Z wudaća: pjatk, 26 junija 2020

pjatk, 26 junija 2020 14:00

Krótkopowěsće (26.06.20)

Tydźeń bjez nowonatyknjenych

Budyšin. Hižo sydom dnjow njesu w Budyskim wokrjesu žanych nowych infekcijow z koronawirusom zwěsćili. Wot spočatka pandemije je tu dotal dohromady 501 koronapadow, z nich je 19 ludźi zemrěło. 480 je so mjeztym wustrowiło. Hišće dwě wosobje stej aktualnje schorjenej, 32 ludźi je w karantenje. Za­wčerawšim su wosom testow přewjedli.

Wuběrkam skoro runostajena

Podstupim. Rada za naležnosće Serbow při Krajnym sejmje Braniborskeje je dźeń a bóle „normalnemu“ wuběrkej parlamenta runostajena. To wuchadźa z wčera wozjewjeneho noweho jednanskeho porjada sejma. Tam je gremij w 17 paragrafach zakótwjeny. Samostatny wot­rězk 12 rjaduje dźěławosć serbskeje rady we wobłuku skutkowanja parlamenta.

Jednaćel zastojnstwo złoži

wozjewjene w: Krótkopowěsće
Při wysokich temperaturach nad 30 stopnjemi, kaž su je wjedrarjo najebać městne njewjedra za kónc tydźenja připowědźili, je ku­pjel prawa městnosć so wočerstwić. Za słónco a wodu njetrjebaš na kóždy pad daloke morjo abo jězor. W Kulowskej lěsnej a přibrjóžnej kupjeli mataj tež Paul a jeho nan we wodźe swoje wulke wjeselo. Foto: Gernot Menzel

wozjewjene w: Łužica
pjatk, 26 junija 2020 14:00

Strowy rozum njech knježi

Marian Wjeńka

Někak so minjene dny zdaše, jako by koronowa pandemija w našim kraju nimo była. Z wolóženjemi w mnohich wobłukach smědźa so zaso wjetše swójbne swjedźenje wotměwać, kina a muzeje su zaso přistupne, samo přednoški a koncerty so zaso po nimale zwučenym wašnju poskićuja. Wězo wšitko wotpowědnje hygieniskim a wotstawkowym předpisam. Hišće mału chwilku a potom smy wšo zmištrowali a takrjec z jednym módrym wóčkom wotešli, tak zawěsće hižo tón abo tamny mysleše. Ale nadobo nam jednotliwe tak mjenowane hotspoty bolostnje wuwědomichu, zo hišće ničo nimo­ njeje. Mjaso předźěłacy zawod Tönies je při tym bjezdwěla najzrudniši přikład, kak spěšnje móže so wirus rozšěrić. Porno tomu bě Ischgl mała hwězda.

wozjewjene w: Rozmyslowane
pjatk, 26 junija 2020 14:00

Mjezynarodne přehladki budu

Přestorčene wustajeńcy nachwataja, tamne po planje přihotuja

Budyšin/Praha (SN/CoR). Koronakrizy dla na kónc junija přestorčena wusta­jeń­ca „Łužiscy Serbja a powěsćowa postawa Krabat“ w Praze chcedźa nětko kónc julija wotewrić. Konkretny termin pak hišće doskónčnje wobkrućeny njeje. Referent Domowiny za kulturu Clemens Škoda přihotuje kulturny wjeršk w čěskej sto­licy zhromadnje ze Serbskim muzejom Budyšin, Krabatowym towarstwom a zastupnistwom Sakskeje w Praze. „Sym so ze wšitkimi serbskimi partnerami wothłosował a smy so na nowy termin dojednać móhli. Namjet, přehladku kónc julija wotewrić, sym Čecham dale dał. Nětko maja woni to w ruce. Sakska a Čěska přeprošujetej, my Serbja jenož při zwoprawdźenju wustajeńcy přidźěłamy. Tuž matej wonej termin postajić“, Škoda rozjasni. „Nadźijam so, zo namjetej přihłosujetej. By dobry signal był, ze zhromadnym dźěłom přez mjezy zaso po­kročować.“

wozjewjene w: Kultura
pjatk, 26 junija 2020 14:00

Komunalny program dale wjesć

Komunalny program za gmejny w serbskim sydlenskim rumje kaž tež přichod Serbskeho zakonja běštej temje, z kotrymajž je so Rada za serbske naležnosće na wčerawšim posedźenju zaběrała.

Drježdźany (SN). Z někotrymi programatiskimi ćežišćemi aktualneje wólbneje periody je so Rada za serbske naležnosće na swojim posedźenju wčera w rumnosćach Sakskeho krajneho sejma w Drježdźanach zaběrała. Na wuradźowanju su so zastupjerjo wšitkich w parlamenće zastupjenych frakcijow wobdźělili, kaž gremij w nowinskej zdźělence informuje.

wozjewjene w: Kraj a swět
pjatk, 26 junija 2020 14:00

Młodym ludźom so wotewrjeć

Ze swojeje knihi „Doma we wućekach II“ je wčera wječor Benedikt Dyrlich (srjedźa) w Njebjelčanskim kulturnym centrumje čitał. Jednaćel Ludoweho nakładnistwa Domo­wina Pětr Syman Cyž a zamołwita za rozšěrjenje LND Manja Bujnowska bywše­ho šef­redaktora Serbskich Nowin kaž tež něhdźe pjatnaće zajimcow wu­trob­nje powitaštaj. W srjedźišću wječora steješe prašenje, kak Benedikt Dyrlich tehdy a dźensa wo me­di­jach mysleše resp. mysli. „Redakcija ma so młodym ludźom wotewrić“, je wón přeswědčeny. Na kóncu zarjdaowanja daše sej tež nowy jednaćel LND knihu wot awto­ra signować. Foto: Feliks Haza

wozjewjene w: Kultura
pjatk, 26 junija 2020 14:00

Bjarnatej Cyžej so dźakowali

Budyšin (SN/JaW). Zhromadne dźěło čłonskich słowjanskich narodnych mjeńšin w Federalistiskej uniji europskich mjeńšin FUEN so krok po kroku norma­lizuje. Wo tym informuje Domowina w medijowej zdźělence.

Zastupnicy dźěłoweje skupiny słowjanske mjeńšiny (ASGM) wuradźowachu tón tydźeń online. Jedne z ćežišćow wuradźowanja běchu přihoty na FUEN-kongres a zetkanje dźěłoweje skupiny słowjanskich mjeńšin w oktobrje. „Matic Germovšek, korutanski Słowjenc a ko­ordinator dźěłoweje skupiny, rozprawješe tež wo postupach noweje internet­ne­je strony a brošurce wo słowjanskich mjeńšinach w Europje, kotraž leži nětko w rukach FUEN“, w zdźělence dale rěka. Zdobom dźakowachu so na digitalnym wuradźowanju wuraznje Serbam, Do­mowinje a předewšěm Bjarnatej Cyžej, „kiž je lěta dołho jako rěčnik skupiny jeje dźěławosć bytostnje přewodźał a zmóžnjał“. Referent Domowiny za kulturu a wukraj Clemens Škoda so wjeseli, „zo je normalne skutkowanje Słowjanow w FUEN pod wuměnjenjemi pandemije zaso zahajene.“

wozjewjene w: Towarstwa
pjatk, 26 junija 2020 14:00

Zakónča eru

Šwikawa (dpa/SN). W Šwikawskej tworni Volkswagen dźensa wulka era skónča. Po šěsć milionow produkowanych awtow tam poslednje jězdźidło ze spalowanskim motorom zhotowja. Po tym montažu přerjaduja a ju na produkciju e-awtow wusměrja. Hižo spočatk nowembra bě Volkswagen serijowu produkciju typa ID.3 w Šwikawje zahajiło. W septembrje chcedźa awto šěrokemu publikumej na wikach poskićeć.

Ćěkancow na twjerdź dowjezli

Athen (dpa/SN). Na grjekskich egejskich kupach přebywa dale wjele ćěkancow, a tuž spyta knježerstwo w Athenje połoženje wolóžić. Wot spočatka junija su 1 900 migrantow wottam wotwjezli. W lěhwje Moria na kupje Lesbos je tuchwilu něhdźe 15 600 migrantow. Kónc měrca bě jich tam nimale 19 000. Tež z tamnych kupow Chios, Samos, Leros a Kos su ćěkancow wotewzali na twjerdź dowjezli. Problem přepjelnjenych lěhwow pak wosta dale njerozrisany.

Nowy trend wozjewjeny

wozjewjene w: Kraj a swět
pjatk, 26 junija 2020 14:00

Konsekwency trěbne

Düsseldorf (dpa/SN). Hladajo na kritiku a diskusije tunjeho mjasa dla chce zwjazkowa ratarska ministerka Julia Klöckner (CDU) dźensa wo konsekwencach wuradźować. Při tym pondźe wo lěpše wuměnjenja w chlěwach a w rězarnjach, ale tež wo wyše płaćizny w kupnicach. Na zhromadne posedźenje do Düsseldorfa přeprosyła je sej wona zastupjerjow plahowarjow, mjasoweje a žiwidłoweje branše, wikowanja, zwjazkoweho karteloweho za­rjada, skótnych lěkarjow a škitarjow pře­trjebarjow. Po wjele padach z korona­wi­rusom inficěrowanych w rězarnjach su změny w cyłym žiwidłowym rjećazu trěbne. Njedostatki jewja so we wjele wobłukach. Tak njezasłuža ratarjo ze swojimi wudźěłkami dosć pjenjez. Tež přistajeni mjasoweje branše dóstanu nisku mzdu.

wozjewjene w: Kraj a swět
pjatk, 26 junija 2020 14:00

Bager wobsadźili

Janšojce (dpa/SN). Klimowi aktiwisća zwjazka Ende Gelände su so dźensa rano na ležownosć Janšojskeje brunicoweje jamy­ dóstali a bager wobsadźili. Po in­formacijach rěčnicy protestuja přećiwo planowanemu brunicowemu zakonjej zwjazkoweho knježerstwa a žadaja sej bruni­cowe milinarnje hnydom wotpinyć. Hižo rano w 5 hodź. su aktiwisća na bager zalězli. Kaž rěčnik policije rjekny, připrawa nětko hižo njedźěła, wšako maja wěstotu ludźi zaručić. Někotři aktiwisća su plakat připrawili a so hnydom zaso wotsalili. Dalša skupina z něhdźe 30 wosobami tam wosta. „Chcemy brunicowu infrastrukturu tak dołho kaž móžno wobsadźić“, ze stron Ende Gelände rěka. Policija mjeztym připowědźi, zo chce ludźi pohnuwać, akciju dobrowólnje zakónčić.

wozjewjene w: Kraj a swět

Serbska debata

nowostki LND