Jenož mało nowonatyknjenych
Budyšin/Zhorjelc. Ze 171 wosobami běchu wčera tři wosoby wjace hač njedźelu w Budyskim wokrjesu z koronawirusom inficěrowani. W karantenje přebywa tuchwilu 774 ludźi. Dalši pacient je so wustrowił. W Zhorjelskim wokrjesu je 69 padow koronawirusa, jedyn wjace hač dźeń do toho. 219 ludźi je w karantenje, jednu wosobu intensiwnje medicinsce zastaruja.
Njewěstosć knježi
Budyšin. We wuchodnej Sakskej bě w měrcu 17 446 bjezdźěłnych, 550 mjenje hač w februaru. Kaž Budyska wotnožka agentury za dźěło dźensa informuje, njetrjebaše so miłeho wjedra dla telko ludźi bjezdźěłnych přizjewić kaž w małym róžku. Aktualne połoženje postaja njewěstosć wuskutkow krizy koronawirusa dla. Kwota bjezdźěłnosće je wo 0,2 na 6,2 procentaj spadnyła.
Zelene wiki zaso dowolene
Sakski krajny zwjazk Zwjazkarstwa němskich hudźbnikow (DTKV) je so ze zjawnym listom na sakskeho ministerskeho prezidenta Michaela Kretschmera (CDU) wobroćił. W nim namjetuje štyri konkretne naprawy za „wudospołnjacu, skutkownu pomoc“ tysacam w hudźbnych powołanjach skutkowacym samostatnym, kotřiž su wot aktualneho zwrěšćenja kulturneho žiwjenja potrjecheni.
Lipsk (SN/CoR). Předsydka a jednaćel sakskeho zwjazka DTKV Stephanie Dathe a Christian Scheibler na to skedźbnjataj, zo njemóže kreditowy program Sakskeje natwarneje banki za najwjetši dźěl swobodnje skutkowacych hudźbnikow, komponistow a hudźbnych pedagogow, kotřiž tworja „personalny zakład w hudźbnym kraju Sakskej, jeničke rozrisanje być“.
Prěni namjet, powołansku nuzowu situaciju přemosćić, je, załožić za hač do 1 500 swobodnje dźěłacych hudźbnikow „rezidencny program koronapomoc“, přez kotryž dóstanu wuměłcy maksimalnje 4 500 eurow na šěsć měsacow. Wuchadźeja z dohromady 6,75 milionow eurow kóštow za program. Za to móhli socialne pomocy za wuměłcow wužiwać.
Budyšin/Kulow/Chrósćicy (SN/bn). Wobmjezowane „socialne kontakty“ w času koronakrizy su mnohim wobydlerjam regiona wulke wužadanje. Předewšěm zastaranje ze žiwidłami kaž tež z tak mjenowanymi tworami wšědneje potrjeby je, byrnjež wobchody dale přistupne byli, za někotrehožkuli tuchwilu problem, dokelž wšelakorych přičin dla wjace bydlenje wopušćić njemóže abo njesmě. Tohodla zahajichu wšelakore towarstwa, zjednoćenstwa a/abo jednotliwcy w minjenych dnjach tójšto iniciatiwow, z kotrymiž chcedźa potrjechenym pod pažu přimnyć.
Drježdźany/Budyšin (SN/at). Ćahi we wobłuku wobchadniskeju zwjazkow Hornje Łobjo (VVO) a Hornja Łužica-Delnja Šleska (ZVON) su dotal najebać wobmjezowanja koronakrizy dla dale tak po puću byli, kaž to jězbny plan postaja. To pak so nětko změni.
Mjeztym dźeń a mjenje ludźi z ćahom jězdźi. Železniske předewzaća tuž wot jutřišeho 1. apryla swoje poskitki na někotrych čarach jasnje přiměrja, kaž VVO informuje. Najebać to ma stabilny taktowy poskitk wostać. Ćahi DB Regio z Wojerec (RE 15) a Srjedźoněmskeje regioželeznicy z Kamjenca (RB 34) jězdźa dale kóždu hodźinu do Drježdźan. VVO na to skedźbnja, zo su na čaromaj Drježdźany–Kamjenc a Drježdźany–Kinspork někotre ćahi jeno z jednym ćěridnym wozom město hewak z dwěmaj po puću. „Mobilitu za wobydlerjow w regionje, kotřiž su za swoje wšědne jězby na bliskowobchad pokazani, tak zhromadnje zaručamy“, informuje jednaćel VVO Burkhard Ehlen.
Dźěłarnistwo IG metal starosći so wo sobudźěłaćerjow předewzaćow a žada sej za nich wobšěrne naprawy, wšako jich měsačne poćeženja dale wobsteja. Jedna naprawa je, płaćić wjace pjenjez za krótkodźěło. Zahajeny pomocny paket Zwjazka a krajow za firmy pak sej dźěłarnistwo chwali.
Budyšin (SN/BŠe). Dźěłarnistwo IG metal je minjeny tydźeń zapósłancam demokratiskich stron zwjazkoweho sejma pisało a sej žadało, hnydomne naprawy pomocneho paketa w zwisku z korona-krizu rozšěrić. W prěnim rjedźe je pomoc jeno za předewzaćelow předwidźana. Wurunanja za mzdy dźěłopřijimarjow hišće zapřijate njejsu. Wězo su wolóženja nastupajo krótkodźěło, kotrež pak wučinjeja 60 do 67 procentow přerězneje mzdy. Přistajeni z dźěćimi su po słowach dźěłarnistwa dwójnje chłostani. Woni smědźa dowol brać a nadhodźiny wottwarjeć, dóstanu pak skónčnje jeno 67 procentow mzdy. Tuchwilu postajeny pjenjez za krótkodźěło tuž njedosaha a dźěłopřijimarjow w krizy přidatnje poćežuje.
Mnichow (dpa/SN). Bayerski ministerski prezident Markus Söder (CSU) žada sej „narodnu nuzowu produkciju“ škitnych maskow. „Trjebamy nuznje wjace maskow wysokeje kwality za wšón personal w chorownjach a lěkarskich praksach“, rjekny Söder dźensa w rańšim magacinje ARD. Němske hospodarstwo měło so nětko na produkciju škitnych maskow přestajić, zo by jich w chorownjach, lěkarskich praksach a starownjach dosć było.
Podlěši zakaz zapućowanja
Washington (dpa/SN). Spočatnje na měsac wobmjezowany zakaz zapućowanja do USA za staćanow EU k wobmjezowanju koronawirusa ma so podlěšić. To je prezident USA Donald Trump připowědźił. Tajke a podobne postajenja wostanu dale płaćiwe a budu snano hišće přiwótřene, rjekny Trump we Washingtonje. Přiwšěm wón njepraji, kak dołho ma zakaz płaćić, kiž bě poprawom hač dosrjedź apryla předwidźany.
Orbán smě z wukazami knježić
Zběrku wjace hač 40 000 komikowych zešiwkow poskića New-Yorkski awkciski dom Sotheby’s na předań. Wot britiskeho hudźbnika Iana Levinea zestajena zběrka wopřijima kóždy jednotliwy zešiwk nakładnistwa DC Comics, kotrež běchu wot lěta 1934 do 2014 wušli. Temy komikowych zešiwkow su Superman, Batman a Wonder Woman. Hódnota hoberskeje zběrki njeje znata.
Za pokład złota njeje so tež po štyrjoch lětach hišće žadyn wobsedźer přizjewił. Złotaki bě dźěłaćer w juniju 2016 na kěrchowje w delnjosakskim Dinklage namakał a wotedał. Pjenjezy běchu tehdy 481 500 eurow hódne, dźensa hižo 24 procentow wjace. Namakar žada sej premiju, město pak so spjećuje ju płaćić. Nětko ma sudnistwo rozsudźić.
Bozen (SN). W Južnym Tirolu je hač do njedźele 71 ludźi na sćěhi koronawirusa zemrěło. To rozprawja redaktor tamnišeje němskorěčneje nowiny Dolomiten Hatto Schmidt ekskluziwnje za naš wječornik. Ličba zemrětych móhła po jeho informacijach hišće wjetša być, dokelž njekontroluja wšitkich zemrětych na wirus. Přirunanje z minjenym lětom znajmjeńša pokazuje, zo je so ličba smjertnych nawěškow wjace hač podwojiła.
Wot wudyrjenja pandemije su w Južnym Tirolu 1 205 ludźi pozitiwnje na wirus testowali. Tež tu pak testuja jenož ludźi, kotřiž maja widźomne symptomy: Nimaja dosć testow, a kapacity laborow su wućežene. W chorownjach tuchwilu 229 inficěrowanych lěkuja, 51 z nich na intensiwnych stacijach. Wjace hač 2 500 ludźi je w domjacej karantenje. Wulke problemy čakaja na 4 400 wobydlerjow starownjow a 3 300 hladarjow. Mjeztym je so 107 wobydlerjow a 138 sobudźěłaćerjow natyknyło.