Paduchaj w kupnicy
Pančicy-Kukow. Mužej w starobje 36 a 37 lět składźeštaj sej zawčerawšim připołdnju w Pančičansko-Kukowskej kupnicy wšelake twory do toboły a chcyštaj wobchod bjez płaćenja wopušćić. Kedźbliwy swědk to wobkedźbowaše a jeju zadźerža. Georgičanomaj pak so poradźi twochnyć a do Peugeota z pólskim čisłom zalězć. Runje w tym wokomiku přijědźechu mjeztym alarmowani policisća a podhladneju nachwilnje zajachu. W jeju awće namakachu dalšu rubiznu, mjez druhim palenc a słódčizny. Nětko dyrbja zwěsćić, z kotrych padustwow wěcy pochadźeja a hač staj podhladnaj dalše delikty skućiłoj.
Rakecy (JK/SN). Kasy Rakečanskeje gmejny běchu spočatk lěta tak derje pjelnjene kaž hižo dawno nic. Dobry milion eurow likwidnych srědkow móžeše nawodnica financneho wotrjada Franziska Pfeiffer w swojej rozprawje wo spjelnjenju lońšeho hospodarskeho plana gmejnskej radźe wčera wupokazać.
Wjacore lěta so wjesne towarstwo Miłočanska žaba prócuje, baćonjace hnězdo na kromje wsy blisko přemysłoweje přestrjenje ponowić. Drjewjany sćežor bě hižo chětro nachileny a po lětach wužiwanja prosće přetrjebany. Z pomocu spěchowanskeho towarstwa za přirodu Hornjołužiskeje hole a hatow z Mikowa je so lětsa skónčnje poradźiło tutón projekt zwoprawdźić.
Stary sćežor smy dospołnje wotstronili, a na samsne městno stajichmy nowy betonowy. Jako podłohu za hnězdo zasadźichmy lochke potrjebane aluminijowe koleso, z witkami wobwite a ze šmrěkowymi hałzami wukładźene. Na konstrukciju přińdźe hišće dźěl stareho hnězda, tak zo je nětko wšitko za přichodnu hnězdźensku dobu přihotowane. Nowe baćonjace hnězdo a betonowy sćežor płaćitej dohromady něhdźe 2 000 eurow, štož zaruna sakske ministerstwo za wobswět a ratarstwo ze spěchowanskimi srědkami.
Miłočenjo nětko čakaja, zo so „jich“ baćony nawróća. W minjenych lětach bě to stajnje něhdźe poslednje dźesać dnjow měrca. Baćony hnězdźa w Miłoćicach mjeztym wot lěta 1994. Hubert Šwejda
14.3.–20.3.2019 Budyski filmowy palast:
Escape Room: wšědnje 20:15 Asterix und das Geheimnis des Zaubertranks: wšědnje 16:00 | štw, so, nj a wu 14:15 Captain Marvel w 3 D: wšědnje 16:45 a 19:45 | štw, so, nj a wu 13:30 | pj a so 22:45 Ostwind: wšědnje 15:30 | štw, so, nj a wu 13:15 Hard Powder: wšědnje 20:00 (nimo pó a wu) Mia und der weiße Löwe: pj a nj 18:00 Drachenzähmen leicht gemacht w 3 D: nj 11:15 Drachenzähmen leicht gemacht: wšědnje 17:45 (nimo wu | wu 18:00 Chaos im Netz: nj 11:45 The Lego Movie: nj 11:00 Alita: Battle Angel w 3 D: pj a so 22:30 100 Dinge: so 22:30 Der Junge muss an die frische Luft: štw, so, pó a srj 18:00 Glass: pj 22:30
Kino-ekstra: Gegen den Strom: pó 20:15
Wojerowski CineMotion:
Asterix und das Geheimnis des Zaubertranks: wšědnje 14:00 a 17:45 | so a nj 12:10 Head full of Honey: srj 19:45 Captain Marvel w 3 D: wšědnje 15:55, 18:25 a 20:00 | pj a so 22:35 Escape Room: wšědnje 20:55 | pj a so 23:00 Captain Marvel: nj, pó a wu 19:45 Beautiful Boy: srj 17.15 Ostwind: wšědnje 15:30 | so a nj 13:15 | nj, pó a wu 17:30 Drachenzähmen leicht gemacht: srj 15:00 | nj, pó a wu 15:15 Mia und der weiße Löwe: nj 13:00
Budyšin (SN). W sprjewinym měsće je so loni wjace přemysłowych zawodow přizjewiło hač wotzjewiło. Samsny bě zjaw nastupajo hosćency. To wuchadźa ze statistiki za zašłe lěto, kotruž je měšćanske zarjadnistwo nětko předpołožiło. Po tym zličichu 255 přemysłowych přizjewjenjow, ale jenož 237 wotzjewjenjow. Štóž raz w měsće rady derje pojě abo słódnu kapku wupije, smě so tohorunja wjeselić, přetož wot zjawa mrěća hosćencow Budyšin potrjecheny njeje. Loni drje je so 13 hosćencarjow wotzjewiło, za to pak 14 nowych přizjewiło.
W lěće 2018 je so 362 dźěći narodźiło. Po dotalnym wjeršku lěta 2016 drje je ličba porodow dale na wysokim niwowje, wona pak njedosaha deficit mjez nowonarodźenymi a zemrětymi wurunać. Aktualnje bydli w Budyšinje 39 631 ludźi. Ličba drje dale woteběra, ale spad wučinja mjenje hač jedyn procent.
Kopata połna wjacezaměrowa hala na Budyskim Třělnišću bě hłownemu organizatorej kóždolětneje politiskeje popjelneje srjedy, serbskemu zapósłancej CDU w Sakskim krajnym sejmje Markej Šimanej, dopokaz, zo měješe zbožownu ručku při přihotach: Lětsa bě so zwjazkowy minister za strowotnistwo Jens Spahn jako rěčnik připowědźił.
Tróšku sćerpnosće wšak wopytowarjo lětušeje mjeztym 27. politiskeje popjelneje srjedy sakskeje CDU trjebachu. Dobre 20 mjeńšin dyrbjachu na zahajenje zarjadowanja čakać. W tym času so minister Jens Spahn zhromadnje z Markom Šimanom demonstrantam wěnowaše, kotřiž před halu z transparentami a hwižkami přećiwo přiběracej běrokratiji w strowotnistwje protestowachu. Na plakatach sej woni žadachu: „Wjace chwile za pacientow“ abo „Nic za pisanskim blidom, ale při łožu choreho“. Minister Spahn je demonstrantam, kotřiž dyrbjachu dlěje hač hodźinu w šćipatym wětřiku čakać, pomoc přilubił.
SG Sonnenhof Großaspach
– FC Energija Choćebuz 0:0
Zestawa hosći: Rauhut – Weidlich, Müller, Matuwila, Schlüter, Bohl, Gjasula, Hemmerich, Marcelo, Viteritti (91. Geisler), Mamba
Móžemy so wadźić, hač běštej hrě koparjow FC Energije w Kaiserslauternje a Rostocku, hdźež swjećachu Choćebuženjo dwójce dobyće 2:0, wobhladanjahódnej. Wěste pak je, zo słuša předstajenje pola SG Sonnenhofa Großaspach na kóždy pak ke kwalitatiwnje lěpšim, kotrež su woni w běhu sezony dotal prezentowali. Ze spěšnych kombinacijow hižo ze škita sem nastachu strašne nadběhi. Wjac pak bohužel nic, dokelž měješe nadběhowar Streli Mamba chětro špatny dźeń. Najlěpše šansy (18., 34., 44. 80.) njemóžeše wón wužić. Tež Marcelo de Freitas (74.) a Fabio Viteritti (38.) to lěpje činiłoj njejstaj.
Tak zwosta po jednostronskej partiji dosćčinjenje, zo njeje so mustwo FC Energije Choćebuz w boju wo zestup hišće podało.
FC Energija Choćebuz
– SC Preußen Münster 3:0 (3:0)
Zestawa domjacych: Rauhut, Weidlich, Matuwila, Müller, Schlüter, Bohl, Gjasula, Rangelow (73. Hemmerich), Marcelo (82. Holthaus), Viteritti (68. Geisler), Mamba