Z wudaća: pjatk, 08 januara 2021

Pjatk 8. a 9.1.   Onlinowa zymska akademija Smochčanskeho kubłanišća swj. Bena

Pjatk 8.1. 20:30 Onlinowa zhromadźizna Drježdźanskeho towarstwa Stup dale

Wutoru 12.1. 13:30 Serbska rada Braniborskeje w Podstupimje

Sobotu 16.1. 18:00 Prěni onlinowy jolka swjedźeń

Digitalizacija serbšćiny budźe jedna z temow přichodneho hornjoserbskeho telewizijneho magacina Wuhladko jutře, sobotu, w 11.45 hodź. na MDR. Kak daloko Serbja mjeztym hižo na tym polu su, na čim hišće klaca a kak je koronapandemija proces serbskeje digitalizacije wobwliwowała? Wotmołwy na wažne prašenja změje direktor Załožby za serbski lud Jan Budar jako hósć w studiju. Dalša tema januarskeho wudaća budźe Lawski areal w sprjewinym měsće. Je to tuchwilu prózdna městnosć w Budyskim nutřkownym měsće, wo kotrejž so wjele rěči. Tam maja nowy Serbski institut, wobšěrny serbski archiw kaž tež kulturne zetkawanišćo nastać. Kajke pak plany dokładnje wupadaja a štó ma to zapłaćić?

Wodorunje: 3 rozmlěte zorno, 5 napjaty film, 6 dźěl mjezwoča, 7 wjedro, 10 jězor w Finskej, 13 dźěl narodneje drasty, 14 předmjeno žony Gorbačowa, 15 wuprajenje mjez sobu zwisowacych słowow

Padorunje: 1 Sprung serbsce, 2 mało-, 3 ptak, 4 serbski hudźbu­twórc, 8 stolica Tibeta, 9 ma biskop na hłowje, 11 hojenska rostlina a korjenina, 12 rěka přez Mnichow

Byrnjež Jurij Młodźink w Róžeńće dawno hižo wuměnkar był, so wón w swojej šewskej dźěłarni přeco hišće derje čuje, hdyž móže pomhać. Hdys a hdys ludźo hišće k njemu přichadźeja, zo bychu sej črije, tobołu abo křižerski škórń zwuporjedźeć dali. Bohužel je Róžeńčan jedyn z poslednich, kotřiž tele rjemjesło wukonjeja. Zwjetša dźě dźensa lědma hišće něchtó něšto porjedźeć da, ale sej ­na přikład radšo nowe črije kupi. Zo jeho rjemjesło tak spěšnje wotemrěje, sej Jurij Młodźink ženje myslił njeby. Foto: Feliks Haza

Poslednje dny stareho a prěnje dny nowe­ho lěta su na mnohich městnach składnosć, na dźěło minjenych dwanaće měsacow zhladować. Serbske Nowiny rozhladuja so po dwurěčnych komunach, što su tam wšo zdokonjeli.

Njebjelčicy (JK/SN). Zo je Njebjelčanska gmejna jara aktiwna, dźe-li wo to, wožiwić wjesne žiwjenje abo wjeski gmejny na žiwjenjahódne městnosće wukmanić, je daloko a šěroko znate. Tež loni su w tym nastupanju najebać wobmjezowanja koronapandemije dla aktiwni byli. Hižo nalěto stej zaběžałoj iniciatiwa za kubłanje na wsy kaž tež akcija politiskeho kubłanja pod hesłom „Rozmołwa na městnje – Talk vor Ort“, kotruž zhromadnje z Budyskej ludowej uniwersitu a Sakskej krajnej centralu za politiske kubłanje organizuja. Dobre a wjele lubjace za­zběhi wobeju naprawow pak njemóžachu pandemije dla dale wjesć. Kaž wjesnjanosta Tomaš Čornak (CDU) wobkrući, chcedźa, ručež zaso normalita do towaršno­stneho žiwjenja zaćehnje, z akcijomaj pokročować.

W Dźěwinje nowe popłatki za žłobik, pěstowarnju a hort wobzamknyli

Brězowka (AK/SN). Wobě komunalnej dźěćacej dnjowej přebywanišći w gmejnje Dźěwin (Groß Düben) – „Baćonjace hnězdo“ w Brězowce a „Wroblace hnězdo“ w Dźěwinje – po zawrjenju w decembru korony dla nětko zaso dźěłatej. To potwjerdźi wjesnjanosta Helmut Krautz (SPD) na wčerawšim posedźenju gmejnskeje rady. „Wot spočatka lěta wšitke kubłarki zaso dźěłaja. Chcemy wotewrjenske časy ručež móžno rozšěrić, zo móhli starši lěpje planować.“ Tuchwilu maja tam jenož nuzowe zastaranje, kotrež płaći za staršich w powołanjach, za system relewantnych. Zastaranje dźěći z jědźu je zawěsćene. W dalokej měrje stabilne su staršiske popłatki. „Wostanjemy dale pod popłatkami, kotrež w Slepom zběraja“, Krautz wčera podšmórny.

Postajenja kontrolowali

Budyšin/Zhorjelc. Policija je wčera we wokrjesomaj Budyšin a Zhorjelc kontrole nastupajo korona-postajenja přewjedła. Při tym zwěsći 70 přeńdźenjow wukaza. Wjace hač sto zastojnikow bě we wobłuku kontrolow zasadźenych.

Demonstrowacych napominali

Budyšin. Na Budyskim Mosće měra je policija wčera zwěsćiła njepřizjewjene zhromadźenje. Něhdźe 25 wobdźělnikow z transparentami a swěčkami drje měješe nahubnik a dźeržeše so na postajeny wotstawk. Přiwšěm pak wobsteješe podhlad, zo njejsu zakoń wo zhromadźowanju wobkedźbowali.

Dobry wothłós mjez čitarjemi Serbskich Nowin je naša hodowna křižowka našła. Tójšto čitarjow je nam minjene dny prawu wotmołwu „Žohnowane hodowne dny“ připósłało. Z kopicy kartkow a mejlkow je redakciska fortuna slědowacych dobyćerjow wulosowała: Hilger Weisweiler z Tübingena je dobył w Ludowym nakładni­stwje Domowina wušłu knihu „Susodźa“. Nad dobropisom Serbskeje kulturneje informacije w hódnoće 15 eurow smě so Herta Libšowa z Pančic-Kukowa wjeselić. A nasćěnowu protyku Petera Beckera z motiwami z Błótow připósćelemy Guidej Zahrodnikej w Jaseńcy. Wšitke myta dóstanu dobyćerjo přichodne dny z póštu.

Wojerecy. Wosrjedź časa pandemije, hdyž sej poprawom nichtó nihdźe wulećeć njemóže, je turistiski zwjazk łužiskeje jězoriny blisko Wojerowskeho hrodu nowy informaciski kašćik nastajił. Tam móžeš so wo přenocowanskich móžnosćach, wo gastronomiskich poskitkach a wo zajimawostkach regiona wobhonić. Za infokašćik su něhdźe 15 000 eurow wudali. Spočatnje technika hišće prawje dźěłała njeje. Tak bě pokazka na Čornochołmčanski Krabatowy młyn z wobrazom Wojerowskeho centralneho parka garněrowana. Na wobsahach pak turistiski zwjazk wobstajnje dźěła.

Za transport koronapacientow

Fararka na wuměnku Katrin Müller ma bože narodki z 43 krajow

Prosty papjerjany boži narodk ­za hromadufałdowanje je Katrin Müller w dźěćatstwje zwjeselił. Na njón fararka na wuměnku rady spomina. Doma w Nieder Seifersdorfje njedaloko Niskeje pokazuje mi wona 300 božich narodkow z dohromady 43 krajow. Luboznje a kreatiwnje rentnarka małe wuměłstwowe twórby w bywšej kowarni, w „prózdnjeńcy“ a „finskej chěži“ wu­staja. W kóždym božim narodku tči wosebita stawizna wo hodźoch.