Z wudaća: srjeda, 17 februara 2021

srjeda, 17 februara 2021 13:00

Krótkopowěsće (17.02.21)

Wirus mutěrował

Budyšin. Budyski wokrjes je wčera w zwisku z koronawirusom wo jědnaće natyknjenjach a wo dalšich pjeć k cyłkownje 580 smjertnym padam rozprawjał. Z 263 schorjenych (-36) lěkuja 26 (+5) w chorowni. Incidenca tu wučinješe 85,66. Mjez 32 nowoinfekcijemi wčera w Zhorjelskim wokrjesu jedna so w jednym padźe wo dalšu mutaciju wirusa. 13 pacientow je zemrěło. Incidenca tam bě 87,45.

Žana politiska popjelna srjeda

Drježdźany/Budyšin. Tradicionalna politiska popjelna srjeda sakskeje CDU dźensa wječor w Budyšinje koronapandemije dla wupadnje. „Wotpowědujo kře­sćansko-židowskemu wodźacemu wo­brazej zasadźam so za solidarisku towaršnosć. To mje zawjazuje swojich blišich po wšěch móžnosćach škitać“, je serbski zapósłanc krajneho sejma Marko Šiman wčera wotprajenje wopodstatnił.

Dalša wirtuelna serbska bjesada

wozjewjene w: Krótkopowěsće
srjeda, 17 februara 2021 13:00

Poskitk jara derje přiwzaty

Ličba wikowarjow, kiž click&collect poskićuja, so dale rozšěrja

Budyšin (SN/BŠe). Drobnowikowarjo sej to dawno žadaja. Nětko skónčnje je sakske knježerstwo woteběraceje ličby koronainfekcijow dla tak mjenowany „click & collect“ dowoliła. To woznamjenja, zo smědźa sej kupcy swoje twory telefonisce abo internetnje skazać a we wobchodach wotewzać. Tež w Budyšinje so lisćina wobdźělenych drobnowikowarjow dale a bóle rozšěrja. Nutřkoměšćanske towarstwo wikowarjow a předewzaćow na­mołwja so přizjewić, zo móhło jednotnu prezentaciju wšitkich wobdźělnikow zhotowić a za nju wabić. Widźomnu akciju wšak je towarstwo hižo z komunalnej wobdźělenskej a wobhospodarjenskej towaršnosću (BBB) a ze zamołwitymi sprjewineho města zwoprawdźiło a minjeny tydźeń baner kampanje „Regionalnje nakupować“ na Budyskim Mosće měra připrawić dało. Nimo namołwy, w regionje nakupować, skedźbnjeja akterojo zdobom na poskitk click&collect.

wozjewjene w: Hospodarstwo
srjeda, 17 februara 2021 13:00

Kreibich-Nawka interne nadawki přewozmje

Budyšin (SN/JaW). Tuchwilna intendantka Serbskeho ludoweho ansambla (SLA) Judith Kubicec jeničku serbsku profesionelnu kulturnu instituciju definitiwnje wopušći (SN informowachu). To je direktor Załožby za serbski lud Jan Budar na naprašowanje našeho wječornika hišće raz wobkrućił. Nimo toho Budar na wčerawšej zawodnej zhromadźiznje w SLA sobudźěłaćerjam institucije dalše kročele w naležnosći rozłoži. Kaž z nowinskeje zdźělenki załožby wuchadźa, přewozmje hač k wotchadej Kubicec 31. julija a tak „hač do kónca hrajneje doby zastupjer intendantki Tomaš Kreibich-Nawka najwažniše interne nadawki“. Při tym ma so wón ­z intendantku­ wusko wothłosować.

wozjewjene w: Kultura
srjeda, 17 februara 2021 13:00

Z roboterami wuknyć

Kak robotery jako wučbny srědk wužiwać – to rozjimaštaj Michał Cyž ze Sakskeho wukubłanskeho a wuwiwanskeho kanala (SAEK) a informatikar Wito Bejmak we wobłuku zhromadnje z Techniskej uniwersitu Drježdźany wuhotowaneho webinara. Nimo toho namjetowaštaj wutworić skład, spřistupnjacy šulam wotpowědnu techniku.

Budyšin (SN/bn). „Kawsalnje myslić móc je bytostna tema přichoda“, Wito Bejmak wčerawše zarjadowanje zahaji. Tónle kognitiwny proces hodźał so z pomocu roboterow spěchować, kaž informatikar na přikładźe modela „B-Bot“ pokaza. „Šulerjo móža jón sami programěrować, tak zo je kmany nadawki spjelnić, kotrychž kompleksita je naposledk njewobmjezowana. Tak wuknjacym na zabawne wašnje zmóžnjamy so z techniku rozestajeć. Zdobom polěkujemy logiskemu myslenju, koordinaciji a orientaciji.“

wozjewjene w: Kubłanje
srjeda, 17 februara 2021 13:00

Davidová swětowa mišterka

Po štyrjoch lětach čakanja ma Čěska skónčnje zaso swětowu mišterku w biatlonje. Markéta Davidová je wčera w słowjenskej Pokljuce wubědźowanje jednotliwcow na distan­cy 15 kilometrow před Šwedowku Hannu Öberg a Norwegowku Ingrid Landmark Tandrevold dobyła. Nowa swětowa mišterka wosta wšitke štyri razy na třěl­nišću bjez zmylka. To drje bě so Galinje Wišnjewskej z Kazachstana tež poradźiło, Čechowka pak bě na běžkach spěšniša. W lěće 2017 bě sej bywša čěska biatlonowa hwězda Gabriela Koukalová na swětowych mišterstwach w awstriskim Hochfilzenje tři medalje wuwojowała: złoto w sprinće, slěbro we wubědźowanju jednotliwcow a bronzu w přesćěhanju. Čitajće tež na stronje 3. Foto: Petr Slavík

wozjewjene w: Sport
srjeda, 17 februara 2021 13:00

FUEN fotowu protyku wudała

Flensburg (SN/CoR). Federalistiska unija europskich narodnych mjeńšin (FUEN) je fotowu protyku mjeńšin 2021 wudała. Kalender ma powšitkownemu směrej FUEN słužić, „mjeńšiny a jich naležnosće widźomniše činić“ a za to poskićeć „rumy, w kotrychž je móžno so zetkać a tamneho rozumić“. Z mjeńšinowej protyku chce FUEN wjetšej zjawnosći tajki rum spřistupnić. Kóžde lěto chce so kalender jednomu z mnohich aspektow kulturneho žiwjenja wěnować, kotrež wobwliwuje identitu mjeńšinowych zhromadźenstwow. Za lěto 2021 předstaja narodnu drastu wu­zwolenych mjeńšin, štož njebě hladajo na wšelakorosć wariantow w zhromadźenstwach „žadyn lochki nadawk“. Pokazuja drastu Sewjernych Frizow w Němskej, Madźarow w Słowakskej, Lezginow w Ruskej, Słowakow w Madźarskej, Madźarow w Rumunskej, Katalanow w Španiskej, Słowjanow ­w Italskej, Elsasko-Lothringow w Francoskej, Němcow w Pólskej, Serbow w Němskej a Mariupolskich Grjekow na Ukrainje. Zajimcy móža sej fotowu protyku mjeńšin 2021 na internetnej stronje FUEN wubhladać a skazać.

wozjewjene w: Kultura
srjeda, 17 februara 2021 13:00

Von der Leyen ma plan

Brüssel (dpa/SN). Po raznej kritice pobrachowaceho šćěpiwa přećiwo koronawirusej dla je prezidentka komisija EU Ursula von der Leyen dźensa swoje plany w boju přećiwo wirusej rozłožiła. Tak chce w prěnim rjedźe přećiwo rozšěrjacym so wariantam wirusa postupować. Zaměr je, ručež móžno lěk přećiwo mutacijam wuwić kaž tež produkciju a zasadźenje šćěpiwa po skrótšenym puću dowolić. Za to chce von der Leyen europsku syć za kliniske testowanja załožić.

Japanska šćěpjenje zahajiła

Tokio (dpa/SN). Ani šěsć měsacow do planowaneho zahajenja Olympiskich lětnich hrow w Tokiju su nětko tež w Ja­panskej započeli, ludźi pře koronawirus šćěpić. Najprjedy maja sobudźěłaćerjo strowotnistwa serum firmy Biontech/Pfizer dóstać. Wot apryla su ludźo, starši hač 65 lět, na rjedźe. Ministerski pre­zident Yoshihide Suga dyrbi sej krizo­weho managementa dla wjele kritiki ­lubić dać. Mjeztym mnozy dwěluja, hač so olympiske hry w lěću scyła přewjesć hodźa.

ESA pyta astronawtow

wozjewjene w: Kraj a swět
Twarc elektroawtow z USA Tesla njesmě lěs za swoju nowu fabriku w Grünheidźe pola Berlina dale trjebić a dyrbi najprjedy raz dźěła zastajić. Kaž je wyše zarjadniske sudnistwo Berlin-Braniborska wobzamknyło, njesmě Tesla we wěstych nakromnych ­wobłukach płonin škita družin płótnych ješćelcow dla štomy pušćeć. Přirodoškitny zwjazk Nabu na tym wobstawa, dalšeho ­trjebjenja za gigafabriku so wzdać. Foto: pa/Sebastian Gabsch

wozjewjene w: Kraj a swět
srjeda, 17 februara 2021 13:00

To a tamne (17.02.21)

Bosy je policist w Zhorjelcu kołpjej pomhał, kotryž w lodźe tčeše. Wobydlerjo běchu policiju wołali, dokelž bě ptak w jězoru zamjerznył a njemóžeše sej hižo sam pomhać. Zastojnik, kiž so w swobodnym času sam w zamjerznjenych hatach kupa, wuzu sej črije a nohajcy, dźěše na hat, roztepta lód wokoło strachoćiweho kołpja a jeho wuswobodźi. Spočatnje trochu chabłacy tón skónčnje wotleća.

Woda kofejoweje mašiny je woheń w jednym z hosćencow badensko-württembergskeho Plochingena zhašała. Kaž w policajskej rozprawje steji, je so plastowe sudobjo za wotpadki zapaliło, po tym zo bě něchtó zbytki z popjelnika do njeho ćisnył. Płomjenja zeškrěchu hadźicu, kotraž kofejowu mašinu z wodu zastaruje. Na to so woda wuliny a płomjenja podusy. Škoda wosta z 500 eurami poměrnje snadna.

wozjewjene w: To a tamne
srjeda, 17 februara 2021 13:00

Njeliča z dalšimi haćenjemi

Pirna (dpa/SN). Na němsko-čěskimaj namjeznymaj přechodomaj na A 17 a B 174 njeliča hižo z dalšimi wobchadnymi haćenjemi raznišich kontrolow dla. Kaž rěčnik zwjazkoweje policije w Pirnje zdźěli, je so wobchad na mjezy mjeztym normalizował. Haćenja su nastali, dokelž běchu so pućowacy na městnje na koronawirus testować dali – nic kontrolow policije dla. „Zdawa so, zo su pućowacy nětko na předpisy nastupajo zapućowanje do Němskeje přihotowani“, praji rěčnik policije. Přiwšěm móhli hišće problemy nastać, hdyž so w běhu dnja w hórskich kónčinach tola hišće sněži.

wozjewjene w: Kraj a swět

Serbska debata

nowostki LND