Z wudaća: srjeda, 27 meje 2020

srjeda, 27 meje 2020 14:00

Krótkopowěsće (27.05.20)

Dalšej wosobje zemrěłoj

Budyšin/Zhorjelc. W Budyskim wo­krjesu stej dalšej wosobje na koronawirus zemrěłoj. Tak rozrosće ličba smjertnych padow na 19. Dale strowotniski zarjad wčera wozjewi, zo su pola třoch wosobow infekciju zwěsćili. W Zhorjelcu so město toho ničo njezměni, tam žanoho na koronu schorjeneho wjac nimaja.

Pomhaja potrěbnym šulerjam

Drježdźany. Swobodny stat Sakska je dźensa zrěčenju ze Zwjazkom wo 500 milionow eurow wopřijacym programje za hnydomne wuhotowanje šulow přihłosował. Tak ma Sakska 25 milionow eurow k dispoziciji, zo móhła mobilne kompjutery za šulerjow kupić, kotřiž tajke nastroje njewobsedźa. Nošerjo šulow maja kompjutery kupić a potrěbnym za přichodne šulske lěto wupožčić.

Nowe čoło frakcije CDU

Budyšin. Rolf-Alexander Scholze předsyduje nětko frakciji CDU Budyskeje měšćanskeje rady, Matthias Knaak je jeho naměstnik. Jeju su měšćanscy radźićeljo CDU předwčerawšim wuzwolili. Wólby běchu trěbne, dokelž bě dotalny frakciski předsyda Karsten Vogt kónc lěta 2019 mandat złožił a měšćansku radu wo­pušćił.

wozjewjene w: Krótkopowěsće
W Sakskej su šulerjo 9. a 10. lětnika dźensa pisomne pruwowanje w předmjetomaj serbšćina/němčina pisali. Na Worklečanskej wyšej šuli „Michał Hórnik“ bě so jedna třećina za serbšćinu rozsudźiła, dwě za němčinu. Šulski nawoda Křesćan Korjeńk kaž tež wučerki němčiny a serbšćiny Simona Eckertowa, Claudia Čornakowa a Katka Bukowa su pruwowancam podłožki rozdźělili. Po słowach šulskeho nawody móžachu so wotchadnicy najebać wobmjezowanja korony dla derje přihotować. Foto: Feliks Haza

wozjewjene w: Kubłanje
srjeda, 27 meje 2020 14:00

Za zakońhišće do lěća

Předwčerawšim wotmě so we wuběrku za hospodarstwo a energiju zwjazkoweho sejma słyšenje nastupajo zakoń wo zakónčenju wudobywanja wuhla. Zapósłanc dr. Klaus-Peter Schulze (CDU) z Grodka bě tam jako jedyn zastupjer Łužicy přitomny. Bianka Šeferowa je so z nim rozmołwjała.

Sće z naćiskom zakonja wo kóncu zmilinjenja wuhla zakładnje spokojom?

K.-P. Schulze: Słyšenje ma prěnjorjadnje zaměr, zo maja wšitke zwjazki a zastupjerjo potrjechenych składnosć, wo wuslědkach so wobhonić a prašenja stajeć. Jako zastupjer wobswětoweho wuběrka mějach wězo hinaši wid na temu a sym so wosebje na temu wotpadki koncentrował. Wjele ludźi scyła njewě, zo je łužiske milinarnje sobu předźěłuja.

Su so Waše prašenja dosahajcy rozrisali?

wozjewjene w: Rozmołwa
srjeda, 27 meje 2020 14:00

„Žro pudla“ dodnić

Naročny nowy format Kamjentneho domu rozjimuje zasadne prašenja

Budyšin (SN/bn). „Žro pudla“ rěka nowy rjad Budyskeho Kamjentneho domu, z kotrymž chce towarstwo lokalnych a regionalnych kulturnych akterow předstajić a našočasne towaršnostne temy we wobłuku interviewow a podijowych diskusijow rozjimać. Hósć wčerawšeho prěnjeho zarjadowanja bě z Worklec pochadźacy spisowaćel Lukaš Ričel, kotrehož fejeton tydźenika Die Zeit „jednoho z najsylnišich hłosow wuchoda“ mjenuje. Zhromadnje z hosćićelku a moderatorku Irenu Janiw – nowa, za kursy, dźěłarnički a projektne dźěło zamołwita sobudźěłaćerka domu je rjad sobu iniciěrowała – improwizowaše na spočatku zarjadowanju mjeno spožčacu scenu z Johanna Wolfganga von Goethoweho „Fausta“. Tak wuwědomištaj publikumej wotmysł formata: dodnić zasadne prašenja.

wozjewjene w: Kultura
srjeda, 27 meje 2020 14:00

Stare město dźensa atraktiwniše

Ze srědkami z městotwarskeho spěchowanja Zwjazka a kraja móžachu wot lěta 1993 wobličo Wojerowskeho stareho města wo tójšto polěpšić. Z temu zaběrała je so wčera tamniša měšćanska rada.

Wojerecy (AK/SN). W saněrowanskej kónčinje „Wojerecy – centrum, stare město“ su dohromady 30,3 miliony eurow za projekty saněrowanja, modernizowanja a wobnowjenja nałožili. To je Michael Kroll, teamowy nawoda za planowanje městow a objektow towaršnosće Komunalne wuwiće srjedźna Němska w Drježdźanach, wčera na posedźenju měšćanskeje rady zjimał. Wón komunu wot lěta 2003 při saněrowanju stareho města fachowje přewodźa. „Bytostne zaměry su docpěte, saněrowanje je wotzamknjene“, Kroll podšmórny. Měšćanscy radźićeljo na to jednohłósnje wobzamknychu, z widom na nachilace so spěchowanje wustawki wo postajenju saněrowanskeje kónčiny „Wojerecy – centrum, stare město“ zběhnyć.

wozjewjene w: Łužica
srjeda, 27 meje 2020 14:00

Šuli serbskorěčnu taflu přepodali

Radworska staršiska iniciatiwa, kotraž prócuje so mjez druhim wo to, serbšćinu w zjawnym rumje widźomnišu sčinić, je dźensa rano šuli „Dr. Marja Grólmusec“ taflu ze serbskimi napisami přepodała. Iniciatorka iniciatiwy Katrin Suchec-Dźisławkowa (2. wotprawa) a dalša čłonka Katleń Wawrikowa (naprawo) běštej so wo zwoprawdźenje starałoj. Nětko maja dalše znamješka na chódbach sćěhować. Nawodnica wyšeje šule Hilža Štilerowa (srjedźa) a jeje naměstnica Corinna Měrćinkowa kaž tež nawodnica zakładneje šule Angela Rynčowa (nalěwo) so wjesela, zo je so přede­wzaće poradźiło. Wšako tafla mnohim, kotřiž prěni raz do kubłanišća přińdu, pomha so w šulskim twarjenju orientować. Foto: Bianka Šeferowa

wozjewjene w: Kubłanje
srjeda, 27 meje 2020 14:00

Wubědźowanje přesunjene

Drježdźany (SN/BŠe). Cyłozwjazkowe wubědźowanje „Naša wjes ma přichod“ přesunu koronapandemije dla na lěto 2023. Zašłe wurisanje bě delnjołužiska wjes Dešno dobyła. Zwjazkowa ministerka za ratarstwo a zežiwjenje Julia Klöckner (CDU) je zastupnikam wsy w januaru wopismo, medalju a mytowy pjenjez přepodała. Za přichodne wubědźowanje smědźa so zajimcy dale přizjewić, wšako su organizatorojo přizjewjenski čas wotpowědnje podlěšili.

Tež 11. sakske krajne wubědźowanje „Naša wjes ma přichod“, kotrež stajnje do zwjazkoweho přewjeduja, budźe hakle w lěće 2022. Přizjewić smědźa so za nje sydlišća, kotrež maja wjace hač 3 000 wobydlerjow. Přewjesć smědźa hižo wjesne dźěłarnički, wěstotne naprawy infekciskeho škita maja pak so dodźeržeć. Dźěłarnički zmóžnjeja lěpšu komunikaciju a su bytostne za wuwiće zhromadneho projekta, zdźěli wčera sakski statny minister za regionalne wuwiće Thomas Schmidt (CDU). „Runje nětko sej ludźo we wjesnych kónčinach wuwědomjeja, kak wažna zhromadnosć je“, minister Schmidt wuzběhny.

wozjewjene w: Kraj a swět
srjeda, 27 meje 2020 14:00

Policija racije nachwatała

Lipsk (dpa/SN). Zwjazkowa policija je dźensa rano w sydom zwjazkowych krajach wjace hač dźesać racijow nachwatała, kotrež dyrbjachu minjene tydźenje koronawirusa dla přestorčić. Policisća přepytachu tež tři bydlenja w Sakskej. Při tym dźěše wo podhlad pašowanja ludźi, wo organizowane fiktiwne mandźelstwa, wo falšowane wupokazy a wo internetne wobšudnistwo.

USA hroža ze sankcijemi

Berlin (dpa/SN). USA wojuja dale přećiwo dotwarej němsko-ruskeho płunowoda w Baltiskim morju Nord Stream 2. Rozžohnowacy so wulkopósłanc USA w Němskej Richard Grenell připowědźa w dźensnišim wudaću nowiny Handelsblatt dalše sankcije přećiwo Němskej. Zdobom wón zwjazkowe knježerstwo namołwja, politiku napřećo Ruskej zasadnje změnić. Němska dyrbi přestać „bestiju dale picować“, město toho zo dosć za NATO njepłaći. Nord Stream 2 AG hro­ženja jako „njezakonsku diskriminaciju europskich předewzaćow“ wotpokazuje.

Z awtom do hosćenca zrazył

wozjewjene w: Kraj a swět
Čestnohamtscy wuchowarjo sornjatkow maja tele dny wjele dźěła. Tele štyri do pjeć dnjow stare hojo běchu pomocnicy minjenu nóc njedaloko delnjosakskeho Seesena z pomocu truty namakali a móžachu je rano wuchować. Po trochowanju fachowcow kóžde lěto dźesaćitysacy tajkich młodźatow syčawow dla zahinu. Foto: dpa/Swen Pförtner

wozjewjene w: Kraj a swět
srjeda, 27 meje 2020 14:00

To a tamne (27.05.20)

Dorostowemu wowčerjej je dźěl jemu dowěrjeneho stadła twochnył a na awtodróhu A 3 pola Nürnberga běžał. Poprawom chcyše njenazhonity wowčer sta­dło přeměstnić, jako so dźěl wowcow wotsali. Hakle wobsadce policajskeju ­awtow a wjacori pomocnicy awtodróhoweje słužby skoćata zaso popadnychu. A 3 dyrbjachu za to dwě hodźinje zawrěć.

Psyče salony, kotrež smědźa w thailandskej stolicy Bangkoku po dlěšim zawrjenju korony dla zaso dźěłać, dožiwjeja nětko hoberski nawal. „Wjetšina wužiwarjow našich posłužbow njeje hišće nihdy swojeho psa sama myła“, rozprawja wobsedźer tajkeho salona. „Tak su stajnje zas na mnje zazwonili, jako bě wobchod ­začinjeny.“ Tójšto psam pobrachowachu tež wosebity płuwanski basenk salona a móžnosće, sej tam w klimatizowanych rumnosćach hrajkać.

wozjewjene w: To a tamne

Serbska debata

nowostki LND