Z wudaća: štwórtk, 30 julija 2020

Braniborska ministerka za strowotnistwo kritizuje wusměrjenje na dobytk

Podstupim (dpa/SN). Chorownje w Braniborskej so krok po kroku k normal­nemu dźěło nawróćeja – kaž do koronapandemije pak njejsu w dalokej měrje hišće­ wućežene. Tuchwilu su to po trochowanju towaršnosće krajnych cho­row­njow ze 65 do 70 procentami, normalne wućeženje by 80 do 85 procentow wu­činjało. „Njejsmy hišće­ w normalnym dźěle“, rjekny jed­naćel towaršnosće Michael Jacob. Tomu po jeho słowach tež lětsa wjace tak njebudźe.

Za čas raznych wobmjezowanjow koro­ny dla běchu chorownje jeničce ze 40 do 50 procentami wućežene. Hłowna přičina toho běchu prawidła dodźerženja wěstotneho wotstawka a předpisy hygieny. Tak smědźeštaj we wjace­łožowych stwach najwjace dwaj pacientaj być. Nimo toho so mnozy chorownjow zda­lowachu, dokelž so bojachu, zo so tam z wirusom natyknu. „Tutón strach wšak je runje w chorownjach ekstremnje snadny“, Jacob wuzběhny.

Znajeće hišće wony žorćik z kónca 90tych lět?: Kajki je rozdźěl mjez ruskimi a ame­riskimi wojakami? Wotmołwa: Rusow smy wotbyli. Na to dyrbjach myslić, jako słyšach dźensa wo konkretnych planach USA, nimale 12 000 swojich wojakow z Němskeje cofnyć, dokelž njewudamy pječa dosć pjenjez za brónjenje. A runjewon samozrozumliwje jewješe so ze stron zastupnicy FDP argument, zo je Němska nětko hladajo na hrožacy nadpad Ruskeje wosłabjena, dokelž pobrachuje 12 000 ameriskich wobškitarjow. Nó hladaj, sej myslach: Je to mjeztym tajke něšto kaž powšitkowna wěda, zo nas Ruska wohroža. Dyrbiš to jenož často dosć wospjetować, doniž wšitcy do toho njewěrja. Kak da by było, bychmy skónčnje zaso normalne styki k Ruskej pěstowali, město toho zo dale do antiruskeje truby trubimy. Móžemy hnydom započeć. Nječakajmy, doniž njeje so tež posledni ameriski wojak z Němskeje zminył. Marko Wjeńka

Lucian Kaulfürst z Budyšina wupraja so pod­ nadpismom „Wulki pohóršk“ wozjewjenemu přinoškej w Serbskich Nowinach ze 27. julija:

W mjenowanym wudaću wašeho medija sym na 2. stronje pod rubriku „politika“ sćěhowace widźał a čitał. Pod fotografiju ze strach načinjacymi ruskimi wojakami steji: „Po wšej Ruskej swjećachu wčera dźeń mórskeje floty ..., kaž tule w Sewastopolu na kupje Krim.“ Tajke wuprajenje mam za cyle jasnu legitimaciju njesprawneho jednanja ruskeho prezidenta Wladimira Putina, kotrež njewotpowěduje ludowemu prawu! Po ludowym prawje­ słuša połkupa Krim mjenujcy k Ukrainje. Ruska je połkupu Krim lěta 2014 z njeprawniskim aktom cyle jednorje anektowała! Ći, kotřiž pod tymle faktom najbóle ćerpja, su prawobydlerjo połkupy Krim mjenujcy tam sydlacy Tata­rojo. Postupowanje Ruskeje federa­cije na połkupje Krim wosobinsce raznje wotpokazuju. Legitimaciju postupowanja w serbskim wječorniku njemóžu ani akcep­tować ani tolerěrować!

30. julija před 150 lětami narodźi so delnjo­serbski duchowny a składnostny spi­sowaćel Měto Wjeńcko burskej swój­bje w Mosće. Po maturiće w Choćebuzu studowaše wón wot lěta 1892 ewan­gelske boho­słowstwo na uniwersitomaj w Halle a Berlinje. Wustudowawši bu 1899 w Sprjejcach, we Wojerowskim wo­krjesu, za fararja zapokazany a skutkowaše tam hač do lěta 1910. Po tym wróći so zaso do Delnjeje Łužicy. Štyri lěta bě w Dešnje z fararjom, doniž njezapoča tam Bogumił Šwjela jako dušepastyr. Hač do lěta 1939 je Wjeńcko w Choćebuskej Serbskej klóšterskej cyrkwi fararił. Wot lěta 1908 přisłu­šeše Maćicy Serb­skej a dlěje hač lětdźe­satk bě aktiwny čłon předsydstwa Maśicy Serbskeje. Składnostnje pěsnješe a pisaše stawizniske a kulturne přinoški do Bramborskeho Casnika a do ewan­gelskeho časo­pisa Wosadnik. Pomhaj Bóh je serial z jeho pjera „Moje pućowanje do Je­rusalema“ w 14 pokročowanjach wo­zjewił. Wjeńcko bě tež awtor přinoškow w Pratyji a w poslednich žiwjenskich lětach w tydźeniku Nowy Casnik.

Wón zemrě 21. oktobra 1953 w Choćebuzu. Manfred Laduš

Dowolowa romantika ŠNAK

Wulki dźěl róštow při twarjenju zarjadniskeho zwjazka Při Klóšterskej wodźe w Pančicach-Kukowje je so hižo zhubił. Někotre pak běchu minjene dny hišće trěbne. Z jich pomocu je Žurčan Joachim Lipič tele dny wopony sobustawskich gmejnow a wobaj napisaj na fasadźe přičinił. Wčera bě serbski na rjedźe. Foto: Feliks Haza

Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne­ dźěło wukonjeja, wo nich pak přewjele nje­zhoniš. W swojej lětnjej seriji­ lětsa tajke aktiwne cyłki před­stajamy, dźensa towar­stwo Miłočanska žaba (8).

Wažny dróhotwarski projekt Budyskeho wokrjesa dale a konkretniši

Delnja Hórka (UM/SN). Dołho je trało, ale nětko zda so twar wobjězdki zwjazkoweje dróhi B 156 wokoło Delnjeje Hórki konkretny być. Znajmjeńša je tuchwilu hač do 19. awgusta naćisk tak mjeno­waneje procedury zawěsćenja plana w Malešanskim a Wulkodubrawskim gmejnskim zarjadnistwje wupołoženy. Štóž čuje­ so wot twarskeho projekta ­po­­trje­cheny, móže hač do 21. septembra swoje přispomnjenja a wobmyslenja ­pisomnje zapodać abo ertnje přednjesć.

Bager do awta zrazył

Stróža. K njewšědnej zražce je předwčerawšim popołdnju w Stróži pola Hućiny dóšło. Na kromje tamnišeje hłowneje dróhi dźěłaše wodźer bagra. Runje jako so 43lětny ze swojej dźěłowej mašinu zwjertny a łžica bagra nad pućom steješe, přijědźe BMW a do njeje zrazy. 45lětny wodźer a pjećlětne dźěćo so snadnje zraništaj. Zranjenu 34lětnu sobujěducu dyrbjachu do chorownje dowjezć. Škoda na awće wučinja 3 500 eurow.

Ekstremna suchota njenačinja jenož ratarjam wulke ćeže, ale zaběraše wčera po­poł­dnju tež wohnjowych wobornikow. Jich wołachu k hašenju šćernišća pola Hodźija. Při puću do Žičenja (Seitschen) paleše so polo na něšto tysac kwadratnych metrach. Z wětřikom so płomjenja dale rozpřestrěwachu. Přiwšěm mějachu wobornicy woheń­ po něhdźe jednej hodźinje pod kontrolu. Foto: Jens Kaczmarek