Z wudaća: štwórtk, 18 julija 2019

štwórtk, 18 julija 2019 14:00

To a tamne (18.07.19)

Najnahlišu dróhu swěta maja we Walesu: Ze 37,45 procentami nahłosće je dróha Ffordd Pen Llech w małoměstačku Harlech nowy swětowy rekord nastajiła, kaž Guinnessowa kniha rekordow zdźěla. Dotal bě nowoseelandske město Dunedin z 35 procentami tutón rekord měło. Za nowy rekord přizjewili su so wobydlerjo sami, po tym zo bě so wosobowe awto z přićahnjenymi borzdźidłami po dróze dele sunyło. Zanjesene městačko nadźija so nětko na wjace turistow.

Do pasli zalězła je sej rjedźerka w Kerpenje pola Kölna. Wobydlerjej bydlenja hižo dlěje na to tukaštaj, zo je rjedźerka padušnica. Tuž połožištaj jej bankowku, kotruž sej 52lětna přistajena bjez wahanja do zaka tykny. Přiwołana policija rjedźerku přepytowaše. Nimo bankowki namaka tež wšelake debjenki z druheho bydlenja domu. Padušnicu zajachu.

wozjewjene w: To a tamne
štwórtk, 18 julija 2019 14:00

Wobydlerjo ćerpja

We wobłuku swojeje dobrowólneje wojerskeje słužby běch wot januara do měrca tohole lěta na zwučowanišću Zwjazkoweje wobory pola Wuskidźa stacioněrowany. Zo připowědźi general Zorn njedawno, je wutwarić chcyć na centralne wukubłanišćo w Němskej, njeběše za mnje tuž překwapjenka. W běhu štwórć lěta přebywanja w tamnišej kasernje běchu moji ně­hdyši kameradźa stajnje na to tukali. Husto­hdy dožiwich tuž diskusije wo lěpšinach a njelěpšinach tajkeho předewzaća. Zwučowanišćo so bjezdwěla derje za wu­twar hodźi. Za tanki a helikoptery je městnosć perfektna. To česća sej wosebje ameriske jednotki, kotrež tam prawidłownje zwučuja, hdys a hdys tež w nocy. Wěm so hišće derje dopomnić, zo wotućich raz rano w třoch, dokelž honjachu Američenjo w swojich Blackhawk-helikopterach wyše kaserny přez nóc. Tule haru změja woby­dlerjo Wuskidźa w přichodźe najskerje hišće­ husćišo znjesć. Pětr Dźisławk

wozjewjene w: Kraj a swět
štwórtk, 18 julija 2019 14:00

Horliwy ćěłozwučowar počesćeny

Choćebuskeho ćěłozwučowarja, trenarja a funkcionara Bernda Schädela su wčera z titulom „Čestnohamtski měsaca“ wuznamjenili. Šef braniborskeje statneje kenclije Martin Gorhold (SPD) je 63lětnemu wotpowědne čestne wopismo přepodał. Schädel­ hižo­ wjele lět swoju zahoritosć za ćěłozwučowanje młódšim sportowcam dale posrědkuje. W Braniborskej su mjeztym 134 „Čestnohamtskich měsaca“ po­česćili. Foto: Michael Helbig

wozjewjene w: Sport
Klóšterska pjekarnja w Pančicach-Kukowje je tuchwilu twarnišćo. Hač do kónca awgusta ju přetwarjeja a zarjaduja w njej kofejownju. Zdobom wutworja zwisk mjez zelowej zahrodu a klóšterskim dworom. Chlěb, całty a tykanc pjeku tuchwilu w pjekarni Chichowitz­ w Lipju-Tornowje sewjernje Njedźichowa a předawaja je nachwilnje we wustajenišću Terezineho domu. Wčera zetkachmy­ na twarnišću Renéja Lenharda a Jörga Freudenberga (wotprawa) ze Smječkečanskeje firmy Rothbau. Foto: Feliks Haza

wozjewjene w: Łužica
štwórtk, 18 julija 2019 14:00

Wjesny wobchod wulke wuwzaće

Něhdy bě w nimale kóždej wsy nakupowanišćo, hdźež poskićachu twory wšědneje potrjeby. Runočasnje běchu to socialne centrumy, hdźež so wjesnjenjo zetkawachu a rady pobjesadowachu. W našej lětnjej seriji na něhdyše wjesne wobchody dopominamy.

Dźensa: Horni Wujězd (6)

wozjewjene w: Łužica
štwórtk, 18 julija 2019 14:00

Do kina (18.07.19)

18.7.–24.7.2019 Budyski filmowy palast: Der König der Löwen: wšědnje 14:15, 16:45 a 19:30 | wu a srj 9:45 | nj, wu a srj 12.15 Der König der Löwen w 3 D:wšědnje 15:00, 17:30 a 20:00 | pj a so 22:45 Annabelle 3: wšědnje 20:00 | pj a so 22:45 Alfons Zitterbacke: wu a srj 10:00 Reiß aus: nj 11:45 Pets 2: wšědnje 14:15 (nimo pó), 16:15 a 18:15 Pets 2 w 3 D: nj, wu a srj 12:15 Spider Man: Far From Home: wšědnje 17:15 (nimo pó) a 20:15 (nimo pó) Spider Man: Far From Home w 3 D: pj a so 22:15 Aladdin: wšědnje 14:30 Traumfabrik: wu a srj 11:45 Drei Schritte zu Dir: nj, wu a srj 12:00 Pokémon Meisterdetektiv Pikachu: wu a srj 9:30 Rocketman: wu a srj 9:30 John Wick: so 22:30 Men in Black: International: pj 22:30

Kino-ekstra: Nur eine Frau: pó 17:15 a 20:15

Wojerowski CineMotion:

Der König der Löwen w 3 D: wšědnje 14:45, 17:30 a 20:15 | pj a so 22:10 Spider Man: Far From Home w 3 D: wšědnje 17:25 a 20:00 Aladdin: wšědnje 12:10 Annabelle 3: wšědnje 19:55 | pj a so 22:45 Der König der Löwen: wšědnje 12:15, 14:00, 16:45 a 19:30 Edie – Für Träume ist es nie zu spät: srj 17:50 John Wick: pj a so 22:00 Pets 2: wšědnje 12:00, 13:55, 16:00 a 18:00 (nimo srj) Pokémon Meisterdetektiv Pikachu: štw, so, pó a srj 11:45 Spider Man: Far From Home: wšědnje 14:40 TKKG: pj, nj a wu 11:50

wozjewjene w: Do kina
štwórtk, 18 julija 2019 14:00

Při jězoru nastanu přistawnišća

Inwestor skorži běrokratiskich jednanjow a dowolnosćow dla

Hamor (AK/SN). Infrastrukturu při Bjerwałdskim jězoru chce Hamorska gmejna dale zaměrnje wuwiwać. Tole wotbły­šćowaše so na zašłym posedźenju gmejnskeje rady. Jednohłósnje radźićeljo wobzamknychu, wotzamknyć z Łužiskej a srjedźoněmskej­ towaršnosću hórnis­twoweho zarjadnistwa (LMBV) zrěčenje wo financowanju a přewzaću funkcionalneho twarjenja w Klětnjanskim přistawje.

Dale wutwori gmejna trěbne wuměnjenja za pasažěrske łódźnistwo na jězorje. Hač do kónca lěta matej za to přistawnišći w Hamorje a Klětnom hotowej być. Tón w Delnim Wujězdźe tuchwilu planuja. „Smy za to wšelake warianty pruwowali. Wažne je, zo móžemy přistawnišćo zapłaćić, zo wone funguje a zo su zawodowe wudawki za nje zastupujomne“, rozłoži planowar Helmut Perk z Rěčičanskeho inženjerskeho běrowa. „Nowa gmejnska rada změje wo tym rozsudźić­.“

wozjewjene w: Łužica
štwórtk, 18 julija 2019 14:00

Z wutrobua elanom za wjes

Huska (SN). Z wuznamjenjenjom za wosebite čestnohamtske dźěło počesći Budyski krajny rada Michael Harig (CDU) Gerta Lehmanna z Huskeje (Gaußig). Tam njebě tón jenož wjele lět wučer, ale tež předsyda sportoweho towarstwa. Jako gmejnski radźićel a zastupowacy wjesnjanosta je wón na kulturnym polu wjele wuskutkował. Jako­ předsyda domizniskeho towarstwa wutwori wón wokoło wsy pućowanske šćežki, organizowaše kulturne a infor­maciske zarjadowanja a tež twar sportoweje hale w lěće 1993 je sobu nastorčił. Na jeho iniciatiwu přewjeduja hudźbne popołdnja w parku, wotměwaja rejwanske wječory a samo zhromadne busowe jězby hač do wukraja. Ze swojimi idejemi Gert Lehmann wjesne žiwjenje w Husce wo­bohaći, Michael Harig wuzběhny.

wozjewjene w: Łužica
štwórtk, 18 julija 2019 14:00

Policija (18.07.19)

Woł ratarja zranił

Dubrjenk. Na njelube wašnje staj sej zawčerawšim popołdnju w Dubrjenku ratar a jeho woł blisko přišłoj. Kaž policija rozprawja, je so njemdre skoćo do 55lětneho muža dało a jeho ćežko zraniło. Wuchowanski helikopter dowjeze bura pozdźišo do chorownje. Zastojnicy Wojerowskeho policajskeho rewěra nětko bliše wobstejnosće, kotrež k zranjenjam muža wjedźechu, přepytuja.

wozjewjene w: Policija
štwórtk, 18 julija 2019 14:00

Na slědach prjedownikow

Slepjanscy šulerjo sej na projektowym dnju blišu domiznu wotkryli

Lennox Schnabel, Finn Seeliger, Lucien Herrgesell a Annemarie Frömer – wšitcy štyrjo dźewjećlětni – su so hižo dlěje na synowe žně wjeselili. Połni wočakowanjow su woni na statok Hanza Šustera w Trjebinje podali. 16 šulerjow rjadownje 3A Slepjanskeje zakładneje šule „Dr. Marja Grólmusec“ wěnowaše so we wobłuku njedawneho projektneho dnja w předmjeće wěcna wučba temje „Wuknjenje něhdy“ a „Žiwjenje burow něhdy“. „Runje na statoku Hanza Šustera móžachu jara praktisce wuknyć. Předmjetaj wěcna wučba a serbšćina hodźitej so derje ze sobu zwjazać“, podšmórny rjadowniska wučerka Silwija Zajcowa. Wona podawa na šuli serbšćinu, němčinu, matematiku a wěcnu wučbu.

wozjewjene w: Kubłanje

Serbska debata

nowostki LND