Z wudaća: pjatk, 11 septembera 2020

pjatk, 11 septembera 2020 14:00

Protyka (11.09.20)

Pjatk 11. do 13.9.   Kónc tydźenja za singlow pod hesłom „połnje do čorneho“ w Smochčanskim kubłanišću swj. Bena

  19:00 Koncert pod hesłom „Serenada w zelenym“ w Stróžanskim Domje tysac hatow

Sobotu 12.9. 18:30 Sakske krajne jewišća předstaja musical „Drei Hasel­nüsse für Aschenbrödel“ na Mortkowskej Jakubec twjerdźiznje

  19:30 Zjawny kinowy wječor w Radworskim młodźinskim klubje

Njedźelu 13.9.   Dźeń wotewrjeneho pomnika, mjez druhim w Budyskim Serbskim muzeju pod hesłom: „Sólnica­ – Sudnistwo – Serbski muzej“

   Dźeń wotewrjeneho pomnika, mjez druhim we Wul­kodubrawskim muzeju Margarećineje hěty

  10:00 Předstajenje projektoweho stawa Sprjewineho mosta na dworje Budyskeho hrodu z wodźenjemi po historiskich twarjenjach

  10:00 Rjemjeslniske wiki w rozwalinje Budyskeje mniše­je cyrkwje

  14:00 Nakupowanska njedźela z nazymskim swjedźenjom w Kamjenskim nutřkownym měsće

  15:00 Poswjećenje skulptury „Nawrót do Koslowa“ na Kos­lowskej nawsy

  16:00 Knižna premjera w LND wušłeje chroniki „Worklecy něhdy a dźensa“ we Worklečanskej sportowni

wozjewjene w: Protyka
pjatk, 11 septembera 2020 14:00

Sport (11.09.20)

Viktoria nětko klasu wyše

Wolejbulisća Viktorije Worklecy star­tuja jutře jako postupnik w krajnej klasy do winowatostnych dypkowych hrow, a to w Coswigu. Tam hraja wot 12 hodź. přećiwo ST Łobjowemu krajej Coswig-Mišno. Druhu hru tohole mustwa serbscy wolejbulisća sudźa, a w třećej hrě dnja wojuje Viktoria z Póstom Drježdźany.

Dalše krajne pokalne koło

Na krajnej runinje přewjedu dalše pokalne koło w kopańcy. Tež někotre cyłki Zapadołužiskeho koparskeho zwjazka su hišće zastupjene.

12.09. 15:00 ST Panitzsch (Borsdorf)

  – Budissa Budyšin

12.09. 15:00 ST Ćisk – VFC Plauen

13.09. 15:00 Čerwjeny křiž Lipsk 99

  – Jednota Kamjenc

Kónctydźenska kopańca

Štyri derbyje pospochi tworja zazběh prěnjeho koparskeho mustwa ST 1922 Radwor. Tydźenja doby wone w Male­šecach z 1:0, njedźelu, w 15 hodź. hraje doma přećiwo cyłkej z Małeho Wjelkowa, kotryž je tydźenja z 0:6 na domjacym trawniku HZ Hórnikečanskemu jězorej/Ćiskej II wysoko podležał.

12.09. 12:30 HZ Hórnikečanski jězor

  – SJ Chrósćicy II

12.09. 13:00 HZ Wojerowski FC II

  – SJ Njebjelčicy

12.09. 15:00 Módro-běli Kulow

  – ST Kinspork/Łužnica

12.09. 15:30 ST Horni kraj-Sprjewja

  – Sokoł Ralbicy/Hórki

13.09. 10:30 LSV Hory II

wozjewjene w: Sport
pjatk, 11 septembera 2020 14:00

Staru pěstowarnju spotorhaja

Hdyž něšto nowe nastanje, so zwjetša něšto stare zminje. Tak je to tež w Chrósćicach, hdźež maja nowe dnjowe dźěćace přebywanišćo. Stare porno tomu hižo wužiwać njemóža.

Chrósćicy (aha/SN). Dny stareje Chróšćanskeje pěstowarnje su ličene. Na swojim wčerawšim posedźenju w kulturnym a gmejnskim centrumje čłonojo gmejnskeje rady wčera wobzamknychu, twarjenje při Satkuli spotorhać. Po dotwarje noweho dźěćaceho přebywanišća před štyrjomi lětami bě jasne, zo dom hinak wužiwać njemóža, dokelž hrozy při sylnych zliwkach nastajnosći strach zapławjenja. Kaž wjesnjanosta Marko Kliman (CDU) wčera zdźěli, ma spotorhanje 113 000 eurow płaćić, z čehož dóstanu 80 procentow spěchowane. Při wobličenju kóštow dyrbjachu wobkedźbować, kelko škódnych wotpadkow nastanje. Po tym, zo budźe areal zrunany, chcedźa na městnje stareje pěstowarnje sadowcy nasadźeć a grilowansku hětu kaž tež hrajkanišćo natwarić. Za to wužija dźěl pjenjez, kotrež dóstachu jako myto we wubědźowanju SIMUL+.

wozjewjene w: Łužica
pjatk, 11 septembera 2020 14:00

Pišćelowu knihu předstajił

Rukopisna pišćelowa kniha „Spěwawa Jězußowa Wincza“ z pjera Michała Jana Wałdy (1721–1794) steješe předwčerawšim w Budyskim Serbskim muzeju w srjedźišću zarjadowanja Kofej w třoch. Alexander Pólk (stejo) je horstce zajimcow wuznam ­knihi rozłožił. Dohromady wopřijima wona 659 kěrlušow, z toho pjeć wot Wałdy ­samoho spisanych, něhdźe 100 přełoženych z Drježdźanskich a šleskich katolskich spěwarskich a 80 ze serbskich ewangelskich spěwarskich. Foto: SN/Hanka Šěnec

wozjewjene w: Kultura
pjatk, 11 septembera 2020 14:00

Na kermušny nyšpor

Budyšin. Njedźelu, 13. septembra, w 17 hodź. wotměje so w Budyskej cyrkwi ­Našeje lubeje knjenje swjatočny dwurěčny kermušny nyšpor. Magdalena Römhild z Weimara na huslach, Budyšan ­Friedemann Böhme na pišćelach kaž tež spěwarjej Magdalena Kircheis (sopran) a Christian Lutz (tenor) z Drježdźan na nim sobu skutkuja. Wšitcy su witani.

Za wustajeńcu so přizjewić

Budyšin. Wosebita wustajeńca „Barby daliny – Moler Ante Trstenjak a Łužiscy Serbja“ budźe za zjawnosć na dnju wotewrjenja njedźelu, 20. septembra, wot 17.30 do 19 hodź. přistupna. Budyski Serbski muzej prosy wo přizjewjenje pod telefonowym čisłom 03591/ 270 8700 za wopyt wustajeńcy w časach 17.30, 18 abo 18.30 hodź. Ličba wosobow na skupinu je na 20 wobmjezowana. Zastup je darmotny.

wozjewjene w: Z městow a wsow
pjatk, 11 septembera 2020 14:00

Hosćenc zaso wotewru

Klóšterska stwička chce solidnu kuchnju a zabawne wječory poskićeć

Pančicy-Kukow (SN/MWj). Wot spočatka oktobra budu wopytowarjo klóštra Marijineje hwězdy w Pančicach-Kukowje móc zaso do Klóšterskeje stwički załožić, wobydlerjo ze wsy a wokoliny tam powječerjeć a swójby swoje swjedźenje přewjesć. „2. oktobra změjemy wječor za prošenych hosći, nazajtra dźeń wotewrjenych duri z hudźbnym wječorom ze spěwarjom Gunterom ­Emmerlichom“, připowědźi nowa wotnajerka Milena Vettrainowa. Hromadźe ze swojej wobchodnej partnerku Jěwu-Mariju Šołćinej a šefkucharjom Domingom Colónom je wona swój hosćencarski koncept Serbskim Nowinam rozłožiła.

wozjewjene w: Łužica
pjatk, 11 septembera 2020 14:00

Policija (11.09.20)

Připowěšakaj pokradnyli

Rakecy. Tójšto škody načinichu njeznaći, kotřiž běchu so w nocy na srjedu na ležownosć w Rakecach zadobyli. Z njeje pokradnychu specialnej připowěšakaj, mjez druhim jedyn za transport kablowych rólow. Hódnotu rubizny trochuja na pjećcyfrowu sumu. Wěcna škoda porno tomu po informacijach policije žana njenasta.

wozjewjene w: Policija
pjatk, 11 septembera 2020 14:00

Znowa wulki swět skulpturow w skale

We wobłuku 14. mjezynarodneje rězbarskeje dźěłarnički w Miłoćicach zaso najwšelakoriše twórby nastali

„Chošćo“ Jadwigi Deleńkec z jasnej pokazku na znate prajidmo. Zadnja strona etiketa je serbsce popisana.

Wot Njebjelčanskeho towarstwa Kamjenjak lětsa 14. raz wuhotowana mjezynarodna rězbarska dźěłarnička w Miłočanskej skale je wospjet mnóstwo zajimawych twórbow najwšelakorišeho razu wupłodźiła. Dohromady dźesać wuměłcow z Němskeje, Pólskeje a Bołharskeje zdźěła w běhu dweju tydźenjow skulptury, wotbłyšćowace cyły, epochi přesahowacy estetiski spektrum rězbarjenja wot realistiskeho napodobnjenja přez abstraktne formy hač ke geometriskej studiji.

wozjewjene w: Předźenak
pjatk, 11 septembera 2020 14:00

Łysa nětko wo wosom metrow wyša

Nowe wuhladnišćo na wjeršku łužiskeje hory pućowacym a hosćom přepodate

Na wjeršk hory Łysa (Lausche), kotraž je ze swojimi 793 metrami najwyša hora Němskeje wuchodnje Łobja, pućować je wobćežne. Puć hač k nowemu wuhladnišću na Łysy, kotrež su hakle kónc minjeneho měsaca zjawnosći přepodali, je runje tak napinacy.

Wšitke pospyty zwrěšćili

Po tym zo bě so 1946 stara bawda na Łysy wotpaliła, běchu zas a zaso prócowanja, wjeršk znowa wobtwarić. Wšitke pospyty, tole zwoprawdźić, pak zwrěšćichu. Gmejna Wulki Šunow (Großschönau) – jej wšak wočerstwjenišćo Waltersdorf wot 2003 přisłuša –, pak je lěta 2007 zjawny diskusijny proces wo znowawuhotowanju wjerška Łysy nastorčiła. Na to přewjedźechu idejowe wubědźowanje, za kotrež zapodachu hač do 2009 cyłkownje 33 namjetow z Němskeje a Čěskeje. Tři lěta pozdźišo nabywaše wšitko jasniše a konkretniše kontury a formy. We wob­łuku diplomoweho dźěła su tuž přepytowanja za wuhladnišćo na wjeršku hory přewjedli. Móžnosće nóclěha na nim a zastaranje pućowacych z jědźu a napojemi pak su wot wšeho spočatka wuzamknyli.

wozjewjene w: Předźenak
Po informacijach Němskeje towaršnosće za mykologiju rosće w Němskej wjac hač 11 700 družin hribow, ně­hdźe 6 000 z nich w Braniborskej. Něhdźe 200 słuša do skupiny jědźnych. Hladajo na 50 dalšich družin fachowcy diskutuja, hač do teje skupiny słušeja. Wšako hodźa so jenož wosebje spřihotowane jěsć. Něhdźe 200 dalšich družin je jědojtych. Kóžde lěto pak fachowcy nowe družiny dopokazuja a do dokumentow zapřijimaja.

Po lěsach chodźić a słódne hriby ­zběrać je kóždu nazymu witana wot­měna. A dobra powěsć za lubowarjow – hriby zaso rostu, tež hdyž někotre družiny ­hišće trochu čakaja.

wozjewjene w: Předźenak

Serbska debata

nowostki LND