Z wudaća: póndźela, 11 januara 2021

Brězowka. Pilni pomocnicy, wobydlerjo a někotři gmejnscy radźićeljo, su tele dny w Brězowce (Halbendorf) zachod na kěrchow runali. Přijězd je nětko tež za tych bjez problemow móžny, kotřiž su z chorobnym stołom po puću. Zdobom su kěrchowske wrota wobarbili. Wjesnja­nosta Helmut Krautz (SPD) dźakowaše so na posedźenju gmejnskeje rady wšěm na akciji wobdźělenym.

Sobuskutkowacy pytani

Pančicy-Kukow. Klóšter Marijina hwězda tuchwilu planuje lětuši klóšterski a swójbny swjedźeń 13. junija přewjesć. Na njón chcedźa přeprosyć zaso regionalne towarstwa, zwjazki, kulturne skupiny a wuměłcow. Ći móža so na jewišću a towarstwowych wikach předstajić. ­Zdobom chcyli přirodowe wiki z wudźěłkami wikowarjow a rjemjeslnikow ­wuhotować. Zajimcy móža so hač do 28. februara na internetnymaj stronomaj www.csb-miltitz.de abo www.marienstern.de přizjewić.

Podpěruja potrěbnych

Ravensburg Towerstars – Łužiske liški Běła Woda 3:5 (2:0, 0:3, 1:2)

Minjenu wutoru běchu so Łužiske lodohokejowe liški na 700kilometerski puć do Ravensburga njedaloko Bodamskeho jězora podali. Hišće před dwěmaj tydźenjomaj běchu woni doma přećiwo mustwu z Badensko-Württembergskej přěhrali. Za dalšej poražku wupadaše tež minjenu wutoru po prěnjej třećinje hry. Wšako dyrbjachu Liški hižo po 35 sekundach prěnje přećiwniske wrota přijimać. Třělwa z distancy dźěše do wrotow Mac Carrutha. Po dalšich šansach na woběmaj bokomaj čaka­chu Běłowodźenjo po dołhim pasu domjacych poprawom na signal sudnika, kiž dyrbješe icing spó­znać (podobnje k nimohrě w kopańcy). Sudnik pak njereagowaše, a tak steješe přećiwniski hrajer samlutki před Carruthom a suny puk k 2:0 do wrotow. Hóstni lodohokejisća mějachu najskerje hišće ćežke nohi po dołhej busowej jězbje.

Biatlonowy Mekka Oberhof ma prěni swětowy cup 2021 za sobu a steji před přichodnym, kotryž započnje so zajutřišim, srjedu, z dalšim sprintom­ muži. Prěnje sprintowe wubědźowanje minjeny pjatk staj Tiril Eckhoff a Johannes Thingnes Bø (wobaj Norweg­ska) doby­łoj. Mjeztym zo móžeše so Eckhoff tež w přesćěhanju žonow přesadźić, doby pola muži Norwega Sturla Holm Lægreid. We wčerawšej měšanej stafli bě wubranka Ruskeje jako prěnja do cila dojěła, a měšanu staflu jednotliwcow doby Franco­ska dwójka ­Julia Simon/Emilien Jacquelin. Foto: Martin Volkmar

Awtor dźensa Toni Ryćer

W swojej prěnjej kolumnje lěta 2020 rozprawjach hižo spočatk februara wo prěnich změnach mjezynarodneho motorsportoweho kalendra. Rozšěrjaceje koronapandemije w Chinje dla pak su tamniši běh formule E wotpra­jili, kotryž bě w měrcu planowany. Tehdy njemóžach sej předstajić, kajke hoberske sćěhi pandemija w dalšim wuwiću změje. Tak informowach wo dalšich motorsportowych ter­minach, wosebje wo tych, kotrež chcychu w našej bliskosći přewjesć. Nimale wšitke terminy dyrbjachu wotprajić abo přepo­łožić. Wosebje mjeńše zarjadnišća běchu ćežko po­trjechene, dokelž pobrachowachu jim tak zdobom za dalše dźěło a wobstaće towarstwow nimoměry wažne dochody. Tak so na přikład we Wuhančicach-Koblicy, hdźež přewjeduja w nor­mal­nych lětach němske a europske mišterstwa w awto­crossu, žane koła njewjerćachu. Tež na motocrossowej čarje w Jaworje bě jara měrne. A samo MotoGP na Sakskim kole dyrbjachu w juniju wotprajić. Sym sej wěsty, zo so tale wurjadna sezona na aktualne lěto a dalše lěta wuskutkuje.

Kaž wšitke towarstwa njemóže tež serb­ska­ koparska wubranka młodźiny D tučas­nje trenować a hrać. Po přećelskej hrě loni w septembru chcychu w decembru halowy trening w Ralbicach přewjesć a so na turněrje w Drježdźanach wobdźělić. Wobaj terminaj pak njehodźeštej so koronapandemije dla zwoprawdźić. Tak je so lěto 2020 z wida dźěćaceje wubranki bohužel dočasnje zakónčiło. To wosebje koparki a koparjow přesłapja. Wšako so stajnje wjesela, za serbske barby za bulom honić.

Berlin (B/SN). Němska kanclerka Angela Merkel a zwjazkowy prezident Frank-Walter Steinmeier chwalitaj sej lětuše ­widejowe poselstwo hwězdnych spěwarjow a so jim po samsnym puću dźa­kujetaj. „Činiće něšto cyle drohotneho, za­sadźeće so za druhich. Pomhaće ludźom, kotrymž so špatnišo dźe, dźěćom z chudšich krajow, dźěćom, kotrež maja bědne žiwjenje“, praji zwjazkowy pre­zident. ­Wokoło Třoch kralow ćahnu hwězdni spěwarjo poprawom dom wot domu a zbě­raja pjenjezy. Pandemije dla to tónkróć móžno njeje. Wot lěta 1959 je so­ tale­ pomocna akcija na najwjetšu swěta wuwiła. Na njej wobdźěla so po cyłej­ Němskej stajnje něhdźe 300 000 dźěći a młodostnych. Wot spočatka akcije nazběrachu tak 1,19 miliardow eurow za 75 600 projektow.

Póstny čas a prawidła