Z wudaća: srjeda, 24 junija 2020

Kamjenske Černobylske towarstwo swjeći 30. róčnicu wobstaća

Kamjenc Mnozy wobydlerjo Wotrowa, Pančic-Kukowa a dalši so zawěsće rady na to dopominaja, zo su w 90tych lětach přewažnje serbske swójby tři tydźenje dźěći z běłoruskeho Černobyla hospodowali. Njebě drje připad, zo słyšachu ně­kotři wobydlerjo Kamjenca nalěto 1990 w rozhłosu namołwu „Noweho foruma“ z Berlina, dźěćom z Černobylskeho regiona wočerstwjenski dowol w swójbach zmóžnić. Woni wobzam­knychu pomhać a starachu so wo dalšich hóstnych staršich a pomocnikow. Hišće w samsnym lěće móžeše so 47 černobylskich dźěći w Kamjencu wočerstwić. Jako so zaso na dom­puć do wot pruhow zajědojće­neje kónčiny nastajichu, bě rozžohno­wanje na woběmaj bokomaj z wjele sylza­mi zwjazane. Kónc samsneho lěta załožichu towarstwo „Iniciatiwa dźěći z Černobyla“ a dachu je jako powšitkownowužitne zapisać.

Tradicionalny sportowy duel žónske­je a muskeje generacije při wy­sokim saku su dźens ­tydźenja na Serbskim gymnaziju Budyšin (SGB) přewjedli.

Z radosću zhonichu šulerjo a wučerjo Budy­skeho Serbskeho gymnazija powěsć z medijow, zo smědźa zaso sportowe wubědźowanja pod wěstymi předpisami hygieny přewjesć. Tak su tež spěšnje termin za tradicionelnej hrě při wysokim saku měli.

Zwjeselace z wida žónskeje generacije bě, zo je sportowa wučerka Tereza Wi­ćazowa hnydom sydom sobuhrajerkow za 11. wolejbulowy duel zorganizowała. Prěni tajki bě so 20. junija 2005 w małej sportowni Serbskeho šulskeho a zetkawanskeho centruma Budyšin wotměł, a tón dobychu tehdy abiturientki z 3:0. Tež tónraz běchu wone z 2:0 wuspěšne, hačrunjež njebě wukónc wobeju sadźbow z 25:22 a 25:18 tak jasny. Wučerki so mócnje wobarachu a so nad kóždej­ wuspěšnej akciju wjeselachu. Je zrozumliwe, zo njeběštej dokładnosć při přiwzaću nadaćow a sylnosć w nadběhu hišće wufilowanej. Wšitkim pedagogowkam słuša tule wutrobny dźak za jich anga­žement na wolejbulnišću.