Wojerecy (SiR/SN). Staroměšćanski bulwar we Wojerecach tež lětsa žiwjenje w měsće wulkotnje wobohaća. To měni mějićelka kofejownje „Rosali“ na Cyrkwinskej hasy Sylvia Hübner. Wona wobkedźbuje, zo wobydlerjo, hosćo a dowolnicy poskitki jara rady přijimaja, byrnjež wobmjezowanja koronapandemije dla trěbne byli. „Wězo je bulwar lětsa hinaši. Wulke swjedźenje pobrachuja, ale tež to je w porjadku. Naša žiwjenska situacija je hinaša, a dyrbimy ju tajku přiwzać. Přiwšěm wuhladam w měsće wjele wjace turistow, dowolnikow a kolesowarjow“, rozprawja Sylvia Hübner.
Runja lońšemu staroměšćanskemu bulwarej změja tež lětsa modowu přehladku, kotruž Sylvia Hübner hromadźe z dalšimi angažowanymi pomocnikami organizuje. Holcy a žony, kotrež pisanu modu Grodkowskeje butiki „For Women“ prezentuja, pochadźeja z kruha swójbnych a přećelow.
Njebjelčicy. Přichodne posedźenje gmejnskeje rady Njebjelčic wotměje so zajutřišim, štwórtk, w 19.30 hodź. w sydarni tamnišeho gmejnskeho zarjada. Wot zastupowaceho wjesnjanosty Tomaša Klara podpisany dnjowy porjad předwidźi, zo dyrbja sydom wobzamknjenjow ze 16. apryla cofnyć a znowa wobzamknyć. Při tym jedna so wo najwšelakoriše twarske naležnosće, kotrež chcedźa wobydlerjo na swojich ležownosćach zwoprawdźić. Nimo toho chcedźa architektowe zrěčenje za twarski plan noweje bydlenskeje štwórće w Serbskich Pazlicach wotzamknyć.
Z busom do Krupki
Radwor. Hišće hač do pjatka tohole tydźenja móža so zajimcy přizjewić, kotřiž chcedźa srjedu, 12. awgusta, z busom na putnisku Božu mšu do Krupki sobu jěć. Přizjewjenja přijimuje Šmitec wozydłownistwo w Radworju pod telefonowym čisłom 03 59 35 / 28 60.
Wopiteho lepili
Kamjenc. Na pózdnim njedźelnym popołdnju je wodźer awta při tankowni na Macherowej w Kamjencu do wabjenskeje tafle zajěł, ale so wo nastatu škodu njestarał. Swědcy tuž za nim jědźechu a informowachu policiju. Zastojnicy 62lětneho krótko na to lepichu a pytnychu, zo bě wón alkohol pił. Při kontroli naměrichu pola njeho 1,66 promilow. Jězbnu dowolnosć a awtowy klučik dyrbješe šofer wotedać a změje so nětko wohroženja nadróžneho wobchada dla zamołwić.
Po nowym spočatku loni w krajnej lize budźe Tomaš Henčl prěnje koparske mustwo Budissy Budyšin w nowej hrajnej dobje dale trenować. Z Łušćanom je so Hanspeter Benad rozmołwjał.
Medije pisaja, zo maće wjacore wotchady w mustwje, kotrež sće hakle loni hromadu zestajeli.
T. Henčl: To w kopańcy k tomu słuša. W kóždym mustwje su změny, wotchady a přichady. Budissu Budyšin wopušća Joseph Gröschke (Chemija Carny Gózd), Jakub Sidlo (FK Velké Hamry), Max Kubitz, Denny Gärtner a Marco Fischer (wšitcy Rakečanske ST) a Philipp Mühlmann (SV Oberoderwitz).
A na tamnej stronje steja přichady.
T. Henčl: Wjeselimy so na Tonija Barnickela (Jednota Kamjenc), Franza Voigta (Zeleno-běli Bukecy), Christophera Gebhardta (Kamjeničanski FC), Jannika Käpplera (Biskopičanske KT 08) a dalšich.
Młynkec łuka wostanje zawěsće hłowne hrajnišćo?
T. Henčl: Chcemy swoje domjace partije dale stajnje sobotu na Młynkec łuce přewjedować a tam tež znajmjeńša jónu wob tydźeń trenować.
Kotry cil abo kotre cile maće za hrajnu dobu 2020/2021?
Natwar Němske Pazlicy
– Sokoł Ralbicy/Hórki 2:2 (2:0)
Za Ralbicy zasadźeni: Schöne – Bejma, Materna, Šewc, M. Matka, Gloxyn, Rachela, Šiman, G. Kurjat, Janca, Domaška, K. Matka, Młynk, Lešawa, Nuk, Ćěsla, Budar
VfB Žitawa – SJ Chrósćicy 0:1 (0:1)
Za hosći hrajachu: Hejduška – B. Cyž, F. Cyž, Sentivan, L. Zahrodnik, Zynda, G. Zahrodnik, Runt, F. Zahrodnik, Paška, Handrik, Mark, M. Cyž.
Jako bě koronapandemija Europu a Němsku trjechiła, měješe to tež wuskutki za sportowe towarstwo w Radworju. Koparjo a dalši sobustawojo njemóžachu hižo trenować, dokelž běchu sportnišćo, hrajkanišćo kaž tež sportowa hala nadobo zawrjene. Tež dalše wotrjady běchu potrjechene. Radworscy koparjo pak běchu w tym času přiwšěm aktiwni, a to w socialnych medijach. Tak na přikład na Instagramje, hdźež wozjewichu kreatiwne wideja a fota.
Sportowcy pak njeběchu jenož digitalnje aktiwni, ale tež pod hołym njebjom. Aktualny trenar Mario Bischof žadaše sej w času pandemije wot swojich chowancow, zo samostatnje trójce wob tydźeń wšelakore zwučowanja přewjeduja. K tomu zahaji wón mału challenge. Radworski koparski cyłk dyrbješe zhromadnje sto kilometrow na tydźeń joggować. Ličby naběhanych kilometrow jednotliwcow su aděrowali. To so cyłkej jara derje poradźi, wón nahromadźi kóždy tydźeń sto kilometrow a wjace.