Z wudaća: wutora, 19 meje 2020

Dalša wosoba zemrěła

Budyšin/Zhorjelc. W Budyskim wo­krjesu je dalša wosoba na koronawirus zemrěła. Ličba smjertnych padow wu­činja nětko 15. Z jednej nowoinfekciju ­je tu dohromady 458 natyknjenych. 114 z nich je schorjenych, 19 lěkuja w chorowni. W Zhorjelskim wokrjesu njejsu wot 6. meje žane dalše nowoinfekcije zwěsćili, tu je dale 268 natyknjenych. ­Aktualnje maja tam dwanaće schorjenych, 22 ludźi je w zwisku z pandemiju zemrěło.

Dobre znamjo staršim

Budyšin. Budyski wokrjesny sejmik je wčera wobzamknył, zo njetrjebaja starši wot meje hač do julija za šulski bus ničo płaćić. Wšako so wuwučowanje na kubłanišćach tuchwilu jara rozdźělnje wotměwa. Rozsud bě jednohłósny. Po prózdninach budźe wotpowědny zarjad wokrjesa busowy popłatk zaso regularnje wotknihować.

Jara mało hosći w měrcu

Wukubłanje na wosoby poćahowace so rjemjeslniske posłužby zachować

Budyšin (SN/BŠe). Hladajo na přerjadowanje syće powołanskich šulow w Swobodnym staće Sakskej so nětko tež Zwjazk Łužiskich Serbow – Domowina słowa jima, posrědkujo swoje wobmyslenja kultusowemu ministrej Christianej Piwarzej (CDU). Po naćisku ministerstwa ma so na přikład pjekarske wukubłanje w Zhorjelcu zaměstnić. Diskusiju wo naćisku chcedźa bórze zahajić. Domowina je minjeny tydźeń jasne stejišćo k naćiskej zabrała a na to pokazała, rěčne rumy zachować. Runje pjekarjo tajke skića, hdźež móža z kupcami samozrozumliwje serbsce rěčeć.

Serbska fachowa šula za socialnistwo je kruty wobstatk Budyskeho powołanskeho centruma, rěka w lisće Domowiny. Dokelž stej wobstejacej směraj „hospodarstwo a technika“ a ,,zežiwjenje a domjacnosć“ zjednoćenej, skića so tam nowe šansy, na kotrež serbski sydlenski rum tež w druhich wukubłanskich profilach wuprudźa. Domowina skedźbnja tuž na to, wšitke na wosoby poćahowace so posłužby w rozmyslowanjach wobkedźbować, dokelž maja so wšitke wobłuki zesylnić.

Sakske kultusowe ministerstwo je wčera w Drježdźanach rozsudźiło a štyri rjadownje za přichodny 5. lětnik na serbskimaj šulomaj přizwoliło.

Drježdźany (SN/JaW). Ralbičanska kaž tež Worklečanska wyša šula změjetej w přichodnym šulskim lěće dwě rjadowni w 5. lětniku. To je wčera připołdnju sakski kultusowy minister Christian Piwarz (CDU) serbskim žurnalistam w kultusowym ministerstwje wozjewił. „Smy dźensa ze zastupjerjemi Serbow situaciju rozjimali a rozsudźili, na woběmaj šulomaj dwě rjadowni wutworić“, rjekny Christian Piwarz. „To stawa so w zajimje staršich, šulerjow kaž tež dalewuwiwanja a šěrjenja serbskeje rěče. Wšako wjace rjadownjow k tomu přinošuje, zo so to tež zešlachći. Dźensniši rozsud je tuž za wšěch spomóžny“.

Budyski wokrjesny sejmik přizwoli na swojim wčerawšim wurjadnym posedźenju w Budyskim Němsko-Serbskim ludowym dźiwadle přidatne wudawki k planej zwoprawdźenja digitalizacije šulskeho kubłanja.

Budyšin (SN/MiR). Suma, kotraž je za digitalizaciju šulow trěbna, wučinja za lětuši etat wokrjesa Budyšin 1 490 500 eurow. Radźićeljo wšitkich frakcijow běchu sej přezjedni, zo je inwesticija nuznje trěbna. Wužiwać chcedźa pjenjezy jako dźěl cyłkowneje sumy 6,7 milionow ­eurow, kotrež ma wokrjes za inwesticije w tym wobłuku k dispoziciji, za testowu fazu. Přewjesć chcedźa testowu fazu na třoch šulach wokrjesa, kotryž ma 30 šulskich kubłanišćow wšelakeje družiny z něhdźe 16 000 šulerjemi w nošerstwje.

Budyšin (Łu/SN). Po dlěšej přestawce koronapandemije dla tež Maćica Serbska zaso dźěła. Najstarše nadregionalne serbske towarstwo orientuje čłonstwo na to, poprawom w měrcu předwidźanu hłownu zhromadźiznu na 26. september přesunyć. To je předsydstwo na pose­dźenju wčera w Budyšinje wobzamknyło. Po štyrilětnym turnusu tam potom znowa předsydstwo wu­zwola. Konkretnu městnosć zhromadźi­zny hišće wozjewja.

Zwjeselace je sylne wobdźělenje gymnaziastow a studentow, kotřiž su so wo Maćične myto prócowali. Spožčić chcedźa je na zhromadźiznje, a čłon dr. Robert Lorenc budźe wo němskim wudaću Mukoweje statistiki Serbow přednošować.

Karlsruhe (dpa/SN). Masowe zběranje datow bjez wosebiteje přičiny we wukraju přez Zwjazkowu tajnu słužbu (BND) rani w swojej tuchwilnej formje zakładne prawa. To je Zwjazkowe wustawowe sudnistwo w Karlsruhe dźensa zwěsćiło. Sudnicy wotpowědowachu skóržbje organizacije za čłowjeske prawa Reporterojo bjez mjezow a wjacorych žurnalistow. Zakoń wo dźěle BND we wukraju dyrbja hač do kónca lěta 2021 předźěłać.

Trump hrozy zarjadej WHO

Washington (dpa/SN). W konflikće z Chinu koronapandemije dla je prezident USA Donald Trump hrozył, zo ze swětoweje strowotniskeje organizacije (WHO) wustupi. Njedyrbjała-li so WHO w běhu 30 dnjow k „zasadnym polěpšenjam“ zawjazać, wón płaćenje přinoškow na dobro WHO přetorhnje a chce dalše čłonstwo w organizaciji pruwować, rěka w spisu Trumpa nawodźe WHO Adhanomej Ghebreyesusej. Trump zarjadej WHO wumjetuje, zo je sobu wina na rozpřestrěću koronawirusa a zo je „marioneta Chiny“.

Warnuje před druhej žołmu

Pod sylnym wliwom drogow stał je 35lětny muž, jako bě ze swojim awtom na awtodróze 57 pola Dormagena do směra na Köln po puću. Jědźeše tajku seklojtu čaru, zo dyrbjachu druzy šoferojo zas a zaso borzdźić. Nadobo wón zasta, wulěze napoł nahi z awta a přeprěči awtodróhu. Nawróćiwši so muž zaso wotjědźe. Wosrjedź Kölna policija jeho skónčnje zadźerža a sobu wza.

Wopačneho policista su při wobchadnej kontroli w Bayerskej lepili. Zastojnicy běchu 42lětneho ze Sakskeje zadźerželi, dokelž bě jeho awto w chětro špatnym stawje. W awće namakachu samopasleny słužbny wupokaz, trašawku, municiju, nóž a policajsku čapku ze sakskim woponom. Hač bě čapka originalna, policija njewě. Wupokaz „sakskeje wěstotneje straže“ to na žadyn pad njebě. Nimo toho njebě awto scyła přizjewjene.