Z wudaća: štwórtk, 25 junija 2020

Prezidentka do karanteny

Bratislava. Słowakska prezidentka Zuzana Caputova je so wčera do prewen­tiwneje karanteny podała. Sobudźěłaćer wot njeje bě do kontakta z pozitiwnje na ko­ronu testowanej wosobu přišoł. Planowane zetkanje z awstriskim zwjazkowym prezidentom Alexanderom Van der Bellen chcedźa nachwatać. Bywša libe­ralna wobydlerska prawiznica je lěto w zastojnstwje a po naprašowanjach z wotstawkom najwoblubowaniša politikarka EU-kraja.

Třeće městno sej zdobyli

Choćebuz. W zwjazkowym wubědźowanju šulerskich firmow je sej projektowa skupina Delnjoserbskeho gymnazija w Choćebuzu ze swojej rejwanskej kofejownju „Kral“ 3. městno zdobyła. Do toho su hižo wotpowědne Braniborske wubědźowanje dobyli. Loni w awgusće je 15 jědnatkow pod nawodom wučerja Guida Kabischa ideju předewzaća wuwiło.

Pomocny paket wobkrućili

Tukrajneho pućowanskeho rozmacha nadźijeja so tež w Hornjej Łužicy

Budyšin (SN/at). Turistiska branša bě prěnja, wona je wot naprawow koronapandemije dla sobu najbóle potrjechjena. W Zhorjelskim a Budyskim wokrjesu rěči Marketingowa towaršnosć Hornja Łužica-Delnja Šleska (MGO) wo nimale poł miliona přenocowanjach, kotrež su hospodarjam wot měrca hač do meje wupadnyli. Tele tři měsacy zaručeja poprawom štwórćinu lětnich přenocowanjow, wšako su jutry w Hornjej Łužicy wosebje přićahliwe, podšmórny předsyda dohladowanskeje rady MGO, Budyski krajny rada Michael Harig (CDU), wčera na nowinarskej rozmołwje w Budyšinje. Tam je MGO wo aktualnym połoženju turistikarjow informowała, kaž tež wo tym, kak chcedźa so do „noweje“ normality po zběhnjenju krutych wobmjezowanjow korony dla wróćić.

Zaměrowy zwjazk sakska łužiska jězori­na inwestuje lětsa 1,13 milionow eurow do wšelakich projektow, za čož sam 192 000 eurow nałoži. Jedne ćežišćo je twar wotpočnišća za wódnych pućo­warjow nad Lejnjanskim jězorom z twarjenjemi a wonkownymi připrawami.

Łaz (AK/SN). Projekt je wobstatk lětušeho etata. Tón kaž tež hospodarski plan zaměroweho zwjazka 2020–2023 su radźićeljo předwčerawšim na posedźenju zwjazkoweje zhromadźizny we Łazu jednohłósnje schwalili.

Wupisanje za wotpočnišćo za wódnych pućowarjow su spočatk junija za­hajili, hač do wutory mějachu poskitki předležeć. Zaměrowy zwjazk je štyri losy wupisał. „Zaměr je lětsa kónc awgusta twarić započeć“, rozjasni jednaćel Daniel Just. Nastać maja multifunkcionalne twarjenje, wonkowne připrawy za camping a caravaning kaž tež sanitarne připrawy. Na hornim poschodźe chcedźa zhromadnu wodowu stražu branibor­­skeje a sakskej wodoškitneje policije zaměst­nić. Za zarjadnišćo su rumnosće z cyłkownej płoninu 180 kwadratnych metrow předwidźane.

Serbske wólbne kopolaki přihotuje předsydstwo župy „Handrij Zejler“, zo móhło pozicije kandidatow k wólbam wyšeho měšćanosty Wojerec nastupajo serbske naležnosće sčasom zhonić.

Wojerecy (pi/SN). Domowinska župa „Handrij Zejler“ chce kandidatam za wólby wyšeho měšćanosty Wojerec 6. septembra sčasom zjawne prašenja k serbskim naležnosćam sposrědkować. Zajimcy maja hišće chwile hač do štwórtka, 2. julija, zo bychu swoju kandidaturu přizjewili. Najebać wulke šulske prózdniny chcedźa čłonojo župneho předsydstwa na posedźenju 22. julija serbske wólbne kopolaki rozjimać a schwalić. Kaž župa informuje, je so gremij na tele postu­powanje na wuradźowanju wčera wječor w bróžni domu Domowiny we Wojerecach dorozumił.

Njewšědnu kombinaciju instrumentow dožiwichu zajimcy we wobłuku 4. koncerta Budyskeho pišćeloweho lěća wčera w tachantskej cyrkwi. Drježdźanjanaj Andreas Scotty Böttcher na Eule-pišćelach a Friedbert Wissmann na synthesizeru wobkuzła­štaj něhdźe 50 připosłucharjow ze sferiskimi improwizacijemi, chabłacymi mjez mini­malizmom, cyrkwinskej hudźbu a jazzom. Pišćelowe lěćo, zarjadowane wot Budyskeho towarstwa cyrkwinskohudźbny skutk, pokročuje přichodnu srjedu z koncertom Praskeje organistki Ireny Chríbkoveje. Hač do kónca awgusta wustupuja mjez druhim tež Berlinjan Tomaš Žur a Izumi Ikeda z Fukuoki. Foto: SN/Hanka Šěnec

Běła Woda (SN/JaW). Hospodarska iniciatiwa Łužica (WiL) je lětsa třom kooperaciskim projektam z Łužicy wědomostne transferne myta w cyłkownej hódnoće 10 000 eurow spožčiła.

Kaž jednaćel WiL Michael Schulz zdźěli, dóstanje prěnje myto 5 000 eurow projekt GMB tzwr, IURS z.t. a Braniborskeje Techniskeje uniwersity Choćebuz-Zły Ko­mo­row (BTU) za wuwiće procedury neutralizować kisału wodu z brunicowych jamow, kotraž je wo wjele skutkowniša hač dotalne metody, kaž tež k naslědnemu rekultiwěrowanju jamow. Druhe myto 3 000 eurow spožča Kreisel tzwr a BTU za wuwiće měrjenja wottrjebanja sypani­znow (Schüttgüter), z kotrymž móža wudobywanske a logistiske procesy w hórnistwje polěpšić. Třeće myto 2 000 eurow dóstanje projekt Großenhainskeje mašinotwarskeje tzwr a BTU za wuwiće hladanskeho lifta, kotryž je z 18 kilogramami lochce zasadźomny, wudźerži pak poćeženja do 130 kg, štož je wosebje wobłukej ambulantneho hladanja wolóženje.

„Wuznamjenjene projekty na zakładźe swojeje inowaciskeje sylnosće ze zapo­datych přinoškow wusahuja“, hódnoćeše předsyda jury Jürgen Fuchs dobyćerske přinoški.

Brüssel (dpa/SN). Komisija Europskeje unije je dźensa wuchowanskemu pakćikej zwjazkoweho knježerstwa za přede­wzaće Lufthansa we wobjimje šěsć miliardow eurow přihłosowała. Wuměnjenje pak je, zo najwjetša lětanska towaršnosć Němskeje zaruči, zo njedóńdźe k skřiwjenju wubědźowanja. Tak budźe Lufthansa prawa na start a přizemjenje na hłownych stejnišćach we Frankfurće nad Mohanom a Mnichowje wotedać dyrbjeć, štož ma konkurencu zmóžnić.

Zaso jasnje wjac padow w USA

Washington (dpa/SN). W USA wozjewichu wčera wulku ličbu nowych korona-infekcijow. Tajke běchu dotal jenož z měsaca apryla znate. Něhdźe 34 700 wosobow su wčera pozitiwnje testowali. Hišće 1. junija wozjewi Johns-Hopkins-uniwersita 17 400 nowych infekcijow. Wosebje w Kaliforniskej je dźeń a wjac padow. Jeničce tam, zwěsćichu 7 149 nowych inficěrowanych. Tuž namołwjeja politikarjo tam ke kedźbnosći. Něhdźe 40 milionow wobydlerjow zwjazkoweho kraja měli po móžnosći doma wostać.

Google chce wobsahi kupić

Wenusowa hrjadka Rogeńskeho parka Wjercha Pücklera ma znowa nastać. Na trawniku mjez hrodom a pergolu je městnosć, hdźež maja so figury grjekskeho bójstwa kaž Poseidon, Amphitrite abo Triton zarjadować. Wčera stej załožba Wjercha Pückleroweho muzeja a tamniše spěchowanske towarstwo projekt zjawnje předstajiłoj. Foto: Michael Helbig

Móšnju ze 460 eurami namakała je wutoru popołdnju 13lětna holca w Drježdźanach blisko Hłowneho dwórnišća a je ju hnydom policiji přepodała. Sprawnosć chcedźa zastojnicy nětko honorować a jej darik přepodać. Hač tež wot wobsedźerja móšnje něšto dóstanje, to so hišće pokaza. Winowatosć za to dźě žana njewobsteji.

Dwaj razaj wob lěto narodniny swjećić smě nětko 15lětny młodostny z porynsko-pfalcskeho městačka Kirn. Na dompuću ze zetkanja z přećelemi bě wón tak mučny, zo so na kolije železnicy lehny a njepytny ani, kak regionalny ćah přijědźe. Lokomotiwnik bě jeho wuhladał a zawoła policiju. Zastojnicy dyrbjachu młodostneho samo budźić, tak kruće wón spaše. Zo je tajku strašnu situaciju přežiwił, jemu scyła wědome njebě.

Berlin/Choćebuz (dpa/SN). Přihoty za to, wudobywanje brunicy nanajpozdźišo hač do lěta 2038 zakónčić, derje postupuja. Zwjazkowy kabinet je wčera zrěčenju mjez Zwjazkom a brunicowymi přede­wzaćemi přihłosowało. Tak dóstanu koncerny wotpowědne wotškódnjenje, jeli milinarnje wotpinaja. Podpisane zrěčenje hišće njeje. Wone pak wobsahuje pasus, zo móhli termin wotšaltowanja jednotliwych milinarnjow bjez přidatneho wotškódnjenja wo tři lěta doprědka sćahnyć. To dyrbjał Zwjazk pjeć lět do zažneho termina wobzamknyć. Nimo toho je w zrěčenju zapisane, zo z politiskich rozsudow, kotrež móhli njerentabelnosć wuhlowych milinarnjow zawinić, žadyn narok na přidatne wotškódnjenje njewurosće. Podpisaja-li předewzaća, wuzamkuja wone zdobom přećiwo kóncej wudobywanja wuhla skoržić.

Jednanja ze zwjazkowym knježerstwom su hižo wotzamknjene, zdźěli nowinska rěčnica Choćebuskeho koncerna Łužiska energija a milinarnje (LEAG). Detaile žane znate njejsu, ale kaž ze zrěčenja wuchadźa, dóstanje LEAG wotškódnjenje něhdźe 1,75 miliardow eurow.