Z wudaća: póndźela, 14 septembera 2020

Ralbicy (JK/SN). Wokomiknje maš dźěło gmejnskeje rady Ralbicy-Róžant nastupajo zaćišć, zo so wšitko jenož hišće ­wokoło noweje Ralbičanskeje pěstowarnje wjerći. Tola tomu tak njeje. Nimo noweje kalkulacije za drje najwjetše wu­žadanje delanskeje gmejny wěnowachu so radźićeljo na minjenym posedźenju tež hinašim wažnym nadawkam. Woni so dojednachu, zo lětušu a klětušu ­pawšalu 54 000 eurow k wudźeržowanju komunalnych pućow zjimaja. Tak hodźi so wjetši objekt zwoprawdźić. Po gmejnskej prioritnej lisćinje měli Trupinski puć w Ralbicach a Fabriksku dróhu w Šunowje ponowić. K tomu poda twarski in­ženjer a planowar Stanij Statnik roz­prawu k stawej a móžnym naprawam. Z nazhonjenjow minjenych dróhotwarskich projektow by móžno było – hladajo na dale a tuńše poskitki fachowych firmow – přirunajo z kalkulaciju gmejny wobaj pućej wobnowić. Radźićeljo so tuž dojednachu, wupisać wobaj pućej klětu spočatk lěta za wobnowjenje w dwěmaj losomaj a potom poskitki firmow wo­čaknyć. Jeli su wone we wobjimje gmejnskich­ móžnosćow, hodźitej so ­wobaj pućej ponowić.

Krajny koparski ligist Budissa Budyšin je sobotu dalše pokalne koło docpěł. W Borsdorfje doby mustwo trenarja Tomaša Henčla 4:0 přećiwo wokrjesnemu wyšemu ligistej ST Panitzsch/Borsdorf 1920. Tule wuhra Florian Baudisch (naprawo, Budyšin) Lucasa Justina Stelznera (nalěwo, Panitzsch). Baudisch je něhdyši chowanc Serbskeje wyšeje šule Budyšin. Wrota za hosći třělichu Karel Vrabec (16.), Max Rülicke (22.), Tom Hagemann (50.) a hrajer hosćićela (80.). Foto: Torsten Zettel

Najebać wšitke njewěstosće a wosebite organizatoriske wužadanja smědźachu na tradicionalny triatlon při Třižonjanskim jězoru tež lětsa sportowcow z cyłeje Němskeje witać. Wjace hač 1 100 wu­trajnostnych sportowčow a wutrajnostnych sportowcow je składnosć wužiło, mjez nimi tež někotři profijojo kaž dwójna Ironman-dobyćerka Maren Hufe, ­lokalny matador Markus Thomschke z Połčnicy a jeho treningowy towarš ­Philipp Bahl­cke. Woni dominowachu sobotu ironmanowu połdistancu (płuwanje 1,9 km, kolesowanje 84 km, běhanje 21,1 km).

Na krótšich čarach wobdźělichu so njedźelu tež třo Serbja. Dopołdnja, při hišće suchim wjedrje, počuchaštaj Matej Wjeńka a Daniel Nuk prěni raz třibojowy powětr na sprintowej distancy. Po 750 metrach we wodźe, 20 kilometrach na kolesu a pjeć kilometrach pěši doběhny­štaj wobaj z mało wotstawkom mjez sobu jako 45. a połstaty w srjedźnym polu do cila.

Awtor dźensa Clemens Šmit

Hłójčkowanje w kopańcy juniorow zakazać!

Ně, to njeje žadyn směšk, ale, dźe-li po měnjenju někotrych wědomostnikow, realna próstwa. Najprjedy to sam wěrić nochcych. Tola smjeće je mi, po tym zo sym so hłubšo do tematiki začitał, woprawdźe zašło.

Přikład Jendźelska: Tamniši koparski zwjazk bě hižo loni na warnowanja reagował a samo wukaz wudał. Z dźěćimi w zakładnošulskej starobje, potajkim hač do jědnaće lět, je hłójčkowanje tohodla na koparskich treningach mjeztym dospołnje zakazane. Dale wukaz předwidźi, zo maja so hač do staroby 18 lět zwučowanja, při kotrychž z hłowu hraja, redukować. Při dypkowych hrach pak wostanje pola jendźelskich juniorow najprjedy hišće wšitko po starym – młodźi hrajerjo smědźa tam z nohomaj runje tak kaž z hłójčku bul třěleć.

ST Horni kraj/Sprjewja – Sokoł Ralbicy/Hórki 4:0 (2:0)

Zestawa hosći: Schöne – Lešawa (68. Nuk), Wałda, Bejma, Matka, Šewc, Rawš (79. Budar), Šołta, Gloxyn, Schultz, Šiman (88. Kobalc)

Po domjacym dobyću přećiwo Módro-běłym Kulow nastajichu so koparjo Sokoła Ralbicy/Hórki sobotu do Budestec. K faworitej na staflowe dobyće jědźechu chowancy trenarja Chrystofa Gloxyna z wulkim sebjewědomjom, byrnjež z Pětrom Domašku, Měrćinom Kurjatom a Paulom Rachelu hnydom třo wažni akterojo pobrachowali. Za to pak nawróći so kapitan Stani Šewc do zestawy.

Minsk (B/SN). Běłoruski prezident Aleksander Lukašenko je podpěru cyrkwje demokratiskemu hibanju w swojim kraju wospjet raznje kritizował a jej ze sankcijemi hrozył. „Stat njebudźe tomu přihladować“, rjekny Lukašenko. Wosebje katolska cyrkej bě so na stronu wobydlerjow Běłoruskeje stupiła, kiž demonstrowachu přećiwo sfalšowanju prezidentskich wólbow na dobro Lukašenka. Arcybiskop Minska Tadeusz Kondrusiewicz kritizowaše brutalne wobchadźenje wěstotnych mocow z demonstranta­mi.

Chcedźa z Romom rěčeć

Bonn (B/SN). Němska biskopska konferenca chce dwělomne instrukcije přichod katolskich wosadow nastupajo z Vatikanom rozjimać. Předsyda konferency biskop Georg Bätzing chce přiwzać poskitk rozmołwy z klerusowej kongregaciju. Wón chce namjetować rozmołwu z biskopami a lajkami wobstejaceho prezidija synodalneho puća, dokelž su biskopja, měšnicy a lajkojo w instrukciji na samsnej runinje narěčami. Papjera z Vatikana mjez druhim wotpokazuje, zo lajkojo wosady nawjeduja.

Klóšter dóstanje přirost