Z wudaća: srjeda, 20 meje 2020

Lipsk (dpa/SN). Hladajo na wobmjezowanja w hosćencach koronapandemije dla nadźija so sakski zwjazk hotelownikow a hosćencarjow Dehoga na jutřišim dnju Božeho spěća rozuma ludźi. „Nadźijamy so wjele hosći a na to, zo woni prawidła dodźerža, runje na dnju muži“, rjekny Axel Klein, hłowny jednaćel Dehoga Sakskeje. Wón na to skedźbni, zo strach natyknjenja dale wobsteji.

Wot minjeneho pjatka smědźa hosćency a korčmy w Sakskej po dwěmaj měsacomaj nanuzowaneje přestawki koronapandemije dla zaso wotewrjene być. Korčmarjo pak su nuzowani, hygieniski koncept zdźěłać. Mjez blidami ma 1,50 metrow wotstawka być, sobudźěłaćerjo maja nahubnik (Mundschutz) nosyć.

Tójšto hosćencarjow chce priwatne wěstotne firmy zasadźić, zo móhli předewšěm wukazane wotstawki mjez hosćimi přesadźić a na to dźiwać, zo njeje wjace ludźi w hosćencach a piwowych zahrodach hač dowolene. Runje to drje budźe serwisowemu personalej najwjetše wužadanje, je sej Axel Klein wěsty.

Naćisk kultusoweho ministerstwa reaguje na změny dźěłoweho swěta

Drježdźany (dpa/SN). Sakska chce poskitki powołanskeho wukubłanja zhusćić a při tym tež wjesne kónčiny sylnić, kaž z naćiska kultusoweho ministerstwa wuchadźa. „Dyrbimy hladać, na kotrych městnach wukubłanje dołhodobnje a w dobrej kwaliće zaměstnimy. Dźe wo wěstotu planowanja za wšitkich wobdźělenych“, rjekny kultusowy minister Christian Piwarz (CDU) powěsćerni dpa. „Dźěłowy swět so razantnje měnja. Nowe powołanske wukubłanja k tomu přińdu, dalše njejsu hižo tak prašane.“ Najebać to chcył stat zastaranje nastupajo powołanske wukubłanje dale zaručić, minister rjekny.

Rědke chorosće su runje tak hrozne kaž tajke, na kotrychž miliony ludźi ćerpja. Z kotreje přičiny wotwažuja chorobne kasy, kotry lěk komu zapłaća? Mnohim pacientam kasy trěbne srědki za hojenje přizwola. Na rědku chorosć kaž xeroderma pigmentosum schorjeni pak dyrbja prosyć wo narunanje płaćizny za žałbu, kotraž jich před UV-pruhami škita a jim dlěše žiwjenje zmóžnja. Wězo, žałba přećiwo słóncu njeje w kóždym padźe medikament. Ale što, hdyž potrjechenym pomha? Zo njeje dosć pjenjez a snano tež nic zajimcow za to slědźić za srědkami, kotrež po ličbje mało schorjenym pomhaja, tohorunja njerozumju. Staju sej w tym zwisku prašenje za hódnotu jednotliweho žiwjenja čłowjeka. Tuž dźakuju so za angažement Worklečanskich šulerjow za akciju. Ta zmóžnja jich přichodnej sobušuler- ce z nimi zhromadnje wuknyć móc. Woni wotwažowali njejsu, a to je wjac hač chwalby hódne. Milenka Rječcyna

Waršawa (JBR/SN). Najrjeńši měsac lěta meja je w cyrkwi Pólskeje za prěnje swjate woprawjenje předwidźany. To so dźewjećlětne holcy kaž hólcy na drohe dary a wobjed z wjele ludźimi w hosćencach wjesela. Swjatočnosće su kaž małe kwasy. W běłych, pyšnych šatach holčki kaž njewjesty wupadaja. Tež kmótřa a swójbni tón dźeń na pjenjezach njelutuja.

Lětsa pak je koronawirusa dla wšitko hinak. Biskopja su tuž namjetowali swjatočnosć na klětu přestorčić. Móža pak dźěsću sakrament tež w małej skupinje – jeno ze staršimaj a kmótru/kmótom – spožčić, a to na Božich mšach přez cyły tydźeń, štož móže hač do junija/julija trać. Dale kruće předpisany pak je wěriwym škit za hubu a nós tež w cyrkwi. Jenož měšnik tajki njetrjeba. Dalši swójbni móža sej ceremoniju w interneće wobhladać, su-li so sčasom přizjewili.

Na cyle wosebity škit nosa a huby za prěnjowoprawjenske dźěći su křesćanske wobchody přihotowane. Za holcy maja běłe a za hólcow čorne zakryća, a to ze złoćanym abo slěbornym monogramom IHS, symbolizowacym Chrystusa. A handl z tajkimi škitnymi srědkami kćěje.

Pandemiska přestawka njeje rutinu wulce wobwliwowała.Šćěpan Hanuš

Pod hesłom „Z wotstawkom najrjeńši kinowy comeback“ je dźensa Budyske kino zaso swoje wrota wotewrěło. Hladajo na aktualne połoženje nastupajo koronawirus su Budyscy wobhospodarjerjo kina zhromadnje ze strowotniskim zarjadom plan naprawow k škitej zdźěłali. Tak maja wotnětka w domje stacije k desinfikowanju rukow, kaž šef kina Andreas Schneider pokazuje. Wužiwajomne městna w jednotliwych kinowych žurlach su za lěpši přehlad čisłowane. Foto: Carmen Schumann

Njeswačanska gmejnska rada chce sej planowanske dźěła wolóžić.

Njeswačidło (JK/SN). Znowa běchu so Njeswačanscy gmejnscy radźićeljo, wobkedźbujo hygieniske předpisy, zetkali na posedźenje w rumnosći wjesneje wohnjoweje wobory. Wčerawši wobšěrny dnjowy plan předwidźeše mjez druhim prěnje čitanje dwójneho hospodarskeho plana gmejny za lěće 2021/22. Hižo dlěje gmejnska rada tajki dwójny plan přihotuje, dokelž móhło to po słowach wjesnjanosty Gerda Schustera (CDU) a komornicy Liliany Wetzko dźěło gmejnskeho zarjada wo tójšto wolóžić. Wšako maja nimo swójskeho plana tež tón za Bóščansku gmejnu nastajić. Z dwójnym planom bychu tak kóžde lěto jenož jedyn plan měli, štož drje runjewon škodźało njeby.

Hamorscy gmejnscy radźićeljo strukturny koncept wobzamkli

Hamor (AK/SN). Gmejnska rada Hamor hotuje so na striktny kurs lutowanja. Tak reaguje wona na swoje ćežke financne połoženje. To podšmórny komornik ­Ulrich Bänsch na minjenym posedźenju gremija. Z wjetšinu wobzamknychu gmejnscy radźićeljo etatowostrukturny koncept za lěta 2020 do 2023. „Mjeztym pjeć lět mamy stajnje negatiwny hospodarski plan. Dyrbjachmy hoberske sumy přemysłoweho dawka Vattenfallej wróćić. Cyłkownje wučinješe tón 17 milionow eurow a přidatnje milion eurow danje“, rozłoži komornik přičiny trěbneho koncepta. Hižo dwójce dyrbješe komuna swój etat zestajić.

Předjězbu njewobkedźbowała

Nowa Łuka/Hory. Při njezbožu na kři­žowanišću mjez Nowej Łuku a Horami pola Wojerec su so póndźelu tři wosoby ćežko zranili. 64lětna wodźerka VW Golfa njeje předjězbu Peugeota wobkedźbowała ­a zrazy do njeho. Wona bě awto přewidźała, kaž policija zdźěli. Při zražce so 56lětna šoferka Peugeota, jeje 84lětna sobujěduca kaž tež šoferka Golfa zranichu. Škodu trochuje policija na něhdźe 20 000 eurow. Přichodny tydźeń započnu kři­žowanišćo na kružny wobchad přetwarić.

Budyšin (SN/JaW). Hdyž podadźa so jutře znowa mužojo z kolesami na swoje kóždolětne jězby na dźeń muži, njebudźe wšak to kaž minjene lěta. Tež w tejle starodawnej tradiciji ma lětsa mjenujcy koronawirus słowčko sobu rěčeć. Toho­dla dyrbja mužojo a tež wšitcy dalši ­wulětnicy tójšto škitnych naprawow a prawi­dłow dodźeržeć.

Derje wšak je, zo maja hosćency a korčmy wot 15. meje zaso wočinjene. Tam pak płaća razne naprawy a hygieniske předpisy, kotrež zarjady a policija tež dokładnje pruwuja. Přiwšěm pak změja mnohe z nich jutře na Božim spěću wotewrjene a poskićeja pućowacym wotpočink a wočerstwjenje. Mjez druhim změja Dinarjecy w Nowoslicach swoju piwowu zahrodu wot 11 hodź. wočinjenu. Runje tak budu tež w Šunowskej Fabrikskej hospodźe wonka wočerstwjenje porjedźić, wězo z trěbnym předpisanym wotstawkom.