Z wudaća: pjatk, 10 meje 2019

Budyšin (SN/BŠe). Budyske předewzaće Zahrodna technika Lehmann bu předwčerawšim z mytom „Motorist lěta 2019“ wuznamjenjene. Kaž šefredaktor nowiny Motorist Martin Brandt rozłoži, měješe jury mjez namjetami z cyłeje Němskeje rozsudźić. „Na kwalitu orientowane wikowanje a reparowanje zahrodneje techniki Budyskeho předewzaća je nas přeswědčiło“, wón wuzběhny. Nimo toho zasadźa so mějićel Lars Lehmann we wšelakorych gremijach Němskeje za regionalne předewzaća, hdźež jim rjap skruća. „Konkurenca z interneta je wulka. Je tuž jara wažne fachowych wikowarjow podpěrać“, wón zwurazni. Samo­zrozumliwje wobdźěla so na fachowych zarjadowanjach, kaž je to kongres motoristow w februaru. „Tam dźe wo to, syće wutworić, sej mjez sobu mysle a nazhonjenja wuměnjeć a so z nowosćemi na wikach zeznajomić“, Lehmann rozłoži.

wozjewjene w: Hospodarstwo
Hišće hač do kónca tohole lěta maja twarske dźěła wokoło Klóšterskeje wody mjez Nowej Wjesku a Hrańcu trać. Tamniši wot­rězk rěki je wulke twarnišćo, hdźež hoberske mnóstwa twaršćiznow nałožuja, kaž tule w Nowej Wjesce. Krajny zarjad rěčnych zawěrow inwestuje tam něhdźe 1,7 milionow eurow, zo by rěku rewitalizował. Foto: Feliks Haza

wozjewjene w: Łužica
pjatk, 10 meje 2019 14:00

Akcija na mnohe wašnje pozbudźa

Dwaj měsacaj po zahajenju wuměłskeho projekta „Swětło pozbudźa“ z Reck-linghausenskim wuměłcom Ludgerom Hinsu móža organizatorojo prěnju pozitiwnu mjezybilancu sćahnyć.

Budyšin (SN). „Naš ekumeniski projekt je derje přiwzaty. Na mnohich zarjado­wanjach so wobstajnje 30 do wjacore sta wopytowarjow wobdźěleja“, praji tachantski farar Wito Sćapan jako sobuiniciator. Na 13 wažnych městnach w Budyšinje a blišej wokolinje su swětłowe křiže a dalše dźěła wuměłca Ludgera Hinsy widźeć,­ mjez druhim w Muzeju Budyšin, w Němsko-Serbskim ludowym dźiwadle, w Budyskim wopomnišću, w Smochčanskim Domje biskopa Bena kaž tež w cyr­kwjach města. W tachantskej cyrkwi su wjacore twórby wuměłca widźeć. Hač do swjatkow steji hišće dobry dźesatk zarjadowanjow na programje. Samo na jednym z měšćanskich busow je wabjenje za projekt naćišćane.

wozjewjene w: Łužica
pjatk, 10 meje 2019 14:00

Dalše nadawki přepodali

Přichodnu srjedu połoža zakładny kamjeń za nowy hort

Worklecy (SN/MWj). Nowy hort při Worklečanskej šuli je bjezdwěla tuchwilny najwjetši projekt w gmejnje. Tam su mjeztym z dźěłami tak derje pokročowali, zo maja porno planowanemu časowemu wotběhej dwaj tydźenjej předskoka. Zo móhli dale tak derje dźěłać, wotměchu wčera samo přidatne posedźenje gmejnskeje rady. Nimo někotrych dalšich dypkow, kotrež su w tym zwisku takrjec sobu wotdźěłachu, stejachu přichodne nadawki za nowy hort w srjedźišću.

wozjewjene w: Łužica
Kamjenc. Lětna hłowna zhromadźizna Kamjenskeho Černobylskeho towarstwa je póndźelu, 13. meje, w 19 hodź. w Kamjenskim dźěćacym domje na Fichtowej 17. Dokelž je zhromadźizna zjawna, su wšitcy zajimcy přeprošeni. W srjedźišću steja wuhódnoćenje dźěła zašłeje wólbneje doby a přihoty lětušeje dźěćaceje akcije. Wot 11. junija do 2. julija wočakuja 20 dźěći z wokrjesa Buda Košeljowo a wot 3. julija do 23. awgusta 20 na dia­betes schorjene běłoruske dźěći.

wozjewjene w: Serwis
pjatk, 10 meje 2019 14:00

Policija (10.05.19)

Paduchow lepili

Budyšin. Cigarety a alkohol chcyštaj mužej zawčerawšim z kupnicy w Budyskej Strowotnej studni kradnyć. Jako to předawarki pytnychu, wobaj ćeknyštaj. Při tym je 33lětny při informaciji dwaj telefonaj skóncował, dokelž sobudźěłaćerka runje policiju wołaše. Jeho pak zastojnicy při­wšěm zajachu, při čimž so jedyn z nich zrani. Tamny skućićel, 36lětny Budyšan, je z kupnicy twochnył a sobudźěłaćerjej hrozył. Tež to pak jemu ničo njepomhaše, dokelž policisća jeho z druhich deliktow hižo znajachu a pozdźišo „wopytachu“.

wozjewjene w: Policija
pjatk, 10 meje 2019 14:00

Gratu so přimać hišće móžno

Budyšin. Sobotu, 1. junija, chce jury, wobstejaca z čłonow młodźinskeje přirady rozsudźić, na kotre młodźinske projekty, iniciatiwy a ideje we wobłuku akcije „Přimaj so gratu!“ rozdźěla cyłkownje 1000 eurow dobyćerskich pjenjez. Sumu přewostaji Partnerstwo za demokratiju w ramiku młodźinskeho fondsa. Bohužel njeje so dotal ani jenička młodźinska skupina abo iniciatiwa požadała. Młodostni, kotřiž chcedźa šansu hišće wužić, njech zapodadźa swoju próstwu hač do 20. meje pod www.my.domowina.de abo młodźinskej socialnej dźěłaćerce RCW Mariji Koklinej.

Smědźa muzeje rumować?

Wojerec. Stawizniske a domiznowědne muzeje su wěste městno zachowanja historiskich objektow. Na jednym boku chcedźa wone wjace zachowanjahódnych wěcow přiwzać, na tamnym maja za to dźeń a mjenje pjenjez a personala. Smě muzej potajkim tež raz něšto wurumować a jeli haj, što? Wo tym přednošuje wutoru, 14. meje, w 17 hodź. Marcel Steller w kaminowej stwě Wojerowskeho hrodu. Zastup je darmotny.

Dróha połojčnje zawrjena

wozjewjene w: Z městow a wsow
pjatk, 10 meje 2019 14:00

Tež serbske skupiny w akciji

Budyšin (mk/SN). Za lětušu 48hodźinsku akciju je so po cyłym Budyskim wokrjesu 95 młodźinskich skupin přizjewiło. Mjez nimi je jědnaće serbskich. Su to młodźinske kluby z Njebjelčic, Radworja, Smječkec a Wotrowa kaž tež Smječkečanska młodźinska wohnjowa wobora. Tež wuknjacy wyšich šulow z Kulowa, Ralbic a Worklecy su přizjewjeni a chcedźa so runja druhim młodostnym na dobro wjesneje zhromadnosće angažować. Tak planuja najwšelakoriše twarske a wuporjedźenske dźěła při młodźinskich klubach, šulskich kubłanišćach, towarstwowych domach na wsach a na sportnišćach. Nimo toho budu naměsta, rěki a puće rjedźić a insektowe hotele twarić. Dalši chcedźa swojich sobučłowjekow zwjeselić. Tak planuja, wopytać wobydlerjow Smječkečanskeho Domu swj. Jana a podpěrać přistajenych dźěłarnje swj. Michała w Pančicach-Kukowje.

wozjewjene w: Łužica

Něhdyše wuhlowe jamy kaž tež kultura a stawizny Serbow zbudźeja dale a wjetši zajim pućowacych

Wot toho časa, zo je jasne, zo wot lěta 2038 tež w Hornjej Łužicy wokoło Slepoho žanu brunicu wjace wudobywać njebudu, dźeń a wjace busowych pućowacych předewzaćow z cyłeje Němskeje jězby do wuhlowych jamow knihuje, kaž Horst Lehmann powěda. Něhdyši hórnik, w mašinotwarje za techniski serwis zamołwity, je dźensa wuměnkar. Wosom lět pak hižo jako swobodnje skutkowacy pućowanski přewodnik turistiske skupiny a dalšich po wopytowarskim centrumje „Wjelčanski hórnistwowy turizm“ po ekskursijach, safarijach a dalšich zarjadowanjach wodźi. Tam dźě zajimcy wšitko wo wudobywanju wuhla zhonja a wo tym, kotre sydlišća dyrbjachu tohodla wotbagrować. Při tym so mnozy za stawiznami a kulturu Serbow prašeja. Wšako mnohich z busami tež do delanskich kónčin, Kulowa, Budyšina a Slepoho woža, zo bychu jim wo našim ludźe rozprawjeli.

wozjewjene w: Předźenak
pjatk, 10 meje 2019 14:00

Rewolucioněrujetaj twarstwo

Z pomocu ultrazwukoweje technologije beton měšeć a energiju lutować

Mjeno firmy „Sonocrete“ wobsahuje dwě wopřijeći. „Sono steji za sonochemiju, při čimž dźe wo wliw ultrazwuka na chemiske reakcije. Concrete je jendźelske słowo za beton“, rozłožuje jednaćel Ricardo Remus. Młody Choćebuski twarski inženjer je z koleginu dr. Christianu Röß­ler nowu metodu za to wuwił, zo by beton spěšnišo stwjerdnył. Dr. Rößler je wědomostna sobudźěłaćerka Weimarskeje Bauhaus-uniwersity a nawjeduje tam dźěłowu skupinu za mikroskopiju elektronow a cementowu chemiju. „Rewolucioněrujemoj zhotowjenje betona“, měni Remus.

wozjewjene w: Předźenak

Serbska debata

nowostki LND