Z wudaća: wutora, 26 meje 2020

wutora, 26 meje 2020 14:00

Krótkopowěsće (26.05.20)

Ličba poměrnje konstantna

Budyšin/Zhorjelc. Ličba wobkrućenych koronainfekcijow je so w Budyskim wokrjesu wo jedyn pad na 482 powjetšiła. Cyłkownje 109 ludźi je tuchwilu schorjenych, 356 je so mjeztym wustrowiło. W Zhorjelskim wokrjesu nimaja ani jeničkeho schorjeneho. Wot 6. meje njeje tamniši strowotniski zarjad žanu nowu infekciju přizjewił. Jenož dwě kontaktnej wosobje stej hišće w karantenje.

Namjezne kontrole zběhnjene

Praha. Čěska policija je wobšěrne a systematiske kontrole na němskej a awstriskej mjezy zběhnyła. Město toho chcedźa wotnětka jenož hišće „zaměrnje a lubowólnje“ kontrolować, kaž čěske knježerstwo na swojim wčerawšim posedźenju wobzamkny. Přiwšěm je wukrajnym turistam dale zakazane do kraja přińć, hewak hroža jim razne pjenježne pokuty.

Mjenje terminow korony dla

wozjewjene w: Krótkopowěsće
We wulkim wobjimje je hornčernja Kannegießer we Wjazońcy wosebite kachlicy za Drježdźansku Technisku uniwersitu zhotowiła. Zo móhli pobóčne křidła wysokeje šule saněrować, bě trjeba po historiskim přikładźe wjedrokrute a w naročnym dekorje wuhotowane kachlicy produkować. Eksperća běchu material pruwowali a mějachu tež wudźěłk za dobry. Kannegießerec swójbny zawod je wulkoprojekt zhromadnje z hornčernju Lehmann zmištrował. Nastało je něhdźe 36 000 kachlicow za nowe architektoniske wobličo Drježdźanskeje TU. Jednu tajku kachlicu pokazuje tule šef zawoda Andreas Kannegießer. Foto: Steffen Unger

wozjewjene w: Hospodarstwo

K naćiskej zakonja zwjazkoweho knježerstwa wo kóncu zmilinjenja brunicy a kamjentneho wuhla je wuběrk za hospodarstwo a energiju zwjazkoweho sejma wčera na zjawne słyšenje w Berlinje přeprosył. Tež delnjołužiscy zapósłancy dr. Klaus-Peter Schulze (CDU), Ulrich Freese (SPD) a prof. dr. Martin Neumann (FDP) mějachu prašenja.

wozjewjene w: Kraj a swět
wutora, 26 meje 2020 14:00

Dźěći su konsekwentne

Tež w dnjowych přebywanišćach škitne naprawy wažnu rólu hraja

Chrósćicy/Miłoćicy (SN/MiR). Wot 18. meje su dźěćace dnjowe přebywanišća zaso wšitkim wotewrjene. Při tym dźiwaja nošerjo na wosebity škit swojich sobudźěłaćerjow, wosebje pak na tón swojich chowancow a wězo tež staršich, kotřiž swoje dźěći kubłarjam/kubłarkam zaso přewostajeja. „Předpisane naprawy wšitke dodźeržimy, a tych je jara wjele“, ­rozłožuje předsydka Serbskeho šulskeho towarstwa Ludmila Budarjowa. To za­počina so z wupokazanjom, při kotrym zachodźe dźěći rano přiwozmu a připołdnju abo popołdnju zaso wotewzaja. Předpisane su tež rumnosće, w kotrychž so dźěći ze swojej kubłarku/swojim kubłarjom pohibuja. Skupiny maja separatne nuzniki a nimaja žadyn zwisk k tamnym skupinam a dźěćom. A dźěći maja wšědnje pisomnje předpołožić, zo chore njejsu. „Wjeselimy so, kak hordźe a konsekwentnje dźěći nowe prawidła dodźerža. Starši su swoje dźěći derje na wopyt pěstowarnje pod wuměnjenjemi koronapandemije přihotowali“, praji Ludmila Budarjowa.

wozjewjene w: Kubłanje
wutora, 26 meje 2020 14:00

W Kašecach sčasom reagowali

Zmjerzki, kotrež mějachmy w času lodowych mužow, su plahowarjam sadu tu a tam wjetše škody načinili.

Budyšin/Kašecy (SN/BŠe). Po wjacorych dnjach ze zmjerzkami hač do štyrjoch stopnjow pod nulu w meji starosća so winicarjo a plahowarjo sadu wo swoje žně. Takle wopisuje jednaćel sakskeho sadoweho burskeho zwjazka Udo Jentzsch tuchwilnu situaciju na polach.

wozjewjene w: Hospodarstwo

Slepo (JoS/SN). Nowa wustajeńca „Mjez Sprjewju a Nysu“ Běłowodźanskeho wuměłca Rainera Dietmara Henniga w Slepjanskim Serbskim kulturnym centrumje (SKC) zbudźa tele dny kedźbnosć wopytowarjow. Přehladka bě kruće do plana lětušich zarjadowanjow SKC zapřijata, koronawirus pak je zamołwitym hnydom dwójce naprěki přišoł. Sprěnja běchu zarjadniske wobmjezowanja wuskutkowali, zo njebě hižo předchadźaca wosebita jutrowna wustajeńca přistupna. Zdruha běchu wuwólnjenja škitnych naprawow hakle po poprawnym terminje wotewrjenja aktualneje ekspozicije wobzamknyli. Nětko su sobudźěłaćerki SKC dwójne rozrisanje našli a wobě wustajeńcy zwjazali. „Smy jutrownu wustajeńcu prosće hač do 14. junija podlěšili. By přeškoda było, njemóhł-li nichtó z lubosću wuhotowanu přehladku dohromady 444 jutrownych jejkow ze zběrkow Ingrid Bramke a dr. Lotara Balka widźeć“, měni nawodnica SKC Sylwija Panošina.

wozjewjene w: Kultura
wutora, 26 meje 2020 14:00

Unija za zniženje mzdow

Berlin (dpa/SN). Hospodarscy fachowcy CDU/CSU w zwjazkowym sejmje sej koronakrizy dla žadaja, minimalnu mzdu w Němskej znižić abo znajmjeńša dalše zwyšenje w přichodnym lěće wusadźić. To poruča „program rozrosta Němskeje“ dźěłoweho zjednoćenstwa Hospodarstwo a energija zakótwjene, kotryž powěsćerni dpa předleži. Politikarjo sej nimo toho žadaja, přinoški za socialne zawěsćenje, potajkim přidatne mzdowe kóšty, na 40 procentow wobmjezować.

Mützenich kandidat SPD?

Berlin (dpa/SN). Frakciski předsyda SPD w zwjazkowym sejmje Rolf Mützenich ma so po informacijach medijow z kanclerskim kandidatom SPD stać. To přejetaj sej předsydaj strony Saskia Esken a Norbert Walter-Borjans k wólbam zwjazkoweho sejma 2021, kaž magacin Cicero rozprawja. Wo personaliji rěča tuchwilu z wodźacymi zastupnikami strony. Doskónčnje wo kanclerskim kandidaće rozsudźić chcedźa hakle w pózdnim lěću. Rěčnik Mützenicha tuž měni, zo su „wšitke powěsće ryzy spekulacije“.

Plan za awtowu industriju

wozjewjene w: Kraj a swět
Z wotmachom hotuja so tule Drježdźanscy sobudźěłaćerjo Sakskeho łódźnistwa parnikow na započatk sezony, kotraž je nowych rjadowanjow koronakrizy dla nětko móžna: Wot pjatka chcedźa wšědnje wjacore jězby po Łobju poskićeć. Jězdźenki kupić je pak tuchwilu jenož internetnje móžno. Na parnikach płaća wotstawkowe a hygieniske prawidła. Foto: pa/Sebastian Kahnert

wozjewjene w: Kraj a swět
wutora, 26 meje 2020 14:00

To a tamne (26.05.20)

Sudniska zwada wo kruwjace zwónčki na pastwje je dźensa dalši wjeršk dožiwiła: Sudnicy Mnichowskeho Wyšeho krajneho sudnistwa pobychu dźensa wosobinsce w hornjobayerskim Holzkirchenje, zo bychu so přeswědčili, hač je hara zwónčkow woprawdźe tak wulka, kaž skóržbnik twjerdźi. Mandźelskaj hižo pjeć lět přećiwo klinkanju zwónčkow na bliskej pastwje skoržitaj a staj hižo wjacore instancy přešłoj. Pječa jimaj „hara“ spar rubi.

3 500 lět staru hlinjanu taflu je šěsćlětny pachoł na juhu Israela namakał, kotruž maja archeologojo za jónkrótnu. Hólc bě ze staršimaj městno wurywanjow wopytał a tafličku připadnje wuhladał. Na njej je zarysowane, kak muž naheho a sputaneho wojaka wotwjedźe. Wědomostnicy lubja sej nowe stawizniske dopóznaća. Šěsćlětny je mjeztym myto dóstał.

wozjewjene w: To a tamne
wutora, 26 meje 2020 14:00

Starši nimaja zrozumjenje

Podstupim (dpa/SN). Braniborski krajny staršiski rěčnik zwěsća, zo nimaja starši za rozdźělne rjadowanje nastupajo hladanje dźěći w pěstowarnjach kraja hižo žane zrozumjenje. „Je ćežko ludźom aktualnu situaciju rozkłasć“, praješe krajny staršiski rěčnik Danilo Fischbach wčera w Podstupimje. W někotrych wokrjesach smědźa dźěći zaso wšědnje do pěstowarnje, mjeztym zo je to w druhich wokrjesach jeno předšulskim dźěćom na někotre hodźiny dowolene.

Runje tak mało zrozumjenja ma Fisch­bach za wotewrjenje zabawjenskeje kupjele „Tropical Island“ a dalšich wólnočasnych objektow runje pod aspektom, zo njeje zastaranje dźěći w pěstowarnjach jasnje rjadowane. „Je zaso raz dospołnje staršimaj přewostajene, kak powołanske dźěło a hladanje dźěći zrjaduja.

W Braniborskej smědźa wokrjesy wotpowědnje połoženju koronawirusa dla wo wotewrjenju pěstowarnjow same rozsudźić.

wozjewjene w: Kraj a swět

Serbska debata

nowostki LND