Z wudaća: wutora, 10 septembera 2019

wutora, 10 septembera 2019 14:00

Najwjetše chošćo Budyšina

Na Budyskich dróhach je nowe mjećenske awto tež ze serbskim napisom po puću. A wone je nuznje trěbne, wšako bě předchadny model dale a časćišo skóncowany. Nowa mašina, kotraž ma tež serbski napis, je jara wuski model, zo by tež po hasach stareho města jězdźić móhł. Za šěsć kubiknych metrow njerjada a za 2 000 litrow wody je mašina za wjetše město derje wuhotowana. Kromu dróhi rjedźa z dwěmaj kulojtymaj chošćomaj. Přidatnje je pod awtom hišće šěroke chošćo připrawjene. Tak da so dróha po šěrokosći 3,35 metrow rjedźić. Najwjetše chošćo Budyšina móža sej zajimcy na naprašowanje pola towaršnosće BBB zwr tež skazać. Foto: BBB/Diana Liebsch

wozjewjene w: Łužica
wutora, 10 septembera 2019 14:00

Policija (10.09.19)

Motorski do přirowa zajěł

Kulow. 33lětny wodźer motorskeho je póndźelu připołdnju na S 95 mjez Němcami a Kulowcom z dotal njeznateje přičiny kontrolu nad swojej Kawasaki zhubił a do přirowa zajěł. Muž so zrani, a jeho dyrbjachu do chorownje dowjezć.

Mountainbike pokradnyli

Hnašecy. W Hnašecach su paduši kónc tydźenja při Łučnym puću wotstajeny mountainbike sobu wzali. Njedźelu připołdnju je wobsedźer dosć droheho žołto-čorno­ błyšćaceho so kolesa pytnył, zo je wone preč.

Pod wliwom drogow z kolesom jěł

Kamjenc. Jako policisća póndźelu rano na Wojerowskej dróze w Kamjencu 34lětneho kolesowarja kontrolowachu, dyrbjachu zwěsćić, zo steješe wón pod wliwom drogow. Na to namakachu pola njeho něšto gramow crystala a cannabisa.

wozjewjene w: Policija
wutora, 10 septembera 2019 14:00

K čěskim přećelam sej dojěli

Lětuša wuprawa Domowinskeje skupiny Pančicy-Kukow wjedźeše jeje čłonow a dalšich zajimcow minjenu sobotu do Prahi. Wjace hač 40 ludźi dožiwi w čěskej stolicy zajimawy dźeń z kopicu nowych informacijow.

Před Narodnym dźiwadłom zetkachu so z předsydu Towarstwa přećelow Serbow Lukášom Novosadom a Radekom Čermákom. Wonaj běštaj wodźenje po přewšo wuznamnym dźiwadle organizowałoj. Posydnywši so w přihladowarskich rynkach znazornichu sej łužiscy wopytowarjo jeho wulkosć z nimale tysac městnami. Wot přewodnicy zhonichu wo nastaću twarjenja 1881 a zo bě so hnydom na to wotpaliło a bu znowa natwarjene. W 1980tych lětach dom dospołnje po­nowichu a namakachu mjez druhim wjacore zakładne kamjenje, kotrež su nětko w pincy dźiwadła widźeć. Wosebite wužadanje we wšěch lětach bě, zwjazać charakter narodneho dźiwadła jako pomnik čěskeho ludu z narokami moderneho dźiwadła. Po politiskim přewróće­ wudospołnichu je z dalšimi twarjenjemi, kotrež tworja nětko cyłkowny ansambl wokoło Naměsta Václava Havela­.

wozjewjene w: Serbski powěstnik
wutora, 10 septembera 2019 14:00

Rada gmejny so skonstituuje

Róžant (SN). Prěni raz po wólbach zetka so štwórtk, 12. septembra, rada gmejny Ralbicy-Róžant. Nimo spřisahanja čłonow wola w Róžeńčanskej gmejnskej sydarni tež zastupjerjow wjesnjanosty a zastupjerjow wjacorych wažnych gremijow. Wuradźowanje je zjawne, započatk je we 18.30 hodź.

Na knižnu premjeru

Budyšin (SN). „Kaskady-kaskaden“ rěka nowa kniha serbskeje tworjaceje wuměłče Maje Nageloweje a jeje němskeho kolegi Jörga Sperlinga. Nowu publikaciju, kotraž je njedawno w Ludowym nakładnistwje Domowina wušła, předstaja zajutřišim štwórtk, w 19.30 hodź. w Budyskej Smolerjec kniharni.

Přewjedu dworowy swjedźeń

wozjewjene w: Z městow a wsow
wutora, 10 septembera 2019 14:00

Raz hinak „so wuchodźowali“

W Hózku wotmě so předwčerawšim, njedźelu, 4. blackbird-run. Přełožene rěka to telko kaž „běh čornych ptačkow“, štož je na kóncu tež woprawdźe na kóždeho přitrjechiło. Wjace hač 400 wob­dźěl­nikow bě sej do małeje wsy blisko­ Kulowa­ dojěło, zo bychu cyle dobro­wólnje po błóće łazyli, wšelake zadźěwki přewinyli, w lód­zymnej wodźe płuwali a při tym hišće wjeselo měli.

wozjewjene w: Sport
wutora, 10 septembera 2019 14:00

Faworit pokalnu hru jasnje dobył

Viktoria Worklecy

– VV Žitawa 09 II 2:0 (25:15, 25:11)

Sobotu tydźenja běchu wolejbulisća prěnjeho mustwa muži Viktorije Worklecy na kwasu swojeho přistajerja Marcela Rjelki (hlej foto) pomhali, swjećili a mě­jachu wjele wjesela. Sydom dnjow pozdźišo pak steješe prěnja winowatostna hra sezony na planje, a to we wobwodnym pokalu.

Pokalne hry su wšitkim mustwam witana móžnosć, pod wubě­dźowanskimi wuměnjenjemi testować a swoje aktualne kmanosće posudźować. Za Viktoriju běše to wosebje wažne, dokelž maja w swojich rjadach někotrych nowačkow. Bohužel bě MSV Budyšin II pobracho­wacych hrajerjow dla krótkodobnje wotpra­jił, tak zo dyrbješe dwubój mjez Workle­cami a Žitawu wo kwalifikaciju za kónčne pokalne koło w decembrje roz­sudźić. Budyšenjo pak starachu so znajmjeńša wo dweju sudnikow. A tak móžachu hru dypkownje zahwizdać.

wozjewjene w: Sport
wutora, 10 septembera 2019 14:00

Měšćanski běh perfektnje zwoprawdźeny

Na 26. měšćanskim běhu w Budyšinje wobdźěli so minjenu sobotu na wšěch wubědźowanskich distancach wot 1,2 do 10 km cyłkownje 1 853 běharkow a běharjow. To je nimale dwěsćě wjace hač na lońšim 25. jubilejnym běhu.

Na distancomaj 1,2 a 2,0 km je so tež zaso­ tójšto sportowcow Serbskeje za­kładneje šule Budyšin (SZŠB) a Serbskeje wyšeje šule Budyšin (SWŠB) sobu wu­bědźowało. Najwuspěšniši bě w swojej starobnej skupinje U 10 – 1,2 km – Jarek Schade (SZŠB), kiž wobsadźi prěnje městno w 4:29 min.

Z wobeju Budyskeju serbskeju šulow steješe na lisćinje wuslědkow wjace hač 40 mjenow šulerjow a šulerkow. Nimo toho wobdźělichu so někotři atleća ze šulskich kubłanišćow za swoje sportowe zjednoćenstwo, w kotrymž trenuja a so tež wubědźuja. Tak startowaštaj šulerjej Radworskeje šule, Bejmakec bratraj Cas­par­ Dominik a Julian, za ST 1922 Radwor na distancy 1,2 km.

wozjewjene w: Sport
wutora, 10 septembera 2019 14:00

Doma z optimalnym wudobytkom

SJ Chrósćicy II

– HZ Hórnikecy/Ćisk II 1:0 (0:0)

Zestawa domjacych: Dórnik – M. Donat, F. Cyž, Šiman, Mark, Handrik (81. J. Donat), Domaška, Matješk, Mohaupt, Liznar, M. Cyž

Po hórkej poražce w serbskim derbyju w Njebjelčicach wočakowaše koparska rezerwa Chróšćanskeje SJ Hrajne zjednoćenstwo Hórnikecy/Ćisk II.

wozjewjene w: Sport

Serbska debata

nowostki LND