Z wudaća: wutora, 11 februara 2020

Twarc elektroawtow podłožki zapodał – nowe protesty w Grünheide

Podstupim (dpa/SN). Twarc elektroawtow Tesla z USA je, kaž běchu wočakowali, próstwu wo spěchowanske srědki za nowu twornju w Grünheide pola Berlina zapodał. Tole je šef předsydstwa za to přisłušneje inwesticiskeje banki kraja Braniborskeje, Tillmann Stenger, w Podstupimje zdźělił. „Podłožki nětko spochi wudospołnjeja.“ K přizwolenju trjebaja hišće inwesticiski plan.

Wo wysokosći spěchowanskeje sumy nochcyše Stenger hišće ničo rjec. Wón pak z toho wuchadźa, zo póńdźe wo wjace hač sto milionow eurow. Trěbny je tež nuzowy financny koncept, kotryž maja komisiji EU w Brüsselu zapodać. Tole wokomiknje přihotuja. Tesla chce w Grünheide nowu twornju natwarić a tam wot julija 2021 kóždolětnje hač do 500 000 jězdźidłow typa Model 3 a Y kaž tež druhich modelow twarić. Tuchwilu přewjeduja přirodoprawniske přepytowanja.

Minjeny kónc tydźenja su přećiwnicy planowaneje wulkotwornje w Grünheide demonstrowali. Po informacijach zarjadowarjow je so něhdźe 120 ludźi na tym wobdźěliło. Demonstracija wotmě so měrniwje.

Runja mjeńšinowej radźe tež ja registrowanje přisłušnosće k mjeńšinam w policajskich statistikach wotpokazuju. Mam podawk Berlinskich policistow, kotřiž běchu přisłušnosć k narodnej mjeńšinje za statistiku kriminality w swojim měsće wosobam přidali, za njesłyšany skandal a ranjenje zakonjow. Z kotrym prawom su to scyła činili? Njeje w Němskej runje tajke zapisowanje zakazane a njepłaći tu wu­znawanski princip – potajkim, štóž so jako Serb wuznawa, je Serb? Po mojim měnjenju njeje wšak to jenož ranjenje zakonjow, ale zdobom diskriminacija w njesłyšanym rozměrje. Wšako njejsu Berlinscy zastojnicy jenož přisłušnosć k mjeńšinje zapisali, ale ju tež za swoje rozprawy wo njeskutkach – kotrež běchu sprawnje prajene z 80 wob lěto směšnje snadne – wužiwali. Tak syja, hač wědomje abo njewědomje, hidu napřećo druhim ludam a připisuja jim negatiwne kajkosće. To njesměmy akceptować! Janek Wowčer

Róža Domašcyna je minjenu sobotu we wobłuku třidnjowskeho zarjadowanja „Dorfbegräbnis – Bayerske filmowe wuměłstwo zetka so ze serbsko-němskim basnistwom a fotografiju“ w Žitawskim Schillerowym forumje zwjetša basnje wo žiwjenju na wsy čitała, jednu tež serbsce. K tomu je Jürgen Maćij fota pokazał, mjez druhim tež wo wotbagrowanju wsow. Bě to zahajenske zarjadowanje projekta „Medijowy centrum kultura na wsy“ Wobswětoweje biblioteki we Wulkich Hendrichecach (Großhennersdorf; SN rozprawjachu). Foto: Jürgen Maćij

11. februara 1945 skónči so w Jalće na połkupje Krim wuznamna konferenca třoch wulkomocow wo powójnskim porjedźe w Europje a na swěće, kotraž bě so 4. februara zahajiła. Knježerstwowe delegacije hosćićelskeho Sowjetskeho zwjazka (ZSSR), USA a Wulkeje Britaniskeje pod nawodom předsydy knježerstwa ZSSR Józefa W. Stalina, prezidenta USA Franklina D. Roosevelta a jendźelskeho premiera Winstona Churchilla wuradźowachu w Liwadijowym palasće, bywšej lětnjej rezidency ruskich carow. Do stawiznow zapisana je konferenca jako wjeršk „wulkich třoch“.

Karnewalowe towarstwo před wjerškom 50. póstniskeje sezony

Njebjelčicy (AKR/SN). Na wosebite zarjadowanje k 50. sezonje Serbskopazličanskeho karnewaloweho towarstwa běchu minjenu sobotu wosebje wšitke dotalne princowske pory, něhdyše škrički a sobustawojo rady jědnaćoch do Njebjelčanskeje „Bjesady“ přeprošeni. Tam rěkaše hesło „WCV swjeći kulojće, 50 lět su pisane!“ Ze zaćahom tuchwilneho princowskeho pora Marcella II. a jeho princesny Christiny II. ze zubneje skały kaž tež dźěćacych princow Metoda a Józefa a princesny Lucije wulkotny wječor zahajichu. Škrički předstajichu ze zapalom nowu reju a holča garda prezentowaše so w nowych gardowych drastach. Nětko so runje tak rjenje frinkola kaž wulke škrički.

Kaž žane druhe twarske předewzaće minjenych lět w Pančicach-Kukowje budźe wottorhanje stareho hosćenca wonkowny napohlad wsy změnić. Na zašłym posedźenju gmejnskeje rady so z tejle temu hnydom wjacore razy zaběrachu.

Pančicy-Kukow (SN/MWj). Hač do kónca apryla ma stary hosćenc w Pančicach-Kukowje spotorhany być. Wulka hromada twaršćiznow drje potom hišće wotnjesena być njetrjeba, ale twarjenja maja takrjec spowalene być, zo njebychu hižo žane hnězdźenske móžnosće za njetopyrje abo ptački eksistowali. Tole zdźěli wjesnjanosta Markus Kreuz (CDU) na zašłym posedźenju gmejnskeje rady we Wotrowskej starej šuli. Tam jeho radźićeljo społnomócnichu, nadawk wottorhanja firmje přepodać.

W gmejnskim domje pobyli

Němcy. Zawčerawšim dopołdnja dyrbjachu w Němcach zwěsćić, zo bě so tam w nocy do toho něchtó do gmejnskeho twarjenja při hłownym puću zadobył. Paduši­ běchu wšitke rumnosće přepytali a njeznatu sumu pjenjez sobu wzali. Wěcna škoda wučinja po informacijach policije něhdźe 2 000 eurow.

Berlin. Přichodne Serbske blido w Berlinje budźe zajutřišim, štwórtk, 13. februara, w 16 hodź. w hosćencu EINSTEIN KAFFEE na Friedrichowej 206. Hosćenc je bjezposrědnje pódla bywšeho namjezneho přechoda Checkpoint Charlie. Zajimcy su wutrobnje witani.

Posołow nalěća sej wobhladać

Budyšin. Nic jeno za prózdninske dźěći je myslene zarjadowanje jutře, srjedu, we 18 hodź. w Budyskej hwězdarni. Tam móža sej zajimcy prěnich astronomiskich posołow nalěća wobhladać, kotrež su we hwězdnu lawa poněčim widźeć. Zastup płaći tři eura, swójbny lisćik pjeć.

Wojerecy (AK/SN). Budyski wokrjes chce swój wobydlerski běrow na Wojerowskim Hrodowym naměsće w tuchwilnym wobjimje wobchować. To samsne přitrjechi za strowotniski zarjad, powšitkownu socialnu słužbu a přizjewjernju awtow. Tole přilubi přirjadnik krajneho rady Udo Wićaz na zašłym posedźenju Wojerowskeje měšćanskeje rady.

„Z dźensnišeho wida změjemy hač do lěta 2024 na Hrodowym naměsće dohromady 88 dźěłowych městnow, na Einsteinowej 110 a na Dillingerowej pjeć“, Wićaz rozłoži. „Kajke budźe wuwiće po 2025, njeje jasne“. Po wšěm zdaću budźe ličba sobudźěłaćerjow wokrjesa we Wojerowskim jobowym centrumje a w młodźinskim zarjedźe potom woteběrać. Porno tomu drje budźe wona w socialnym zarjedźe stupać. Móžno zo wokrjes swoju imobiliju na Einsteinowej zawrěje a wšitke posłužbowe wobłuki na Hrodowym naměsće koncentruje. „Chcemy je na kóždy pad tež po 2025 w połnym wobjimje zachować“, praji Wićaz.

Ničo snadniše hač wuwiće wjesneje zhromadnosće steješe w srjedźišću njedawneho rozmołwneho wječora we Worklecach. Gmejnski zwjazk CDU je do hrodu maltezow přeprosył.

Worklecy (BWa/SN). Nimale 60 wjesnjanow a zamołwitych je njedawno we Worklečanskim hrodźe maltezow wo přichodźe wsy diskutowało. K tomu přeprosychu sej jako hosći Stephana Freiherra Spies von Büllesheim z rjadu maltezow a swojeho wjesnjana Carstena Šnajdera, kiž chce něhdyšu Worklečansku kupnicu přetwarić a jej nowy nadawk dać.