Z wudaća: štwórtk, 12 septembera 2019

Za towarstwo Krabata hłosować

Njebjelčicy. Krabatowe towarstwo je za Myto publikuma Němskeho angažementoweho myta namjetowane. Online-wothłosowanje je so dźensa w interneće pod https://www.deutscher-engagementpreis.de/publikumspreis/ zahajił. Sakske towarstwo kandiduje we wosom z 19 temowych wobłukow. Po cyłej republice, rozrjadowane po zwjazkowych krajach, wabi 617 cyłkow wo podpěranske hłosy.

Wojerowska šula pódla

Drježdźany/Wojerecy. Wyša šula „Při planetariju“ we Wojerecach je jedne z pjeć sakskich kubłanišćow, hdźež zwoprawdźeja projekt „šula a digitalna demokratija“. Jedne lěto wukmanjeja pro­fijo šulerjow, wučerjow a staršich. We workshopach posrědkuja hódnoty we wobłuku socialnych medijow, zo bychu online-diskriminaciji w formje cyber-mobbinga abo hatespeechow zadźěwali.

Kóncowku „-ová“ zachować

Piwo budźe tež klětu zaručene! Tak znajmjeńša z wida Krěpječanskeje agrarneje towaršnosće wupada. Z lětušim wunoškom chmjelowych žnjow su tam spokojom, kaž rjekny to Frank Hommel (prědku) našemu wječornikej. Přiwšěm je suchota swoje slědy zawosta­jiła, pobrachowaceje wody dla su płody mjeńše hač w minjenych lětach. Foto: SN/Maćij Bulank

Wot 22. septembra do 6. oktobra wotměja so w Budyskim wokrjesu 10. interkulturne dny. Zarjadowanje je wu­směrjene na zajimcow wšelakeho kulturneho­ pozadka, tež serbskeho.

Budyšin/Wojerecy (SN/MiR). Nowinka lětušeju interkulturneju tydźenjow w Budyskim wokrjesu je, zo budźe zahajenske zarjadowanje 22. septembra w Budyskim Dźiwadle na hrodźe kaž tež na Hrodowym naměsće. Tamniši zetkawanski swjedźeń kulturow steji pod hesłom „Chwile swjećić“. Mjez hosćimi budu Budyski wyši měšćanosta Alexander Ahrens, sakska statna ministerka runo­stajenje a integraciju Petra Köpping (wobaj­ SPD) a społnomócnjeny za na­ležnosće wukrajnikow w Sakskej Geert Ma­ckenroth (CDU).

Slědźerske stipendije za přebytk w lěće 2020 na Serbskim instituće

Budyšin (SN/MiR). Serbski institut wabi wo slědźerski dorost. Hač do 31. oktobra hišće móža so tam zajimcy, kotřiž chcyli klětu w serbskej wědomostnej instituciji slědźić, wo stipendij požadać. „Hižo wot spočatka 1990tych lět to poskićamy, mjeztym pak ofensiwnišo wo stipendiatow wabimy. Mamy nětko wjele wjace přizjewjenjow hač městnow. Wo­sebje w zašłymaj lětomaj je wjele požadanjow do instituta dóšło“, rozłožuje nawoda wotrjada za kulturne wědomosće w Budyskim Serbskim instituće dr. Friedrich Pollack. „Wupisamy na lěto dwaj do tři stipendije. Zajimcow pak je wo wjele wjace. Poskićene temy a zakładne dźěła požadarjow su zwjetša tak zajimawe, zo je nam wuběr jara ćežki.“

Wojerecy (pi/SN). Předsydstwo Wojerowskeje župy „Handrij Zejler“ je na swojim wčerawšim posedźenju wjacore terminy wothłosowało. Tak přewjedu popołdnjo za swójby 2. nowembra na žurli Ćišćanskeho hosćenca „Zeleny wěnc“, kaž župan Marcel Brauman zdźěli.

Swoju kubłansku jězbu planuja Wojerowscy Domowinjenjo lětsa zhromadnje z Budyskej župu 4. oktobra na zahajenje serbskeho lěta w Liberecu. „Mamy hišće městno. Štóž chce so wobdźělić, njech so pola Sonje Hrjehorjoweje přizjewi“, Brauman rjekny. Dalši župje wažny termin je serbski wječork ze zastupjerjemi Domowiny, Załožby za serbski lud, Rady za serbske naležnosće Sakskeje a dalšich institucijow 7. nowembra na Židźinskej starej šuli. Tam budźe składnosć za wuměnu a naprašowanja zastupjerjam Serbow wšelakich gremijow.

Filmowy team z Lipska je wčera w Njebjelčicach zapopadnył wobrazy za imageowy pask. Ćežišćo filmowcow běchu wosebitosće architektury tamnišeje pěstowarnje.­

Berlin/Wolfsburg (dpa/SN). Awtotwarc Volkswagen njeje po swójskich wuprajenjach w nowšich dieselowych awtach žane ilegalne připrawy za manipulaciju wotpłuna zatwarił. Po dotalnym přepytowanju „njeje so ničo ilegalneho stało“, zdźěli rěčnik koncerna. Wón reagowaše tak na rozprawu rozhłosa SWR, po kotrejž je awtotwarc pječa tež w nowšich dieselowych modelach wotpłunoweje normy 6 software zatwarił. Wona spó­znawa, zo awto runje pruwuja.

Wjace chudych rentnarjow

Berlin (dpa/SN). Samo při dalšim pozitiwnym konjunkturnym wuwiću drje strach chudoby w starobje přichodne lěta dale přiběra. To wuchadźa z dźensa wozjewjeneho přepytowanja Němskeho instituta za hospodarske slědźenje w nadawku Bertelsmannoweje załožby. Wot chudoby wosebje wohroženi su mało kwalifikowani, samostejacy kaž tež ludźo po dołhej bjezdźěłnosći. Podźěl chudych rentnarjow móhł po wobličenjach fachowcow wot tuchwilu 16,8 procentow na 21,6 proc. w lěće 2039 rozrosć.

Wojacy pomhaja po wichoru

Prjedy hač su mjezynarodnu awtomobilowu wustajeńcu IAA w Frankfurće nad Mohanom dźensa wotewrěli, je policija z pomocu na rozbuchlinu trenowanymi psami wšitke jězdźidła w bjezposrědnjej wokolinje swjatočnosće přepruwowała, kaž tele nowe elektroawto ID.3. Na oficialnym zahajenju wobdźěli so tež zwjazkowa kanclerka Angela Merkel (CDU). Foto: dpa/Silas Stein

Powětrowe balony zakazać chcedźa Zeleni w Delnjej Sakskej. „K njebju pušćene balony přizemjeja w přirodźe, hdźež je ptački a dalše zwěrjata žeru a na to zahinu“, měni krajna předsydka Anne Kura medijam. Wona skedźbnja na to, zo je město Gütersloh z płunom pjelnjene balony hižo zakazało. Wobswětowe minis­terstwo zakaz wotpokazuje. „Po powětře lětace balony su ludźo hižo přeco ze sonami a nadźiju zwjazowali. Zakaz balonow swět njewumóži“, ministerstwo zdźěla.

Šěsć razow 37 poschodow na kolesu horje skakał je pólski ekstremny sportowc Krystian Herba. Ze specialnym kolesom je 38lětny wčera w Berlinje zdobom swójski rekord w Guinnessowej knize přewinył. Dobrej dwě hodźinje Polak w hotelu Park Inn na Alexanderowym naměsće na swojim trialbikeu schody horje ska­kaše, bjeztoho zo by jónu z kolesa zlězł.

Grodk/Choćebuz (SN/at). Tuchwilu wotpočowaca Janšojska brunicowa jama znjeměrnja komunalne zwjazkarstwo Łužiski kruh, rjemjeslnisku komoru kaž tež Industrijnu a wikowansku komoru w Choćebuzu. „Wulkeje starosće wo přichod regiona dla“ su so wone spočatk tydźenja­ z Łužiskim apelom na brani­borskeho ministerskeho prezidenta Dietmara Woidku (SPD), na amtěrowace krajne knježerstwo a na wšitkich wobdźělenych wobroćili.