Wjelki tema w kabineće
Berlin. Po wjele diskusijach předpołoži zwjazkowe knježerstwo skónčnje naćisk wjelčeho zakonja. Tón je kabinet dźensa w Berlinje schwalił. Přichodnje budźe lóšo problematiske wjelki třěleć směć. Přiwšěm budźe stajnje hišće wotpowědna dowolnosć trěbna. Wowčerjo zakoń jara witaja. Wobswětoškitna organizacija BUND plany kritizuje.
Zhladuja na róčnicy
Podstupim/Choćebuz. Serbski zakoń Braniborskeje wobsteji 25 lět, pjeć lět skutkuje knježerstwowa społnomócnjena za naležnosće Serbow w susodnym zwjazkowym kraju. Přiležnosć to ministerstwu za wědomosć, slědźenje a kulturu wuhotować póndźelu, 27. meje, zarjadowanje z přeprošenymi hosćimi w Choćebuskim Delnjoserbskim gymnaziju, zo bychu na wobě róčnicy zhladowali.
Nihdy njezabyć
Budyšin (SN/mwe). Christiana Schramma, něhdyšeho wyšeho měšćanostu Budyšina jako čestneho wobydlerja wuznamjenić, to wobzamknychu radźićeljo na zašłym posedźenju Budyskeje měšćanskeje rady. Nětčiši wyši měšćanosta Alexander Ahrens (SPD) w swojim pledoajeju emocionalnje wuzběhny, zo měli so wobydlerjo jeho předchadnikej dźakować, zo je město Budyšin dźensa tajke žiwjenjahódne. Ahrens wosebje wobdźiwaše, zo bě Christian Schramm w 1990tych lětach zamóhł při běžnym dźěle fungowace zarjadnistwo wutworić.
Wuslědki njesprócniweho skutkowanja bywšeho wjelelětneho wyšeho měšćanosty wšak su dźeń wote dnja widźomne, hdyž móža Budyšenjo wopytowarjam nimale dospołnje saněrowane stare město prezentować, swoje dźěći do modernych šulow słać abo w Centeru na Žitnych wikach nakupować. Zdobom słušeše hospodarstwo k ćežišćam dźěła Schramma. Wšako dźensa wšědnje wjace hač 18 000 ludźi do Budyšina na dźěło jězdźi. 25 lět je wón sprjewinemu městu wobličo dawał a je tež jako kulturnu stolicu Serbow we wšelakich gremijach zastupował.
Budyšin (SN/at). K wólbam wo 98 mandatow za nowy Budyski wokrjesny sejmik nastupi 386 kandidatow w 14 wólbnych wokrjesach. Mjez nimi su tři Serbowki a 31 Serbow. Přichodna ličba wokrjesnych radźićelow je samsna kaž ta aktualneho sejmika a złožuje so na předpisy Sakskeho komunalneho porjada, wuswětla wokrjesna wólbna nawodnica Andrea Peter. Wotum budźe hromadźe z wólbami Europskeho parlamenta, měšćanskich, gmejnskich a wjesnych radow njedźelu, 26. meje.
Dwanaće Serbow kandiduje we wólbnym wokrjesu (wk) 12, kotremuž su gmejny zarjadniskeho zwjazka Při Klóšterskej wodźe, Kulow, Halštrow a Łaz přirjadowane. Za CDU su to Dawid Statnik, Měrko Domaška a dr. Beno Wałda, za FDP Alexander Pólk, za Zelenych Julian Nyča, za Serbske wolerske zjednoćenstwo (SWZ) Jan Budar, Katharina Jurkowa, Sonja Hrjehorjowa, Měrko Korjeńk, Marko Kowar a Clemens Škoda, za Łužisku aliancu Ignac Wjesela.
Něšto dlěje hač třištwórć lěta tomu je, zo bě Šwedowka Greta Thunberg loni 20. awgusta prěni króć před twarjenjom Šwedskeho rajchstaga za lěpšu klimu stawkowała.
Budyšin (SN/MiR). Zajutřišim, pjatk, chcedźa nětko w Budyšinje šulerjo prěni króć přikład 16lětneje Grety sćěhować a stawkować. Akcija je zapřijata do globalneho klimoweho stawka k wólbam Europskeho parlamenta. Budyska městna skupina Fridays-for-future chce zhromadnje z wobdźělnikami stawka na to pokazać, zo ma so politika hibać, chcedźa-li nětko rozsudźacy swět přichodnym generacijam zachować.
„Runowaha zaruča wobstajnosć. Pušćeš-li wjac štomow, hač sadźeš, pak přirodu ničiš.“ To je objektiwne zhladowanje Christiana Budera na strowy wobswět. Jeho mjeno steji na lisćinje zjednoćenstwa Rjemjesło a přemysło za Njeswačansku gmejnsku radu.
Lubosć k přirodźe staj staršej dźensa 61lětnemu do kolebki połožiłoj. Runja jemu bě nan blidar, mać pochadźeše ze serbskeje ratarskeje Panachec swójby we Łomsku. Přirodoškit wobhladuje Buder jako wužadacy nadawk tež na komunalnej runinje. „Maš jenož hišće mało łastojčkow, a scyła je so w přirodźe wjele pohubjeńšiło. Dyrbimy sej swojeje zamołwitosće wědomi być a njesměmy ničenju stwórby bjezradni přihladować.“
Berlin (dpa/SN). Ze stron CDU a CSU jewi so razna kritika na planach SPD nastupajo financowanje zakładneje renty za mało zasłužacych. Financowanje zakładneje renty wobsteji jeničce z fantazijowych ličbow, praji Eckhardt Rehberg, etatopolitiski rěčnik frakcije CDU/CSU w zwjazkowym sejmje. Ani jenički cent njepředleži. Městopředsyda frakcije SPD Sören Bartol porno tomu twjerdźi, zo su financy za koncept zaručene.
Röttgen: Ničo noweho
Berlin (dpa/SN). Nowy namjet britiskeje premierministerki Theresy May za rjadowany wustup kraja z Europskeje unije zbudźa w Němskej wulke wobmyslenja. „Boju so, zo nowy namjet wobsahowje ničo njezměni“, rjekny předsyda wonkowneho wuběrka zwjazkoweho sejma Norbert Röttgen (CDU) powěsćerni dpa. „May wostawa sej swěrna, to samsne stajnje zas w nowych pospytach namjetować.“ Wona je wčera namjetowała wo nowym referendumje wothłosować.
CDU w Bremenje před SPD
Přemało mnichow na wideju dla chcedźa w Thailandskej oficialny film wo narodnej hymnje znowa nawjerćeć. Premierminister Prayut Chan-o-cha je widejo skazał, kotryž pokazuje wjace mnichow, kak swoju wěru praktikuja. Film, hakle spočatk meje znowa nahrawany, pokazuje zastupjerjow wšelakich worštow thailandskeho ludu při spěwanju hymny. Buddhistiska organizacija je so na to hóršiła, dokelž su na wideju lědma mniša widźeć.
Wjace hač 300 hudźbnikow a skupin je so lětsa za požadanu dowolnosć hudźenja w New-Yorkskej podzemskej železnicy přizjewiło. Něhdźe 70 z nich změje składnosć, swoje hudźbne kmanosće komisiji předstajić. 20 skupin a jednotliwcow přiwozmu potom do kruha něhdźe 350 hudźbnych cyłkow, kotrež smědźa na 30 wuzwolenych podzemskich dwórnišćach koncertować, štož je 7 500 wustupow wob lěto.