Dalše kulturne namrěwstwo
Drježdźany/Baku. W Sakskej mamy dalše swětowe kulturne namrěwstwo. UNESCO je serbsko-čěsku historisku hórnisku kónčinu Rudne horiny-Krušnohoří na sobotnym posedźenju w azerbajdźanskej stolicy Bakuwje do lisćiny škitahódneho namrěwstwa swěta přiwzała. Region běštej wobaj krajej namjetowałoj. Delegaća mjenowachu jón „mištersku twórbu čłowjeskeje kreatiwity“.
Putaca wustajeńca wotewrjena
Dobri Ług. Přichodne lěta ma wosebita wustajeńca w muzeju na hrodźe Dobri Ług (Doberlug) zajimcow přiwabić. Pórclin z Berlinskich zběrkow swědči wo srjedźoeuropskich kulturnych stawiznach. Braniborska kulturna statna sekretarka Ulrike Gutheil (SPD) je ekspoziciju wčera we wobłuku lětnjeho braniborsko-sakskeho zetkanja pod hesłom „Kryjemy taflu“ wotewrěła.
Lětanišćo za južnu Čěsku
Chrósćicy (SN/CoR/bn/MWj). Z nowym rekordom dohromady 22 000 wopytowarjow je so wčera XIII. mjezynarodny folklorny festiwal „Łužica 2019“ zakónčił. Wjace hač 1 000 sobuskutkowacych – mjez nimi 700 wuměłcow z dohromady 15 krajow – je wot štwórtka hač do wčerawšeho w Budyšinje, Hochozy a Chrósćicach hudźbno-spěwno-rejwanske programy wuhotowało. Předsyda Domowina Dawid Statnik a předsyda přihotowanskeho wuběrka festiwala Marko Kowar staj wšitkim sobuskutkowacym wuměłcam z tu- a wukraja kaž tež jich přewodźerjam, pomocnikam, organizatoram, hosćićelam, mějićelam statokow, dalšim podpěraćelam a pomocnikam wutrobny dźak wuprajiłoj.
Chrósćicy (SN/BŠe). Hudźba a reje we Łužicy su přewšo pisane. To dožiwichu přihladowarjo dorostoweho programa pod hesłom „W raju wjesołych dźěći“, kotryž bě Rěčny centrum WITAJ sobotu popołdnju na Kralec statoku organizował. Zahajiło je jón dwanaće młodych porow Smjerdźečanskeje rejwanskeje skupiny, kotrež dopokazachu, zo njetrjeba so kulturne ćěleso wo dorost starosćić. Chór Chróšćanskeje zakładneje šule pod nawodom Marhaty Cyžec-Korjeńkoweje přednjese na to spěwy z lěta 2016 wušłeje knihi „Marka, Janko, pójtaj won“. Poradźena bě premjera. Solistce běštej Luiza Hermanec a Helena Smolic. W běhu třihodźinskeho programa je tež dźesać skupin Łužičanki Serbskeho ludoweho ansambla swój rejwanski talent na jewišću pokazało. Wutrobny přiklesk žnějachu tohorunja dźěći a maćerje Drježdźanskeho towarstwa Stup dale, kotrež běchu prěni raz přinošk za festiwal spřihotowali. Mali wuměłcy najwšelakorišeje staroby su z wulkim lóštom a wjesolom přazu předstajili.
Athen (dpa/SN). Grjekski ministerski prezident Alexis Tsipras dyrbi hić. Wolerjo kraja su so při wólbach parlamenta jasnje za konserwatiwnu stronu Nea Dimokratia rozsudźili. Strona z předsydu Kyriakosom Mitsotakisom na čole je sej wčera 39,7 procentow hłosow zdobyła a změje w parlamenće z 300 zapósłancani přichodnje wjetšinu 154 mandatow. Lěwicarska strona Syriza Tsiprasa docpě 31,5 procentow. Mitsotakisa chcychu hišće dźensa spřisahać.
Migranća kraj docpěli
Valletta (dpa/SN). Cyłkownje 65 migrantow na němskej wuchowanskej łódźi „Alan Kurdi“ je po informacijach wójska kupu Malta docpěło. Patruljowy čołm bě jich z wuchowanskeje łódźe přewzał. Migrantow chcedźa ručež móžno na druhe europskeje kraje rozdźělić. Do toho bě knježerstwo we Valletta intensiwnje z komisiju Europskeje unije a z němskim knježerstwom jednało. Pomocna łódź z ćěkancami bě dny dołho po morju błudźiła, dokelž njesmědźeše do přistawa.
Prawicarjow wobkedźbować
Swójskeho syna wobskoržiłoj staj staršej w Neuruppinje, dokelž bě jeju awto skradźu a bjez jězbneje dowolnosće wužiwał. Do toho běštaj chłostanku přespěšneho jězdźenja dla dóstałoj, na kotrejž bě 28lětny syn jako šofer spóznajomny. Dźeń po tym policisća jeho kontrolowachu a zwěsćichu přeco hišće 2,26 promilow alkohola w kreji. Młody muž wšak zastojnikam klučiki awta dobrowólnje přepoda.
W zawodźe za grilowanske wuhlo a přisłušk w Essenje je w nocy na njedźelu woheń wudyrił. Hašenske dźěła trajachu cyły dźeń, a płomjenja so jara spěšnje rozpřestrěchu. Hłowne twarjenje, hdźež bě material składowany, je so mjeztym sypnyło. Wulkeje horcoty dla njemóžachu so wobornicy hišće k centrumej wohenja předrěć a liča z hoberskej wěcnej škodu. Na zbožo so nichtó njezrani.
Hannover (dpa/SN). Delnjosakski ministerski prezident Stephan Weil (SPD) je nastajenje Bayerskeje a Sakskeje při pytanju za kmanym kónčnym składźišćom za atomowe wotpadki kritizował. Bě to wuspěch minjeneje legislaturneje doby, zo dojednaja so wšitcy zhromadnje na „běłu zemjepisnu kartu“ bjez dočasnych posudkow za městnom, rjekny Weil powěsćerni dpa. To je narodny nadawk, kotremuž njesměł so nichtó wuwinyć. „Tohodla je mi absolutnje njezrozumliwe, zo so jednotliwe kraje wočiwidnje z tutej zasadu rozžohnuja, na přikład Bayerska a Sakska. Tak to njepoběhnje.“
Poprawom bě Němska kónčne składźišćo w delnjosakskim Gorlebenje planowała. Po lětdźesatki trajacych protestach bě Zwjazk 2017 nowy proces pytanja zahajił. Zaměr je, hač do lěta 2031 kmane składźišćo namakać. Atomowe wotpadki měli so hłuboko pod zemju w bywšich podkopkach składować. Geologisce přińdu formacije kaž sel, hlina abo kristaliny kamjeń kaž zornowc do prašenja. Prěnje wuslědki maja klětu předležeć.
Berlin (dpa/SN). Wot zwjazkoweho knježerstwa zasadźena komisija k přepytowanju žiwjenskich wobstejnosćow su po informacijach medijow hoberske rozdźěle mjez jednotliwymi regionami Němskeje zwěsćiła. „Wulke přećiwki wobsteja w regionalnych dochodach, dźěłowych móžnosćach, při wobchadnym a mobilnoškričkowym přiwjazanju a při zakładnym zastaranju ludźi“, rěka w kónčnej rozprawje knježerstwoweje komisije „Runohódne žiwjenske wobstejnosće“, kaž medije rozprawjeja.
Po samsnych žórłach chcyło knježerstwo na zakładźe rozprawy strukturnu a spěchowansku politiku znowa wusměrić. Wona njesměła hižo dlěje na wuchod a zapad orientowana, ale skerje po „potrěbnosćach“ skutkowna być. K tomu słuša tež zawjazk knježerstwa, runohódnosć žiwjenskich wuměnjenjow jako „směrnicu wšeho politiskeho skutkowanja“ wobhladować. Zwjazkowe knježerstwo bě komisiju w juliju 2018 zasadźiło. Zajutřišim, srjedu, chcedźa wuslědki přepytowanja w Berlinje oficialnje předstajić.
Prožym (AK/SN). W zwisku z rozšěrjenjom brunicoweje jamy Wjelcej-juh hrozy Prožymej wotbagrowanje. Tak by 800 ludźi, mjez nimi 250 křesćanow, swoju domiznu zhubiło. „Tež naša cyrkej by potrjechena była. Lětsa je wona runje sto lět stara“, praji Hans-Christoph Schütt, wot lěta 2010 farar ewangelskeje wulkowosady Wjelcej, Prožym, Lěska, Maliń (Greifenhain), Nowe Wiki (Neupetershain) a Rašyn (Ressen) z 1 075 wosadnymi. Kedźbliwje jemu wobdźělnicy krajneho kruha za dźěło muži připosłuchaja. Cyłkownje 21 křesćanow z Berlina, Podstupima, Frankfurta nad Wódru a Choćebuza je pódla. W Prožymskej cyrkwi prašeja so woni za njewěstosću mjez ludźimi we wsy. Wobhonjeja so wo młodźinje a zhonja wo hłubokej pačenosći ludźi. Prožym je jedna ze stacijow na jich dwudnjowskej jězbje tydźenja po Łužicy. Při tym zaběraja so ze skónčenjom zmilinjenja brunicy a ze strukturnej změnu.