Z wudaća: štwórtk, 10 januara 2019

Slepo (AK/SN). Hižo druhi dźeń noweho lěta su někotre rjemjeslniske předewzaća na twarnišću noweho němsko-serbskeho šulskeho kompleksa w Slepom po kónclětnej přestawce ze swojim dźěłom pokročowali. Nětko měrja so tam na nutřkowny wutwar kubłanišća, rozłoži na­woda twarskeho wotrjada Slepjanskeho zarjadniskeho zjednoćenstwa ­Steffen Seidlich na wutornym posedźenju Slepjanskeje gmejnskeje rady. „Nutřkowny wutwar wusměrja so na tepjenje, přewětrjenje, sanitarne připrawy a na cyłu elektriku. Bórze budu samo prěnje špundowanja kładźene“, Seidlich rjekny. Srjedź januara su potom dalše dźěła na wonkownych připrawach předwidźane.

Za sydom losow chcedźa přichodne dny dalše twarske nadawki rozdawać. Tak maja so w sportowej hali wěstotna sćěna, špundowanje, tribuna, zawěški za dźělenje­ hale a zaćěmnjenje zatwarić. W decembru chcedźa šulski centrum potom­ přepodać.

Čorny Chołmc (SN/MWj). Štóž chce sej lětuše Krabatowe swjedźenske hry w Čornym Chołmcu wobhladać, trjeba přichodnu póndźelu wjele wutrajnosće. 14. januara mjenujcy započnje so předpředań zastupnych lisćikow, zdźěli producentka Krabatowych swjedźenskich hrow Doris Siebecke z Drježdźanskeje agentury 0351.

Dypkownje wot 8 hodź. budźe na internetnej stronje www.krabat-festspiele.de skazanski formular přistupny. Samsny dźeń wot 10 hodź. móža zajimcy zastupne lisćiki tež pod telefonowym čisłom­ 0351/ 410 79 55 skazać.

Dočasne skazanki, kotrež w Drježdźanskej agenturje e-mailnje pod adresu dóńdu, njebudu wobkedźbowane, Doris Siebecke podšmórny. Nimo toho wona na to skedźbni, zo móže kóžda wosoba maksimalnje wosom­ kartkow skazać. Wšitke dalše informacije­ wo zastupnych lisćikach za Krabatowe swjedźenske hry 2019 kaž tež terminy předstajenjow nadeńdu zajimcy na mjenowanej internetnej stronje.

Čita wo kriminalnym padźe

Chrósćicy. Proces mordarstwa dla je w lěće 2000 Hornju Łužicu zaběrał. Lěta po tym, zo bě so Sonnhild I. z Jonsdorfa w Žitawskich horinach bjeze slěda zhubiła, so pad znowa před sudnistwo dósta. Jeje mandźelskeho wobwinowachu, zo bě ju morił. Dlěje hač sydom měsacow sedźeše wón w přepytowanskej jatbje. Ćěło žony pak njenamakachu. Na kóncu muža wuwinowachu. Christian Schultze je insider – prawiznik, kiž so z padom zaběraše a zdobom susod potrjecheneje swójby. Wón so stawiznje pozdźišo jako swobodny spisowaćel znowa wěnowaše. Schultze čita ze swojeje lěta 2013 wušłeje knihi „Weißer Stein – Ein Oberlausitzer Mordprozess ohne Leiche“ hižo jutře, 11. januara, w 19.45 hodź. w Chróšćanskej putniskej hospodźe. Nazajtra, sobotu, w 16 hodź. su dźěći přeprošene, hdyž rěka „Ćeta Monika bajku baje“.

Do horta pohladnyć

10.1.–16.1.2019 Budyski filmowy palast:­

Feuerwehrmann Sam: so 14:00 | nj 12:00, 14:00 a 15:45 Immenhof: nj 14:30 Bumblebee: wšědnje 20:15 (nimo pó) Der Junge muss an die frische Luft: wšědnje 15:45, 18:00 a 20:15 Der kleine Drache Kokosnuss: wšědnje 14:00 (nimo pó a srj) Aquaman w 3 D: wšědnje 19:45 | pj a so 22:45 Mary Poppins’ Rück­keher: wšědnje 17:00 | štw, pj, so a wu 14:45 Der Grinch: wšědnje 16:00 (nimo nj a pó) | nj 17:15 Tabaluga: nj 12:15 | štw, pj a wu 14:00 Spider Man: nj 11:30 100 Dinge: wšědnje 18:00 (nimo nj a pó) Phantastische Tierwesen 2: pj a so 22:30 Mortal Engines: pj a so 22:45

Kino-ekstra: Abgeschnitten: pó 17:15 a 20:15

Wojerowski CineMotion:

Immenhof: nj 14:15 Robin Hood: wšědnje 17:50 a 20:15 | pj a so 22:40 Kalte Füße: wšědnje 14:15 (nimo so a nj), 16:15 (nimo so a nj) a 20:35 (nimo so) | so 14:35, 16:40 a 20:55 | nj 16:30 a 18:30 Aquaman w 3 D: wšědnje 19:30 Aquaman: wšědnje 16:30 | pj a so 22:20 Feuerwehrmann Sam: so a nj 14:30 Der kleine Drache Kokosnuss: wšědnje 14:10 (nimo so) | so 12:50 a 14:45 | nj 12:20 Der Junge muss an die frische Luft: wšědnje 16:00 (nimo so), 18:10 (nimo so) a 20:20 (nimo so) | so 16:35 a 19:00 Juliet, Naked: srj 18:15 Mary Poppins’ Rückkehr: wšědnje 15:10 Bumblebee: pj 22:35 | so 12:45 a 23:15 | nj 12:45 Tabaluga: so 12:40 | nj 12.15 100 Dinge: štw, pj, pó a wu 18:15 Der Grinch: wšědnje 14:30 (nimo so a nj) | so a nj 12:30 Phantastische Tierwelten: pj 22:30 | so 22:55

Při zastanišću znjezbožiła

Błohašecy. Ćežko zraniła je so wutoru rano 58lětna žona při busowym zastanišću w Błohašecach. Wona tam z busa wulěze a chcyše statnu dróhu S 100 přeprěčić, při tym pak njewobkedźbowaše bližace so awto. 18lětna wodźerka Forda nje­móžeše hižo zastać a zrazy do žony. Dyrbjachu ju do chorownje dowjezć.