Z wudaća: póndźela, 09 septembera 2019

Zhorjelski wokrjes zarjaduje přichodnje wobydlerske běrowy

Zhorjelc (AK/SN). Z cyłkownje 28 projektami chce Zhorjelski wokrjes přichodnje ludźom přichileniši a transparentniši być. Na to měri so nowy program „Zarjadnistwo 4.0“. Decentralne wobydlerske běrowy zmóžnjeja krótke puće a dobry serwis, rozłoži komornik Thomas Gampe minjeny pjatk w Zhorjelcu. Běrowy maja w Lubiju, Běłej Wodźe, Niskej a Žitawje nastać. Hłowny zaměr je, zo nje­trjeba žadyn wobydler přichodnje dale hač 20 kilometrow jěć, zo móhł posłužby zarjadnistwa wužiwać.

W prěnim kwartalu 2020 chcedźa wobydlerski běrow w Lubiju wotewrěć. W třećim abo štwórtym kwartalu ma běrow w Běłej Wodźe slědować. Stej to prěnjej pilotowej projektaj toho razu.

Překwapjenki mamy wšitcy rady, wosebje, hdyž móžemy wjeselo z druhimi dźělić. Tajke začuće mějachu bjezdwěla wopytowarjo dotal třoch předstajenjow musicala „Quo vadis – dokal dźeš?“. Šulerjo a wučerjo Worklečanskeje wyšeje šule „Michał Hórnik“ kaž tež jich partnerojo su publikum wulce překwapili. Dlěje hač lěto běchu wot ideje hač k premjerje na musicalu dźěłali, dołhodobnje a wušiknje su za swój projekt wabili. Tak su w njestajnych wotstawkach politikarjow na proby wi­tali, běchu hosćo w Drježdźanach a su w rozhłosu wo projekće rěčeli. Tak bě wěste, zo mnozy wćipni rynki stólcow w Chróšćanskej „Jednoće“ pjelnja. Worklečanska gmejna jako nošer projekta tuž na kóncu zawěsće zabudźe, zo dyrbješe hromady formularow podpisać. Jeničce technika je wjacore dźesaćtysacy eurow płaćiła. Na kóncu mjenujcy přewažuje wjeselo, zo je zhromadna myslička k zasłuženemu wuspěchej wjedła. Milenka Rječcyna

Hdźež su prjedy raz płun zhotowjeli, móža so Budyšenjo bórze podłu Sprjewje wuchodźować. A ryby maja w rěce swoju swobodu. To běše Němskemu zjednoćenstwu za wodohospodarstwo wosebiteho wuznamjenjenja hódne.

Na modernu architekturu w starym měsće Budyšina skedźbnili

Budyšin (CRM/SN). „Ze zapřijećom ‚moderna‘ zwjazujemy tež dźensa narok načasneje změny wobstejaceho abo tež wu­tworjenje noweho.“ Tak zwurazni to Budyska měšćanostka za twarstwo Julia Naumann k lětušemu dnjej wotewrjeneho pomnika. Kóždolětne zarjadowanje nańdźe wčera, njedźelu, čiły wothłós tež w starodawnym měsće nad Sprjewju.

Na swójbne popołdnjo a dworowy swjedźeń do Wuježka běštej kónc tydźenja Krygarjec swójba a Serbske ewangelske towarstwo přeprosyłoj. Hižo 15. króć su Serbja, ewangelscy kaž tež katolscy, poskitk dźakownje přiwzali.

Wuježk (lm/SN). Dokelž maja młode swójby termin po lětnich prózdninach kruće zaplanowany, poda so něhdźe 40 zajimcow, přewažnje dźěći, sobotu po wobjedźe do přirody wokoło Wuježka. Pućowanje wjedźeše přez lěs na Rubježny hród. Po puću knježeštej čiła bjesada a wuměna, wšako běchu hosćo ze wšěch kóncow Łužicy kaž tež z Lipska a Bayerskeho lěsa přichwatali. Přiroda skićeše dźěćom dosć městna so wucychnować a dorosćenym so wočerstwić, tak zo dachu sej na kóncu swačinu na Pawlikec dworje we Wuježku zesłodźeć.

Woheń we wjaceswójbnym domje

Trjebjeńca. Woheń hašeć dyrbjachu wohnjowi wobornicy wčera w Trjebjeńcy (Steindörfel). W jednym z bydlenjow nańdźechu 73lětneho bjez wědomja. Jeho dowjezechu z helikopterom do chorownje.

Berlin. Přichodne Serbske blido w Berlinje budźe štwórtk, 12. septembra, w 16 hodź. w hosćencu EINSTEIN KAFFEE na Friedrichowej 206. Hosćenc je direktnje pódla bywšeho namjezneho přechoda Checkpoint Charlie. Zajimcy su wutrobnje witani.

Statny rěčnik porěči

Kulow. Křesćansko-socialny kubłanski skutk přeprošuje na dalše popoł­dnjo seniorow.­ Wone wotměje so srjedu, 11. septembra, w 14.30 hodź. na Kulowskim Starym dwórnišću. W srjedźišću zarjadowanja steji prašenje, što je poprawom prawniski stat? Statny rěčnik na Budyskim hamtskim sudnistwje dr. Ludger Altenkamp wo temje porěči a wjeseli so na prašenja wopytowarjow.

Čorny Chołmc (AK/SN). „Nad myjnicu wisa špihel“, Ruth Brězanowa pomału a jasnje serbsce čita. W Čornochołmčanskim Frenclowym domje nawjeduje Kulowska wučerka na wuměnku kurs serbšćiny za kubłarki a dalšich zajimcow. Na zašłym­ zetkanju zaběrachu so wobdźělnicy z rumnosćemi w bydlenju.

Kóžde lěto dźakujetej so Radworske agrarne předewzaće a Wulkowjelkowski agrarny zawod swojim wotnajerjam ležownosćow za dowěru. Bjez přewostajenja přestrjenjow dźě njemóžetej ratarskej předewzaći dźěłać. Tak zarjadowaštej sobotu znowa wotnajerski swjedźeń w Čornym Hodlerju. Na kołojězbach móžachu so ludźo na přikład wobhonić, što zawodaj na polach plahujetej. Wšako chcedźa wědźeć, što so na jich ležownosćach stawa. Runje tak su sobudźěłaćerjo předewzaćow ratarsku techniku přihotowali a ju zajimcam rozłožili. Nimo toho bě dosć dalšich darmotnych poskitkow za dźěći a dorosćenych. Foto: SN/Maćij Bulank

Optik Rathenow

– FC Energija Choćebuz 1:4 (1:1)

Zestawa hosći: Moser – Borgmann, Zi­ckert, Koch, Hoppe, Eisenhuth, Erlbeck, Broschinski, Brügmann (86. Beyazit), Taz (88. F. Geisler/89. N. Geisler), Rangelow

Na 7. hrajnym dnju regionalneje koparskeje ligi sewjerowuchod poradźi so FC Energiji Choćebuz, zestupnikej z třećeje ligi Němskeje, prěnje wonkowne dobyće a je tak přeposlednjeho tabulki ze 4:1 na distancu dźeržał. Hosćo z Delnjeje Łužicy pokazachu nimale cyły čas swoju dominancu a mějachu tójšto móžnosćow. Wo nawjedowanje drje postarachu so domjacy po konteru (17.), přichodna akcija před tamnymi wrotami pak wjedźeše hižo k 1:1 (18.) přez Felixa Brügmanna. Za njeho běchu to zdobom pjate wrota aktualneje hrajneje doby.

Tež po přestawce hraješe nimale jenož FC Energija. Dimitar Rangelow třěli 1:2 (60.) a 1:3 (73.), doniž njepostara so Abdulkadir Beyazit wo kónčne 1:4 (87.). Přewulke wjeselo pak w rjadach hosći nje­nasta, dokelž bě sej Felix Geisler jenož mjeńšinu, po tym zo bu zaměnjeny, křižny pask w prawym kolenje torhnył. Tak najprjedy raz šěsć měsacow wupadnje.

 

FC Energija Choćebuz

– VfB Auerbach 1:4 (1:2)