Budyšin (SN/MiR). Budyšan Lucian Kaulfürst je wuwił koncept za hudźbny projekt w dźěćacych dnjowych přebywanišćach, kotrež su w nošerstwje Miłočanskeho Křesćansko-socialneho kubłanskeho skutka (CSB). Na zakładźe swojich idejow chce wón dźěćom předewšěm serbske dźěćace a ludowe spěwy nawučić a zmóžnja jim na zwukowych instrumentach hrać. „Zaměr mojeho koncepta je, hudźbne spěchowanje dźěći w pěstowarnjach podpěrać. Z terapeutiskeho wida chcu jim pokazać, kak móža swoje zajimy přesadźić a hdźe maja na druhich kedźbu dać“, hudźbny terapeut za wosebitu pedagogiku, rehabilitaciju a socialne dźěło Lucian Kaulfürst rozłožuje. Wot spočatk apryla je wón kóždu wutoru rano w Budyskej pěstowarni „Jan Radyserb-Wjela“, hdźež z dźěćimi Zmijoweje, Krabatoweje a Pumpotoweje skupiny spěwa, hudźi a hry hraje. Kompletny poskitk wotměwa so serbsce. Na to dojědźe sej do Pančic-Kukowa, hdźež dźěła z dźěćimi tamnišeje Witaj-skupiny.
Sakska rozmołwa w Kamjencu
Kamjenc. Sakska rozmołwa z ministerskim prezidentom Michaelom Kretschmerom (CDU) wróći so 29. apryla do Budyskeho wokrjesa. W Kamjenskim Lessingowym gymnaziju nochcedźa so wón a dalši čłonojo kabineta jenož z wobydlerjemi rozmołwjeć, ale zdobom wotbłyšćować, što je so po prěnim tajkim zarjadowanju změniło a hdźe je hišće dalša potrjeba jednać.
Woblubowana hrajka za slepych
Mnichow. LEGO skupina a załožba stej zhromadnje ze wšelakimi zwjazkami za slepych Braille-pismo na kamuški za hrajkanje přenjesłoj. Wot lěta 2020 móža potrjechene slepe abo mało widźace dźěći kamuški z podpěru wubranych organizacijow bjezpłatnje dóstać. Předwidźane je, 250 wšelakich kamuškow produkować. Zaměr naprawy je, potrjechene dźěći při čitanju spěchować.
Spočatny podhlad njepředleži
Drježdźany/Budyšin/Wojerecy (SN/at). Tarifowe jednanja w sakskim bliskowobchadźe njepostupuja. Přičina to dźěłarnistwu ver.di, so hišće doraznišo za docpěće swójskich žadanjow nastupajo zwyšenje mzdy zasadźeć. Dźěłarnistwo je dźensa za jutře, štwórtk, dalši warnowanski stawk w regionalnym a bliskowobchadźe Sakskeje připowědźiło. Dźěłowy bój budu rano w dwěmaj zahajić. Wón ma 24 hodźin trać. W Hornjej Łužicy su linijowy wobchad předewzaća Regionalbus Hornja Łužica (RBO), Wojerowskeje wobchadneje towaršnosće (VGH) a Wozydłownistwoweje towaršnosće krajowy třiróžk Žitawa-Lubij (KVG) potrjechene.
Budyšin (SN/mwe). Město Budyšin chce po swojich indiwidualnych móžnosćach požadanje wulkeho wokrjesneho města Žitawa wo titul „Kulturna stolica Europy 2025“ podpěrać. Měšćanscy radźićeljo tomu přihłosuja, zo Budyski wyši měšćanosta Alexander Ahrens (SPD) ze Žitawskim wyšim měšćanostu Thomasom Zenkerom (Žitawa wjace móže) wotpowědne zrěčenje podpisa. „To je dobry puć za region, smy jako město Budyšin derje poradźowani, so na tym wobdźělić“, Heiner Schleppers (CDU) na njedawnym posedźenju měšćanskeje rady zwurazni.
Město nad Sprjewju widźi w požadanskim procesu a hladajo na lěto europskeho kulturneho města w Hornjej Łužicy šansy towaršnostneho, kulturneho kaž tež turistiskeho wuwića. Tuž chcedźa w Budyšinje konkretne poskitki města za tutón proces zestajeć a wuwiwać. Bjezdwěla budu tež Serbja ze swojim přidźěłom a idejemi wosebje prašani.
Paralelnje k lětušemu ptačokwasnemu programej za dźěći je SLA wosebite wubědźowanje wupisał. Jutry běchu wuslědki w Budyšinje wustajane.
Budyšin (SN/bn). We wobłuku lětušeho programa za dźěći „Ptačokwasny són“ je jón wuhotowacy Serbski ludowy ansambl wšitkich přihladowarjow přeprosył, so na wosebitym wubědźowanju wobdźělić. Holcy a hólcy móžachu sej jednu scenu z programa wuzwolić a ju jako předłohu za wobraz wužiwać. Najčasćišo jewjachu so na zapodatych mólbach a rysowankach kwasny porik sroki a hawrona, tola tež wosy a samo wjelki běchu po słowach za zjawnostne dźěło SLA zamołwiteho Stefana Cuški dosć derje zastupjene. Dohromady su jednotliwcy kaž tež cyłe rjadownje ansamblej 250 wobrazow sposrědkowali. Wobdźělnicy pochadźeja z cyłeje Łužicy, a z nimale kóždeho města resp. kóždeje wsy, hdźež je SLA program předstajił, je namjet dóšoł.
Budyšin (SN/BŠe). Tele dny, tak fachowcy wěšća, budźe populacija skórnikow zaso aktiwna, wšako wočakujemy temperatury hač do 20 stopnjow a wjace nad nulu. Kaž z wobkedźbowanjow wuchadźa, změjemy lětsa wosebje strašnu situaciju skórnika dla. Hižo loni napjate połoženje we łužiskich lěsach njeje so pomjeńšiło, ale skerje miłeje zymy dla so přiwótřiło. „Miliardy skórnikow so po sakskich lěsach dale rozpřestrěja“, warnuje prezident krajneho lěsnistwa Utz Hempfling. Wobsedźerjo lěsow měli tuž z wotpowědnymi naprawami masiwnym lěsnym škodam zadźěwać spytać. Naprawy hodźa so spěchować a sahaja wot předźěłanja wobškodźeneho drjewa přez zasadźenje insekticidow hač k transportej drjewa z lěsa won. Spěchowanske móžnosće płaća za chójny, lariki a šmrěki. Próstwystajerjo móža priwatne wosoby, komuny abo lěsniske zwjazki być. Na prašenja kołowokoło spěchowanja wotmołwjeja lěsnicy wotpowědnych rewěrow.
Düsseldorf (dpa/SN). Niwow derjeměća wšelakich kónčin Němskeje je dale jara rozdźělny. W po wšej Němskej najbohatšim wokrjesu Starnberg pola Mnichowa zasłuža kóždy wobydler nimale 35 000 eurow. To je dwójce telko dochodow kaž w poruhrskim Gelsenkirchenje, hdźež maja ludźo přerěznje 16 000 eurow wob lěto k dispoziciji. Wuchodne kraje wostanu tež 30 lět po přewróće daloko za zapadnymi. W Halle nad Solawu na přikład zasłužeja ludźo mjenje hač 18 000 eurow.
Weber přećiwo płunowodej
Waršawa (dpa/SN). Politikar CSU Manfred Weber chcył so w padźe wuzwolenja za šefa Komisije EU za to zasadźić, twar wjele diskutowaneho płunowoda Nord Stream 2 w Baltiskim morju přetorhnyć. Tole je wón pólskej nowinje Polska Times přilubił. Wón je přećiwo projektej, dokelž so tak wotwisnosć Europy wot ruskich surowiznow dale zwyša, Weber rjekny. Zwjazkowe knježerstwo porno tomu projekt podpěruje. USA pipelinu tohorunja wotpokazuja, dokelž chcyli Europje swój zemski płun předawać.
Rezolucija wosłabjena