Z wudaća: póndźela, 23 měrca 2020

51lětny při wohenju zemrěł

Běła Woda. Sobotu wječor dóńdźe nuzowy telefonat na čisło 112, dokelž je z by­dlenja we wjaceswójbnym domje na Hasy Käthy Kollwitz w Běłej Wodźe kur stupał. Sobudźěłaćerka hladanskeje słužby w přizemju domskeho bě wohnjowu woboru zazwoniła. Kameradojo su z pódlanskeho bydlenja muža chowali, nuzowy lěkar pak zwěsći, zo bě wón hižo mortwy. 51lětny bydleše sam. Wobornicy płomjenja doskónčnje zhašachu. W dalšich bydlenjach a rumnosćach hladanskeje słužby žana škoda njenasta. Móžna přičina wohenja móhła być toaster.

Narć (SN/JaW). Cyłkownje 24 nowych wohnjowobornych a zasadźenskich jězdźidłow za katastrofowy škit su minjeny štwórtk w Narćanskej Krajnej wohnjowobornej šuli wokrjesam a bjezwokrjesnym městam přepodali. Hłownje jedna so při tym wo hašenske kaž tež gratowe awta. Flota ma hódnotu cyłkownje 7,6 milionow eurow, zdźěli sakske nutřkowne ministerstwo w nowinskej informaciji.

Z nowymi awtami narunaja stare a dodźeržane wozy wohnjowych woborow a katastrofoweho škita w swobodnym staće. Tak dóstanu mjez druhim wohnjowe wobory w Čornym Chołmcu, Ptačecach, Kulowje, Rěčicach a Slepom stajnje po jednym tankowym hašenskim jězdźidle TLF 4 000. Je to specialne jězdźidło, zasadźomne předewšěm při lěsnych wohenjach. Wšako ma wone tank za cyłkownje 4 500 litrow wody za hašenje a dalše přidatne wuhotowanje z hašenskimi hadźicami a wjacorymi pryskawami.

Tabulka wobwodneje wolejbuloweje ­ligi wuchodneje Sakskeje – žony

1. Doprědka Rózbork  14 40 : 12 36

2. HZ Pančicy-Worklecy 14 35 : 15 32

3. TSV Kundraćicy  14 32 : 20 29

4. JTVG Koblicy 12 29 : 16 25

5. ST Kupoj-Nowa Łuka 12 21 : 23 18

6. OSC Lubij  12 22 : 24 16

7. Ochran. wolejfantki 13 18 : 28 12

8. MSV Budyšin 04 II  14 8 : 39 5

9. Nysa Wolejs 13 8 : 36 4

W běhu jednoho tydźenja stejachu za prě­nje zastupnistwo wolejbulistkow Hrajneho zjednoćenstwa Pančicy-Worklecy hnydom tři dypkowe hry na planje. Kónc februara dźěše tuž najprjedy raz do Lubija.

OSC Lubij – Hrajne zjednoćenstwo Pančicy-Worklecy 0:3 (16:25, 22:25, 16:25)

Lubijske žony OSC čakachu hižo na rewanšu. Wšako běchu w prěnim kole 0:3 přěhrali. Pančičanki a Worklečanki pak nochcychu so na žadyn pad bjez dobyća nawróćić. Dźěchu tuž ze stoprocentowskim zasadźenjom do prěnjeje sadźby, kotruž z 25:16 jasnje dobychu. W druhej sadźbje drje tu a tam njetrjebawše zmylki worachu, jenož jedna nadaćowa serija pak tomu polěkowaše, zo tež ju z 25:22 dobychu. W třećim přechodźe pokazachu wšitke hrajerki zaso swoju wukonliwosć, a tak rěkaše po něhdźe 20 mjeńšinach 25:16 za hwězdźički-micki.

MSV Budyšin 04 II – HZ Pančicy-Worklecy 1:3 (26:24, 11:25, 11:25, 23:25)

Coronawirus runje naš wšědny dźeń postaja. Hač w nowinach, telewizoru abo w syći, wšudźe jenož wo strašnym wirusu rozprawjeja. Ale što dyrbja žurnalisća tučasnje tež hewak tematizować? Wšitko je znajmjeńša hač do jutrow wotprajene, a móžemy drje z tym ličić, zo hač do lěća žane zjawne zarjadowanja, wosebje sportowe z přihladowarjemi, njebudu. Cyle wěsće budźemy bórze na njewěsty čas tež doma wostać dyrbjeć. Wosebje pohib wonka na čerstwym powětře pak čłowjekej tyje a je njesměrnje wažny za jeho strowotu. Tohodla móžu kóždemu jenož poručić – wot pěstowarskeho dźěsća hač k wuměnkarjej – njeje-li hinak móžno, so w swójskich štyrjoch sćěnach kóždy dźeń pohibować a při tym dosć čerstweho powětra do domu dać. Wosebje widejoplatforma Youtube skići telko móžnosćow za ćěłozwučowanje tež w bydlenskej stwě. A tute poskitki by nětko woprawdźe kóždy wužić dyrbjał. Wšako je jich w syći dźeń a wjac. Jara kreatiwny přikład tajkeho Youtube-wideja ma Njebjelčanska pěstowarnja.