Z wudaća: pjatk, 29 nowembera 2019

W Komorowje pola Rakec dyrbja šoferojo tele dny wokołopuće na so brać. Tam wu- a přetwarjeja tuchwilu busowu čakarnju we wsy. Jej napřećo nastawa zdobom nowa, předewšěm za šulske dźěći. Za čas twarskich dźěłow wostanje dróha dospołnje zawrjena, wobjězdka wjedźe po zwjazkowej dróze B 96. Foto: SN/Maćij Bulank

W Njeswačanskim domizniskim muzeju wočakuja wot jutřišeho připołdnja wopytowarjow na nowu wosebitu wustajeńcu. Wona je kaž stajnje kónc lěta hodam wěnowana a předstaja tónkróć 240 modernych božich narodkow.

Njeswačidło (SN/ML). Wosebity hobby mějićelki pohrjebneje słužby z Plusnikec Uty Schilder je, zběrać tajke nowše předstajenja wuznamneho podawka w Betlehemskej Božej nocy. Nimale 300 eksponatow ze wšeho swěta wona mjeztym wobsedźi. Wjetšinu swojeje zběrki po­kaza wot jutřišeho hač do klětušeho 19. wulkeho róžka w Njeswačidle.

Mjez pokazanymi eksponatami je wjele ze wšelakich kónčin Němskeje, tak mjeńši tradicionalny drjewjany boži narodk z Bayerskeje. Sylnje zastupjeny je Israel,­ kraj, w kotrymž bě so před 2019 lětami wony w Nowym zakonju wopisany podawk stał. Z Armenskeje wuhladaš na papjercu­ znate postawy – swjatu Mariju,­ Józefa a w žłobiku Jězusdźěćatko. Podobne zwobraznjenje Božeho naroda je z Georgiskeje.

Wěteńčanske dźěći smědźa so na nowe hrajkanišćo wjeselić

Wěteńca (JK/SN). Zo ma gmejna Njebjelčicy komunalny lěs, njeje najskerje wjele ludźom znate. Při jeno 9,7 hektarach to wězo tež njezadźiwa. Při­wšěm maja wone porjadnje wobhospodarjene być. Za to trěbny je hospodarski plan, kotryž nastaji za komunalne lěsy teje wulkosće sakski statny zawod Sachsenforst.

Zamołwity za lěsnistwo na teritoriju něhdyšeho Kamjenskeho wokrjesa, Wěteńčan Michał Zahon, rozłoži na wčera­wšim posedźenju Njebjelčanskeje gmejnskeje rady pola Zahonec we Wěteńcy wobsahi a zaměr najaktualnišeho lěsneho plana za Njebjelčanski komunalny lěs. Tón je po wjacorych płoninach po cyłej gmejnje roztřěskany, ale ma dobry wobstatk, štož fachowc wobkrući. Nimale 90 procentow su lisćowcy, zwjetša duby. W přichodnych lětach chcedźa wjetše mnóstwa drjewa nadźěłać, ale tež młody lěs zapołožić a hižo wobstejace hladać. Drjewo z gmejnskeho lěsa wužiwa gmejna za swoje komunalne nadawki sama.

Budyšin. Předsydstwo župy „Jan Arnošt Smoler“ Budyšin přeproša na swoje kónclětne zarjadowanje štwórtk, 5. decembra, w 16 hodź. na žurlu Budyskeho Serbskeho domu. Trudla Malinkowa přednošuje tam wo 400lětnym wobstaću Budyskeje Michałskeje wosady. Při šalce kofeja a wosušku přizamknje so zhromadne spěwanje dohodownych pěsnjow. Čłonojo župnych skupin a towarstwow a wšitcy dalši zajimcy su wutrobnje přeprošeni. Župa prosy so hač do 3. decembra w Budyskim regionalnym běrowje pod 03591/55 02 11 přizjewić.

Kniha wo Geraće Pawliku

Nowosólc-Hródk. W Serbach znata sopranistka a hudźbna wědomostnica Romy Petrick je na zakładźe awtobiografije Gerata Pawlika (1896–1966) knihu wo žiwjenskich dopomnjenkach tohole Drježdźanskeho Serba, organista a komponista wudała. Knižna premjera budźe jutře, sobotu, w 16 hodź. na swjedźenskej žurli radnicy w Nowosólcu-Hródku.

Šofer sej po wšěm zdaću wusnył

Koitzsch. K ćežkemu njezbožu je dźensa w nocy pola Koitzscha njedaloko Kamjenca dóšło. Z dotal njeznateje přičiny bě tam wodźer Opela na prawy bok z puća zajěł a frontalnje do štoma zrazył. Policija z toho wuchadźa, zo bě sej wodźer awta na někotre sekundy wusnył. Zawołani sanitetarjo zranjeneho šofera zastarachu a dowjezechu jeho na dalše lěkowanje do chorownje. Najskerje poměrnje wulkeje spěšnosće dla bě jězdźidło chětro wobškodźene. Wohnjowa wobora dyrbješe z awta wuběžane ćěriwo wotstronić, čehoždla bě dróha někotre hodźiny za­wrjena. Policija móžnu přičinu njezboža nětko přepytuje.

Chrósćicy (aha/SN). Je hižo z wjelelětnej tradiciju, zo župa „Michał Hórnik“ swojich wjesnych chronikarjow na wuměnu nazhonjenjow přeprosy. Tomu bě tež wčera tak, a županka Zala Cyžowa móžeše w sydarni noweho gmejnskeho a kulturneho centruma w Chrósćicach ně­hdźe dwaceći ludźi witać. Rozjimali su tam koncepciju wustajeńcy „Kraj podłu Klóšterskeje wody“. Naćisk za nju stej Budyski Serbski muzej a Křesćansko-socialny kubłanski skutk (CSB) z dalšimi partnerami zdźěłałoj.

Chronikarjo mějachu wčera składnosć, so ke koncepcionelnym myslam a předstawam kaž tež wobsahowym prašenjam wuprajić. Historikar dr. Lars-Arne Dannenberg z Drježdźanskeho Centruma za kulturu a stawizny bě jara za­dźiwany, zo njeběchu chronikarjo naćisk z přeprošenjom dóstali.

Šulerjo a staršiska rada Serbskeje zakładneje šule Budyšin su dźensa dopołdnja towarstwu „Vision 2017“, kotrež skutkuje za pomoc Nikaraguwje a je we Wósporku zaměstnjene, šek 1 000 eurow přepodali. Pjenjezy nazběrali běchu šulerjo we wobłuku běha sponsorow w septembru, krótko po zahajenju šulskeho lěta składnostnje šulskeho swjedźenskeho tydźenja. Z pjenjezami chce towarstwo twar šule w Nikara­guwje podpěrać. Tak su so staršiska rada a wuknjacy rozsudźili mjenowanemu towarstwu­ pjenježny dar přewostajić. Na přepodaću šeka dźakowaše so dr. Zamora Gonzalez­ z towarstwa „Vision­ 2017“ dźěćom z piñatu. Foto: Carmen Schumann