Z wudaća: srjeda, 12 junija 2019

Pjenjezy a awto pokradnyli

Hózk. W krótkim času su njeznaći póndźelu rano w ratarskim zawodźe w Hózku wulku škodu načinili. W běhu jenož 15 mjeńšin pokradnychu tam po informacijach policije pjeć z pjenjezami pjelnjenych kasetow, bow z drobnymi pjenjezami kaž tež móšnju. Nimo toho spakosćichu klučiki na terenje zawoda stejaceho předawanskeho awta a z nim wot­- jědźechu. Dźěl kasetow a pjenjez namaka policija pozdźišo w bliskim lěsu. Dohromady nasta zawodej nimale 30 000 eurow škody. Za paduchami kaž tež za awtom z čisłom BZ-XA 579 policija pyta.

Radwor. Ke kóncej šulskeho lěta 2018/2019 wotměje so jutře, štwórtk, we 18.30 hodź. w Radworskim hosćencu „Meja“ zhromadny koncert Budyskeje wokrjesneje hudźbneje šule a Radworskeje zakładneje a wyšeje šule. Nimo instrumentalistow na drjewjanych a blachowych instrumentach, na akordeonje a gitarje wustupitej chóraj zakładneje a wyšeje šule. Zastup je darmotny, organizatorojo pak proša wo dar.

Porěči wo wurywanjach

Wojerecy. Kotre informacije zdobywaja archeologojo z wurywankow a čehodla su rubježne wurywanja tak problematiske? Wo tym porěči Marcel Steller jutře, 13. junija, w 17 hodź. w kaminowej stwě Wojerowskeho hrodu.

Moluja na dźěłarničce

Njechorń. Spěchowanski kruh za serbsku ludowu kulturu přewjedźe wot pjatka hač do njedźele tohole tydźenja molersku dźěłarničku w Domje Měrćina Nowaka w Njechornju. Wuměłski nawod změje Maja Nagelowa. Mjez druhim zaběraja so wobdźělnicy z portretowanjom, molowanjom w přirodźe a z molowanjom na wulkich łopjenach. Wuslědki chcedźa we wustajeńcy pokazać.

ST Wulka Dubrawa

– SJ Chrósćicy II 3:0 (0:0)

Zestawa hosći: Hejduška – Donat, Kl. Mark, H. Zynda, Lešawa (90.+ 3 Ki. Mark), J. Zynda, Špitank, Wowčer, Šiman, Šmit, Liznar (80. Matješk)

Zakitowar titula swjatkowny turněr w Pěskecach dobył

„Wjesnjan bě nam 50litersku fasku piwa za dobyće přilubił“, rěkaše mjez druhim póndźelu po zakitowanju titula Pěskečanskich wjesnych koparjow. „Tuž je wjeselo hišće wjetše, wšako móžemy nětko hišće dlěje swjećić.“

Znowa běchu Pěskečanki a Pěskečenjo rjany swjatkowny sportowy kónc tydźenja zarjadowali a wuhotowali. Hižo sobotu bě so dźesać mustwow prěni raz we wulkim XXL-kickeru z woprawdźitymi koparkami a koparjemi wubědźowało. Woni běchu při wulkich žerdźach z wlečicami fiksěrowani a móžachu so jenož we wobmjezowanym pasmje hibać. Zajimawe tež bě, zo sedźeše sudnik na hońtwjerskim rěblu, zo by wot horjeka akcije lěpje widźał a zakročić móhł. Chróšćenjo su premjeru w Pěskecach před cyłkom tamnišeje młodźiny dobyli. Třeće městno wobsadźichu Pěskečanske legendy.

Sokoł Ralbicy/Hórki

– ST Porchow 3:0 (1:0)

Zestawa domjacych: Schöne – Matka, Bjeńš, Schultz, Budar (76. Kobalc), Bejmak (82. Materna), Gloxyn, Šołta, Rawš, Korjeńk, Domaška (78. Kurjat)

Rekordne wobdźělenje na lětušim běhu po Krakečanskich hórkach

Srjedu, 29. meje, wotmě so 32. raz běh po Krakečanskich hórkach. Na šěsć rozdźělnych distancach wubědźowachu so běharjo wot bambinijow hač k 85lětnymaj wuměnkarjomaj, a to po wotpowědnych kołokursach. Bambinije star­towa­chu na 350 metrow, starše dźěći a młódši šulerjo na 0,7 km, starši šulerjo na 2 km, młodostni a dorosćeni wšěch starobnych klasow na distancomaj 5,1 a 10,2 km. Na 5,1 km su tež lubowarjo walkinga mocy měrili. Cyłkownje je 520 atletow do cila doběžało, mjez nimi 29 wobdźělnikow walkinga, štož běše zaso nowy rekord.­ Lońši je so tak wo 52 atletow polěp­šił! Starterojo běchu z cyłeje Hornjeje kaž ze srjedźneje Łužicy a jednotliwcy tež z Delnjeje Łužicy, z Drježdźan a wokoliny, Neustadta, Radeburga, Mišna a Pirny. We wšěch běhach su serbscy starterojo wuspěšnje wojowali.