Z wudaća: wutora, 10 septembera 2019

wutora, 10 septembera 2019 14:00

Krótkopowěsće (10.09.19)

Wjace wody za Sprjewju a Šepc

Kwětanecy. Z Kwětanečanskeje rěčneje zawěry běži nětko wjace wody do Sprjewje a Čorneho Šepca, a to dokelž wěšća wjedrarjo za přichodne tydźenje njedosahace spadki. Přidatnje 1,8 milionow kubiknych metrow wody chcedźa wotpušćić, zdźěli krajny zarjad rěčnych zawěrow. Staw wody w Kwětanečanskej rěčnej zawěrje so tak wo něhdźe poł metra zniži.

Přesadźuja stadło wowcow

Budyšin. Krajnoradny zarjad přesadźuje jutře w 10 hodź. w domje 2, stwa 007 na Budyskej Dwórnišćowej 9 stadło 151 Suffolk-wowcow wšěch starobnych skupin a boranow w jednym losu. Skoćata su w poměrnje dobrym stawje zežiwjenja a ćerpja zdźěla pod chromosću. Zajimcy maja płaćiwe čisło skótneho wobchadneho porjada (VVVO.-Nr.) a wobkrućacy spis skótneho lěkarja wo družinje wotpowědnym plahowanju předpołožić.

Z tramwajku na Ještěd

wozjewjene w: Krótkopowěsće
Madeleine Krüger přihotuje pisanu paletu zeleniny za dworowy wobchod Krügerec zahrodnistwa w Kromoli. Hišće ženje njejsu tam hač do septembra tajke mnóstwo samoplahowaneje zeleniny za předań na składźe měli. Jeničce běrny su pod horcotu ćerpjeli.­ Tomaty, kórki a morchej su lětsa wosebje derje rostli, ale tež poskitk mangolda, kulirabijow, jahodow aronije a cuki­nijow maja Krügerecy jara wulki. Foto: Joachim Rjela

wozjewjene w: Hospodarstwo
wutora, 10 septembera 2019 14:00

Žiwjenjea nazhonjenja

Musical „Quo vadis-dokal dźeš?“ Worklečanskeje Serbskeje wyšeje šule „Michał­ Hórnik“ je na štyrjoch před­stajenjach wulku syłu přihladowarjow přiwabił. Milenka Rječcyna je so někotrych za jich zaćišćemi prašała.

Franciska Hejdušcyna: To bě poskitk, kiž swědči wo hłubokim zwisku mjez wučerjemi a šulerjemi. Začuwać bě zhromadnosć a zo serbska wutroba wšitko zwjazuje. Sym sej něštožkuli za swoje žiwjenje sobu brała. Dopóznach, zo maš, wšojedne dokal će puće w žiwjenju wjedu, swoje korjenje tam, hdźež su swójbni a přećeljo.

Hannah Šmitec: Mi je so musical wulkotnje lubił. By rjenje było, móhli tajke něšto tež na Serbskim gymnaziju w Budyšinje činić. Wěm, zo je to wjele dźěła. Ale na kóncu widźiš, zo so wudani. Wosebje spodobałoj stej so mi wulki chór a hudźba, kotruž je band live hrała. Myslu sej, zo je wobsahowe žro hry młodym ludźom wjele sobu na puć dało.

wozjewjene w: Měnjenja
wutora, 10 septembera 2019 14:00

Poćah mjez přirodu a kulturu

Projekt „LandArt podłu Jawory“ chce wuměłstwo před durjemi pokazać

Njebjelčicy (SN/MiR/bn). Cyłkownje šěsć wuměłcow z Němskeje, Pólskeje, Awstriskeje, Indiskeje a Čěskeje so na lětušim projekće „LandArt podłu Jawory“ wobdźěli. Hłownje wot towarstwa Kamjenjak organizowany projekt wotměje so přichodne tydźenje wokoło Miłoćic, Wěteńcy, Pěskec, Serbskich Pazlic a Njebjelčic.

Wuměłcy chcedźa elementy krajiny na sensibelne wašnje wuzběhnyć. Tak chcedźa wobhladowarjej wuwědomić, zo je přiroda za čłowjeka esencielna. Za aktualny projekt zamołwity je Hubert Lange.­ Na naprašowanje SN zdźěli čłon předsydstwa Kamjenjaka, „zo su wjacori čłonojo towarstwa wobdźělnikow wu­zwolili a jich přeprosyli. Před dwěmaj měsacomaj su wuměłcy nas wopytali a sej sami zaćišć wo tudyšich poměrach wutworili.“ Zdobom su sej woni wubrali městnosće, na kotrychž chcedźa wuměłsce skutkować. Kónc tohole tydźenja započnu dźěłać.

wozjewjene w: Kultura
wutora, 10 septembera 2019 14:00

Bórze z nowym logom

Předsydstwje Maśicy a Maćicy Serbskeje stej so ze skutkowanjom młodeho delnjoserbskeho kulturneho towarstwa zeznajomiłoj a so na nowe towarstwowe logo dojednałoj.

Choćebuz (JŁu/SN). Předsydstwje Maćicy a Maśicy Serbskeje stej so wčera w Choćebuskim Serbskim domje z dźěławosću noweho delnjoserbskeho kulturneho towarstwa Studnja zeznajomiłoj. Wo tym informuje předsyda Maćicy Serbskeje Jurij Łušćanski. „Tradicionelnje wuradźujetej předsydstwje jónu wob lěto zwonka Budyšina, zo byštej sej skutkowanje regionalnych towarstwow zbližiłoj“, Jurij Łušćanski wuswětli.

wozjewjene w: Towarstwa
wutora, 10 septembera 2019 14:00

Łužiscy wuměłcy w portreće

Nowa kniha Jürgena Maćija „Wuměłcy w Hornjej Łužicy 2“, wopřijaca 70 portretow žiwych kaž tež biografije 130 njebohich wuměłcow regiona, wudospołnja před dźesać lětami wušły prěni zwjazk antologije. Wona twori zakład za aktualnu, hač do spočatka nowembra přistupnu wustajeńcu samsneho mjena we Wuchodosakskej wuměłstwowej hali w Połčnicy. Publikacija kaž tež přehladka nastaštej w zhromadnym dźěle fotografa a towarstwa Kulturne koło Ernsta Rietschela. Lawdatorka wernisaže a zdobom knižneje premjery minjenu sobotu bě dr. Ingrid Koch; hudźbnje wobrubił je premjeru Łužiski róžkowy kwartet z Choćebuza. Foto: Rico Löb

wozjewjene w: Kultura
wutora, 10 septembera 2019 14:00

Twórby Serbowki w ministerstwje

Drježdźany (SN). Pod hesłom „Wuměłstwo na chódbje“ wuhotuje sakske mi­nisterstwo za wědomosć a wuměłstwo prawidłowne wustajeńcy „w mjeńšim ramiku“ tydyšich resp. wottud pochadźacych molerjow, grafikarjow a fotografow. Na wopyće statneho sekretara Uwy Gaula pola Serbow loni w Budyskim Serbskim domje běchu ideju zrodźili, předstajić w tym wobłuku tež serbske tworjace wuměłstwo. Z podpěru Zwjazka serbskich wuměłcow (ZSW) su w minjenych měsacach přihotowali prezentaciju tuchwilu w Berlinje bydlaceje a skutkowaceje čłonki towarstwa Měrki Pawlikoweje. Přehladka wopřijima dohromady sydom mólbow kaž tež žiwjenjoběh wuměłče.

Jutře, srjedu, w 11 hodź. budźe w přitomnosći Měrki Pawlikoweje kaž tež mjez druhim předsydy ZSW Jana Bělka drje njeoficialne, ale přiwšěm zjawne wotewrjenje wustajeńcy, kotrež je na chódbje běrowow amtěrowaceje ministerki dr. Evy-Marije Stange (SPD) a jeje sobudźěłaćerjow zaměstnjena. Mała ekspozicija wostanje potom hač do kónca lěta přistupna.

wozjewjene w: Towarstwa
wutora, 10 septembera 2019 14:00

Raka dla złoži zastojnstwo

Schwerin (dpa/SN). Ministerska prezidentka Mecklenburgsko-Předpomorskeje Manuela Schwesig je na raka nadrow schorjeła a tuž swoje zastojnstwo jako komisariska předsydka SPD złoži. To je 45lětna dźensa na posedźenju kabineta w Schwerinje zdźěliła, kaž statna kenclija informuje. Zastojnstwo ministerskeje prezidentki a krajneje předsydki SPD chce pak dale wukonjeć, wona zdźěli. Schwesig z toho wuchadźa, zo je rak hojomny a zo so zaso wustrowi.

Johnson znowa podležał

London (dpa/SN). Britiski premierminister Boris Johnson je minjenu nóc znowa z pospytom zwrěšćił, nowowólby přesadźić. Jara jasnje misny wón trěbnu wjetšinu dweju třećinow hłosow w Delnjej komorje parlamenta. Tak njeje hižo móžno, nowowólby do planowaneho wustupa kraja z EU 31. oktobra přewjesć. Porno tomu njeje Johnson tomu zadźěwać móhł, zo je nowy zakoń přećiwo njerjadowanemu brexitej płaćiwosće nabył. Prezident Delnjeje komory John Bercow připowědźi, zo 31. oktobra wotstupi.

Wuradźuja wo etaće 2020

wozjewjene w: Kraj a swět
Do zarjadowanja k Dnjej njewotwisnosće Chorwatskeje w Kulowje su chorwatscy hosćo dźensa w Ralbicach Božu mšu swjećili, kotruž dźeržeše japoštołski nuncius, arcybiskop, dr. Nikola Eterović, zhromadnje z wosadnym fararjom Šćěpanom Delanom. Přitomni běchu tež chorwatski wulkopósłanc dr. Gordan Grlić Radmann, honorarny konsul Chorwatskeje dr. Peter Neumann a zastupowacy měšćanosta chorwatskeho Varaždina Zlatan Avar (wotprawa). Foto: Feliks Haza

wozjewjene w: Kraj a swět
wutora, 10 septembera 2019 14:00

To a tamne (10.09.19)

Sobujěduceho na parkowanišću zabyła je pućowanska skupina na dompuću do Pólskeje 70 kilometrow južnje Podstupima při awtodróze A 9. Kaž policija zdźěla, njemóžeše 31lětny bus telefonisce wjace docpěć a na so skedźbnić, dokelž bě ba­terija mobilneho telefona wučerpana. Pomocliwy pěšk wołaše tuž policiju, kotraž muža z parkowanišća Hagen West do Michendorfa dowjeze. Tam namaka wón krajana, kiž jeho ze swojim wo­sobowym awtom do směra na Pólsku sobu­ wza.

Chětro zahe wo hodownu dekoraciju starali su so paduši w Plauenje. Woni zadobychu so do zamknjeneje pincy wjaceswójbneho domu. Namócnje wotewrěchu jednu z pinčnych boksow a wzachu tři kartony sobu. W nich bě bjez wuwzaća swjedźenska dekoracija za hodowny čas. Cyłkowna hódnota: 200 eurow.

wozjewjene w: To a tamne

Serbska debata

nowostki LND