Kulow (aha/SN). Město Kulow ze swojimi dwanaće přewažnje serbskimi wjesnymi dźělemi ma 5 800 wobydlerjow. Wot junija 2014 je tam dźensa 51lětny Markus Posch (CDU) měšćanosta. Wot wšeho spočatka bě sej swojeje zamołwitosće wědomy na to dźiwać, zo je mjez wobydlerjemi něhdźe 30 procentow Serbow. To wotbłyšćuje so tež w zestawje měšćanskeje rady, hdźež su mjez 14 radźićelemi třo Serbja. Posch, kiž je na Kamjenskej ludowej uniwersiće zakładny a natwarny kurs serbšćiny wopytał, wobdźěla so mjeztym tež něšto lět w serbskej skupinje putnikow do Częstochowy. Bjez dźiwa wón tuž jara připóznawa, zo na cyrkwinskich swjedźenjach ličba serbskich družkow přiběra.
Z prawom hordy měšćanosta je, zo je so minjene lěta mjezsobna toleranca mjez serbskej a němskej ludnosću pozitiwnje změniła. W nowym dnjowym přebywanišću maja dźensa serbsku skupinu ze 16 dźěćimi.
Njebjelčicy (SN/JaW). Twarska naležnosć w Serbskich Pazlicach, kotruž je Njebjelčanska gmejnska rada 2. julija w Pěskecach rozjimała (SN rozprawjachu), a někotre dalše ćeže zbudźeja tuchwilu tójšto prašenjow a njeměra mjez wobydlerjemi gmejny.
Wóslink. Přichodnu njedźelu, 2. awgusta, woli něhdźe 1 800 wólbokmanych we Wóslinčanskej gmejnje noweho wjesnjanostu. Dokelž maja jenož dweju kandidatow, drje njebudźe 30. awgusta druhi wólbny přechod trěbny. Z nowym wjesnjanostu stać chcetaj so Johannes Nitzsche z wolerskeho zjednoćenstwa „Zwjazk přichod tworić“, kiž za AfD w Budyskim wokrjesnym sejmiku sedźi, a gmejnski radźićel Thomas Perjak z wolerskeho zjednoćenstwa „Elstergrund“. Samsnemu zjednoćenstwu přisłuša tuchwilny wjesnjanosta Siegfried Gersdorf, kiž so po sydom lětach w zastojnstwje na wuměnk poda.
Maja nowe ryzwa
Smochćicy. Dom biskopa Bena ma nětko dwanaće nowych ryzwow za Bože mšě. Wšitcy měšnicy, kotřiž tam kemše swjeća, móža zelenu, fijałkojtu, čerwjenu a běłu drastu wužiwać, rěka w nowinskej zdźělence. Nakup ryzwow je Bonifacijowy skutk z 2 500 eurami podpěrał, štož wotpowěduje něhdźe dwěmaj třećinomaj cyłkownych kóštow.
Njeswačidło (ML/SN). Na mjeńše dźěći čaka w Njeswačanskim domizniskim muzeju wosebita překwapjenka, wopytaja-li wone ze staršimaj abo z wowku a dźědom nowu wustajeńcu „Hrajki z NDRskeho časa“. 70lětny bywši docent za EDV Frank Lange z Póckowow je něhdźe 250 hrajkow z NDRskeho časa muzejej jako požčonki přewostajił.
Po politiskim přewróće 1989/1990 započa Póckowčan hrajki, modele jězdźidłow a figury, z kotrymiž bě so kaž tamne NDRske dźěći rady zaběrał, zběrać. Před 30 lětami su mnozy tele hrajki preč mjetali. Lange pak je zběraše. Pozdźišo kupowaše je tež na čaporowych wikach. „Dźensa jeno za wjele pjenjez derje zdźeržane hrajki z časa 1949 do 1989 w NDR dóstanješ“, wón wuswětla. Mjeztym ma wjace hač 1 000 tajkich eksponatow woblubowaneje dźěćaceje zaběry. „Mjeztym su wone tež na zapadźe Němskeje a w druhich krajach, samo w USA, jara požadane, wšako je hižo njeprodukuja. Fabriki za jich zhotowjenje hižo njewobsteja“, zběraćel powěda. Lange je tež sobuawtor dweju knihow wo NDRskich hrajkach. Jeho mandźelska Veronika jako něhdyša pěstowarka jeho podpěruje.