Z wudaća: pjatk, 10 januara 2020

Foto: Lubina DučmanowaW Kulowje hodownu stawiznu předstajili Tež w Krabatowej zakładnej šuli Kulow so šulerjo na hody wjeselachu. Posledni dźeń do hód spěwachu najprjedy wšitcy zhromadnje hodowne pěsnje. Po tym předstajichu šulerjo 4. lětnika hodownu stawiznu. Při tym wužiwachu tež serbske spěwy a wobroty. Lubina Dučmanowa

Foće: Štefan Paška„Hody bjez wowki ...“ ... rěka hnujaca stawiznička, kotruž su holcy cyłodnjowskeho po­skitka ,,Wćipny pisak“ w běhu třoch tydźenjow sami spisali a na­zwučowali. Na zakładźe wobrazow su sej samostatnje powě­dančko wumyslili wo swójbje, hdźež je wowka zemrěła, a tak dyrbja nětko hody bjez njeje swjećić. Prěnje předstajenje mějachu šulerjo do hód před domjacym publikumom – šule­rjemi a šulerkami zakładneje šule. Dokelž bě so hra wulkotnje poradźiła, nasta spontana ideja ,,mini-turneje”. Hižo dwaj dnjej pozdźišo poda so skupinka ze swo­jim wučerjom knjezom Pašku do Wotrowskeje a Pančičanskeje pěstowarnje kaž tež do starownje a zakładneje šule w Chrósćicach. Publikum bě zahorjeny a hnuty, kak čućiwje šulerki z temu wobchadźachu. Hudź­ba toho abo tamneho sobu pohnu, zo so jemu sylza wuroni – w spomi­nanju na swójski dóńt. Wšitkim akteram wulke připóznaće! Šulerjo Serbskeje zakładneje šule „Šula Ćišinskeho“ Pančicy-Kukow

Fota: Rejzka Delenkowa

Takle postrowištaj Milenka a Preston z 3. lětnika swojich sobušulerjow do hód na Radworskej zakładnej šuli. Moderatoraj witaštaj šulerjow 1. do 4. lětnika a jich wučerki na zhromadnu hodźinu w sportowej hali, zo bychu sej mjez sobu swoje talenty předstajili. A tajkich maja mjez šulerjemi, kaž su hižo při planowanju eventa zwěsćili, zawěrno dosć a nadosć. Mamy z wulkej wěstosću prawych wuměłcow w akro­batice, w rěčenju cuzych rěčow, w rejo­wanju, w hraću na wše­lakich instrumentach, we wjaco­rych sportowych dru­žinach a spěwanju.