Z wudaća: póndźela, 23 měrca 2020

Praha (dpa/SN). Nowy coronawirus je sej prěni smjertny wopor w Čěskej žadał. Wčera wječor je 95lětny pacient zemrěł, kaž jeho lěkowaca chorownja w Praze zdźěli. Před štyrjomi dnjemi běchu pola njeho chorosć płucow covid-19 zwěsćili. Muž měješe přidatne strowotniske problemy swojeje wysokeje staroby dla. „To je njesměrnje zrudźaca powěsć“, rjekny minister za strowotnistwo Adam Vojtěch w telewizijnym sćelaku ČT. W Čěskej je so dotal 1 120 ludźi z wirusom natyknyło, 19 z nich lěkuja na intensiwnej staciji.

Mjezy Čěskeje wostanu stracha coronawirusa dla „wjele měsacow“ za tu- a wukrajnikow zawrjene, znajmjeńša pak poł lěta. To je nawoda čěskeho krizoweho staba coronawirusa dla, epidemiologa Roman Prymula wčera wječor připowědźił. Wukrajnicy smědźa kraj wopušćić, njesmědźa pak znowa do kraja přińć. Wuwzaća płaća za powołanskich dojězdźowarjow, kotřiž w Sakskej, Bayerskej a Awstriskej dźěłaja. Dyrbjeli-li so wuwzaća znjewužiwać, je „kónc dobroćiwosće“, zdźěli nutřkowny minister Jan Hamáček.

Zwjazkowe knježerstwo planuje 156 miliardow eurow za sćěhi wirusa

Berlin (dpa/SN). K wobmjezowanju negatiwnych sćěhow rozšěrjenja coronawirusa dla je zwjazkowy kabinet dźensa wobšěrne naprawy wobzamknył. Při tym dźe wo škitne systemy za předewzaća, přistajenych a chorownje. W tym zwisku su tež wšelake prawniske předpisy změnili, zo móhli naprawy spěšnje přesadźić. Hižo zajutřišim, srjedu, chce zwjazkowy sejm naprawy schwalić.

„Wobšěrne naprawy, kiž je kabinet dźensa schwalił, podpěruja swójby, po­družnikow, dźěławych, samostatnych a předewzaća cyle praktisce, spěšnje a njeběrokratisce“, rjekny generalny sekretar SPD Lars Klingbeil powěsćerni dpa. Klinbeil rěčeše wo „hoberskich sumach“, kotrež dyrbi financny minister Olaf Scholz (SPD) za to nałožić. „Stat ludźi w tuchwilnej krizy njewopušći. Přichodne tydźenje njebudu lochke, na kóncu pak wuńdźe naša towaršnosć zesylnjena.“ Zwjazkowe knježerstwo chce dotatny etat 156 miliardow eurow za lěto 2020 přesadźić a za to płaćiwe směrnicy nastupajo hranicu znowazadołženja stata zběhnyć.

Nichtó z nas njeje tajke něšto hišće dožiwił: wuludnjene města, zawrjene wobchody a dospołnje zlemjene zjawne žiwjenje. Wšitko ma tomu słužić, zo nimaja ludźo hižo žane socialne kontakty, zo njeby so coronawirus dale rozpřestrěł a sej dalše wopory žadał. Nětko směmy so jenož ­hišće w skupinkach dweju wosobow w zjawnosći hibać ... To drje móžemy lětuše jutrowne křižerske procesiony zabyć. Štož znjeměrnja, su wuhlady do přichoda. Nichtó chutnje njewěri, zo budu najnowše naprawy wobmjezowanja kontaktow za dwaj tydźenjej zaso zběhnjene. Čěska chce swoje mjezy znajmjeńša na poł lěta za­wrěć. A w telewiziji dźensa rano jedyn z fachowcow rjekny, zo njeje wuspěch w boju přećiwo wirusej tež z najraznišimi naprawami scyła wěsty. Što budźe, hdyž naprawy wjacore měsacy traja? Potom drje budu barbne patrony ćišćakow doma dawno prózdne. A tón abo tamny dyrbi tola raz k frizerej ... Marko Wjeńka

Wopušćena a zawrjena je jědźernja Europskeje uniwersity Viadrina w Frankfurće na Wódru. Braniborske ministerstwo a wědomosć bě wobzamknyło, wučbu na wysokošulskich kubłanišćach coronawirusa dla wot dźensnišeho w dalokej měrje zastajić. Najpozdźišo jutře ma tež poslednja wysoka šula w kraju zawrjena być. Runja druhim zwjazkowym krajam płaći w Braniborskej wot dźensnišeho tohorunja tak mjenowany kontaktny zakaz. Najwjace dwě wosobje smětej zhromadnje w zjawnosći być. W kraju je dotal 353 padow corony, jedna wosoba je zemrěła. Foto: dpa/Patrick Pleul

Waršawa/Praha/Bratislava (dpa/SN). Na němsko-pólskej mjezy bě nadróžny wobchad minjeny kónc tydźenja na najwjace přechodach w dalokej měrje normalizowany, kaž pólski namjezny škit na swojej internetnej stronje zdźěla. Jeničke wu­wzaće bě přechod Jędrzychowice na awtodróze A 4 pola Zhorjelca. Tu dyrbjachu nakładne awta sobotu hišće něhdźe połdra hodźiny čakać.

Tež čěska policija njeje žane wjetše haćenja na čěsko-němskej mjezy registrowała, byrnjež za powołanskich dojězdźowarjow razniše prawidła płaćili.

Porno tomu so nakładne awta na čěsko-słowakskej mjezy dale a bóle kopja. Přičina toho je, zo je Madźarska hranicu zawrěła. Rynk Lkw-jow, kotrež chcedźa do Madźarskeje, so po cyłej Słowakskej hač do Čěskeje wróćo haći.

Regina Šołćina z Konjec měni, zo so stawizny wospjetuja:

Wójny su surowe. Naši nanojo su Druhu swětowu wójnu dožiwili a jeje hórkosć wonka na bitwišćach začuwali. Jeli mějachu zbožo, hłód, zranjenja a strach kóždy dźeń znowa smjerći do woči hladajo, so zbožownje domoj nawróćić ze zajeća.

Njejsmy pak dźensa zaso we wójnskich poměrach kaž woni tehdy? Bomby a granaty drje tónraz žane njehroža, ale njewidźomny a nic mjenje sylny njepřećel ma cyłu Europu, haj samo poł swěta w rukach. Kaž tajka njenasytna kraka wupřestrěwa wón swoje njesmilne pa­zory přez mjezy krajow. Kóždu wyšnosć a knježerstwa, kotrež su do tuteje katastrofy sebje wuchwalujo wustupowali, tónle njepřećel do kolen tłóči. Nichtó ­njewě, kak daloko a dołho tele njewidźomne šerjenje, kiž so corona mjenuje, čłowjestwo hišće niči a poniža. Z teje „bitwy“ žadyn dobyćer njewuńdźe, ale wšitcy přěhrajemy.

Někotre dny pozdźišo hač Budyšin je nětko tež měšćanske zarjadnistwo Kamjenca rozsudźiło, wšitke swoje zarjady za zjawny wobchad zawrěć. Kontakt do zarjada je jeničce hišće telefonisce abo po pisomnym puću móžny. Přichodne tydźenje drje budźe napohlad na radnicu tajki, kaž je jón naš fotograf zapopadnył – měrny a přehladny. Foto: Daniel Schäfer

Z dowola běchu sej Nowoměšćenjo iniciatiwu sobu přinjesli wozrodźić swój wjesny swjedźeń. Krótko po towaršnostnym přewróće nawjazachu woni zwisk do Taxenbacha w Zillertalu.

Nowe Město (JoS/SN). Předsyda sportoweho towarstwa w Nowym Měsće Jörg Woschick dopomina so derje na NDRski čas, jako běchu we wsy wulke wjesne swjedźenje wuhotowali, čerpajo z mnohich atrakcijow. Po přewróće pak sej wšitko wusny. Wjesne wosebitosće njeběchu hižo wulce wažne, skerje wabješe wulki swět. W Nowym Měsće tuž chětro woćichny. Wěčnje pak njeměješe tomu tak być. Někotři wjesnjenjo započachu wo tym rozmyslować, kak móhli najlěpje na stare tradicije nawjazać.

Radwor. Katolski serbski dźěćacy dom „Alojs Andricki“ w Radworju pyta wot 1. apryla kubłarku abo kubłarja. Nadrobniše informacije podawa wjednica Andrea Henichowa pod 035935/20 717.

Kasa zawrjena, serwis pak daty

Budyšin. Powšitkowneho postajenja Swobodneho stata Sakskeje k wotwobaranju coronawirusa dla su wšitke zarjadowanja Serbskeho ludoweho ansambla hač do 20. jutrownika wotprajene. To zdźěli rěčnik SLA Stefan Cuška. Tež kasa je wotnětka zawrjena. Zajimcy móža sobudźěłaćerki serwisa telefonisce pod čisłom 03591 358111 abo e-mailnje pod docpěć.

Štó chce sobu hrać?

Budyšin. Za lětuše dźiwadłowe lěćo „Sherlock Holmes“ pyta NSLDź lajskich hrajerjow wšěch starobnych skupin, kotřiž chcyli rólu statista přewzać. Zwučowanja přewjedu wotsrjedź meje stajnje wječor a kónc tydźenja. Předstajenja budu 25. junija hač do 2. awgusta.

Nowy termin hižo postajili

Dalše rjadowanja epidemije dla w Lessingowym měsće

Kamjenc (SN/MiR). Kamjenske měšćanske zarjadnistwo je po wuhódnoćenju prěnjeje fazy we wobchadźe z coronawirusom a na zakładźe powšitkownje płaćiwych wukazow sakskeho ministerstwa za socialne a towaršnostnu zhromadnosć rozsudźiło, radnicu kaž tež jej přirjadowane wonkowne zarjady za zjawnosć zawrěć. To płaći wot 19. měrca. Přiwšěm chcedźa we wobłuku swojich móžnosćow regularnje dale dźěłać.