Z wudaća: srjeda, 12 februara 2020

Budyšin (SN). Z časa přewróta je Budyska Serbska fachowa šula za socialne zwjazana z dr. Hubertusom Šenkom. Wosebite zasłužby ma wón při wukubłanju serbskorěčnych kubłarjow a kubłarkow. Wosebje dowěrliwe zhromadne dźěło měješe mjez druhim z Miłočanskim Křesćansko-socialnym kubłanskim skutkom (CSB).

Berlin. Lubowarjo serbskeho filma w Berlinje njech njeskomdźa přichodnu sobotu, 15. februara serbski filmowy wječor w kinje Krokodil na Greifenhagenskej dróze 32. Tam čakaja na wopytowarjow serbske filmy z podtitulemi abo z přełožkom, rozmołwy a zhromadny spěw, štož ma być takrjec serbski warmup za Berlinale. Z hosćom budźe režiser Roman Pernak. Wot 20.45 hodź. pokazaja filmy „Listy“ w spominanju na dr. Marju Grólmusec, „Dźiwja žónska“, „Zymske prózdniny“ a „Zhubić a namakać“. Moderaciju změje Grit Lemke. Wšitcy zajimcy su wutrobnje witani.

Dźěći zestajeja přehladku

Stróža. Nowu wosebitu wustajeńcu „Moje­ dźiwotworne zwěrjo“ wotewru zajutřišim, pjatk, w 15 hodź. w Stróžanskim Domje tysac hatow. Cyły tydźeń su so dźěći z přirodu wokoło Hućinjanskich hatow zaběrali a swoje dožiwjenja w tekstach a linolorězbach zapopadnyli. Z nimi prezentuja nětko nowu přehladku.

Grat z kolesom wotwjezli

Rakecy. Za čas wichora w nocy na póndźelu su so njeznaći namócnje do zawoda při Rakečanskej hłownej dróze zadobyli. Ze zamkarnjow pokradnychu wšelki grat a wzachu nimo toho mužace koleso sobu. Móžno, zo su z nim swoju rubiznu wotwjezli. Wobsedźer trochuje wěcnu škodu na něhdźe tysac eurow. Pokradnjeny grat pak měješe hódnotu něhdźe 1 900 eurow. Kriminalna policija pad nětko přepytuje.

Čestnohamtsce skutkowacy zajimcy podpěruja team sobudźěłaćerjow w Krabatowym młynje

Mnozy šulerjo z cyłeje Sakskeje su loni wo Krabaće wuknyli, su zeznali powědki wo nim, ale tež wo Serbach. Kubłanske dźěło na dožiwjenskim statoku Krabatowy młyn Čorny Chołmc ma wysoku hódnotu.

Z mnohimi projektami a poskitkami je dožiwjenski statok Krabatowy młyn Čorny Chołmc loni docpěł něhdźe 2 400 šulerjow. Předewšěm dźěći z 5. a 6. lětnikow je wužiwaja. Nimo šulow z bliskich městow a wsow su tam tež rjadownje z Drježdźan, Coswiga a Zhorjelca byli. „Kubłanske dźěło ma za nas wulku hódnotu a je nam markowe znamjo. Z tym wabimy do zjawnosće a chcemy je wobstajnje dale wuwiwać“, potwjerdźa jednaćel zarjadnišća Tobias Ćižik.

K dalšemu hrajnemu dnjej we wolejbulowej wokrjesnej klasy wuchod nastupichu minjeny štwórtk w Pančicach-Kukowje ST Budyšin-sewjer, ST Marijina hwězda a Sokoł Budyšin. Nimo serbskeho der­byja wuhra so potajkim tež měšćanski derby.­

ST Marijina hwězda – Sokoł Budyšin 2:0 (25:14, 25:21)

W prěnjej sadźbje so Sokołam přećiwo nazymskemu mištrej z Pančic-Kukowa wjele njeporadźi. Hakle na kóncu a z tym přepozdźe so Budyšenjo popadnychu. Sadźba so spěšnje miny a domjacy ju z 25:14 dobychu. W druhim kole so Budyscy zrunachu, koncentracija a aktiwita přiběraštej. Tež blok steješe a zdobom nadběh bě agresiwniši. Mjeztymnje hosćo­ dwójce nawjedowachu. Po wučasu wuhrachu klóšterscy jich konstancu a domjacu lěpšinu.­ Z 25:21 domoródni dobychu a z tym hru z 2:0.

ST Marijina hwězda – ST Budyšin-sewjer 2:0 (25:19, 25:11)

Druha hra Pančanow běše ze sadźbowymaj dobyćomaj 25:19 a 25:11 jasna wěc za hosćićela. Připisać pak na tutym městnje dyrbju, zo hraještaj w rjadach Budyšanow hrajerjej ze starobu nad 70 lětami. Hladajo na to pak běše wukon měšćanskeje šěstki jara dobry.

Sokoł Budyšin – ST Budyšin-sewjer 2:0 (25:20, 25:7)

29.02. 14:00 ST Viktoria Worklecy

  – Kupoj Nowa Łuka

29.02. 14:00 ST Viktoria Worklecy

  – TSV Niederoderwitz

29.02. 14:00 VV Žitawa 09 III

  – Viktoria Worklecy (žony)

29.02. 14:00 VV Žitawa 09 II – HZ Panči-

  cy-Worklecy II (žony)

29.02. 14:00 OSC Lubij – HZ Pančicy-    Worklecy (žony)

05.03. 19:00 ST Marijina hwězda

  – Schönbachske VV

05.03. 20:00 ST Marijina hwězda

  – ST Hnašecy-Dobruša

06.03. 19:00 Sokolnik Wjazońca

  – Sokoł Budyšin

07.03. 14:00 TSV Kundraćicy – HZ     Pančicy-Worklecy (žony)

07.03. 14:00 VV Žitawa 09 III – HZ    Pančicy-Worklecy II (žony)

14.03. 14:00 ST Viktoria Worklecy

  – MSV Budyšin II

14.03. 14:00 ST Viktoria Worklecy

  – CVJM Zhorjelc

21.03. 14:00 ST Viktoria Worklecy

  – Nysa Wolejs II (žony)

21.03. 14:00 ST Viktoria Worklecy

  – Schönbachske VV (žony)