Z wudaća: póndźela, 18 měrca 2019

póndźela, 18 měrca 2019 13:00

Krótkopowěsće (18.03.19)

Wulki zajim za olympiadu

Budyšin. 94 šulerjow je so za lětušu centralnu olympiadu serbšćiny přizjewiło, 24 wjace hač loni. W Delnjej Łužicy su ličbu zajimcow porno lońšemu na 38 podwojili. Wjetšina hornjoserbskich šulerjow – w cyłku 37 – su maćernorěčni, kaž Serbske šulske towarstwo jako zarjadowar olympiady zdźěla. SŠT so nad přiběra­cym zajimom šulerjow za centralne wurisanje wot 8. do 10. apryla jara wjeseli.

Maywald nowy nawoda

Ralbicy. Michał Maywald ze Šunowa je nowy nawoda dobrowólnych wohnjowych woborow gmejny Ralbicy-Róžant. 27lětneho, kotryž dźěła jako wobornik w Hamorskej milinarni, su gmejnscy wobor­nicy sobotu na wólbnej zhromadźiznje w Ralbicach jako jeničkeho kandidata jednohłósnje wuzwolili. Jeho zastu­puje Achim Měrćink z Ralbic, kiž bě wot lěta 2007 šef delanskich wohnjowych woborow.

Šiman mjez potrjechenymi

wozjewjene w: Krótkopowěsće
Bettina Borcherding z hessenskeho Rahdena je jedna z dobyćerkow lětušeho 66. wubědźowanja wo najrjeńše serbske jutrowne jejko. Rodźena Budyšanka zdoby sej prěnje městno w jednobarbnym wóskowanju a druhe městno we wjacebarbnym debjenju tuteje techniki. Nimo hłownych mytow spožči Spěchowanski kruh za serbsku ludowu kulturu dohromady tři připóznawanske a pjeć spěchowanskich mytow. Naprawo widźiće bosěrowane jutrowne jejko. (Čitajće dale na 4. stronje.)SN/Hanka Šěnec

wozjewjene w: Kultura
póndźela, 18 měrca 2019 13:00

46 mytow kiwa projektam za žiwu dwurěčnosć

Wuměnjenja so wobdźělić kaž tež požadan­ski formular za wubědźowanje wo ideje we wobłuku „Sakskeho fondsa Čiń sobu“ su wot pjatka w interneće přistup­ne. Zaměr je, strukturnu změnu w srjedźoněmskim a łužiskim rewěrje z idejemi wobydlerjow wudospołnić. K třom po­wšitkownym kategorijam wuwoła Sakska we Łužicy wosebitu štwórtu „Łužica – žiwa dwurěčnosć“.

Budyšin (SN/at). Za wobłuk łužiskeho rewě­ra je z wuměnjenjom, zo zapodawarjo wubědźowanskich projektow w Bu­dyskim abo Zhorjelskim wokrjesu by­dla. Móža to wobydlerjo być, kotřiž su 18. žiwjenske lěto zakónčili, runje tak kaž zastu­pjerjo zjawneho towaršnostneho žiwje­nja. Postajene tež je, štó njesmě so wobdźělić. Wuzamknjene su mjez druhim strony a wolerske skupiny, ale tež „přirodne a juri­stiske wosoby, kotrychž ideologiske, po­litiske abo nabožne wu­směrjenje cilej a wobsahej wubědźowanja njewotpowěduje“.

wozjewjene w: Hospodarstwo
póndźela, 18 měrca 2019 13:00

Čłonojo jury pomjenowani

Zaměrnje za wobdźělenje na sakskim wubědźowanju wabić

Chrósćicy (SN/JaW). Zwjazkowe před­syd­stwo Domowiny je minjeny pjatk w Chró­sćicach čłonow jury za wubědźowanje „Sakskeho fondsa Čiń sobu“ za strukturnu změnu w kategoriji „Łužica – žiwa dwurěčnosć“ pomjenowało. Župu „Jakub Lorenc-Zalěski“ zastupuje w jury Manfred Hermaš, Wojerowsku župu „Handrij Zejler“ Sonja Hrjehorjowa, Kamjensku župu „Michał Hórnik“ Wendelin Brězan a Budysku župu „Jan Arnošt Smoler“ Leńka Thomasowa. Nimo nich přisłušataj gremijej zastupnikej Rady za serbske naležnosće Sakskeje a Załožby za serbski lud. Serbska rada bě hižo štwórtk swoju předsydku Marju Michałkowu nominowała, tak ma jenož hišće załožba swojeho zastupnika pomjenować.

wozjewjene w: Towarstwa
póndźela, 18 měrca 2019 13:00

Zahaja digitalnu ofensiwu

Dale a wjac ludźi pyta w interneće za turisti­skimi poskitkami. Turistiski zwjazk Łužiska jězorina poskićerjow tuž pohonja prezentni być. Nětko zahaja­ za to digitalnu ofensiwu.

Zły Komorow (AK/SN). Mjezy přesahowacy turistiski zwjazk Łužiska jězorina chce posłužbarjow na polu turistiki pohnuć nowe medije wužiwać. Za to chcedźa zamołwići na druhim turistiskim dnju 26. měrca w Ranju z akciju „Naši hosćo­ su online – a wy?“ zaměrnje wabić. Narěčani su hosćencarjo, mějićeljo pensijow, hotelownicy kaž tež wólnočasni a kulturni poskićerjo. „Runje tak su to zastupjerjo­ komunow“, podšmórny jednaćelka turistiskeho zwjazka Kathrin Winkler na nowinskej rozmołwje minjeny tydźeń.

wozjewjene w: Hospodarstwo

Budyšin (CS/SN). Dźenikowe zapiski su něšto jara hódne. Wone swědča wo tym, što je čłowjek we wokomiku po­dawka myslił a začuwał. Po premjerje wudaća „Leben im Zwiespalt I“ w swojim nowym domizniskim měsće Drježdźanach je serbski basnik Benedikt Dyrlich swoje memoiry wčera w Budyskim Dźiwadle na hrodźe we wobłuku rjada „Łužiska literatura dopoł­dnja“ předstajił. Kaž Dyr­lichowy lektor Pětr Thiemann rjekny, su za­piski basnika hłownje serbsce na­pisane. Z prof. Die­trichom Šołtu, wjelelětnym přećelom a přewodźerjom, nańdźechu přełožowarja do němčiny, kiž je tekst na wuběrne wašnje a adekwatnje pře­njesł. Tak su Dyrlichowe zapiski šě­ro­kemu kruhej publikuma přistupne.

wozjewjene w: Kultura
póndźela, 18 měrca 2019 13:00

Proces morjenja dla zahajeny

Drježdźany (dpa/SN). Sydom měsacow po smjertnym nadpadźe z nožom w Kamjenicy je so dźensa na Drježdźanskim krajnym sudnistwje proces přećiwo jednomu z podhladneju zahajił. Ze Syriskeje pochadźacy wobskorženy dyrbi so morjenja dla zamołwić. Wón je 35lětny wopor w awgusće 2018 zhromadnje z dalšim podhladnym, kiž přeco hišće ćěka, pječa zakłół. Njeskutk bě w Kamjenicy přećiwo wukrajnikam měrjace so protesty a namócnosće zbudźił.

Brexit: Zaso wothłosować

London (dpa/SN). Britiske knježerstwo chcyše so dźensa k dalšemu wothłosowanju wo z Brüsselom wujednanym zrěčenju wo wustupje kraja z Europskeje unije wuprajić. Premierministerka Theresa May bě připowědźiła, najpozdźišo hač do srjedy wo zrěčenju w parlamenće wothłosować dać. Při tym dźe wo to, hač chcyła Wulka Britaniska Brüssel wo to prosyć, termin brexita přestorčić, zo móhli nadrobnosće zrjadować. W Brüsselu wšak na to kritisce zhladuja.

Knježerstwo zmylki přiznało

wozjewjene w: Kraj a swět
Do wobkuzłaceje pisaneje instalacije je Choćebuski wuměłc Jörn Hanitzsch minjeny pjatk a sobotu wječor Choćebuske Stare wiki přetworił. Za to bě wón 600 metrow swěcoweje hadźicy składł, z čehož nasta 14 wosebitych skulpturow, přeprošacych wuchodźowarjow k wobhladanju: Swjatki chce Hanitzsch podobnu nócnu akciju w zwěrjencu přewjesć. Foto: Michael Helbig

wozjewjene w: Kraj a swět
póndźela, 18 měrca 2019 13:00

To a tamne (18.03.19)

W awće na kromje dróhi dźěćo porodźiła je žona we wuchodnej Hessenskej. 28lětna bě wčera po puću do chorownje, jako dósta sylne hrona. Tak muž na kromje zwjazkoweje dróhi B 84 pola Hünfelda zasta. Policija wodźeše wobchad nimo awta, nuzowy lěkar při porodźe pomhaše. Mać a hólčk Feliks staj strowaj. Tež nan je wšitko derje přetrał.

W cuzym domje wusnyłoj staj sej wopitaj młodostnaj w saksko-anhaltskim Halberstadće. Na dompuću z party běštaj so zabłudźiłoj. Jedyn z njeju widźeše wote­wrjene durje terasy a dźěše do ćopłeho bydlenja. Tamny sej na stólcu na zahrodźe wusny. Jako wobsedźer domu jeju wuhlada, zawoła policiju. Zastojnicy su 16lětneju na to domoj pósłali.

wozjewjene w: To a tamne
póndźela, 18 měrca 2019 13:00

Zaměrnje dale do turizma inwestować

Hamor (AK/SN). Zaměrowy zwjazk Łužiska jězorina Sakskeje chce lětsa za najwšelakoriše naprawy cyłkownje 926 000 eurow nałožić. Swójski podźěl při tym wučinja 184 00 eurow. To wuchadźa z hospodarskeho plana, kotryž su radźićeljo zwjazka na posedźenju minjeny tydźeń jednohłósnje wobzamknyli. „Swójski podźěl financujemy z likwidnych srědkow“, wuzběhny jednaćel zaměroweho zwjazka Daniel Just tele dny w turistiskim infocentrumje Hamor.

Najwjetša naprawa je předwidźana při Lejnjanskim jězorje, hdźež ma wotpočnišćo wodowych sportowcow nastać. Za to chcedźa 459 000 eurow z etata přewostajić. Něhdźe 71 000 eurow tu swójski podźěl wučinja. Planowane su přenocowanske móžnosće, rumnosće za Wodosportowe towarstwo Lejnjanski jězor, rumnosće za wodoškitnu policiju kaž tež sanitarne připrawy.

Dalša naprawa, kotraž zamołwitych zaběra, je projekt krajnych značkow. Dale pokročować chcedźa hač do lěta 2020 tež ze systemom pućnikow. W hospodarskim planje zwjazka je za to 211 000 eurow zakótwjenych.

wozjewjene w: Hospodarstwo

Serbska debata

nowostki LND