Z wudaća: srjeda, 10 julija 2019

FDP wupraja so za statne zrěčenje wo spušćomnosći

Běła Woda (CK/SN). Łužica 2040 je region z hospodarsce sylnym srjedźnym stawom a z kwalifikowanymi fachowcami. Snano požada so kónčina wo swětowu wustajeńcu – jako přikład poradźeneje strukturneje změny. Znajmjeńša tak widźachu to zapósłancy FDP zwjazkoweho sejma a fachowcy na wčerawšim wobydlerskim forumje w Běłowodźanskim sociokulturnym centrumje Telux.

Strona liberalnych demokratow njewobdźěla so na „wubědźowanju wo najlěpši datum, zmilinjenje brunicy zakónčić“. Najprjedy maja wuměnjenja za strukturnu změnu wutworjene być. Dźěłowe městna na zarjadach runje tak kaž infrastrukturne naprawy njedosahaja. Předewšěm dźe wo pjenježne srědki a mjenje běrokratije, zo móhli inwestorow do Łužicy wabić. Bytostna za to je sćerpnosć, wšako móžetej planowanje a dowolnosć dróhotwara hač do dwaceći lět trać.

Čorna Pumpa je za znate łužiske hórniske a energijowe předewzaće městnosć industrijnych pospytow. Před wjace hač lětdźesatkom bě tam připrawa Vattenfalla za wotšćěpjowanje wuhlikoweho dioksida dźěłać započała, zwrěšći pak, dokelž njebě móžno za to trěbne podzemske składy zaručić. Najebać z tym zwjazany inženjerskotechniski wukon njeby tehdyša technologija ničo na tym změniła, brunicy dla serbske wsy dale wotbagrować. Znowa w Čornej Pumpje je LEAG wčera započała projekt zeskutkownjeć. Kritiske hłosy we Łužicy so na to prašachu, čeho­dla runje LEAG prěni tajki milinowy skład w Němskej twari. Ale njeje da nawodnistwo winowate kompetency w předewzaću wužiwać a za nowymi wobchodniskimi polemi slědźić, hdyž je za swójski dotalny model kónc připowědźeny? Zo bě do rozsuda w předewzaću čiła diskusija wo projekće, kaž bě wčera słyšeć, dźě sobu zwuraznja, zo LEAG pod přichodnymi wobstejnosćemi swoje městno pyta. Axel Arlt

Lipsk (LW/SN). Irski prezident Michael D. Higgins je spočatk julija Uniwersitu Lipsk wopytał. Bě to wizita we wobłuku zhromadneho wopyta štyrjoch němskich městow, nimo Lipska tež Berlina, Frankfurta nad Mohanom a Würzburga. Lipsk bu za srjedźišćo studija mjeńši­nowych rěčow wuzwoleny.

Nimo Higginsa witaše rektorka Lipšćanskeje uni­wer­sity prof. Beate A. Schü­cking ministra za won­kownu politiku Irske­je Simona Coveneyja, wulkopósłanca Irskeje w Němskej Michaela Collinsa a dalšich sobu­dźěłaćerjow diplomati­skeho korpsa kaž tež sakskeho ministerskeho prezidenta Michaela Kretschmera (CDU) a Lipšćanskeho wyšeho měšćanostu Burkharda Junga (SPD).

W zwisku z wutwarom křižowanišća před Radworskim kěrchowom su tam nětko z druhim twarskim wotrězkom započeli. W prózdninskim času chcedźa hłownu dróhu hač k nawsy wutwarić a ju z asfaltowej worštu pokryć. Puć je w tym času dospołnje zawrjeny. Wulkomyslna wobjězdka wjedźe wot Rakec přez Minakał hač do Małeho Wjelkowa. Foto: SN/Maćij Bulank

Wobstajnje přewjeduje wjednistwo Budyskeje radnicy za jednotliwe měšćanske dźěle wobydlerske forumy. Wčera wotmě so tajki w Małym Wjelkowje a bě derje wopytany.

Mały Wjelkow (CS/SN). Za Małowjelkowsku sotrownju tamniša Bratrowska wosada planuje, nazymu spěchowanske towarstwo załožić. Na te wašnje ma so zaručić, zo wuwiće tohole jónkrótneho objekta tež zajimam wobydlerjow wotpowěduje. To rjekny Budyski wyši měšćanosta Alexander Ahrens (SPD) na wčerawšim wobydlerskim forumje w Małym Wjelkowje. Wjesnjenjo su hižo nětko namołwjeni rozmyslować, kak hodźał so areal při Małowjelkowskej cyrkwi wužiwać. Tuchwilu je konferencnišćo z přenocowanskimi móžnosćemi planowane. Ahrens podšmórny wulki wuznam objekta, kotrehož prěnjotne struktury su zachowane. Za saněrowanje móhli srědki Zwjazka zasadźić. Tež sakski ministerski prezident je podpěru přilubił.

Kulow. Zjednoćene Kulowske kluby přihotuja tuchwilu festiwal při tamnišim měšćanskim haće. Zarjadowanje přewjeduja stajnje prěni kónc tydźenja w awgusće. Lětsa budźe wone wot 2. do 4. awgusta a je sedme tajkeho razu. Tónraz su znowa regionalne a nadregionalne kapały přizjewjene, mjez druhim Antilopengang a Part of the Crowd. Dalše informacije pod www.stadtteichfestival.de

Woheń škodu načinił

Ptačecy. Z dotal njeznateje přičiny je so póndźelu na ležownosći w Ptačecach (Tätzschwitz) w gmejnje Halštrowska Hola žiwy płót palił. Wulkeje suchoty dla přeskočichu płomjenja na susodnu garažu, na kontejner a tohorunja na blisku kólnju. Dohromady nasta ně­hdźe 50 000 eurow škody, rěka w policajskej rozprawje. Kriminalna policija přepytuje nětko podhlada zapalerstwa dla.

Lětuša turistiska sezona při Bjerwałdskim jězoru derje zaběžała

Hamor (AK/SN). Turistiska sezona 2019 při Bjerwałdskim jězoru, najwjetšim Sak­ske­je, je derje zaběžała. Tole podšmórny Hamorski wjesnjanosta Achim Junker (CDU) na póndźelnym posedźenju gmejnskeje rady. „Hladajo na dotal předležace ličby aktualneje sezony směmy so noweho wopytowarskeho rekorda na­dźi­jeć. To pak budźe wězo wot wjedra a wot ličby hóstnych łožow w přichodnych tydźenjach wotwisować“, Junker rjekny. Po nazhonjenjach minjenych lět su hotele, pensije a dowolowe bydlenja na teritoriju gmejny w juliju a awgusće wuknihowane. Přenocowanske kapacity drje přiběraja, hłownje pak w tym wobłuku, kotryž w statistisce njeliča, mjenujcy hdyž jedna so wo mjenje hač dźesać łožow. „Tež w gastronomiskim wobłuku zwěsćamy stagnaciju, štož zwisuje hłownje z pobrachowacym personalom.“

Bórkhamor (JoS/SN). Wjesnych swjedźenjow w gmejnje Halštrowska Hola hižo telko njeje. 600 lět Sprjejcy bě wuwzaće, w Bórku su jón před lětomaj wozrodźili a w Nowym Měsće maja kóžde druhe lěto­ zeleny lěsny swjedźeń hajnikow. Bórkhamorski wjesny swjedźeń je tuž trochu wusahowacy, dokelž tam infrastruktura derje funguje a wšitcy za jedyn postronk ćahnu. Kaž čłonka předsydstwa wjesneho kluba Olivia Böttcher powěda, su młodźinski klub zestarjenja dla rozpušćili a jón do wjesneho kluba integrowali. Tež hewak so mnozy za wjesny swjedźeń kaž tohorunja za zetkanje motorskich angažuja.

Prěni wjeršk Bórkhamorskeho wjesneho swjedźenja minjeny kónc tydźenja bě hižo pjatk wubědźowanje wohnjowych woborow wo pokal Jantaroweho jězo­ra. Třinaće mustwow z cyłeje Łužicy bě so za to přizjewiło. Kameradojo z Lubowa (Lauba) pola Wopakeje (Oppach) docpěchu z 22,91 sekundami nowy čarowy rekord. Za prěnje městno w cyłkownym hódnoćenju pak to přiwšěm njedosahaše. Pokal wotwjezechu sej na kóncu wobornicy z delnich Sulšec před swojimi kolegami z Lubowa a tymi z Trjebina.

40 lět Mjezynarodny swjedźeń serbskeje poezije

Sobotu, 13. julija, wotměje so pod Budyskej Starej wodarnju 40. mjezynarodny swjedźeń serbskeje poezije. Lětsa wopominaja z nim serbskeho basnika Kita Lorenca. Iniciatiwna skupina Budyska nóc poezije pod nawodom Benedikta Dyrlicha wuhotuje tradicionalny kulturny swjatk w kooperaciji z Turi­stiskim zwjazkom Budyšin, z podpěru zjednoćenstwa PEN Němskeje a dalšich sponsorow. Alfons Wićaz je so z Benediktom Dyrlichom rozmołwjał.

39. mjezynarodny swjedźeń serbskeje poezije wotmě so w małej formje 2017 we Wojerecach. Loni je tradicionalny kulturny swjatk wupadnył. Sobotu wotměje so nětko štyrcety. Čehodla hakle lětsa?