Z wudaća: srjeda, 20 februara 2019

srjeda, 20 februara 2019 13:00

Krótkopowěsće (20.02.19)

Miliony za wokrjesne dróhi

Kamjenc. Za wuporjedźenje zymskich škodow na dróhach přewostaji Sakska wokrjesej Budyšin 2,8 milionow eurow. To zdźěli dźensa zapósłanc krajneho sejma Alojs Mikławšk (CDU). Tež serbske komuny­ z toho profituja. Tak dóstanu Pančicy-Kukow 35 300 eurow, Chrósćicy 30 600, Njebjelčicy nimale 30 000 eurow, Ralbicy-Róžant 25 000 a Worklecy ně­hdźe 18 000 eurow, kaž z Kamjenskeho běrowa zapósłanca rěka.

Nowa spěchowanska směrnica

Drježdźany. Sakske knježerstwo je na swojim póndźelnym posedźenju wobzamknyło, směrnicu za spěchowanje sporta w swobodnym staće ponowić. Hladajo na „demografisku změnu, globalizaciju a hinaše žiwjenske wobstejnosće“ chcedźa zjawny sport přichodnje „fleksibelnišo a mjenje běrokratisce“ podpěrać. Lětsa inwestuja dohromady 60,3 miliony a klětu 59 milionow eurow.

Statysacy galaksisow wotkryli

wozjewjene w: Krótkopowěsće
Kulowski karnewal wšudźe z połnej paru přihotuja. Tež na wjacorych serbskich wsach mjez druhim w Konjecach, Nowoslicach, abo kaž na wobrazu w delnich Sulšecach, twarja młodostni – mjez nimi Mikławš Korch, Markus Brösan a Jonatan Brězan (wotlěwa) – pilnje temowe wozy za wulki róžowopóndźelny póstniski ćah. Sulšečanska młodźina poda so lětsa hižo 23. króć ze swójskim wozom do Kulowa. Foto: Feliks Haza

wozjewjene w: Łužica

Budyšin (SN/bn). Składnostnje róčnicy zasozjednoćenja Němskeje před 30 lětami planujetej towarstwo Kamjentny dom a młodźinske dźiwadło Serbskeho gymnazija Budyšin w Němsko-Serbskim ludowym dźiwadle zhromadnu produkciju. Na zakładźe wěrnosći wotpowědowaceho podawka ma nastać scenarij, kotryž wotbłyšćuje stawizny młodeje rockoweje skupiny w NDR. Najprjedy přewažuja ekscesiwne swjedźenje a imita- cija wulkich, často zapadnych idolow. Poněčim­ pak je hudźbnikam žiwjenje w realnje eksistowacym socializmje přewuske. Tohodla počinaja wo tym rozmyslować, do ZRN ćeknyć.

Wot spočatka měrca chcedźa sobuskutkowacy hru we wobłuku prawidłownych dźěłarničkow nazwučować. Nimo kónctydźenskich terminow wotmějetej Kamjentny dom a NSLDź dohromady tři probowe lěhwa w lětnich, nazymskich a zymskich prózdninach. Režiju wukonja nawoda młodźinskeho dźiwadła Měrko Brankačk. Inscenacija, kotrejež dźěłowy titul rěka „Prěki – durich – loborka“, ma hru, reju a hudźbu wopřijeć.

wozjewjene w: Kultura
srjeda, 20 februara 2019 13:00

Nastupja po cyłym wokrjesu

Serbske wolerske zjednoćenstwo kandidatow nastajiło

Pančicy-Kukow (SN/MWj). Znajmjeńša z jednym zastupjerjom měło Serbske ­wolerske zjednoćenstwo (SWZ) do ­přichodneho Budyskeho wokrjesneho sejmika zaćahnyć. To je takrjec minimalny cil wot wšitkich stron njewotwisneho cyłka. Takle zwurazni Měrko Šmit zaměr skupiny, kotraž je wčera w twarjenju zarjadniskeho zwjazka Při Klóšterskej wodźe w Pančicach-Kukowje swojich kandidatow za wólby 26. meje nastajiła. Najwažniši wuslědk je, zo je so poradźiło we wšitkich 14 wólbnych wo­krjesach swójskich kandidatow nastajić.

wozjewjene w: Kraj a swět
srjeda, 20 februara 2019 13:00

Připóznaće za kolesowarske tury

Dowolnicy we Łužicy prašeja so za dale a wjace kolesowanskimi móžnosćemi. Łužiscy turistikarjo su tuž wužadani a reaguja z naprawami.

Zły Komorow (AK/SN). Dźeń a wjetšeho naprašowanja za poskitkami kolesowanja dla chce turistiski zwjazk Łužiska jězorina zajimcow sylnišo do kraja jězorow wabić. „Tohodla smy so rozsudźili nimale rozebranu brošurku k jězorinowej čarje znowa nakładować“, podšmórnje zamołwita za zjawnostne dźěło a marketing zwjazka Katja Wersch. „Kolesowarjam přichileni poskićerjo přenocowanjow, gastronomojo­ a přenajerjo kolesow podłu­ čary kaž tež poskićowarjo kolesowanskich pućowanjow móža so nětko wo zapis do njeje prócować.“

wozjewjene w: Hospodarstwo
srjeda, 20 februara 2019 13:00

Wuknu wěcy wuporjedźeć

Prawidłownje kóždu druhu wutoru měsaca wuhotuja w ateljeju Budyskeho Kamjentneho­ domu zhromadnje z towarstwom Ganzmacher dźěłarničku „Elektro & technika“. Tam pokazuja młodym zajimcam wot sydom lět pod nawodom nazhonitych fachowcow po hesle „Reparować město preč mjetać“, kak hodźa so skón­cowane nastroje wuporjedźeć. Zawčerawšim dźiwaše so młody Verian-Tadeus, zo maćerne žehlidło po poměrnje njekomplikowanej procedurje Reinera Klatty a Dietera­ Kunzy (wotlěwa) zaso bjezporočnje dźěła. Nimo elektrotechniki poskićatej towar­stwje tež kursy mechaniki a jězdźidłow. Foto: SN/Maćij Bulank

wozjewjene w: Łužica
srjeda, 20 februara 2019 13:00

Dźe wo tarify

Kamjenc (SN/JaW). Baterijowa twornja Deutsche Accumotive w Kamjencu a dźěłarnistwo IG metal stej wčera jednanja wo tarifowych zrěčenjach zahajili. Kaž zdźěli dźěłarnistwowa sekretarka Eileen Müller wuchodosakskeje wotnožki IG metal w Budyšinje, stej sej stronje přezjednej, stejnišćo w Lessingowym měsće skrućić a na přichod wu­směrić. „Předstawy wobeju partnerow pak su hišće daloko wot so zdalene“, rěka w nowinskej zdźělence. „Ćim bóle zwjesela, zo móžachmy so na to dojednać, spěšnje a bjez haćenjow jednać. Dalše tři jednanske terminy we wotstawku maksimalnje dweju do třoch tydźenjow su hižo jasne“, rjekny prěni społnomócnjeny dźěłarnistwa za wuchod Sakskeje Jan Otto.

wozjewjene w: Hospodarstwo
srjeda, 20 februara 2019 13:00

China Tibet zawrěła

Peking (dpa/SN). Krótko do 60. róčnicy ćeknjenja dalaija-lamy z Tibeta je knježerstwo Chiny jězby wukrajnikow do regiona zakazało. Hakle po 1. aprylu su tajke zaso dowolene, zdźěleja dźensa wjacore dowolowe agentury. Stajnje do wažnych politiskich zetkanjow a róčnicow njeje turistam z wukraja dowolene region wopytać. Wjac hač sto Tibećanow je so minjene lěta protesta přećiwo politice chinskeho knježerstwa dla samych zapaliło. Tajkich hrózbnych wobrazow so kraj boji.

Znowa rekord docpěli

Frankfurt n. M. (dpa/SN). Najebać mjenje eksportow kónc lěta 2018 je němska elektroindustrija dalši rekord docpěła. Tak je hódnota jeje eksportow wo pjeć procentow na nětko 211,9 miliardow eurow rozrostła, zdźěla centralny zwjazk elektroindustrije w Frankfurće nad Mohanom. To je pjaty rekord w minjenych pjeć lětach. Najwažniši wuwozny kraj wostanje China. Na druhim městnje slěduja USA.

Wójsko za swětnišćo wutworić

wozjewjene w: Kraj a swět
Po tym zo bě so wčera w šwicarskim sněhakowanišću Crans-Montana wjacore sta metrow šěroka lawina na pistu pušćiła, pytachu pomocnicy hórskeje wuchowanskeje słužby cyłu nóc za móžnymi woporami. Štyrjoch ludźi su krótko po lawinje ze sněha wuchowali. Kaž policija dźensa zdźěli, njeje mjeztym nichtó dalšich zhubjenych přizjewił. Foto: pa/Denis Mentha

wozjewjene w: Kraj a swět
srjeda, 20 februara 2019 13:00

To a tamne (20.02.19)

Nimo je zhromadne hońtwjerske wjeselo. Dokelž je pos z třělbu na hajnika třělił, ma to nětko sćěhi za 74lětneho. Wón dyrbi swoje hońtwjerske wopismo wotedać, dokelž njeje třělbu zawěsćenu měł. Jako so z wuchodźowarku rozmołwješe, je so jeho pos w awće z hońtwjerskej třělbu hrajkał, na hajnika třělił a jeho tak na ruce zranił.

Po turbulentnej jězbje z pokradnjenym awtom sam telefonisce pola policije přizjewił je so chětro natutkany 24lětny w badensko-württembergskim Ludwigsburgu. Po wšěm zdaću je sej potom tola hinak přemyslił a so radšo zminył. Policija muža na to pytaše a namaka jeho skónčnje doma w bydlenju. Bjez jězbneje dowolnosće bě młody muž z awtom runjewon přez kružny wobchad jěł, do parkowaceho awta zrazył a na to do štoma, doniž jeho sćěna domu njezadźerža.

wozjewjene w: To a tamne

Serbska debata

nowostki LND