajnosće. 14. januara mjenujcy započnje so předpředań zastupnych lisćikow, zdźěli producentka Krabatowych swjedźenskich hrow Doris Siebecke z Drježdźanskeje agentury 0351.

Dypkownje wot 8 hodź. budźe na internetnej stronje www.krabat-festspiele.de skazanski formular přistupny. Samsny dźeń wot 10 hodź. móža zajimcy zastupne lisćiki tež pod telefonowym čisłom­ 0351/ 410 79 55 skazać.

Dočasne skazanki, kotrež w Drježdźanskej agenturje e-mailnje pod adresu dóńdu, njebudu wobkedźbowane, Doris Siebecke podšmórny. Nimo toho wona na to skedźbni, zo móže kóžda wosoba maksimalnje wosom­ kartkow skazać. Wšitke dalše informacije­ wo zastupnych lisćikach za Krabatowe swjedźenske hry 2019 kaž tež terminy předstajenjow nadeńdu zajimcy na mjenowanej internetnej stronje.

wozjewjene w: Lokalka
štwórtk, 10 januara 2019 13:00

Štom na kolije padnył

Wo přetorhnjeny železniski zwisk je so nawalena zyma nětko tež w Hornjej Łužicy postarała. Při čarje Biskopicy–Budyšin blisko Žičenja bě so dźensa rano ćežkeho sněha dla štom powróćił a jeho wjeršk na železniske kolije padny. Bórze na to tam ćah předewzaća ODEG do hałzow zajědźe a tčacy wosta. Wjace hač dwaceći sobujěducych dyrbješe dlěši čas w ćahu wutrać, prjedy hač tón zaso wróćo do Biskopic jědźeše. Na zbožo so nichtó njezrani. Hałzy rumować bě wobćežne, dokelž hrožeše strach, zo dalše štomy padnu. Ćahi jězdźachu z Drježdźan jenož hač do Biskopic. Za dalšu jězbu busy zasadźić wjedra dla móžno njebě. Foto: Rocci Klein

wozjewjene w: Lokalka
štwórtk, 10 januara 2019 13:00

Krótkopowěsće (10.01.19)

Flashmob w interneće přistupny

Budyšin. Serbski flashmob w Budyskim Centeru na Žitnych wikach móža sej zajimcy nětko pod www.youtube.com/watch?v=h8z0QIFn3Ak wobhladać. Widejo natočił je Sakski wukubłanski a wupruwowanski kanal. Dotal je sej tam filmčk nimale 2 200 ludźi wobhladało. Wutoru bě ně­hdźe 30 Serbow mjenje abo bóle spon­tanje serbski postrow na njewšědne wašnje do noweho lěto słało.

Za wjac fachowcow we wokrjesu

Zhorjelc. Regionalna fachowa alianca Zhorjelskeho wokrjesa namołwja zajimcow tež lětsa projekty za zdobyće a zawěsćenje fachowcow zapodać. Tak móhli komuny abo dalši nošerjo, kaž na přikład zhromadźenstwa, swoje naprawy pomjenować, kotrež chcyli lětsa we wo­krjesu zwoprawdźić. Srědki pak maja hač do 31. decembra za projekty wužiwać.

Spěchuja přetwar kapałki

wozjewjene w: Krótkopowěsće
štwórtk, 10 januara 2019 13:00

Pokiwaj (10.01.19)

Čita wo kriminalnym padźe

Chrósćicy. Proces mordarstwa dla je w lěće 2000 Hornju Łužicu zaběrał. Lěta po tym, zo bě so Sonnhild I. z Jonsdorfa w Žitawskich horinach bjeze slěda zhubiła, so pad znowa před sudnistwo dósta. Jeje mandźelskeho wobwinowachu, zo bě ju morił. Dlěje hač sydom měsacow sedźeše wón w přepytowanskej jatbje. Ćěło žony pak njenamakachu. Na kóncu muža wuwinowachu. Christian Schultze je insider – prawiznik, kiž so z padom zaběraše a zdobom susod potrjecheneje swójby. Wón so stawiznje pozdźišo jako swobodny spisowaćel znowa wěnowaše. Schultze čita ze swojeje lěta 2013 wušłeje knihi „Weißer Stein – Ein Oberlausitzer Mordprozess ohne Leiche“ hižo jutře, 11. januara, w 19.45 hodź. w Chróšćanskej putniskej hospodźe. Nazajtra, sobotu, w 16 hodź. su dźěći přeprošene, hdyž rěka „Ćeta Monika bajku baje“.

Do horta pohladnyć

wozjewjene w: Pokiwy

nawěšk

nowostki LND