Z wudaća: srjeda, 20 meje 2020

Infekcije w Kamjenskej chorowni

Budyšin/Zhorjelc. Ličba z koronawirusom natyknjenych je w Budyskim wo­krjesu na 469 (+11) stupała. Mjez druhim su pady w Kamjenskej chorowni maltezow a we Wojerowskim powołanskošulskim centrumje zwěsćili. 120 ludźi je tuchwilu schorjenych. W Zhorjelskim wo­krjesu njejsu wot 6. meje žane nowe infekcije zwěsćili, tu je dale 268 inficěrowanych, zo toho je wosom ludźi chorych.

Nakładnistwa wuznamjenjene

Berlin. Społnomócnjena Zwjazka za kulturu a medije Monika Grütters (CDU), Bursowe towarstwo němskeho knižneho wikowarstwa a załožba Kurta Wolffa su wčera dohromady 66 nakładnistwam Němske nakładnistwowe myto přiznali. Mjez šěsć sakskimi lawreatami je tež Lipšćanske nakładnistwo Poetenladen, kotrež je mjez druhim lyriku Róže Domašcyneje a Kita Lorenca publikowało.

Region zhromadnje wuwić

Tři skulptury z drjewa – worjoł, hadźacy kral a wódny muž – na puću k Radušanskemu přistawej su čłonojo tamnišeho turistiskeho zwjazka w swójskej iniciatiwje tele dny ze zlutniwym LED-wobswětlenjom wuhotowali. Schmidtojc elektrofirma je jich podpěrała. Za wobydlerjow a turistow je puć mjez Błótnym młynom a přistawom nětko wječor zdźěla wobswětleny. Foto: Peter Becker

Komuny wobydlerjow, přemysło a industriju z ćopłotu zastaruja. Kak móhli nowe koncepty wuwić a ćopłotne systemy dale zaručić bě tema zwjazkoweho wubědźowanja, na kotrymž je so tež město Wojerecy wobdźěliło.

Wojerecy (AK/SN). Město Wojerecy je so wuspěšnje na zwjazkowym wubědźowanju „Komunalna ćopłotna změna“ wobdźěliło, ke kotremuž běštej agentura za wobnowjomne energije kaž tež Fraunhoferski institut za energijowe hospodarstwo a energijowe systemy namołwjałoj a do přichoda sahace ideje pytałoj. Mjez něhdźe 50 požadarjemi dobychu Wojerecy w Sakskej, Hoya nad rěku Weser (Delnja Sakska) a Regensburg (Bayerska).

Wo spěchowanju projektow za druhu połojcu lěta rozsudźa

Budyšin (SN/CoR). Wuwzaćnje koronakrizy dla móžachu zajimcy hač do 11. meje Załožbje za serbski lud próstwy wo spěchowanje wosebiteho projekta zapodać, kotrež chcedźa w druhej połojcy lěta 2020 přewjesć. „Dohromady smy 46 próstwow dóstali. Z toho pak su jednu zaso cofnyli, a jednu dyrbjachmy wotpokazać, dokelž njebě sčasom dóšła“, rozłožuje Nicole Zimmermannec, kotraž je za controlling kaž tež za regionalne projekty w załožbje zamołwita.

Mjez 44 projektami su wjacore mjeńše we wobjimje hač do tysac eurow, w kotrychž proša wšelakore domizniske towarstwa, kaž na přikład Njeswačanske, wo podpěru, zo bychu sej serbsku narodnu drastu kupić a w swojich wustajeńcach prezentować móhli. Loni je załožba nakup dźělow narodneje drasty z nimale 50 000 eurami spěchowała, we wjetšim wobjimje tež za rejwanske skupiny.

Płaćizny za wopyt předstajenja w Budyskim Němsko-Serbskim ludowym dźiwadle budu wot 1. awgusta, to rěka ze spočatkom hrajneje doby 2020/2021, wyše. To je Budyski wokrjesny sejmik na swojim póndźelnym posedźenju rozsudźił. Ze 74 hłosokmanych přitomnych je so jedyn přećiwo namjetej wuprajił, šesćo su so hłosa wzdali.

Sprjejcy (JoS/SN). Blisko saksko-braniborskeje krajneje mjezy je Łužiska a srjedźoněmska towaršnosć hórnistwoweho zarjadnistwa (LMBV) projekt nastorčiła, zo by poćeženje ze zerzawcom w Sprjewi a w Małej Sprjewi pomjeńšiła. To je na dobro přewšo poćeženeju wotrězkow Sprjewje wot Rulec młyna hač k předzawěrje Grodkowskeje rěčneje zawěry a Małeje Sprjewje mjez Bórkhamorom a wuliwom do Sprjewje pola Sprjejc. Tak tworja zdobom dalše wěstoty tež za Błóta. Zwoprawdźejo koncept haćenja chcedźa mnóstwo w Sprjejčanskej rynje wotsadźeneho zerzawca krok po krok pomjeńšić.

Berlin (dpa/SN). Zwjazkowe knježerstwo je dźensa na iniciatiwu Zelenych naćisk zakonja schwaliło, po kotrymž ma so bencin, tepjenski wolij a zemski płun wuhlikoweho dioksida dla podróšić. Runočasnje chce popłatki za wobnowjomne energije znižić. Financować chcedźa tole z přidatnymi dochodami wuhlikoweho dioksida dla. Za to su zakoń wo wobnowjomnych energijach změnili. Přiwšěm njeje scyła hišće wěste, kak so popłatki za wobnowjomne energije a płaćizny miliny přichodny čas wuwiwaja.

Dojednanja wupowědźił

Ramallah (dpa/SN). Palestinski prezident Mahmud Abbas je wšitke dojednanja z Israelom a USA wupowědźił. Potrjechene su tež wěstotne dojednanja. Wón reagowaše tak po informacijach powěsćernje Wafa na plany Israela, sej dalše palestinske kónčiny w Kraju zapadnje Jordana přiswojić. USA israelske plany podpěruja. Tuž su USA po słowach Abbasa jako partner Israela „połnje zamołwite za potłóčowanje palestinskeho ludu“.

Liča z wyšimi dawkami

Čłonojo wobswětoškitneje organizacije BUND su so składnostnje dźensnišeho swětoweho dnja pčołkow na akciji před Berlinskim Reichstagom wobdźělili: Woni mjetachu samopaslene insekty do powětra, zo bychu na to skedźbnili, zo je mnohotnosć překasancow w přirodźe dźeń a bóle wohrožena. Foto: dpa/Wolfgang Kumm

Nic jenož přespěšnje, ale tež hišće wopojeny je sobudźěłaćer pochowanskeho předewzaća ze swojim słužbny wozom na awtodróze A 24 pola Hamburga po puću był. W běłym awće steješe kašć z ćěłom. Šofer jědźeše 120 město dowolenych 80 km/h, jako wón ciwilne jězdźidło policije přesćahny. Test drogow wujewi, zo je 36lětny do jězby canabis brał. Dale jěć wón njesmědźeše. Awto z kašćom a ćěłom dyrbješe druhi šofer wotewzać.

Młody muž, kiž bě so w Awstralskej do muzeja zadobył a so z nopom dinosawriera fotografował, je z Němskeje. 25lětny dyrbi so nětko před regionalnym sudnistwom zamołwić, policija stata New South Wales zdźěla. Wón bě so před dźesać dnjemi do awstralskeho muzeja zadobył a so tam „přechodźował“. Při tym so stajnje zaso z mobilnym telefonom sam fotografowaše. Policija je jeho kónc tydźenja zajała, po tym zo běchu wobrazy awtomatiskeje kamery wuhódnoćili. Přepytowanski sudnik jeho pod wuměnjenjom pušći, zo so 1. junija zaso přizjewi.

Praha (ČŽ/K/SN). Němska a kraje Visegrádskeje štyrki (V 4) su za to, wobmjezowanja na hranicach wotstronić tak ručež kaž to wuwiće pandemije koronowirusa dowola. Jich wotpohlad připowědźa ­nowinske wozjewjenje wo wutornej ­widejowej konferency premierow Čěskeje, Słowakskeje, Pólskeje a Madźarskeje z němskej kanclerku Angelu Merkel (CDU). Nawodni politikarjo mjenowanych krajow su so hłownje z naprawami k dalšemu přewinjenju negatiwnych wuskutkow pandemije zaběrali. Wobdźěleni politikarjo wěnowachu so tohorunja naležnym europskim temam. Mjez druhim rozłoži kanclerka Merkel tamnym mi­nisterskim prezidentam hłowne dypki němsko-francoskeho plana, wutworić za wobnowjenje hospodarstwa po tuchwilnej krizy europski wuchowanski fonds we wobjimje 500 miliardow eurow. W separatnej rozmołwje z čěskim premierom Andrejom Babišom je nimo toho šło wo mjezu překročace zhromadne dźěło mjez woběmaj krajomaj kaž tež wo dalše polěpšenje zwiskow mjez nimaj, čemuž ma nic naposledk předwidźana železniska spěšnočara mjez Prahu, Drježdźanami a Berlinom přinošować.